گۈزەل ھايات 10-بۆلۈم49-قىسىم _كىمنىڭ بالىسى

49-قىسىم

كىمنىڭ بالىسى

ئەمدى گەپنى يەنە ئىلزاتتىن ئاڭلايلى.

ھېلىقى ئايال ئىلزاتنىڭ چىراي ئىپادىسىگە قاراپ، ھەم جىددىيلىشىپ ھەم ئىچ ئاغرىتتى.

ئىلزات دەرھال قوشۇمىسىنى تۈرۈپ:

  -  نېمە بولدى؟ - دەپ سورىدى.

ئايال ساپادا ئولتۇرۇپ، تېلېفوننى قولىغا ئېلىپ:

 -   يانفونىڭىزنىڭ توكى قالمىدىمۇ ؟ - دەپ سورىدى.

ئىلزات ئورنىدىن تۇرۇپ كارىۋاتتىن چۈشتى، ئۇنىڭ گېپىنى ئاڭلاپ، ئىختىيارسىز بىر نەرسىنى ئىزدىدى.

ئايال چاي ئۈستىلىنى كۆرسىتىپ، ئاندىن ئۈستىدىكى  قارا رەڭلىك يانفوننى ئېلىپ، ئورنىدىن تۇرۇپ ئۇنىڭغا ئاپىرىپ بەردى.

 ئىلزاتنىڭ تېلېفوننى ئېلىپ،  ئېكراننى ئاچقانلىقىنى كۆرۈپ، ئايال لېۋىنى پۈرۈشتۈرۈپ :

 -  ئەسلىدە توك بار ئىكەندە، تۈنۈگۈن كەچتە ئازراقمۇ شەپە بولمىسا، مەن تېخى توك يوق ئوخشايدۇ دەپتىمەن. - دېدى .  

ئىلزات گەپ قىلماي، ھېچقانداق ئالاھىدە يېرى يوق يانفونغا قاراپ قويۇپ،  بىر چەتكە تاشلاپ قويدى.

 قولىنى سوزۇپ قوشۇمىسىنى چىمدىدى.

 -  تۈنۈگۈن كەچتە ھېچكىم سىزگە تېلېفون ياكى ئۇچۇر قىلماپتىمۇ؟ - دەپ سورىدى ئايال.

ئىلزات ئورنىدىن تۇرۇپ تازىلىق ئۆيىگە كىرمەكچى بولدى، ئايالنىڭ بۇ گېپىنى ئاڭلاپ، قەۋەتلا بىزار بولۇپ:

- زادى نېمە دېمەكچىسىز؟ - دېدى.

ئايال جىمىپ قېلىپ:

- تۈنۈگۈن قاۋاقخانىدىكى ئىشىنى باشقىلار تورغا چىقىرىۋېتىپتۇ، قىزغىنلىق دەرىجىسى بەك يۇقىرى، مەن تېخى، ئايالىڭىزنى سىزگە تېلېفون قىلىپ جەزىملەشتۈرىدىغۇ دەپتىمەن - دېدى.

ئىلزات قەدىمىنى توختىتىپ، بېشىنى بۇراپ، مەستلىكتىن قىزىرىپ كەتكەن كۆزلىرى بىلەن ئايالغا قارىدى، كۆزلىرىدىن سوغۇق نۇر چاقنىدى.

ئايال شۇ ھامان قورققىنىدىن كەينىگە ئىككى قەدەم داجىپ:

 -  كەچۈرۈڭ ، - دېدى.

ئىلزات بېشىنى بۇراپ، بىر نەچچە سېكۇنت ئويلانغاندەك بولۇپ، سوغۇق كۈلۈپ قويۇپ، تازىلىق ئۆيىنىڭ ئىشىكىنى تېپىپ كىرىپ كەتتى، ئارقىدىن ئىشىك قاتتىق سىلكىنىپ يېپىلغان ئاۋازى ئاڭلاندى.

 يۇيۇنۇپ چىقىشقا 15 مىنۇت ۋاقىت كەتتى.

ئۇچىسىغا مۇنچا كىيىمى كىيىپ، ساپادا نېمە قىلارىنى بىلمەي ئولتۇرغان ئايالغا پەرۋا قىلماي، ئۇدۇل كارىۋاتنىڭ يېنىغا بېرىپ يانفونىنى ئېلىپ باشقىلارغا كىيىم تەييارلاپ بېرىشنى ئېيتتى.

