ལི་ཧྥུའུ་ཀྲུང་གིས་གོང་དཀར་རྫོང་དུ་རྟོག་ཞིབ་གནང་བ།

     སྲིན་པོ་རི་སློབ་འབྲིང་དུ། ལི་ཧྥུའུ་ཀྲུང་གིས་སློབ་མའི་ཟ་སྡོད་ཀྱི་གནས་ཚུལ་ལ་རྟོག་ཞིབ་ཞིབ་ཕྲ་གནང་ཞིང་། ཁོང་གིས་ནན་བཤད་གནང་དོན། ཏང་གི་སློབ་གསོའི་མཛད་ཕྱོགས་ཁྱོན་ཡོངས་ནས་ལག་བསྟར་བྱེད་དགོས་པ་དང་། སྤྱོད་བཟང་དང་མི་སྣ་གསོ་སྐྱོང་བྱེད་པའི་རྩ་བའི་ལས་འགན་དོན་འཁྱོལ་བྱས་ཏེ། ཀུན་སྤྱོད་དང་ཤེས་རིག  ལུས་རྩལ།  མཛེས་རིག། ངལ་རྩོལ་བཅས་ཁྱོན་ཡོངས་ནས་འཕེལ་རྒྱས་ཡོང་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་དགོས། སློབ་གྲྭའི་བདེ་འཇགས་དྲིལ་བསྒྲགས་བྱེད་ཤུགས་ཆེ་རུ་གཏོང་དགོས་པ་དང་། སློབ་གྲྭའི་བཟའ་བཅའི་བདེ་འཇགས་ཀྱི་ལྟ་སྐུལ་དོ་དམ་དང་རྒྱུན་གཏན་གྱི་དོ་དམ་ལ་ཤུགས་སྣོན་རྒྱག་པ། དགེ་རྒན་གྱིས་སློབ་མས་ཁ་ལག་ཟ་སྐབས་མཉམ་དུ་བསྡད་ནས་ལྟ་སྡོམ་བྱེད་པ་དང་། ལྟོ་ཆས་ཀྱི་དཔེ་ཕུད་འཇོག་པ་སོགས་ཀྱི་ལམ་ལུགས་དོན་འཁྱོལ་ནན་པོ་བཅས་བརྒྱུད་སློབ་གྲྭའི་བཟའ་བཅའི་བདེ་འཇགས་འགན་ལེན་བྱེད་དགོས།

   གོང་དཀར་གནམ་ཐང་ཉེ་འཁོར་གྱི་ལྷོ་བྱང་རི་བོའི་སྔོ་འགྱུར་ལས་གྲྭའི་རྣམ་གྲངས་ཁུལ་དུ། ལི་ཧྥུའུ་ཀྲུང་གིས་འགྲེམས་པང་ལ་གཟིགས་པ་དང་། ངོ་སྤྲོད་གསན་པ། འཕེལ་རིམ་བཀའ་འདྲི་བཅས་གནང་བ་མ་ཟད། ས་ཡུལ་དངོས་ནས་ལྕང་སོན་སྐྱེས་ཚུལ་ལ་གཟིགས་ཀྱིན་ནགས་བཟོ་སྔོ་འགྱུར་ལས་གྲྭའི་ཞིབ་ཕྲའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་། ལས་གྲྭའི་སྤུས་ཚད་ལ་གདེང་འཇོག་ཀྱང་གནང་བ་རེད། ཁོང་གིས། ལྷོ་བྱང་རི་བོའི་སྔོ་འགྱུར་ལས་དོན་སྤེལ་རྒྱུ་ནི་རང་སྐྱོང་ལྗོངས་ཏང་ཨུད་ཀྱིས་ཞི་ཅིན་ཕིང་གི་སྣོད་བཅུད་ཤེས་དཔལ་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། རྒྱལ་ཁབ་ཀྱི་སྣོད་བཅུད་བདེ་འཇགས་སྲུང་ཡོལ་བརྟན་དུ་གཏོང་བ། རྒྱལ་ཁབ་ཀྱི་སྣོད་བཅུད་ཤེས་དཔལ་གྱི་མཐོ་ས་གཏོད་པའི་བཀོད་སྒྲིག་གལ་ཆེན་ལ་དམིགས་པ་ཞིག་ཡིན་པས་ང་ཚོས“རི་བོ་གཉིས”ཀྱི་འདུ་ཤེས་བརྟན་པོ་འཛུགས་པ་དང་། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ། ལས་ཀའི་འགན་འཁྲི་ཏན་ཏིག་འཁུར་བ། དོན་དངོས་ཀྱི་གནས་ཚུལ་དང་ཟུང་འབྲེལ་བཅས་བྱས་ཏེ་རང་བྱུང་སླར་གསོ་གཙོ་བོར་བྱེད་པ་དང་། མི་ཐབས་ལ་བརྟེན་ནས་ཉམས་གསོ་བྱ་རྒྱུ་ཞོར་དུ་བྱེད་པ། ཚན་རིག་དང་མཐུན་པའི་སྒོ་ནས་འདེབས་འཛུགས་བྱེད་པ། ཡུལ་བབ་དང་བསྟུན་པ། ས་བབ་དང་བསྟུན་ནས་ཤིང་འཛུགས་རྒྱུར་དམིགས་པ་བཅས་བྱས་ཐོག་ཤིང་སོན་དང་མེ་ཏོག། རྩི་ཤིང་གི་གྲུབ་ཆ་རྒྱུན་ཆད་མེད་པར་ལེགས་སུ་བཏང་སྟེ་ནགས་ཤིང་འཕྲོད་སར་ནགས་ཤིང་དང་། ཆུ་འདྲེན་ཡག་སར་ཆུ་འདྲེན། རྩྭ་རྩི་ཤིང་འཕྲོད་སར་རྩྭ་རྩི་ཤིང་འདེབས་པ་བཅས་བྱེད་དགོས། ནགས་བཟོ་བདག་སྐྱོང་བྱེད་རྒྱུར་ཤུགས་སྣོན་བརྒྱབ་སྟེ་གསོ་སྐྱོང་བདག་སྐྱོང་དང་། གསབ་འཛུགས་གསབ་འདེབས་བྱེད་པ་སོགས་ཀྱི་བྱ་ཐབས་བརྒྱུད་སྔོ་སྒྱུར་ལྕང་སོན་ལ་དོ་དམ་ཞིབ་ཚགས་བྱེད་ཤུགས་ཟམ་མི་ཆད་པར་ཆེ་རུ་བཏང་ནས་འདེབས་གསོ་ཡག་པོ་དང་། བདག་སྐྱོང་ཡག་པོ། དོ་དམ་ཡག་པོ་བཅས་ཐུབ་པ་བྱེད་དགོས། ས་གནས་དེ་གའི་མང་ཚོགས་ཀྱིས་ངལ་ནུས་བཏོན་ནས་ནགས་བཟོ་སྔོ་སྒྱུར་གྱི་ལས་གྲྭར་ཞུགས་རྒྱུར་བསྡུ་འགུག་ཧུར་ཐག་བྱས་ཏེ་མང་ཚོགས་ཀྱི་ཡོང་འབབ་འཕར་སྣོན་ཏན་ཏིག་ཡོང་བ་བྱེད་དགོས། ནགས་བཟོ་སྔོ་འགྱུར་གྱི་དཔེ་མཚོན་བྱ་ཐབས་ལ་ཕྱོགས་བསྡོམས་དང་གསེད་བཀྲོལ་ནན་ཏན་བྱས་ནས་སློབ་སྦྱོང་དང་དཔྱད་གཞིར་འཛིན་ཆོག་པའི་རྒྱལ་ཁབ་ཀྱི་ས་ཆ་སྔོ་འགྱུར་གྱི་ཉམས་མྱོང་གཏོད་དེ་སྔོ་འགྱུར་ལས་གྲྭའི་དཔེ་མཚོན་སྣེ་ཁྲིད་ཀྱི་ནུས་པ་འདོན་སྤེལ་གང་ལེགས་བྱེད་དགོས་པའི་ནན་བཤད་གནང་།

