བླ་མའི་རྣལ་འབྱོར་དོན་དམ་ལྟ་བ་མ་བཞུགས་སོ།།
དཀོན་མཆོག་གསུམ་ལ་སྙིང་ནས་སྐྱབས་སུ་མཆི།།
སྨོན་འཇུག་ཡང་དག་ངང་ནས་སེམས་བསྐྱེད་དོ།།
ཡན་ལག་བདུན་པའི་ཚོགས་ཆེན་རྫོགས་པ་དང་།།
དོན་དམ་ལྟ་བའི་རང་ངོ་སྐྱོང་བར་བགྱི།།
ཨཿ སྣང་སེམས་སྒྱུ་མར་འོད་གསལ་ཞིང་གི་དབུས།།
རྒྱུད་གསུམ་དབྱེར་མེད་བླ་མ་རྡོ་རྗེ་འཆང་།།
མཚན་དཔེ་ཡོངས་རྫོགས་ཆོས་འཆད་ཚེ་བུམ་འཛིན།།
སྐྱབས་གནས་ཀུན་འདུས་དགྱེས་བཞིན་བཞུགས་པར་གྱུར།།
རྒྱས་ན། ཨོཾ་ཨཱཿ གུ་རུ་མཉྫུ་གྷོ་ཥཱ་སིངྷ་སརྦ་སིདྡྷི་ཧཱུཾ།
བསྡུ་ན། ཨོཾ་ཨཱཿ མཉྫུ་གྷོ་ཥཱ་སིངྷ་སིདྡྷི་ཧཱུཾ། ཅི་ནུས་བཟླ།
འཁོར་འདས་དབྱེར་མེད་བརྗོད་བྲལ་ངོ་བོ་ཉིད།།
རངབཞིན་ལྷུན་འགྲུབ་སྐུ་བཞིའི་རྩལ་རྫོགས་པ།།
རིག་སྟོང་འཇ༵མ་དབྱ༵ངས་སྨྲ་བའི་སེ༵ང་གེ༵་ཡི།།
ཐུགས་རྒྱུད་རྟོགས་པའི་བྱིན་རླབས་འཕོ་བར་ཤོག། ཅེས་འདོན།
བླ་མའི་གསོལ་འདེབས་སོགས་འདོན་ན་འདིར་བཅུག །མཇུག་མཐར།
བླ་མའི་གནས་གསུམ་འོད་ཟེར་རིམ་གཅིག་ཆར།།
རང་ལ་ཕོག་པས་སྒྲིབ་དག་དབང་བཞི་ཐོབ།།
སྐུ་བཞི་མངོན་གྱུར་ཟུང་འཇུག་བླ་མའི་ས།།
མྱུར་ལམ་རྡོ་རྗེ་འཆང་ཆེན་འགྲུབ་པར་ཤོག།།
ཅེས་རྗེ་བླ་མས་སྐུ་ང་འདྲ་མ་ཞེས་གསུང་བཟང་བྱོན་པའི་བྱིན་རླབས་མཐོང་གྲོལ་ཅན་གྱི་མདུན་འཆི་མེད་ཚེ་རིང་པས་ཤར་མར་བྲིས་པའོ།།