كىيىم ساقلاۋاتقان مەزگىلدە، ئىلزات يەنە ئەتىگەنلىك تاماق بۇيرۇتتى.

كۆز ئالدىدىكى ئايالغىمۇ ئۇۋال بولمىدى، بىللە يېدى.

ئايال تاماقنى ئاز يېدى، ئەمما ئىلزاتقا دىققەت قىلىپ، ئۇنىڭ تاماق مىقدارىنىڭ نورمال ئەرلەرنىڭكىدىن كۆپرەك ئىكەنلىكىنى بايقىدى.

ئۇ نۇرغۇن  ئەر-ئاياللارنى كۆرگەن،  بىر ۋاخ تاماققا پەقەت ئومۇمنىڭ ئىشىدەك مۇئامىلە قىلىپ، ئازراقلا يېيىشىدۇ، پەقەت بىر كۈنلۈك ئۆرە تۇرۇشىغا يەتكۈدەك مادارى بولسا دەپ ئويلايدۇ.   

ھازىر،  ئاخىرى  ھەقىقىي بىر ئەرنى كۆرگەندەك بولدى.

لېكىن بۈگۈنكى تاماق مىقدارى ئىلزاتنىڭ ئادەتتىكى تاماق مىقدارىغا يەتمەيتتى.

تۈنۈگۈن ئاچ قورساققا شۇنچە كۆپ ھاراق ئىچكەنلىكى ئۈچۈن، ئاشقازىنى ئەسلىدىنلا بىئارام، ئۇنىڭ ئۈستىگە بېشى ئاغرىغاچقا، كۆپ نەرسە يېيەلىشى ئەسلا مۇمكىن ئەمەس ئىدى.

ئەتىگەنلىك تاماق ۋاقتىدا، ئىككىيلەن بىر ئېغىزمۇ گەپ قىلىشمىدى،  تاماقنى يەپ بولغاندىن كېيىن، كىيىمنىمۇ ئەكېلىپ بەردى.

تەييارلانغان كىيىم ئىككى يۈرۈش بولۇپ، ئايالغىمۇ تەييارلىغانىدى.

كىيىمنى ئايالغا تاشلاپ بېرىپ،   تازىلىق ئۆيىگە كىرىپ ئالماشتۇرۇشنى ئېيتتى.

ئايال گەرچە سەۋەبىنى بىلمىسىمۇ، لېكىن يەنىلا ياۋاشلىق بىلەن ئالماشتۇردى.

تازىلىق ئۆيىدىن چىققاندا، ئىلزات   كاستۇم-بۇرۇلكىسىنى كىيىپ، چېچىنى ئاددىيلا تۈزەشتۈرۈپ،  روھلۇق، سوغۇققان ھالىتىگە قايتقان بولۇپ، باشقىچە بىر خىل سېھرىي كۈچىنى نامايان قىلىپ تۇراتتى.

ئۇ ئايالنىڭ چىقىۋاتقانلىقىنى كۆرۈپ، چىرايىنى ئۆزگەرتمەي  -  يۈرۈڭ دېدى-دە، ئىشىكنى ئاچتى.

ئايالنىڭ يۈزى قىزىرىپ، يۈرىكى تېز سوقۇپ، كەينىدىن ئەگىشىپ مېڭىپ يېنىغا كېلىپ توختىدى.

ئىككى سېكۇنت تۇرۇپ قالغاندىن كېيىن، پەس ئاۋازدا:

 -  ئەمەلىيەتتە بۇنداق قىلىشنىڭ زۆرۈرىيىتى  يوق، - دېدى.

ئىلزات ئۇنىڭ سۆزىنى ئاڭلىماي، ئالدى بىلەن ئىشىكتىن چىقتى.

تۈنۈگۈن ئاخشامقى قاينام تاشقىنلىققا سېلىشتۇرغاندا، بۈگۈن ئەتىگەنكى قاۋاقخانا بەكلا چۆلدەرەپ قالغانىدى.

ئادەم يوق دېگەنلىك ئەمەس، بەلكى كەچتە ھەممەيلەن قاتتىق ئويناپ ، ئەتىسى روھسىز ھارغىنچىلىقتا، بىر ئېغىزمۇ گەپ قىلىشماي غەمكىن ھالدا سىرتقا چىقىشقا تەييارلىق قىلىۋاتاتتى.

