གྲོང་ཨུད་འགོ་ཁྲིད་ཧྲན་ཆང་དང་ཨན་ཤིན་གོ་གཉིས་བརྟག་ཞིབ་ནང་ལྷན་དུ་ཞུགས་པ་རེད།
འདི་ནི་ལི་ཧྥུའུ་ཀྲུང་གིས་གྲོང་ཁྱེར་ཆུ་བེད་ཅུད་དུ་བསོད་ནམས་དཀར་ཁུང་རྣམ་གྲངས་འཛུགས་སྐྲུན་དང་། གྲོང་གསེབ་ཀྱི་ཆུ་མཁོ་འདོན་བདེ་འཇགས། མཚོ་དཔོན་དང་ཆུ་དཔོན་ལམ་ལུགས་སོགས་ལས་དོན་སྤེལ་ཚུལ་ལ་བརྟག་ཞིབ་དང་ཤེས་རྟོགས་གནང་བཞིན་པ།
ས་ཆ་གང་དུ་སླེབས་ཀྱང་ལི་ཧྥུའུ་ཀྲུང་གིས་སྙན་ཞུ་ཉན་པ་དང་། སྡེ་ཚན་ཁག་ཏུ་སྐྱོད་པ། གནས་ཚུལ་ཞིབ་ཕྲ་འདྲི་བ་བཅས་ཀྱི་ཐོག་ནས་ལས་བྱེད་ལས་བཟོར་བྱམས་བརྩེའི་ངང་གཟིགས་པ་དང་འབྲེལ་ཚང་མའི་ལས་ཀ་དང་འཚོ་བའི་སྐོར་བཀའ་འདྲི་ཡང་གནང་བ་རེད།
གྲོང་ཁྱེར་ཆུ་བེད་ཅུད་དུ་ཕེབས་སྐབས་ལི་ཧྥུའུ་ཀྲུང་གིས་བསོད་ནམས་དཀར་ཁུང་རྣམ་གྲངས་འཛུགས་སྐྲུན་དང་། གྲོང་གསེབ་ཀྱི་འཐུང་ཆུའི་བདེ་འཇགས། ཆུ་དཔོན་དང་མཚོ་དཔོན་ལམ་ལུགས་སོགས་ཀྱི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་རེད། ཁོང་གིས་ཧུར་ཐག་སྒྲུབ་པ་དང་། རང་འགུལ་ངང་སྦྲེལ་མཐུད་བྱེད་པ། སྤྱི་འདོམས་མཐུན་སྦྱོར་ལ་ཤུགས་སྣོན་རྒྱག་པ། དཀའ་གནད་ཧུར་ཐག་སེལ་བ། རྣམ་གྲངས་དོན་འཁྱོལ་གཞིས་ཆགས་ལ་མགྱོགས་མྱུར་སྐུལ་འདེད་གཏོང་བ་བཅས་བྱས་ནས་བསོད་ནམས་དཀར་ཁུང་རྣམ་གྲངས་དེ་སྐྱེ་ཁམས་འདུ་འགོད་དང་དམངས་ཕན་འདུ་འགོད་ཅིག་ཏུ་ཧུར་ཐག་བསྐྲུན་དགོས། ཚད་གཞི་མཐོ་བ་དང་དམིགས་ས་མཐོ་བའི་ཐོག་ནས་གྲོང་གསེབ་ཀྱི་ཆུ་མཁོ་འདོན་འགན་ལེན་ལས་གྲྭ་འཆར་འགོད་དང་འཛུགས་སྐྲུན་བྱས་ཏེ་གྲོང་གསེབ་ཀྱི་ཆུ་མཁོ་འདོན་འགན་ལེན་གྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས། ཆུ་དཔོན་དང་མཚོ་དཔོན་ལམ་ལུགས་ཀྱི་འགན་འཁྲི་ཁྱོན་ཡོངས་ནས་དོན་འཁྱོལ་བྱས་ཏེ་དངོས་ཐོག་བདེན་འཚོལ་དང་འགན་འཁུར་ཕོད་པ། གནད་དོན་ལ་ཞིབ་འཇུག་དང་ཐག་གཅོད་ནན་ཏན་བཅས་བྱས་ཏེ་ཆུ་བོ་དང་མཚེའུ་ཡི་དོ་དམ་སྲུང་སྐྱོང་གི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས་པའི་ནན་གསུང་གནང་།