     རྒྱ་དྲུག་གླིང་གྲོང་རྡལ་དུ། ལི་ཧྥུའུ་ཀྲུང་གིས་རྨང་གཞིའི་སྒྲིག་བཀོད་ཀྱི་སྤུས་ཚད་མཐོར་གཏོང་དང་སྒྱུར་བཀོད་རྣམ་གྲངས་འཛུགས་སྐྲུན་གྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས། མཁའ་འགྲུལ་ཁུལ་གསར་ནི་ལྗོངས་ཡོངས་ཀྱི་ཕྱི་ཕྱོགས་ཀྱི“སྐར་ཁུང”གལ་ཆེན་ཞིག་ཡིན་པས་ཆབ་སྲིད་ཀྱི་ཚུགས་གནས་སྔར་བས་མཐོ་རུ་གཏོང་དགོས་པ་དང་། འཆར་འགོད་ཀྱིས་སྣེ་ཁྲིད་བྱ་རྒྱུ་མཐའ་འཁྱོངས་བྱེད་དགོས་པ། གནམ་ཐང་ཉེ་འཁོར་གྱི་སྡོད་མལ་ཁོར་ཡུག་བཅོས་སྒྲིག་ལས་དོན་སྤེལ་ཤུགས་ཆེ་རུ་གཏོང་བ། རྨང་གཞིའི་སྒྲིག་བཀོད་འཛུགས་སྐྲུན་རྒྱུན་མཐུད་ངང་འཐུས་སྒོ་ཚང་དུ་གཏོང་བ་བཅས་བྱས་ཏེ་མཁའ་འགྲུལ་ཁུལ་གསར་དེ་དཔལ་འབྱོར་འཕར་གཞི་གསར་པ་ཞིག་ཏུ་འགྱུར་བ་བྱེད་དགོས། རང་འགུལ་ངང་འགན་འཁུར་བ་དང་། བྱས་རྗེས་ཧུར་ཐག་བཞག་ནས་ཚོང་འགུགས་མ་འདྲེན་བྱེད་ཤུགས་སྔར་བས་ཆེ་རུ་བཏང་ཐོག་རྣམ་གྲངས་དེ་བས་མང་བ་མཁའ་འགྲུལ་ཁུལ་གསར་དུ་དོན་འཁྱོལ་ཡོང་རྒྱུར་སྐུལ་འདེད་བཏང་སྟེ་གྲོང་ཁྱེར་ཡོངས་ཀྱི་དཔལ་འབྱོར་དང་སྤྱི་ཚོགས་སྤུས་མཐོའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་དགོས་པའི་ནན་བཤད་གནང་ངོ་།། 

བསོད་ནམས་དོན་གྲུབ་ཀྱིས་བསྒྱུར། བསོད་བསྟན་གྱིས་ཞུས།