بىراق كۆپ ساندىكى كىشىلەر ئىلزاتنىڭ ھېلىقى ئايال بىلەن بىللە چىققانلىقىنى كۆرگەندە، بىر ئاز غەلىتە قارىشىپ قالدى.

ئەمما كەينىدىن گەپ قىلىپمۇ يۈرمىدى.

 لېكىن ئىلزات بىر يەرلىرىنى توغرا ئەمەستەك ھېس قىلدى.

بۇرۇنقىدەكلا قەددى-قامىتىنى تىك تۇتۇپ، ئالدىغا قاراپ:

  -  بايا نېمە دېگەنتىڭىز؟  - دەپ سورىدى.

ئايال ئېنىقلا بۇ گەپنى ئۆزىگە دېگەنلىكىنى بىلدى.

 چۆچۈپ كەتكەندىن كېيىن، پەس ئاۋازدا :

- تۈنۈگۈن قاۋاقخانىدىكى ئىشقا نۇرغۇن ئادەم دىققەت قىلدى، ئەگەر سىز پەقەت ئويۇن قويماقچى بولسىڭىز، تۈنۈگۈن ئاخشام مەقسىتىڭىزگە يەتتىڭىز. لېكىن بۈگۈن ئەتىگەنكى نەتىجىنىڭ سىزنىڭ ئېرىشمەكچى بولغان نەتىجەنىڭ شۇ ياكى  ئەمەسلىكىنى بىلمەيمەن - دېدى.

ئىككىيلەن قاۋاقخانىدىن چىقىپ، ئىشىك ئالدىدا تۇرۇپ، ساپ ھاۋادىن نەپەس ئالدى.

 -  نېمە ئۇ مەن ئېرىشمەكچى بولغان نەتىجە دېگەن؟ - دېدى ئىلزات.

ئايال خېلى ئۇزۇنغىچە گەپ قىلمىدى، ئىلزات تاقەتسىزلىنىپ، بۇرۇلۇپ ئۇنىڭغا قارىدى، ئەمما ئايال يانفوننى ئالدىغا سۇندى.

توردىكى قىزىق تېمىغا كۆزىگە چېلىقتى.

[ئىلزات بايۋەچچىنىڭ ئايالى بۇرۇنقى ئوغۇل دوستى  بىلەن بىللە خىزمەتكە باردى ]

[ئىلزات بايۋەچچە بىلەن ئايالى ، ھەر قايسىسى ئۆز ئالدىغا ئويناشنى ياخشى كۆرىدۇ ]

[كونا ھېسسىيات قايتا قوزغالدى، ئىككىنچى كېلىنئاغچا ئىلزات بايۋەچچىنىڭ سەتچىلىكىگە قىلچە پىسەنت قىلمىدى ]

ئىلزاتنىڭ چىرايى قارىداپ سەتلىشىپ كەتتى.

ئەتىگەندە ئويغانغاندىلا  بۇ ئايالنىڭ كۆزلىرىدە بىر خىل ئىچ ئاغرىتىش چىقىپ تۇرۇشى ئەجەبلىنەرلىك ئەمەسكەن.

ئۇنىڭ يان تېلېفونىنىڭ بىر كېچە جىمجىت تۇرغانلىقىنى تەكىتلىشىمۇ ، بايىقى كىشىلەرنىڭ ئۇنىڭغا قاراشلىرىمۇ ئەجەبلىنەرلىك ئەمەس ئىكەن.

تۈنۈگۈن كەچتە ئۇ شۇنداق چوڭ ئىش تېرىدى، پەرىدە تېلېفون قىلمايلا قالماستىن، بۈگۈن ئەتىگەن بۇرۇنقى ئوغۇل دوستى بىلەن بىللە سەتچىلىككە پەرۋا قىلماي، مېھىر - مۇھەببەتلىك بېقىشىپ بىللە ئىشقا بېرىپتۇ...

ھى...

پەرىدە، يارايسىز.

ياردەمچى ماشىنىنى ھەيدەپ ئىلزاتنىڭ ئالدىدا توختىدى، ئىلزات ئۇدۇل چوڭ قەدەم بىلەن ماشىنىغا چىقتى.

ئايال  ئۆز ئورنىدا تاشلىنىپ قالدى.

گەرچە سەل ئوڭايسىزلانغان بولسىمۇ، لېكىن يەنىلا  ئۇھ دېدى.