ལི་ཧྥུའུ་ཀྲུང་གིས་གྲོང་ཁྱེར་རང་བྱུང་ཐོན་ཁུངས་ཅུད་གཏེར་ཁའི་ཐོན་རྫས་འགྲེམས་ཁང་དང་རི་ཆུའི་རྣམ་གྲངས་ཀྱི་གྲངས་གཞི་ཆེན་པོའི་ལས་སྟེགས་ལྟེ་གནས་སུ་ཕེབས་ཏེ་གཏེར་ཁའི་ཐོན་ཁུངས་འཆར་འགོད་བེད་སྤྱོད་དང་སྐྱེ་ཁམས་སྲུང་སྐྱོང་དང་ཉམས་གསོའི་རྣམ་གྲངས་ལག་བསྟར་བྱས་ཚུལ་ལ་བརྟག་ཞིབ་དང་ཤེས་རྟོགས་གནང་བ་རེད། ཁོང་གིས་གཏེར་ཁའི་ཐོན་ཁུངས་གསར་སྤེལ་དང་བེད་སྤྱོད་བྱེད་རྒྱུ་ཚད་ལྡན་ནན་པོ་བཟོས་ནས་ལྟ་སྐུལ་དོ་དམ་བྱེད་རྒྱུར་ཤུགས་སྣོན་བརྒྱབ་སྟེ་གཏེར་ཁའི་བདེ་འཇགས་འགན་ལེན་ཐུབ་པ་བྱེད་དགོས། རྒྱལ་ཁབ་ཀྱི་མངའ་ཁོངས་བར་སྟོང་འཆར་འགོད་མ་ལག་སྔར་བས་འཐུས་ཚང་དུ་བཏང་ནས་རྨོ་ཞིང་སྲུང་སྐྱོང་གི་དམར་ཐིག་བརྟན་སྲུང་མཐའ་གཅིག་ཏུ་བྱེད་དགོས་པའི་ནན་གསུང་གནང་།
གྲོང་ཁྱེར་ཞིང་ལས་དང་གྲོང་གསེབ་ཅུད་དུ་ལི་ཧྥུའུ་ཀྲུང་གིས་གྲོང་ཁྱེར་ཡོངས་ཀྱི་ཞིང་ལས་ཐོན་སྐྱེད་དང་དབུལ་ལོག་སྔོན་འགོག་ལས་དོན་སྤེལ་ཚུལ་ཤེས་རྟོགས་ནན་ཏན་གནང་རྗེས་ཁོང་གིས། དབུལ་ལོག་སྔོན་འགོག་གི་ལྟ་ཞིབ་ཚད་ལེན་དང་རོགས་སྐྱོར་ལམ་སྲོལ་ལ་སྔར་བས་ཤུགས་སྣོན་རྒྱག་པ་དང་རོགས་སྐྱོར་བྱ་ཐབས་དོན་འཁྱོལ་ལ་ཤུགས་སྣོན་བརྒྱབ་ནས་གཞི་ཁྱོན་རང་བཞིན་གྱི་དབུལ་ལོག་མི་ཐོན་པའི་འགན་ལེན་བྱེད་དགོས། ཐོན་ཁུངས་ཀྱི་སྤུས་ཚད་ལ་གཞི་ཚུགས་ནས་ཞིང་ཕན་སྲིད་ཇུས་ཁག་དོན་འཁྱོལ་ཡག་པོ་བྱེད་པ་དང་རྩལ་ནུས་གསོ་སྦྱོང་ལ་ཤུགས་སྣོན་བརྒྱབ་ནས་མང་ཚོགས་ཀྱི་ཡོང་འབབ་རྒྱུན་ཆད་མེད་པར་མཐོ་རུ་གཏོང་དགོས། ཆ་རྐྱེན་ལ་མི་ལྟ་བར་དཀའ་ངལ་ཁྱད་བསད་ཀྱིས་ཞིང་ལས་དང་འབྲེལ་བ་ཡོད་པའི་ཁྱབ་ཁོངས་ཀྱི་སྐོར་ཞིབ་ལན་ཆའི་གནད་དོན་བཅོས་སྒྲིག་མཐའ་གཅིག་ཏུ་བྱས་ནས་ཐབས་བརྒྱ་ཇུས་སྟོང་ངང་ལོ་འཁོར་གྱི་དམིགས་ཚད་ལས་འགན་ལེགས་སྒྲུབ་བྱེད་དགོས་པ་བཅས་ཀྱི་ནན་བཤད་གནང་།
བརྟག་ཞིབ་གནང་རིང་། ལི་ཧྥུའུ་ཀྲུང་གིས་གྲོང་ཁྱེར་ཆུ་བེད་ཅུད་དང་། རང་བྱུང་ཐོན་ཁུངས་ཅུད། ཞིང་ལས་དང་གྲོང་གསེབ་ཅུད་བཅས་ཀྱི་ཚན་ཁག་གི་ཁོངས་མི་དང་བཞུགས་མོལ་གནང་བ་དང་། ལས་དོན་སྤེལ་ཚུལ་གྱི་སྙན་ཞུ་གསན་པ། ལས་དོན་ཁག་ལ་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ། གོམ་སྟབས་རྗེས་མའི་ལས་དོན་ཐད་བླང་བྱ་གསལ་པོ་བཏོན་གནང་བ་རེད། ཁོང་གིས་ཆབ་སྲིད་ཀྱི་ལངས་ཕྱོགས་མཐོ་རུ་བཏང་ནས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