التايدا ارالاپ قويىلدى

ىلە قازاق اۆتونوميالى وبلىسى قۇرىلعاندىعىنىڭ 70 جىلدىعىن قۇتتىقتاۋعا ارنالعان «قۇلاشىن كەڭ جايعان ىلەگە نازار» اتىنداعى كونسەرت 11-ايدىڭ 5-كۇنى كەشتە التاي قالاسىندا قويىلىپ، كورەرمەندەرگە جۇرەك قىلىن تەربەتىپ، كوڭىل كوكجيەگىن نۇرلاندىرعان اسەم ءان، ادەمى ءبي سالتاناتىن سيلاپ، جەرگىلىكتى تۇرعىنداردىڭ قىزۋ قارسى الۋى مەن جوعارى باعاسىنا يە بولدى.

ىلە قازاق اۆتونوميالى وبلىسى قۇرىلعاندىعىنىڭ 70 جىلدىعىن قۇتتىقتاۋ نەگىزگى تاقىرىپ ەتىلگەن وسى جولعى كونسەرت «العاشقى جۇزدەسۋ . تاۋ-وزەن»، «ديدارلاسۋ . ەپوس»، «تاعى كەزدەسۋ . قالا تۇرعىندارى» سىندى 3 بولىمنەن قۇرالعان. مۇندا، كەيىپكەرلىك، وقيعالىق بايانداۋ جانە وقيعا ءوربىتۋ سەكىلدى تاسىلدەرمەن ىلەنىڭ سان سالالى بەيزاتتىق مادەني مۇراسىن توعىستىرا كورسەتىپ، كورىنىستىك بەينەلەۋ، ۇلتتىق ءان-ءبي، كوپ مەديالى تەاتر، ءداستۇردى جاڭالاپ كورسەتۋ، حور ايتۋ، وركەستردە ورىنداۋ سەكىلدى كوركەمونەرلىك فورمالار ارقىلى ۋاقىت پەن ورىن توعىستىرىلعان دراممالىق كورىنىسكە يە تارتىمدى كونسەرت ءنومىرىن كورەرمەندەرگە تۇڭعىش رەت ۇسىندى.

سول كۇنى ساعات 21:00 دە ساۋىق كەش شات مەرەيگە تولى، اسقاق تا ايبىندى «كوركەم ىلە» اتتى كولەمدى ءان-بيمەن باستالدى. ءساندى كيىنگەن ونەرپازدار بۇرالا بيگە باسىپ، ءتۇرلى كوركەم كورىنىستى كورەرمەندەرگە سيلادى. وسىدان سوڭ، وركەستردە ورىندالعان كۇي «شوپان جىرى»، «اققۋ ماحابباتى» اتتى ءبي، ىشەكتىك مۋزيكا اسپابىنىڭ سۇيەمەلىمەن ورىندالعان ءان «كەزدەسەيىك»، كورىنىستى ءان-ءبي «كوركەم ىلە» سەكىلدى تارتىمدى كونسەرت ءنومىرى ارت-ارتىنان ورىندالىپ، جەرگىلىكتى ورىن مادەنيەتىمەن تولىق توعىسىپ، ىلەدەگى ءار ۇلت حالقىنىڭ باسىپ وتكەن شۇعىلالى تاريحي ساپارى مەن قول جەتكىزگەن كەسەك تابىسى ايگىلەندى.

التاي قالاسىنىڭ تۇرعىنى حۋ شياۋۋي بىلاي دەدى: سۇيىسپەنشىلىككە تولى كونسەرتتەن كوركەمونەردىڭ، اسەمدىكتىڭ كۇش-قۋاتىن سەزىندىم، كوڭىلىم دە ءبىر كوتەرىلىپ قالدى. ساۋىق كەشتەگى شىت جاڭا مادەني تۇرعى ىلەنىڭ كۇن سايىن گۇلدەنگەن شۋاقتى كۇندەردەگى شۇعىلالى جەتىستىكتەرىن ايگىلەپتى، بايتاق ءارى كورىكتى شينجياڭنىڭ كۇن سايىن گۇلدەنە بەرەتىندىگىنە سەنەمىن.

التاي ايماقتىق ءان-ءبي ۇيىرمەسىنىڭ جاس ونەرپازى عايني شالقار قىزى بىلاي دەدى: «مەنىڭ التايىم» ءانىن ورىندادىم. بۇل جولعى ادەبيەت-كوركەمونەر كونسەرتى ءار ۇلت بۇقاراسىنا قۋانىش سيلادى، ونان دا ماڭىزدىسى، ىلە مەن التاي اراسىنداعى مادەني اۋىس-كۇيىس پەن توعىسۋعا پارمەندى تۇرتكى بولدى، جۇڭحۋا ۇلتى ورتاق تۇلعا تانىمى جۇرت جۇرەگىنە تەرەڭ ۇيالادى.

مەملەكەتتىك 1-دارەجەلى ارتيس، «قۇلاشىن كەڭ جايعان ىلەگە نازار» اتىنداعى ساۋىق كەشتىڭ باس اتقارۋشى رەجيسسەرى كۇلايزا قادىر قىزى بىلاي دەدى: وسى جولعى ساۋىق كەش ارقىلى ىلە مەن التاي اراسىنداعى مادەني اۋىس-كۇيىستى جيىلەتىپ، ەكى جەر اراسىندا دوستىق كوپىرىن سالۋدى ماقسات ەتتىك.

ىلە قازاق اۆتونوميالى وبلىستىق ءان-ءبي تەاتر ۇيىرمەسى پارتكومىنىڭ ورىنباسار شۋجيى، ءتارتىپ تەكسەرۋ كوميتەتىنىڭ شۋجيى ۋاڭ حاۋشىڭ بىلاي دەدى: «قۇلاشىن كەڭ جايعان ىلەگە نازار» اتىنداعى وسى كونسەرت التاي حالقىنىڭ كوڭىلىنەن شىقسا ەكەن دەيمىن. سونىمەن بىرگە، بۇدان كەيىن دە ەكى جەردىڭ كوبىرەك اۋىس-كۇيىس، بارىس-كەلىس جاساسۋىن، بىرگە دامۋىن، بىرگە ىلگەرىلەۋىن، شينجياڭدى مادەنيەتپەن نارلەندىرۋگە، جۇڭحۋا ۇلى ورتاق تۇلعا تانىمىن بەكەمدەۋگە زور ۇلەس قوسۋىن ءۇمىت ەتەمىن.

«قۇلاشىن كەڭ جايعان ىلەگە نازار» اتىنداعى ساۋىق كەش 11-ايدىڭ 5-، 6-كۇندەرى التاي ايماعىندا ەكى رەت ارالاپ قويىلىپ، قالىڭ بۇقارانىڭ رۋحاني، مادەني تۇرمىسىن اناعۇرلىم بايىتتى.

باقىت ينايات ۇلى قاتارلى ايماق باسشىلارى ساۋىق كەشتى تاماشالادى.