ئىلزات شۇ چاغدا بىۋاسىتە پەرىدەنىڭ شىركىتىگە بېرىپ، ئۇنى تارتىپ چىقىپ، ئوبدان ئەدەپلەپ قويماقچى بولدى.

لېكىن ئۇزاق ئۆتمەي، يەنە ئۆزىنى تۇتۇۋالدى.

ئۇ ئىككىسى مېھىر - مۇھەببىتىنى كۆز - كۆز قىلسا،  ئەتىگەندە تۇيۇقسىز ئىزدەپ بارسا... ئۇ بۇ ئىشقا ھەممىدىن بەك كۆڭۈل بۆلىدىغان، بۇرنىدىن يېتىلەپ مېڭىلغان ئادەم بولۇپ قالمامدۇ؟

نېمىشقا  ئۇنداق قىلغۇدەك، ئۇ نېمە دەپ پەرىدەگە كۆڭۈل بۆلىدۇ... 

ماشىنىنىڭ يۆنىلىشىنى ئۆزگەرتىپ شىركەتكە باردى.

توردا ئۇلارغا مۇناسىۋەتلىك خەۋەرلەر يەنىلا كۆپلەپ تارقىلىپ، قىزىق نۇقتىدىن چۈشمىدى.

پەرىدە بىلەن شىرئەلىنىڭ بىللە چۈشلۈك تاماق يېگەنلىك خەۋىرى يەنە بىر قېتىم قىزغىنلىق قوزغىدى.

بوشى مالىيە گۇرۇھىدىكى  ھەممە ئادەم  بېشىنىمۇ كۆتۈرەلمەي ، ئۆز ئىشى بىلەن مەشغۇل بولغاندەك بولۇۋالدى.

ھەممە ئادەم قاتتىق جىددىيلەشكەن بولسىمۇ، يۈرەكلىك بىرەر ئېغىز گەپ قىلىشقا جۈرئەت قىلالمىدى.

ئەسلىدە پەقەت ئىليار باش مۇدىرنىڭلا توردىكى ئالقىشلىنىش دەرىجىسى يۇقىرى  دەپ ئويلىغانىدى.

ئىلزات بايۋەچچىنى بولسا مىجەزى ئەركىن، چېچىلاڭغۇ،  چاقچاق قىلىپ كۈلۈپلا يۈرىدىغان ئادەم دەپ بىلەتتى، شۇڭا بۇ ئىككى ئاكا-ئۇكىنى سېلىشتۇرغاندا، ئۇلارنىڭ نەزىرىدە پۈتۈنلەي ئوخشىمايدىغان ئىككى ئادەم ئىدى.

لېكىن ھازىرقى ئەھۋالدىن قارىغاندا، تەبىئىي سوغۇققان سالاپەت تۇغۇلۇشىدىنلا بار ئىكەن، بۇرۇن يوق ئەمەس، پەقەت كۆرسەتمەپتىكەن خالاس.

ھازىرقى بۇ ھالىتى، ئىليار باش مۇدىرنىڭ ئادەم ئۇرۇشىدىنمۇ قورقۇنچلۇق تەسىر بەردى.

چۈنكى، ئادەتتىكى كۈنلەردە چىقىشقاق، بىپەرۋا ئادەم ئاچچىقلانغاندا قانچىلىك قورقۇنچلۇق تەھدىت پەيدا قىلىدىغانلىقىنى ھېچكىم تەسەۋۋۇر قىلالمايتتى.

 خەۋەرنى ئۇلارمۇ تەبىئىيلا كۆردى.

شۇڭا قورقۇنچ تۇيغۇسى تېخىمۇ چوڭقۇرلىشىپ كېتىۋاتاتتى.

كەچتە ئىشتىن چۈشكەندە ھەممەيلەن ئېھتىيات بىلەن كارتا سۈركەپ كېتىپ قالدى، ئىلزاتنىڭ ئىشخانىسىدا ھېچقانداق شەپە بولمىدى.

ئەمەلىيەتتە پۈتۈن بىر كۈن كۆڭلى جايىدا بولمىدى، خىزمەتتىن باشقا ھېچقانداق تېلېفون قوبۇل قىلمىدى.

ئىش بۇ يەرگە كەلگەندە، ھەممە ئادەمگە پەرۋا قىلمايدىغاندەك قىلاتتى.

