11-ايدىڭ 19-كۇنى كەشتە گەنەرال تاۋى حالىقارالىق قار شاڭعى دەمالىس رايونىنىڭ قىزمەتكەرى: قار شاڭعى تەبەتىندەر جۇمىستان تۇسە سالىسىمەن قار شاڭعى الاڭىنا كەلىپ، تۇنىق اۋادا بوي جازىپ، قار شاڭعى تەپكەننەن كەيىن ۇيلەرىنە قايتتى،-دەدى. تۇنگى قار شاڭعى تەبۋدى باستادى، كوپتەگەن قار شاڭعى اۋەسكەرى الدىن الا قار شاڭعى تەبۋگە كەلىسىپ، تۇنگى قار شاڭعى الاڭىندا كوڭىلدى قار شاڭعى تەپتى.
ىمىرت ۇيىرىلىسىمەن شىراق جانعاندا تاسپاداي تارتىلعان قار شاڭعى جولىن كورەسىز. شىراقتىڭ جارىعىندا ”مۇزداي قارۋلانعان“ قار شاڭعى اۋەسكەرلەرى قار شاڭعى جولىندا زىمىراپ، قارقىن مەن شابىتتان بارىنشا ءلاززاتتاندى. قار شاڭعى اۋەسكەرلەرى كۇندىز دە، تۇندە دە شاڭعى تەۋىپ قۇمارىنان شىقتى.
بەيجيڭنەن كەلگەن قار شاڭعى اۋەسكەرى گاۋ جىشياڭ قۋانىشتى بەينەدە تىلشىگە: كۇندىز ويىنىم قانباعان سوڭ تۇندە جالعاستى قار شاڭعى تەپتىم. تاۋ باسىنان قۇلديلاپ كەلە جاتقاندا، قۇلاعىما قار شاڭعى تاقتايشاسى مەن قاردىڭ ۇيكەلىس دىبىسى عانا ەستىلەدى، اي جارىعىندا قار شاڭعىمەن زىمىراۋ ادامدى ەرەكشە رومانتيكالى سەزىمگە بولەيدى،- دەدى.
تۇندە قار شاڭعى تەبۋ قار شاڭعى اۋەسكەرلەرىنىڭ قاجەتىن قاناعاتتاندىرۋمەن بىرگە، قىزمەتكەرلەردى شىت جاڭا تۇنگى تۇرمىس تالعامىمەن قامدادى. بيىل 10-ايدىڭ 31-كۇنى ايماقتىق مادەنيەت-دەنەتاربيە، راديو-تەلەۆيزيا جانە ساياحات مەكەمەسى جاريالاعان «قارلى مەكەن حالقىنىڭ قار-مۇز ساياحاتى قيمىلىن ورىستەتۋ جونىندەگى حابارلاندىرۋىندا» 2024 — 2025 قار ماۋسىمىندا (جاڭا جىل دەمالىسى جانە كوكتەم مەرەكەسىنىڭ قاۋىرت مەزگىلىنەن سىرت) التاي ايماعىندا قىزمەت ىستەيتىن، تۇرمىس كەشىرەتىن ءار ۇلت بۇقاراسى ازاماتتىق كۋالىگى، قوعامدىق قامتاماسىزداندىرۋ كارتوچكاسى قاتارلى كۋالىگى ارقىلى گەنەرال تاۋى، كوكتوعاي، جىكبەلەڭ حالىقارالىق قار شاڭعى دەمالىس رايونىندا اقىسىز قار شاڭعى تەبۋگە الدىن الا كەلىسۋىنە بولادى دەپ ايقىن اتاپ كورسەتىلدى. بۇل ساياساتتىڭ جولعا قويىلۋىنا ىلەسە گەنەرال تاۋى حالىقارالىق قار شاڭعى دەمالىس رايونىنىڭ تۇنگى قار شاڭعى الاڭى اشىلىپ، قىزمەتكەرلەردىڭ جۇمىستان تۇسكەننەن كەيىن قار شاڭعى الاڭىنا تىكە بارىپ، قار شاڭعى تەبۋدىڭ قىزىعىنا باتىپ، قىزمەت باسىمدىلىعىن جەڭىلدەتۋىنە مۇمكىندىك جاسالدى.
التاي قالاسىنىڭ قار شاڭعى اۋەسكەرى لي فىڭچيڭ تىلشىگە: ءبىر كۇندىك قىزمەت اياقتاعان سوڭ وسى اراعا كەلگەندە بارلىق قىسىمنان ارىلعانداي بولامىن. بۇل دا قارلى مەكەن حالقىنىڭ ەلدەن ەرەك ”قىسىمدى جەڭىلدەتۋ ءادىسى“،-دەدى.
گەنەرال تاۋى حالىقارالىق قار شاڭعى دەمالىس رايونى ساياحاتشىلارعا قىزمەت وتەۋ ورتالىعى زالىنىڭ ديرەكتورى گۋان كىشين تىلشىگە: تۇنگى قار شاڭعى الاڭىندا جينگۋاڭ قار شاڭعى جولى، كايشۋان قار شاڭعى جولى، ياڭگۋاڭ قار شاڭعى جولى سىندى 3 قار شاڭعى جولى اشىلدى ءارى شىراقتىڭ جارىعى جانە حاۋىپسىزدىك قۇرىلعىلارى قاتارلى جاقتا دارەجەسى جاپپاي جوعارىلاتىلدى. قار شاڭعى اۋەسكەرلەرىنىڭ قار شاڭعى تەبۋدىڭ قىزىعىنا بەرىلۋىنە قولايلىلىق جاراتۋ ءۇشىن، قار شاڭعى الاڭىن اشۋدان بۇرىن ءبىز قار شاڭعى جولىن قايتادان رەتتەيمىز ءارى كوپتەگەن ەسكەرتۋ بەلگىسىن ورناتىپ، حاۋىپسىز، الاڭسىز قار شاڭعى تەبۋگە كەپىلدىك ەتەمىز،-دەدى.
来源：雪都嘟/阿勒泰地区融媒体中心
记者：董世菊 实习记者：刘欢
编辑：哈尔勒哈西·毛吾列提
一审：米拉木古丽·穆斯那提
二审：铁木尔哈孜·木坦
终审：吐尔德别克·哈力别克
