تۇيۇقسىز كەلگەن مۇھەببەت 55-قىسىم_ كۈتۈلمىگەن تاسادىپىيلىق

55 - قىسىم  كۈتۈلمىگەن تاسادىپىيلىق...

پەزىلىيە بېشىنى چايقاپ:

   -  لېكىن مەن سىزنىڭ ئۇۋالچىلىققا ئۇچرىغانلىقىڭىزنى، كۈلۈپ تۇرۇپ ئازابلانغانلىقىڭىزنى كۆرۈشنى خالىمايمەن . - دېدى.

دوست بولۇش سۈپىتى بىلەن، ئۇنىڭمۇ مۇنىرەگە تايانچ بولغۇسى بار.

ـ  ھىم، ـ  مۇنىرە چوكىنى قويۇپ، ئىككى قولىنى گىرەلەشتۈرۈپ:

 ـ  راستتىنلا بىلگىڭىز بارمۇ؟ - دېدى.

 پەزىلىيە ئۇنىڭغا تىكىلىپ قاراپ:

- مېنى ئەخمەق قىلماڭ ھە، - دېدى.

   -  قانداقسىگە ئۇنداق قىلاي، ئەمەلىيەتتە سىزگە دەپ بەرسەم بولمايدىغان يېرى يوق، پەقەت شۇ كەيپىياتىمدىكى داۋالغۇش كۆپىيىپ قالدى، بەزىدە  قانداق ئىپادىلەپ بېرىشنىمۇ بىلمەيمەن. - دېدى.

  -  جۆيلۈمەڭ، بارلىق كەيپىياتنىڭ ئىزناسى بولىدۇ. ئېيتىڭە، بۇنىڭ سەۋەبى نېمە؟ - دېدى پەزىلىيە.

مۇنىرە بىر ئاز ئويلىنىۋالغاندىن كېيىن، كەسكىنلىك بىلەن:

-   سۈرلەنگەن پاچاق گۆشى. - دېدى.

ئاڭلىماققا يۇمۇرغا ئوخشاپ قالغىنى بىلەن، لېكىن ھەقىقەتەن راست گەپنى قىلدى.

پەزىلىيە بۇنىڭغا ئىشەنمەي:

   -   تاياق يەپ كېتىشتىن قورقمامسىز، - دېدى.

- ئۇ ئادەتتىكى سۈرلەنگەن پاچاق گۆشى ئەمەس، -  مۇنىرە چۈشەندۈرمەكچى بولۇپ تۇرغاندا، توساتتىن بىر ئايالنىڭ ئاۋازى ئۇنىڭ گېپىنى بۆلۈۋەتتى،  ئاۋاز چىققان تەرەپكە قاراپ،  يېشى ئۆزلىرى بىلەن تەڭ دېمەتلىك كېلىدىغان بىر قىزنىڭ   ئاغزىنى قولى بىلەن ئېتىپ، يىرگەنگەندەك  ئۇلارغا قاراپ تۇرغانلىقىنى، توغرىسىنى ئېيتقاندا، ئۇدۇلىدىكى پەزىلىيەگە قاراپ تۇرغانلىقىنى كۆردى.

  -  بۇ يىللاردا باشقىلارنى مۇھەببىتىنى بۇزىدىغان نومۇسسىزلار شۇنداق كۆپكەن ، خىجىل بولمايدىغان. - دېدى.

مۇنىرە قوشۇمىسىنى تۈردى، پەزىلىيەمۇ گاڭگىراپ قالدى.

بۇياق كىم بولىدۇ؟

  -   خاتا تونۇپ قاپتۇ، ئۇنىڭ بىلەن كارىڭىز بولمىسۇن. - دېدى مۇنىرە ئالدى بىلەن ئېسىنى يىغىپ،-  تامىقىمىزنى يەيلى، - دېدى.

 پەزىلىيە بېشىنى لىڭشىتىپ :

- غەلىتە ئادەملەر ھەقىقەتەن كۆپكەن، - دېدى.