كەچتە شىرئەلى ئەسلىدە پەرىدە بىلەن كەچلىك تاماق يېمەكچى ئىدى، ئەمما پەرىدە رەت قىلدى.

 -  پەرغانە مېنى ئۆيدە ساقلاۋاتىدۇ، كەچلىك تاماقنى بولدى قىلايلى، - دېدى پەرىدە.

شىرئەلىمۇ چىڭ تۇرمىدى.

 -  ھەپتە ئاخىرىدا پەرغانەنى بىللە چىقايلى. - دېدى شىرئەلى. 

پەرىدە ئۇنىڭغا بىر قاراپ قويۇپ، بىخەتەرلىك تاسمىسىنى يېشىپ:

  -  ۋاقتى كەلگەندە بىر گەپ بولسۇن، - دېدى. 

 -  پەرىدە، مەن پەرغانەنى  ياخشى كۆرىمەن. - دېدى شىرئەلى.

 -   ھىم. - پەرىدە شۇنداق دېگىنىچە ماشىنىنىڭ ئىشىكىنى يانچە  ئېچىپلا قېتىپ تۇرۇپ قالدى.

ياتاق بىناسىنىڭ ئاستىدىكى يول چىرىغى ناھايىتى يورۇق بولۇپ، نۇر ھالقىسىنىڭ سىرتىدا بىر نەچچە پەرۋانە نۇر مەنبەسىنى چۆرىدەپ تۇراتتى.

ماشىنا توختىتىش مەيدانى يەنىلا ئازراق غۇۋا قاراڭغۇ.

ماشىنىنىڭ ئالدى قاپقىقىغا يۆلىنىپ، ئىككى قولىنى قوۋۇشتۇرۇپ تۇرغان بىرەيلەننىڭ تۇرقىنى غۇۋا كۆرگىلى بولاتتى، قارىماققا بۇ يەرگە قاراپ تۇرغاندەك قىلاتتى.

پەرىدەنىڭ كۆڭلى بىر قىسما بولۇپ قالدى، كۆزىنى قىسىپ ئالدىدىكى ئادەمگە سىنچىلاپ قارىدى. بۇ ئىلزات ئىدى.

ئەمما كېيىنكى  سېكۇنتتا شىرئەلى پەرىدەنىڭ مۈرىسىدىن كەينىگە تارتتى.

پەرىدە تەييارلىقسىز بولغاچقا، سەنتۈرۈلۈپ بېشىنى بۇرىغاندا، پېشانىسىگە ئىسسىق تامغا باستى.

بەدىنى شۇ ھامان قېتىپ، كۆزلىرى چەكچىيىپ كەتتى، ھېچقانداق ئىنكاس قايتۇرماي تۇرۇپلا، تۇيۇقسىز كەينىدىن قاتتىق تارتىلدى.

شىرئەلى قولىنى سوزۇپ ئۇنى تۇتۇۋالماقچى بولدى، ئەمما يەنىلا بىر قەدەم كېچىكىپ قالدى.

پەرىدە بىۋاسىتە ماشىنىدىن ئىلزات تەرىپىدىن تارتىپ چىقىرىلىپ يەرگە يېقىلدى.

بىر تىزى يەرگە تېگىپ تىزلىنىپ قالغان بولسىمۇ، يەنىلا ئىلزات ئۇنى كۈچەپ كۆتۈرۋالدى.

شىرئەلى بۇ ئەھۋالنى كۆرۈپ، دەرھال ئىشىكنى ئېچىپ  ماشىنىدىن چۈشتى.

ماشىنا گەۋدىسىدىن ئايلىنىپ ئۆتۈپ، ئارىلىق يېقىنلاشقاندا، ئەرنىڭ چىرايىنى ئېنىق كۆردى.

شىرئەلى بىر ئاز تۇرۇپ قالغاندىن كېيىن، داۋاملىق ئالدىغا بېرىپ، ئۇنىڭغا تەمكىنلىك بىلەن قاراپ:

 -   ئۇنى قويۇۋېتىڭ، - دېدى.بىراق  گەپ تۈگىشى ھامان مۇشت كۈچلۈك شامال بىلەن   يۈزىگە قاتتىق تەگدى.

شىرئەلىنىڭ بەدىنى تۇيۇقسىز قىيسىپ ئۇزۇن بىلىكىنى ماشىنىنىڭ ئالدى قاپقىقىغا تىرەپ تۇرۇۋالدى.