التايدىڭ ءتورت ماۋسىمى اتىنداعى كالەندار جاريالاندى

جۋىردا، حۋاچىڭ باسپاسىنان باسىلىپ شىققان «التايدىڭ ءتورت ماۋسىمى» اتىنداعى 2025-جىلعى كالەندار تاراتىلدى. بۇل كالەنداردا لي جۋاننىڭ شالقىمالارىنان ۇزىندىلەر كەلتىرىلىپ، فوتو سۋرەتشى ليۋ شينحاي تۇسىرگەن التايدىڭ كوركەم كورىنىسى باسىلىپ، كورگەن جاننىڭ كوز مەيىرىن قاندىردى.

ۇعىسۋىمىزشا، كالەندارعا لي جۋاننىڭ «سولتۇستىك شينجياڭداعى جازۋشىلىق» اتتى شىعارماسىنداعى تارتىمدى سويلەمدەر باسىلىپ، لي جۋاننىڭ يۋمورلى جانە جاندى ءسوز-سويلەمى ارقىلى التايدىڭ جەرگىلىكتى سالت-ساناسى بەينەلەنگەن. لي جۋاننىڭ شىعارماسىنداعى جاندى سۋرەتتەلگەن كوكتەمنىڭ جالىندى تىرشىلىك تىنىسى مەن قىستىڭ كوركەم كورىنىسى ... ونىڭ وسى جەرگە دەگەن تەرەڭ سۇيىسپەنشىلىگىن بەينەلەيدى، مىنە، وسىنى كورىپ تاماشالاعان وقىرمان ۋاقىت پەن كەڭىستىكتەن ءوتىپ، كورىكتى شينجياڭداعى التايدىڭ كوركەم كورىنىسىن، سالت- ساناسىن ءوز كوزىمەن كورگەندەي كۇي كەشەدى.

«التايدىڭ ءتورت ماۋسىمى» اتىنداعى 2025-جىلعى كالەندارداعى فوتو سۋرەتتەردى ليۋ شينحاي تۇسىرگەن. ايماقتىق فوتو سۋرەتشىلەر قوعامىنىڭ ءتوراعاسى، شينجياڭ فوتو سۋرەتشىلەر قوعامىنىڭ القاسى، شينجياڭ ساياحات فوتو سۋرەت قوعامىنىڭ ورىنباسار ءتوراعاسى، شينجياڭ فوتو سۋرەت كاسىپتىك قوعامى اۋەدەن سۋرەت تارتۋ كوميتەتىنىڭ ورىنباسار ءتوراعاسى، شينحۋا اگەنتتىگىنىڭ، حالىق تورابىنىڭ توقتام جاساسقان فوتوشىسى بولعان ليۋ شينحاي ءوزىنىڭ دارا فوتو سۋرەت تارتۋ ەرەكشەلىگى جانە ىسىلعان ونەرىمەن التايدىڭ ءتورت ماۋسىمىنداعى ءاربىر تاماشا ءساتتى فوتوعا تۇسىرگەن. ۇشى-قيىرسىز ساحارادان قارلى اسقار تاۋعا، جىلجىپ اققان وزەن اڭعارىنان كۇنباعىس اتىزىنا دەيىن ليۋ شينحايدىڭ اياق ءىزى قالىپ، فوتو اپپاراتىندا كوركەم كورىنىستەر ساقتالدى. ونىڭ تۋىندىلارى التايدىڭ جاراتىلىستىق كوركەمدىگىن تولىق ايگىلەپ، وسىناۋ بايتاق ولكەگە دەگەن تەرەڭ سۇيىسپەنشىلىگى مەن قۇرمەتىن بەينەلەگەن.

تانىستىرۋعا قاراعاندا، «التايدىڭ ءتورت ماۋسىمى» اتىنداعى كالەندار حۋاچىڭ باسپاسىنىڭ ۇكىمەت جاق دۇكەنىندە سورەگە شىعارىلىپ ساتىلعان، بەلگىلى ساقتاۋ قۇنىنا يە، قولدانىلمالىلىعى مەن كوركەمدىك ءبىرتۇلعالانعان، ەرەكشە قاعازدان جاسالعان، وڭ-تەرىس بەتىنە باسىلعان بولىپ، ءتۇسى اشىق، كورىنىسى كوركەم؛ كالەنداردىڭ تەرىس بەتىندە بوس ورىن بار بولىپ، كۇندەلىك جازۋعا قولايلى.

جۋىق جىلداردان بەرى، ساياحات كاسىبىنىڭ قارىشتاپ دامۋىنا بايلانىستى، ايماق وزگەشە جاراتىلىستىق كورىنىس پەن مول ساياحات بايلىعىنا سۇيەنىپ ءتىپتى دە كوپ ساياحاتشىنى باۋرادى. «التايدىڭ ءتورت ماۋسىمى» اتىنداعى كالەنداردىڭ تاراتىلۋى ساياحات مادەنيەتىنىڭ تارالۋىن ونان ارى ىلگەرىلەتىپ، جەرگىلىكتى ورىن ەكونوميكاسىنىڭ جوعارى ساپالى دامۋىن ۇزدىكسىز جەبەيتىندىگى داۋسىز.