ئۇلارنىڭ تالاش-تارتىش قىلىشنى خالىمىغانلىقى  ئىش تېرىغۇچىنىڭ توختاپ قالىدىغانلىقىدىن دېرەك بەرمەيدۇ. ھېچقانداق جاۋابقا ئېرىشەلمىگەن قىز تېخىمۇ غەزەپلەندى، ئۇ ھەمراھىنىڭ قولىنى قويۇۋېتىپ، پەزىلىيەنىڭ ئالدىغا ئېتىلىپ بېرىپ، ئۈستەلدىكى چاينى ئېلىپ پەزىلىيەنىڭ يۈزىگە چېچىپ:

  -  يۈزى قېلىن تۈلكە جىن! - دېدى.

ھېلىمۇ ياخشى  چاي ئانچە قىزىق بولمىغاچقا، پەزىلىيەنىڭ پۈتۈن بەدىنى ھۆل بولغان بولسىمۇ،  ماھىيەتلىك يارىلىنىش كۆرۈلمىدى.

  -  نېمە قىلىۋاتىسىز؟ ! ـ  مۇنىرە قىزنىڭ بىلىكىنى تۇتۇپ، قاتتىق ۋارقىرىدى، ـ  بىز سىزنى تونۇمايمىز، ئادەمنى خاتا تونۇپ قالدىڭىزمۇ قانداق؟ !  - دېدى.

ھېلىقى قىز سۇس كۈلۈپ قويۇپ:

   -  ئادەمنى خاتا تونۇپ قاپتىمەنمۇ تېخى؟  ئۆزىڭىز ئۇنىڭ قانداق ياخشى ئىش قىلغانلىقىنى سوراپ بېقىڭ! - دېدى.

پەزىلىيە بېشىنى كۆتۈرۈپ ئۈستەلنى ئۇرۇپ ئورنىدىن تۇرۇپ:

   -  ساراڭ بولدىڭىزمۇ؟  مەن نېمە ئىش قىپتىمەن؟ كاللىڭىزنىڭ دەردى بولسا بېرىپ داۋالىنىڭ، - دېدى.

ئەتراپتىكى  كىشىلەر يان تېلېفونىنى چىقىرىپ سىنغا ئېلىشقا باشلىدى، ھەر ۋاقىت دوستلار چەمبىرىكىگە چىقىرىشقا تەييارلىنىپ بولۇشتى.

  -   ھى، ھى،  نېمە ئىش قىپتىمەن؟ باشقىلارنىڭ ئوغۇل دوستىنى ئازدۇرۇپ،  پاك قىياپەتكە كىرىۋالماقچىمۇ؟  كېچىكتىڭىز! - دېدى ھېلىقى قىز مۇنىرەنىڭ قولىنى سىلكىپ، پەزىلىيەنىڭ بۇرۇنىنى كۆرسىتىپ تۇرۇپ،   -  كۆپچىلىك يېقىنراق كېلىپ سۈرەتكە تارتىڭلار، دەل مۇشۇ نومۇسسىز ئايال مېنىڭ ئوغۇل دوستۇم بىلەن بولغان مۇھەببىتىمنى بۇزدى، ئۇ ئادەمنىڭ ئۆچلۈكىنى كەلتۈرىدىغان ئۈچىنچى شەخس! - دېدى.

بۇنى ئاڭلىغان كۆپچىلىك تېخىمۇ قىزىقىپ،  بۆرە توپى ئولجىنى بايقىغاندەك، ئۈچەيلەننى ئورىۋېلىپ، يان تېلېفونلىرىنى چىقىرىپ، سۈرەتكە تارتىشقا باشلىدى، ھەتتا بەزىلەر سۈرەتكە تارتىۋاتقاندا ياندىن چۈشەندۈرۈشكە باشلىدى.

پەزىلىيە ئالاقزەدە بولۇپ كەتتى، ئۇنىڭ  قەلبىدە مۇراتتىن باشقا ئادەم يوق.   ئىت-مۈشۈكلەرنى ئازدۇرىدىغان نىيىتىمۇ يوق، ئۇغۇ ھېچ ئىش قىلمىدى، لېكىن سۈرەتكە تارتىپ تورغا چىقارسا، بەلكىم  ئورۇنسىز  ئەيىبلىنىشى مۇمكىن.

ئۇ قولى بىلەن يۈزىنى توسۇۋېلىپ، نېمە قىلارىنى بىلەلمەي:

   -  تارتىماڭلار، تارتماڭلار! - دېدى.

