جۋىردا، التاي ايماقتىق مادەني ەسكەرتكىشتەر جانە مۇراجاي مەكەمەسى (مۇراجاي) ”مەنىڭ التايىم“ اتىنداعى ماي بوياۋلى سۋرەت تۋىندىلار كورمەسىن اشىپ، كوپتەگەن كوركەمونەر اۋەسكەرىن باۋرادى. بۇل رەتكى كورمە التاي ايماعىنىڭ وزگەشە جاراتىلىستىق كورىنىسىن ايگىلەپ عانا قالماستان، كورەرمەننىڭ كوز مەيىرىن قاندىردى.
كورمە زالىنداعى تۋىندىلاردىڭ ءارقايسىسى ءوزىنىڭ وزگەشە ستيلىمەن التايدىڭ حيكاياسىن بەينەلەدى. سۋرەتشىلەر ەرەن بەينەلەۋ شەبەرلىگى ارقىلى التايدىڭ كورىكتى تاۋ-وزەنىن، كوگىلدىر كول، ۇلان-بايتاق ساحاراسىن جاندى بەينەلەگەنى كورگەن كىسىنى قايران قالدىردى.
كورەرمەننىڭ كەيبىرەۋى ماي بوياۋلى سۋرەتتى تاماشالاعاندا سول كوركەم كورىنىستىڭ ىشىندە تۇرعانداي سەزىندى؛ كەيبىرەۋى كورىنىستى جاقىننان تاماشالاپ، استارىن تۇسىنۋگە تىرىستى. وسى ماي بوياۋلى سۋرەت تۋىندىلارى كورەرمەندى كوركەم كورىنىستەن سۋسىنداتىپ عانا قالماستان، ونان دا ماڭىزدىسى، جان دۇنيەسىن سەرگىتىپ، ادامدارعا التايدىڭ كوركەم كورىنىسى مەن ماي بوياۋلى سۋرەت كوركەمونەرىنىڭ تارتىمدىلىعىن تەرەڭ سەزىندىردى.
سانجىدان كەلگەن ساياحاتشى شالقار داكەن ۇلى كورمەنى كورگەننەن كەيىن تەبىرەنە تىلشىگە: سۋرەتشىنىڭ قالامىنان تۋىنداعان التايدىڭ كوركەم كورىنىسىن تاماشالاعانىمدا، شىت جاڭا الەمگە قادام تاستاعانداي بولدىم. بۇل تۋىندىلار التايعا دەگەن قىزىعۋىمدى ارتتىردى، سۋرەتتەگى جەرلەرگە بارعىم كەلدى،-دەدى.
ۇعىسۋعا قاراعاندا، وسى رەتكى ماي بوياۋلى سۋرەت تۋىندىلارى التايدىڭ جەرگىلىكتى تاڭداۋلى ماي بوياۋلى سۋرەتشىلەرىنىڭ قولىنان شىققان. بيىل 9-ايدا التاي قالالىق مادەنيەت-دەنەتاربيە، راديو-تەلەۆيزيا جانە ساياحات مەكەمەسى، التاي قالالىق مادەنيەت سارايى (اسەمونەر سارايى) ماتەريال جيناۋ جاسامپازدىق قيمىلىن ۇيىمداستىرىپ ورىستەتتى. سۋرەتشىلەر التاي قالاسىنداعى ۇلكەن قىران، قىزىلتاس كورىنىس رايونى قاتارلى كورىنىس ورىندارىنا بارىپ، جارىم اي ۋاقىت جۇمساپ 140 نەشە ماي بوياۋلى سۋرەت تۋىندىسىن جاراتتى. مۇقيات تاڭداۋ ارقىلى ەڭ سوڭىندا، 75 تۋىندى وسى رەتكى كورمەگە قويىلدى، كورمە ۋاقىتى 11-ايدىڭ 28-كۇنىنە دەيىن جالعاسادى.
التاي قالالىق مادەنيەت-دەنەتاربيە، راديو-تەلەۆيزيا جانە ساياحات مەكەمەسى پارتگرۋپپاسىنىڭ مۇشەسى جاڭ شياۋلۇڭ تىلشىگە: وسى رەتكى كورمەنى وتكىزۋدەگى ماقسات — كورەرمەنگە التايدىڭ كوركەم كورىنىسىن كوركەم تۋىندى ارقىلى بەينەلەپ كورسەتىپ، ءتىپتى دە كوپ ادامنىڭ التايدى تۇسىنۋىنە مۇمكىندىك جاساۋ. ءبىز الداعى جەردە ءتۇرلى دەنەتاربيە جارىسى مەن كولەمدى ادەبيەت-كوركەمونەر كونسەرتى قاتارلى قيمىل وتكىزىپ، ءار ۇلت بۇقاراسىنىڭ رۋحاني مادەنيەت تۇرمىسىن ونان ارى بايىتىپ، التايدى ءتىپتى دە كوپ ادامنىڭ اڭسايتىن جەرىنە اينالدىرامىز، ـ دەدى.
来源：雪都嘟/阿勒泰地区融媒体中心
记者：阿丽娜·阿依登
通讯员：吾丽帕·吾拉勒别克
编辑：哈尔勒哈西·毛吾列提
一审：米拉木古丽·穆斯那提
二审：铁木尔哈孜·木坦
终审：吐尔德别克·哈力别克