་བླངས་ཏེ“འདུ་ཤེས་བཞི”ཟབ་ཏུ་གཏོང་བ་དང་། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བཅས་བྱས་ནས་ཞི་ཅིན་ཕིང་གི་དཔལ་འབྱོར་དགོངས་པ་དང་ལྷག་པར་དུ“ཞིང་གསུམ”ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་། བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན། དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་སློབ་སྦྱོང་ཡག་པོ་དང་གོ་བ་ཡག་པོ་བླངས་ཏེ། ཏང་ཀྲུང་དབྱང་དང་ལྗོངས་ཏང་ཨུད་ཀྱིས“ཞིང་གསུམ”ལས་དོན་ལ་བཏོན་པའི་བླང་བྱ་གསར་པ་ཁོང་དུ་ཡང་དག་ཆུད་པ་བྱས་ཐོག་ཆབ་སྲིད་ལ་སྣང་ཆེན་བྱེད་པའི་ཕན་འབྲས་དེ“ཞིང་གསུམ”ལས་དོན་སྤུས་ཚད་མཐོ་པོའི་སྒོ་ནས་གོང་འཕེལ་གཏོང་བའི་བྱ་སྤྱོད་དངོས་དང་ཞིབ་ཕྲའི་ཕན་འབྲས་ཐོག་ནས་མངོན་ཐུབ་པ་བྱེད་དགོས།
ལི་ཧྥུའུ་ཀྲུང་གིས་བླང་བྱ་བཏོན་དོན། “ཞིང་གསུམ”ལས་དོན་ཡག་པོ་སྒྲུབ་པའི་འགན་འཁྲིའི་བསམ་པ་དང་ཁ་ཚ་དགོས་གཏུགས་ཀྱི་བསམ་པ་ཆེ་རུ་གཏོང་བ་དང་འབྲུ་རིགས་བདེ་འཇགས་དང་། ཐོན་ལས་འཕེལ་རྒྱས། གྲོང་གསེབ་དར་རྒྱས། མང་ཚོགས་འབབ་འཕར། གྲོང་གསེབ་བཅོས་སྐྱོང་སོགས་ཐད་ཀྱི་ཁ་བཤོ་འབིགས་ས་དང་ཤུགས་འདོན་ས་མ་ནོར་བ་བྱས་ཏེ“ཐོན་ལས་སྟོབས་ཆེར་གཏོང་བ་དང་། གྲོང་གསེབ་དར་རྒྱས་གཏོང་བ། འབབ་འཕར་ལ་སྐུལ་འདེད་གཏོང་བ”བཅས་ཀྱི་ཐད་ཤུགས་སྣོན་རྒྱག་དགོས། འབྲུ་རིགས་བདེ་འཇགས་ཀྱི་རྨང་གཞི་བརྟན་དུ་གཏོང་བ་དང་། རྨོ་ཞིང་སྲུང་སྐྱོང་ལ་ཤུགས་སྣོན་རྒྱག་པ། རྨང་གཞིའི་སྒྲིག་བཀོད་སྟོབས་ཆེར་གཏོང་བ། མ་དངུལ་སོགས་གཏོང་ཤུགས་ཆེ་རུ་གཏོང་བ་བཅས་བྱས་ནས་ཞིང་ཕྱུགས་ཐོན་རྫས་མཁོ་སྤྲོད་བྱེད་ནུས་ཟམ་མི་ཆད་པར་ཆེ་རུ་གཏོང་དགོས། གྲོང་གསེབ་ཀྱི་ཐོན་ལས་གོང་འཕེལ་དང་སྟོབས་ཆེར་བཏང་ནས་ས་མཐོའི་རྒུན་འབྲུམ་དང་སྡོང་ཐུང་ཀུ་ཤུ་སོགས་ས་མཐོའི་ཁྱད་ལྡན་ཞིང་འབྲོག་ལས་སྟོབས་ཆེར་གཏོང་དགོས། མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བྱེད་མགྱོགས་སུ་གཏོང་བ་དང་། འཕེལ་རྒྱས་ཀྱི་འཆར་འགོད་བཟོ་མགྱོགས་སུ་གཏོང་བ། གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