མཁན་ཆེན་གཞན་ཕན་སྙིང་པོ་ལ་ཞབས་བརྟན་གསོལ་འདེབས་བདུད་ལས་རྒྱལ་བ་ཞེས་བྱ་བ་བཞུགས་སོ།།
ཨོཾ་སྭསྟི་སིདྡྷཾ།
མཁས་པའི་རྣམ་དཔྱོད་མ་ཧཱ་པཎྜི་ཏ།།
ཕྱོགས་ལས་རྣམ་རྒྱལ་འཇིགས་བྲལ་གྲུབ་པའི་དབང་།།
ཐུབ་བསྟན་ཡོངས་ཀྱི་སྲོག་ཤིང་ས་སྐྱ་པ།།
གཞན་ཕན་སྙིང་པོའི་ཞབས་ལ་གསོལ་བ་འདེབས།།
མགོན་པོ་ཁྱེད་ཀྱི་འཛམ་གླིང་ཕྱོགས་ཁ་ཀུན།།
དབང་བསྒྱུར་མཁྱེན་པ་ནམ་མཁའི་མཐའ་ལྟར་ཡངས།།
རྒྱལ་བ་ཀུན་གྱི་ཐུགས་བསྐྱེད་ཆུ་གཏེར་ལས།།
རྨད་བྱུང་འཕྲིན་ལས་རྒྱས་ལ་གསོལ་བ་འདེབས།།
ས་ཆེན་གོང་མས་ཟུར་ཕུད་པོད་པན་བཅིངས།།
མཁྱེན་བརྩེའི་ལུང་རྟོགས་རྒྱ་མཚོའི་དགའ་སྟོན་ཅན།།
བཤད་སྒྲུབ་གཉིས་འཛིན་རྗེ་བཙུན་ས་དཀར་བའི།།
བསྟན་པའི་ཉི་མ་གྱུར་ལ་གསོལ་བ་འདེབས།།
དམ་ཅན་རྒྱ་མཚོས་ཀུན་ནས་སྲུང་བ་མཛད།།
ཤེས་རབ་ལྷ་མཆོག་དགྱེས་པའི་དབྱངས་ཀྱིས་བསྟོད།།
དབང་བརྒྱའི་ལྷ་ཡི་ཁམས་གསུམ་དབང་བསྒྱུར་བའི།།
གསུང་རབ་རྒྱ་མཚོའི་གཏེར་ཁྱོད་གསོལ་བ་འདེབས།།
འགའ་ཞིག་སྦྱོང་འདོད་ཁོ་ནས་ཤུལ་དུ་ལུས།།
ལ་ལས་རྟོག་གེའི་དུག་ཆུས་ཐུབ་བསྟན་དཀྲུགས།།
འགའ་ཙམ་བླུན་བསྒོམ་ཁོ་ནས་རང་བློ་རྨོངས།།
ཐོས་སྒོམ་ལྷན་དུ་བཟུང་བ་ཁྱོད་ཕྱག་འཚལ།།
ཀུན་མཁྱེན་བླ་མའི་མཛད་པའི་འཕྲིནལས་ལ།།
དགའ་ཞིང་སྤྲོ་བའི་དད་པ་རྣམ་གསུམ་གྱི།།
སྙིང་ནས་སྙིང་དབུས་གསོལ་བ་བཏབ་པ་ཡི།།
བར་ཆད་བདུད་ཀྱི་གཡུལ་ལས་རྒྱལ་བར་ཤོག།
ལམ་འབྲས་ཚོགས་བཤད་གྲོལ་བའི་བཏང་རག་གི་རྣམ་པ་ཞིག་མཇལ་བས་དགའ་དད་ཆེན་པོས་ངེས་མེད་རྒྱུ་བ་འཆི་མེད་ཚེ་རིང་པས་གསོལ་བ་བཏབ་པས་དེ་བཞིན་འགྲུབ་པའི་རྒྱུར་གྱུར་ཅིག།
