شىنخۇا ئاگېنتلىقى، بېيجىڭ، 1 ـ ئاينىڭ 11 ـ كۈنى تېلېگراممىسى جۇڭگو كوممۇنىستىك پارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ يېقىندا ئىقتىسادىي تەپتىش خىزمىتى توغرىسىدا مۇھىم يوليورۇق بېرىپ مۇنداق كۆرسەتتى: ئىقتىسادىي تەپتىش قىلىش پارتىيە ۋە دۆلەت نازارەتچىلىك سىستېمىسىنىڭ مۇھىم تەركىبىي قىسمى. يېقىنقى يىللاردىن بۇيان، ئىقتىسادىي تەپتىش ئورگانلىرى پارتىيە ۋە دۆلەت خىزمىتى ئومۇمىيىتىنى چۆرىدەپ، مەۋقەنى ئىقتىسادىي نازارەتچىلىك ئورۇن بېكىتمىسىگە قويۇپ، ئىقتىسادنىڭ ساغلام تەرەققىياتىنى ئىلگىرى سۈرۈش، دۆلەتنىڭ ئىقتىساد بىخەتەرلىكىنى قوغداش، يوشۇرۇن خەۋپ ـ خەتەرنى كۆرسىتىپ بېرىش، چىرىكلىككە قارشى تۇرۇش، قالايمىقانچىلىقنى تۈزەشكە تۈرتكە بولۇش قاتارلىق جەھەتلەردە پائال رولىنى جارى قىلدۇردى.
شى جىنپىڭ مۇنداق تەكىتلىدى: يېڭى مۇساپىدە، يېڭى دەۋر جۇڭگوچە سوتسىيالىزم ئىدىيەسىنى يېتەكچى قىلىپ، پارتىيە مەركىزىي كومىتېتىنىڭ ئىقتىسادىي تەپتىش خىزمىتىگە بولغان مەركەزلىك بىرتۇتاش رەھبەرلىكىدە چىڭ تۇرۇپ، دىققەتنى ئاساسىي مەسئۇلىيەت، ئاساسىي كەسىپكە مەركەزلەشتۈرۈپ، ئىسلاھ قىلىش، يېڭىلىق يارىتىشنى چوڭقۇرلاشتۇرۇپ، ئۆز قۇرۇلۇشىنى كۈچەيتىپ، مەركەزلىك بىرتۇتاش بولغان، ئومۇميۈزلۈك قاپلىغان، نوپۇزلۇق، يۇقىرى ئۈنۈملۈك ئىقتىسادىي تەپتىش نازارەتچىلىك سىستېمىسىنى كۈچەپ بەرپا قىلىپ، ئىقتىسادىي تەپتىش نازارەتچىلىكىنىڭ سۈپىتى ۋە ئۈنۈمىنى ئۈزلۈكسىز ئۆستۈرۈپ، يۇقىرى سۈپەتلىك ئىقتىسادىي تەپتىش نازارەتچىلىكى ئارقىلىق ئىقتىساد، جەمئىيەتنىڭ يۇقىرى سۈپەتلىك تەرەققىياتىنى قوغداپ، قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرىنى جۇڭگوچە زامانىۋىلاشتۇرۇش ئارقىلىق ئومۇميۈزلۈك ئالغا سىلجىتىش ئۈچۈن يېڭى تۆھپە قوشۇش كېرەك.
مەملىكەتلىك ئىقتىسادىي تەپتىش خىزمىتى يىغىنى ۋە مەملىكەتلىك ئىقتىسادىي تەپتىش ئورگانلىرىدىكى ئىلغار كوللېكتىپلار ۋە ئىلغار خىزمەتچىلەرنى تەقدىرلەش يىغىنى 1 ـ ئاينىڭ 10 ـ كۈنىدىن 11 ـ كۈنىگىچە بېيجىڭدا ئېچىلدى. يىغىندا، دۆلەت ئىشلىرى كومىسسارى، قوشۇمچە گوۋۇيۈەننىڭ باش كاتىپى ۋۇ جېڭلۇڭ شى جىنپىڭنىڭ مۇھىم يوليورۇقىنى يەتكۈزدى، مەملىكەت بويىچە ئىقتىسادىي تەپتىش ئورگانلىرىدىن 80 ئىلغار كوللېكتىپ، 45 ئىلغار خىزمەتچى تەقدىرلەندى.