باش ئىش تىرىغۇچى  يەنىلا ۋارقىراپ تۇرۇپ:

   -  نومۇسسىز پەس، باشقىلارنىڭ مۇھەببىتىنى بۇزسىڭىز، قانۇن بىر تەرەپ قىلالمىغىنى بىلەن، جامائەت پىكرى  ساۋاق بېرىدۇ، بۇنىڭدىن كېيىن يەنە قىلىشقا جۈرئەت قىلالامسىز- يوق قاراپ باقايلى ... - دېدى.

پاق...

بىر يان تېلېفون ئۇچۇپ چىقىپ، ئالدى بىلەن ئۈستەل يۈزىگە ئۇرۇلدى، ئاندىن سىيرىلىپ بېرىپ تاماق ئۈستىلىدىكى قاچا-قۇچىلارغا تەگدى.

كۆپچىلىك جىمىپ قالدى.

مۇنىرە قولىنى سىلكىپ، ئالدىدىكى يانفونىنى تارتىۋېلىنغان ئوتتۇرا ياشلىق ئەرگە قاراپ:

   -  تاماشا كۆرۈش چوڭ ئىش ئەمەستۇ، ئەمىسە كۆپچىلىك بىللە تاماشا قىلايلى، مەن بىر نامرات، ھېچقانچە پۇلۇم يوق، لېكىن بەش-ئالتە يانفوننى يەنىلا تۆلەپ بەرگۈچىلىكىم بار، داۋاملىق سىناپ باقامسىلەر؟ - دېدى.

يان تېلېفوننى كۆتۈرۈۋالغان ئىككى ئادەم تېلېفوننى ئىتىتكلا چۈشۈرۋالدى، قالغان قەيسەر كىشىلەر يەنىلا سۈرەتكە ئېلىشتا چىڭ تۇردى، ئەمما پەقەت گەپ قىلمىدى.

پەزىلىيە بۇ كۈتۈلمىگەن ئاپەتكە دۇچار بولۇپ، كۆپچىلىكنىڭ نەزىرى مۇنىرەگە يۆتكەلگەن پۇرسەتتىن پايدىلىنىپ، دەرھال يانفونىنى چىقىرىپ تېلېفون قىلدى، تېلېفون ئۇلانغاندا،  يىغلاپ تۇرۇپ:

   -  مەن قانداق قىلىشنى بىلمىدىم، تېز كېلىڭ... - دېدى.

مۇنىرە جاسارەتلىك سالاپىتىنى نامايەن قىلىپ، ئۆزىنى قاچۇرماي، كامېراغا قاراپ:

   -  كۆپچىلىك سىلەرمۇ قىزىقكەنسىلەر، بۇ قىزنىڭ بىر ئېغىز گىپى بىلەنلا باشقىلارغا جىنايەت بېكىتىپ قويدىڭلار، ھەرقانچە بولسىمۇ ئىشنىڭ سەۋەبى ۋە ئاقىۋىتىنى ئېنىق سوراپ دەلىل-ئىسپات تېپىپ ئاندىن بىر نېمە دېسەڭلارمۇ ئۈلگۈرىسىلەر! !  - دېدى.

كۆپچىلىك سۈكۈتكە چۆكتى، ھېلىقى قىز ئېتىلىپ چىقىپ:

   -  ئەجەبا مەن قەستەن بېشىمغا يېشىل قالپاق كىيىپ، ئۇنىڭغا تۆھمەت قىلىپ ئوغۇل دوستۇمنى ئازدۇردى دەۋاتامدىم؟ - دېدى.

مۇنىرە كۈلۈپ تۇرۇپ:

   -  ئوغۇل دوستىڭىز زادى كىم، مېنىڭ دوستۇمنى ئۆزىگە قارىتىۋالغۇدەك؟ - دېدى. ئۇنىڭ ئۈستىدە پەزىلىيە ئۇنداق پەسكەشلەردىن ئەمەس، ئۇ بولغان تەقدىردىمۇ، مۇراتتەك ئېسىل يىگىتى تۇرسا، ئادەتتىكى ئادەملەرنى كۆزىگە ئىلمايدۇ؟

  -   سىز نېمىنى بىلەتتىڭىز؟ مەن ئۆز كۆزۈم بىلەن ئوغۇل دوستۇمنىڭ يان تېلېفونىدىن ئۇنىڭ سۈرىتىنى كۆرۈپ قالدىم، يەنە كېلىپ ئۆزتارتىم قىلىپ تارتقان سۈرەت، دەلىل-ئىسپات تولۇق بولدىمۇ؟  - دېدى قىزچاق تۈكۈرىكىنى چاچرىتىپ،   ـ  ئەمەلىيەتتە بولدى قىلاي دېگەن، بىراق نەس باسقۇرنى بۇ يەردە كۆرۈپ قالدىم، مەن نېمىشقا بۇ دەردنى ئىچىمگە تۇتقۇدەكمەن؟ - دېدى. 

