ەگەر ءۇيىڭىز جىلىنباسا

اۋا تەمپەراتۋراسىنىڭ تومەندەۋىنە بايلانىستى، جىلۋمەن قامداۋ ماسەلەسى تۇرعىندار نازار اۋداراتىن تۇيىنگە اينالدى، جاقىندا، التاي قالاسى لانتيان جىلۋمەن قامداۋ شەكتى جاۋاپكەرشىلىك سەرىكتەستىگى قالا تۇرعىندارى اڭىس ەتكەن ءۇيدىڭ جىلىنباۋى ماسەلەسىنە قاراتا ىشكەرىلەي زەرتتەۋ جۇرگىزدى جانە تالداۋ جاسادى.

التاي قالاسى لانتيان جىلۋمەن قامداۋ شەكتى جاۋاپكەرشىلىك سەرىكتەستىگىنىڭ تەحنيكا باس ينجەنەرى جي يانشوۋ بىلاي دەدى: جىلۋمەن قامداۋ كەزىندە تۇتىنۋشىلار ءتۇرلى ماسەلەلەرگە جولىعۋى مۇمكىن، مەن تۇسىندىرگەن باسقىش بويىنشا ماسەلەنىڭ نەدە ەكەنىنە تالداۋ جاساڭىز.

1.كورشىڭىزدىڭ ءۇيى جىلى، ءوز ءۇيىڭىز جىلى بولماعان جاعدايدا

ەگەر كورشىڭىزدىڭ ءۇيى جىلى بولسا، وندا ماسەلە ءوز ۇيىڭىزدەن شىققان بولۋى مۇمكىن؛ ەگەر كورشىڭىزدىڭ ءۇيى دە جىلى بولماسا، وندا تۇتاس كۋرپستىڭ جاعدايىن تەكسەرۋ كەرەك؛ ەگەر باسقا كۋرپس جىلى بولىپ، ءسىز تۇرعان كۋرپس جىلى بولماسا، وندا ماسەلە ءوز ءۇيىڭىز تۇرعان كۋرپستىڭ جىلۋ قۇبىرى جولىنان شىققان بولۋى مۇمكىن؛ ەگەر تۇتاس شاعىن رايون جىلى بولماسا، شاعىن رايوننىڭ قۇلاقتاندىرۋ شىعارعان-شىعارماعاندىعىنا نازار اۋدارىپ، شاعىن رايوننىڭ جىلۋ قۇبىرىندا كىنارات تۋىلعان-تۋىلماعاندىعىن ۇعىسۋ كەرەك.

2.جاڭادان سالىنعان شاعىن رايوندا العاش رەت جىلۋدان پايدالانعان تۇتىنۋشى نەمەسە جىلۋمەن قامداۋدى الدىن-الا كەلىسىپ توقتاتقان تۇتىنۋشى جونىنەن العاندا

عيمارات زالىن نەمەسە ۇيدىڭ ىشىندەگى جىلۋ قۇبىرىنىڭ قاتىستى كلاپاندارىنىڭ اشىلعان-اشىلماعاندىعىن ءتۇيىندى تۇردە تەكسەرۋ ءارى ۇيدەگى جىلۋ قۇبىرىنداعى اۋانى ىعىستىرىپ، جۇيەنىڭ قالىپتى اينالىمىنا كەپىلدىك ەتۋ كەرەك. بۇدان سىرت، جىلۋ قۇبىرىن پايدالانعان ۋاقىت تىم ۇزاق بولۋ، جىلۋ قۇبىرى جولدارى مەن كلاپاننىڭ كونەرۋى سياقتى فاكتورلار دا جىلۋ اينالىمىنا ىقپال جەتكىزۋى مۇمكىن. ەگەر جىلۋ قۇبىرى بىتەلىپ قالسا، ۇيدەگى بولمەلەردىڭ تەگىس جىلى بولماۋ جاعدايى تۋىلۋى مۇمكىن.

3.تۇتىنۋشىلار ۇيىنىڭ بىردە سۋىق، بىردە جىلى بولۋ جاعدايى بايقالعاندا

بۇل ادەتتە ”اۋانى ىعىستىرۋمەن“ قاتىستى بولادى. وسى كەزدە اتۆەركا نەمەسە تىستەۋىكپەن ساعات سترەلكاسىنا قارسى باعىتتا پاردىڭ اۋا ىعىستىرۋ كلاپانىن بۇراپ اۋانى ىعىستىرۋ، شۇپەرەكپەن اۋا ىعىستىرۋ اۋزىن بۇركەپ، سۋدىڭ شاشىراۋىنان ساقتانعان ءجون. اۋا ىعىستىرۋ كلاپانىنان سۋ اققاندا عانا اۋا ىعىستىرۋ جۇمىسى ورىندالعان بولادى.