شينجياڭنىڭ جاعراپيالىق ەرەكشەلىگى — «وڭتۇستىگى قۇرعاق، سولتۇستىگى دىمقىل كەلەدى»، سولتۇستىكتەگى تاۋلى وڭىرگە جاقىنداعان سايىن، اۋاداعى دىمقىلدىق ارتىپ، سالقىنداي باستايدى... 6-ايعا تاياسا دا ءالى قار جاۋىپ تۇر، قاردىڭ جاۋعانى عاجاپتانارلىق ءىس ەمەس، عاجابى، قار ۇشقىنى قايدان پايدا بولادى؟ بار اتىراپ اپپاق تۇسكە بولەنگەن، ۇشى -قيىرسىز كەڭ دالا اق كورپەسىن قىمتانىپ جاتىر ... مۇنىڭ سىرىن ءسىز بىلمەيسىز! قار-مۇز قۇرسانعان وسى شاعىن قالاعا قالايدان قالاي تەرەڭ سۇيسپەنشىلىك ورناتتىم... كوڭىلسىزدىككە جولىققاندا وسىناۋ كورىكتى ورتادا بارلىعىن ۇمىتىپ، قاشان دا كوڭىلدى جۇرەمىن...اقاۋسىز دەنساۋلىق، شۋاقتى كۇن نۇرى، ءدامى ءتىل ۇيىرەتىن اس-سۋ، تەرەڭ دوستىق؛ قۇلپىرا اشىلعان الۋان گۇلدەر ساحاراعا كورىك بەرۋدە. اۋىل-قىستاقتىڭ كوركەم ەكەندىگىن كورىپ ـ ءبىلىپ جۇرسەك تە، ەشبىر جان مۇنداعى كوركەمدىكتىڭ سىرىنا ءۇڭىلىپ كورمەگەن بولار.

سولتۇستىكتىڭ كەڭ-بايتاق دالاسىندا، جاز سوڭىنان كۇز باسىنا دەيىن قىستاقتاردىڭ ساي-سالاسى مول ءونىم شاتتىعىنا شومادى، اعاشتىڭ بۇتاعى ماۋەلەگەن جەمىسكە تولى... كۇنباعىس كوركەمدىكتىڭ عانا ەمەس، تاماشا بولاشاقتىڭ سيمۆولى، كوپ جاعدايدا اسەرلى سەزىم مەن باتىلدىقتىڭ جارشىسى بولادى. مەن شالقىمامدا كۇنباعىستى وسىلاي سۋرەتتەۋدى ويلاستىرعام، ءبىراق، ويلاعانىمداي بولعان جوق... ولار گۇل اشىپ، شەشەكتەگەندەگى كوركەم كورىنىسمەن كوزگە ءتۇسىپ عانا قالماستان، جاراتىلىسىنداعى تاباندىلىقپەن، توزىمدىلىكپەن، قايسارلىقپەن ەرەكشەلەنەدى! بارلىق ادام كۇنباعىستىڭ گۇل اشىپ جايقالعان كەزىن تاماشالاۋعا قۇشتار، ونىڭ تاباندىلىعى، توزىمدىلىگى مەن قايسارلىعىنا  ءمان بەرگەن جان بالاسى بولماسا كەرەك.

مالشى ءۇيىنىڭ بارلىق بۇيىمى شەبەر قولدان تىگىلىپ شىعادى، تۇسكيىز، كەستەلى ورامال، اشەكەيلەنگەن شاي دوربا، تۇز دوربا، ەر-توقىم، اعاش كەبەجە سىندى قول ونەرمەن جاسالعان بۇيىمدار بولماسا وسىناۋ مالشى وتباسى قانشالىق جۇدەۋ تارتار ەدى؟ مالشى وتباسىنا باس سۇققانىمدا كەستەلى تۇسكيىزدەن تارتىپ جاعالاي كوز سالىپ، شەبەر قولدان شىققان كوركەم بۇيىمدارعا ءتانتى بولامىن. شاكەنە باسپانانى تەرەڭ سۇيىسپەنشىلىگىنە، كەربەز كوركەمدىككە بولەگەن شەبەرلىكتىڭ قىر-سىرىنا ۇڭىلەمىن، مۇنىڭ بارلىعى تۇرمىستى بەينەلەگەن عاجايىپ ءۇن، كەرەمەت سويلەمدەر سياقتى ەلەستەيدى ماعان... وتباسىنداعى بارلىق جابدىقتى ءوزى دايىنداۋ قانداي شەبەرلىك!