-   سىڭلىم، سىزمۇ ئۆزتارتىم قىلىپ چۈشكەن سۈرەت دېدىڭىز، ئىككى ئادەمنىڭ يېقىنچىلىق قىلىپ چۈشكەن سۈرىتى ئەمەسكەن. - دېدى  مۇنىرە  مۇھەببەتتىن كاللىسىدىن كېتىپ قالغان قىزغا  ھەقىقەتەن قايىل بولۇپ، -  ئۆزتارتىم سۈرەتكە ئېرىشىشنىڭ يوللىرى بەك كۆپ، سىز ئۇنىڭ ئۆزتارتىم سۈرىتىنىڭ قەيەردىن كەلگەنلىكىنى تەكشۈرۈپ باقتىڭىزمۇ؟ دوستۇمنىڭ چىرايىنىڭ قاملاشلاشقانلىقىغا قاراڭ، ئوغۇل دوستىڭىزنىڭ بىر تەرەپلىمە ھالدا دوستۇمنى ياخشى كۆرۈپ قالمىغانلىقىغا ئىشىنەمسىز؟  - دېدى.

ئەتراپتىكى ئويۇن كۆرگۈچىلەر ھوشىنى تېپىپ، ئاۋۋال قول سالغان قىزغا سالا قىلىشقا باشلىدى.

- سىڭلىم، مەن سىزنىڭ يەنىلا ئاشۇ ئۆلگۈر يىگىتىڭىزنى تەكشۈرۈپ بېقىشىڭىزنى، ھېچ ئىش بىلمەيدىغان ئادەملەرگە قالايمىقان تۆھمەت قىلماسلىقىڭىزنى تەۋسىيە قىلىمەن. - دېدى.

ئۇ قىزنىڭ يۈزلىرى قىزىرىپ، دە تالاش قىلالماي، دەرھال يانفونىنى چىقىرىپ تېلېفون ئۇرۇپ:

   -   دەرھال بۇ يەرگە كېلىڭ! قەيەر؟ ئورۇننى ئەۋەتىپ بېرىمەن، 10 مىنۇت ئىچىدە كېلىڭ! نېمە ئىش بولاتتى؟  ئۆزىڭىز قىلغان ئىپلاس ئىشنى بىلمەمسىز؟ تېز كېلىڭ، دەرھال، ھازىرلا! خىزمىتىڭىزنى قويۇڭ! كەلمىسىڭىز ئاقىۋىتىنىڭ قانداق بولىدىغانلىقىنى ئوبدان بىلىسىز، قالغىنى ئۆزىڭىز ئويلىشىڭ! - دېدى.

گەپنى بۇنچىلىك قىلغاندىن كېيىن، مۇنىرە پەزىلىيەنىڭ يېنىغا قايتىپ كېلىپ، پەس ئاۋازدا:

   -  قانداق تۇرىسىز؟ - دەپ سورىدى.

پەزىلىيە ئۇنىڭ قولىنى تۇتۇپ، كۆزىگە ياش ئالغان ھالدا بېشىنى چايقاپ:

   -  ھېچقىسى يوق، مەن مۇراتنى كېلىڭ دېدىم... - دېدى. 

مۇنىرە چۆچۈپ كەتتى ۋە دەرھال:

  -  ياخشى بوپتۇ. - دېدى.  بۇ چاغدا ئۇنىڭ كېلىپ مەدەت بەرگىنىمۇ يامان ئەمەس تاللاش.

مۇرات بىلەن داشقال ئەر تەڭلا كەلگەن بولۇپ، ئىككىسى بىر يەردە تۇرسا، بىر-بىرىدىن قېلىشمايتتى. مۇراتنىڭ مەيلى تاشقى قىياپىتى بولسۇن، سالاپىتى بولسۇن،  تولۇق بېسىپ چۈشەتتى.