ادەتتە كۇنىنە ەكى رەت اۋا ىعىستىرۋعا بولادى، پار تەمپەراتۋراسى قالىپتى بولعانعا دەيىن جالعاسادى. بۇل ءادىس ”ستاتيكالىق قىسىممەن اۋا ىعىستىرۋ ءادىسى“ دەلىنەدى، ياعني ۇيدەگى جىلى سۋدىڭ شىعۋ كلاپانى جابىلعاننان كەيىن اۋانى تاعى ىعىستىرعاندا تەز ءارى ءونىمدى تۇردە اۋانى ىعىستىرۋعا بولادى.

تۇتىنۋشىلار جىلۋ قۇبىرىنىڭ اۋاسىن ىعىستىرۋىنا بولادى، ءبىراق سۋ جىبەرۋىنە بولمايدى. ويتكەنى سۋ جىبەرىپ پايدالانۋ جىلۋ قۇبىرىندا سۋ جەتىسپەۋ جاعدايىن، جىلۋ جۇيەسىنىڭ قىسىم تەپە-تەڭدىگىن بۇزىپ، تۇتاس جۇيەدە ورنىقتى جىلۋمەن قامداۋعا ىقپال جاسايدى. سونىمەن بىرگە، سۋ جەتىسپەۋ جاعدايى تۋىلسا، جىلۋمەن قامداۋ سەرىكتەستىگى ۇزدىكسىز سۋىق سۋ جىبەرىپ، تۇتاس جۇيەنىڭ سۋ تەمپەراتۋراسىن تومەندەتىپ، تۇرعىنداردىڭ قالىپتى جىلۋدان پايدالانۋىنا ىقپال جاسايدى.

4.سۇزگىنىڭ بىتەلگەن-بىتەلمەگەنىن تەكسەرۋ

ەگەر جوعارىداعى ماسەلەلەردىڭ بارلىعى تەكسەرىلىپ ەشقانداي كەدەرگىلىك بولماسا، ەدەننەن جىليتىن پاردان پايدالاناتىن تۇتىنۋشىلار سۇزگىنىڭ بىتەلگەن-بىتەلمەگەندىگىن ويلاستىرۋى كەرەك. قۇبىر ىشىندە ۇزاق ۋاقىت جينالعان لاس زاتتار قۇبىر ىشىندە ساقتالىپ، ەڭ سوڭىندا سۇزگىگە كىرىپ، سۇزگى بىتەلىپ، سۋ اينالىمىنىڭ ىركىلىسسىز بولماۋىن كەلتىرىپ شىعارۋى مۇمكىن. وسى كەزدە تۇتىنۋشىلار وزدەرى نەمەسە كاسىپتىك ادامداردى سۇزگىنى جۋۋعا ۇسىنىس ەتۋىنە بولادى. سۇزگىنى جۋعان كەزدە كاتەل، تەگەنەنى سۇزگىنىڭ استىنا قويىپ، سۋ كىرەتىن، قايتاتىن كلاپاندى جاۋىپ، كۇلىشپەن سۇزگىنىڭ مىس ۆەنتىن ساعات سترەلكاسىنا قارسى باعىتتا بۇراپ اشۋ كەرەك. تازالاپ جۋعاننان كەيىن، سۇزگىنى ورنىنا سالىپ، بەكىتۋ كەرەك.

التاي قالاسى لانتيان جىلۋمەن قامداۋ شەكتى جاۋاپكەرشىلىك سەرىكتەستىگىنىڭ قاتىستى جاۋاپتىسى بىلاي دەدى: سەرىكتەستىگىمىز قالا تۇرعىندارىن جىلۋمەن قامداۋعا ۇزدىكسىز نازار اۋدارىپ، بارلىق تۇتىنۋشىلاردىڭ قىستى جىلى دا جايلى وتكىزۋىنە كەپىلدىك ەتەدى.

ىقىلاستى ەسكەرتپە:

سۇزگىنى جۋعان كەزدە، سۋدىڭ اعىس مولشەرى ازايماسا نەمەسە بىرتىندەپ كۇشەيسە، سۇزگىنىڭ ۆەنتىن دەرەۋ بۇراپ قاتايتىپ، سۋ كلاپانىنىڭ ءبۇلىنىپ جابىلماي قالۋىنان ساقتانىڭىز. ەگەر ءوزىڭىز ءبىر جاقتىلى ەتە المايتىن جاعدايدا، كلاپاننىڭ بۇلىنگەنىن نەمەسە توزعانىن بايقاساڭىز، سۋ كلاپانىن الباتى قوزعاماي، دەرەۋ جىلۋمەن قامداۋ سەرىكتەستىگىنىڭ رايون جاۋاپتىسىمەن بايلانىس جاساپ، نەگىزگى كلاپاندى جاپقاننان كەيىن بارىپ تازالاعانىڭىز ءجون.