་ལ་སྤྱི་འདོམས་བྱེད་པ། རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་རྒྱག་པ་བཅས་བྱས་ནས་སྡོད་མལ་ཁོར་ཡུག་བཅོས་སྒྲིག་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་དགོས། མང་ཚོགས་ཀྱི་ཡོང་འབབ་རྒྱུན་མཐུད་ངང་མང་དུ་གཏོང་བ་དང་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་ཡག་པོ་བཏང་ནས་རྒུད་གསབ་ལས་སྤྲོད་སོགས་ཀྱི་ལས་དོན་སྤེལ་ཤུགས་ཆེ་རུ་གཏོང་དགོས། གྲོང་གསེབ་བཅོས་སྐྱོང་ལ་ཤུགས་སྣོན་བརྒྱབ་སྟེ་གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱེད་དགོས་པ་དང་། གྲོང་གསེབ་བཅོས་སྐྱོང་མ་ལག་འཐུས་ཚང་དུ་གཏོང་བ། “ཏང་འཛུགས་སྐྱོང་དང་། དྲ་རྒྱ། གྲངས་འཛིན་བཅོས་སྐྱོང་བཅས་ཟུང་དུ་འབྲེལ་བའི”རྣམ་པ་ཁྱབ་གདལ་བེད་སྤྱོད་ཡག་པོ་བྱེད་པ། སྤྱི་ཚོགས་ཀྱི་འགལ་བ་དང་རྩོད་གཞི་སྣ་ཚོགས་སྔོན་འགོག་དང་འདུམ་འགྲིག་ཐག་གཅོད་བྱེད་པའི་ལམ་སྲོལ་འཐུས་ཚང་དུ་གཏོང་བ་བཅས་བྱས་ནས་གཞི་རིམ་སྤྱི་ཚོགས་ཞི་མཐུན་བརྟན་ལྷིང་ལ་སྲུང་སྐྱོང་ཏན་ཏིག་བྱེད་དགོས།
ལི་ཧྥུའུ་ཀྲུང་གིས་ནན་བཤད་གནང་དོན། ཏང་གིས“ཞིང་གསུམ”ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུར་ཤུགས་སྣོན་རྒྱག་པ་དང་། ལས་དོན་གལ་ཆེན་དགོངས་སྐོར་སྙན་ཞུའི་ལམ་ལུགས་ལག་བསྟར་ནན་པོ་བྱེད་པ། ཞིང་སྐྱོར་ཞིང་དར་འགན་ལེན་གྱི་ལས་ཀའི་ལམ་སྲོལ་འཐུས་ཚང་དུ་གཏོང་བ། ཏང་ཀྲུང་དབྱང་གིས་གནང་བའི་དམིགས་བསལ་གཟིགས་སྐྱོང་སྲིད་ཇུས་གང་ལེགས་སྤྱོད་པ། ཞིང་འབྲོག་ལས་དང་ཞིང་འབྲོག་ཁུལ་སྔོན་ལ་འཕེལ་རྒྱས་གཏོང་བའི་སྲིད་ཇུས་འཐུས་ཚང་དུ་གཏོང་བ། སྤྱོད་ཚུལ་མུ་མཐུད་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པ་བཅས་ཀྱི་ཐོག་ནས། “ཞིང་གསུམ་”ལས་དོན་སྐས་རིམ་གསར་པ་ཞིག་ཏུ་སླེབས་པར་རྒྱུན་ཆད་མེད་པར་སྐུལ་འདེད་གཏོང་དགོས་པ་བཅས་སོ།།
བསོད་ནམས་བསྟན་པས་བསྒྱུར། བསོད་ཡེ་བདེས་ཞུས།
ཡོང་ཁུངས། ལྷོ་ཁའི་བོད་ཡིག་ཚགས་པར།
འགན་འཁུར་རྩོམ་སྒྲིག་པ། བསོད་ནམས་བསྟན་པ།
ལག་བསྟར་རྩོམ་སྒྲིག་པ། ཡེ་ཤེས་བཟང་མོ།
ཞུ་དག བསོད་ནམས་དོན་གྲུབ། བདེ་སྐྱིད་དཔལ་སྒྲོལ།