مۇنىرە ئۇنىڭغا قاراپ قويۇپ، بېشىنى لىڭشىتتى.

پەزىلىيە مۇراتنىڭ قوينىغا ئۆزىنى ئاتتى، مۇراتمۇ ئۇنى چىڭ قۇچاقلىۋالدى.

ئىش ئاسانلا ھەل بولدى، ئەمەلىيەتتە خاتا چۈشىنىش يۈز بەرگەنىدى، ئەر باش پېرسوناژ سەل داشقال نېمە بولۇپ،  ئۇ پەزىلىيەنىڭ يىراق ئەلدىن قايتىپ كەلگەندىن  كېيىنكى لايىق ئىزدەش ئوبيېكتلىرىنىڭ بىرى، ئائىلىسىدىكىلەرنىڭ تەلىپى بويىچە ئۇچرىشىشقا بارغان، سۈرەتنى چوڭلار بەرگەندىن كېيىن پەزىلىيە بىلەن تېخىمۇ چۈشىنىشىپ بېقىشنى كۆڭلىگە پۈككەن، لېكىن ئىككىلا تەرەپتە بىر بىرىگە قىزىقىش پەيدا بولمىغاندىكىن،  بولدى قىلغان، ئۆچۈرۈۋېتىشنى ئۇنتۇپ قالغان سۈرەتنىڭ بىر مەيدان بوران-چاپقۇننى كەلتۈرۈپ چىقىرىدىغانلىقىنى پەقەتلا ئويلىمىغانىدى. 

ئەر باش پېرسوناژ كەچۈرۈم سوراپ، ۋارقىراپ-جارقىرىغان قىزنى ئېلىپ كېتىپ قالدى، ئەتراپتىكىلەر تاماشا كۆرۈشنىڭ ھاجىتى قالمىغانلىقىنى كۆرۈپ، تارقىلىپ كەتتى...  مۇنىرە تېلېفونىنى چېقىۋەتكەن ئوتتۇرا ياشلىق ئادەم يەنىلا ئورنىدىن مىدىرلىمىدى.

مۇنىرەنىڭ پۇلغا  ئىچى ئاچچىق بولسىمۇ، ئەمما  يەنىلا جىگىرى بار، تۆلەيمەن دېدىمۇ تۆلەپ بېرىدۇ، لېكىن ئاغزىدا ئادەمگە رەھىم قىلماي:

  -  تاغا، ئەخلاق قامچىسى بىلەن جازالاشتەك بۇنداق ئىشنى قىلغاندا يەنىلا سەگەك بولۇش كېرەك، بۇنىڭدىن كېيىن يەنىلا ئۆزىڭىزنىڭ ئىشىنى قىلىڭ، - دېدى.

ئوتتۇرا ياشلىق ئەرنىڭ يۈزلىرى قىزىرىپ كەتكەنىدى، ئەمما نېمىلا دېگەن بىلەن ئۇمۇ زىيان تارتتى، پۇلنى ئالغاندىن كېيىن ھېچنېمە دېمەي، دەردىنى ئىچىگە يۇتۇپ كېتىپ قالدى.

مۇناسىۋەتسىز ئادەملەرنىڭ ھەممىسى دېگۈدەك تارقىلىپ كەتكەندىن كېيىن، مۇنىرە كۆز ئالدىدىكى  گىرەلىشىپ قالغان ئىككى ئادەمگە قاراپ، ئۆزىنىڭمۇ چېكىنمىسە بولمايدىغانلىقىنى ھېس قىلدى.

 قۇچىقىدىكى ئادەمنى بەزلەپ بولغان مۇرات بېشىنى كۆتۈرۈپ،  مۇنىرەنىڭ سومكىسىنى  ئېلىۋاتقانلىقىنى كۆرۈپ قالدى، بىر مەھەل مۇرەككەپ ھېسسىياتتا  كۆڭلى پەرىشان بولۇپ،  يۈرىكى ئاچچىق بولدى.

ئۇ ئاخىرى  ھەممىنى چۈشەندى، پەزىلىيە دېگەن پەزىلىيە، مۇنىرە  يەنىلا مۇنىرە ئىكەن.

بۇ ئىككى ئادەم پۈتۈنلەي ئوخشىمايدۇ.