བརྟན་མ་བཅུ་གཉིས།
སངས་རྒྱས་གཉིས་པ་སློབ་དཔོན་པདྨ་འབྱུང་གནས་ཀྱིས་བལ་བོད་ཀྱི་སོ་མཚམས་ཁ་ལ་རོང་སྒོ་ལ་སོགས་པར་དམ་ལ་བཏགས། བོད་ཁམས་སྐྱོང་བར་བཀའ་བསྒོས་ཤིང་ལྟ་ལོག་མུ་སྟེགས་པའི་རྒོལ་བ་བསྲུང་བར་ཁས་བླངས་པར་གྲགས་ཤིང་། དེ་ཚེ་སློབ་དཔོན་གྱིས་མཁྱེན་བཞིན་དུ། ཁྱེད་ལྷ་སྲིན་མོ་རྣམས་ཀྱིས་ལས་ཅི་ནུས། སྲོག་སྙིང་གང་ཡིན་གསུངས་པས། བརྟན་མ་རྣམས་ཀྱིས། ཀྱཻ། དཔལ་ཆེན་སྤྲུལ་པའི་སྐུ། བདག་ཅག་རྣམས་ཀྱིས་བོད་ཁ་བ་ཅན་གྱི་ས་མཚམས་སྲུང་ནུས། སྲོག་གི་སྙིང་པོ་སོ་སོར་མཆིས་ཏེ་སློབ་དཔོན་ཉིད་ལ་འབུལ་ལོ། །ཞེས་པ་ལྟར་སློབ་དཔོན་ཆེན་པོས་དམ་ལ་བཞག་ཅིང་གཏེར་ཁ་ཕལ་མོ་ཆེའི་སྲུང་མར་བསྐོས། བདུད་མོ་ཆེན་མོ་བཞི་སྐུ་མདོག་མཐིང་ནག་བདུད་ཀྱི་བེར་ནག་དང་ཆུ་སྲིན་གྱི་རྒྱལ་མཚན་མེ་ལོང་རྣམས་འཛིན་པ། སྨན་བཙུན་རྣམས་ནི་སྐུ་མདོག་དཀར་ལྗང་དར་གྱི་ན་བཟའ་དང་མདའ་དང་རིན་ཆེན་སྒྲོམ་བུ་འཛིན་ནས་བཞུགས་པ། གནོད་སྦྱིན་བཞི་ནི་སྐུ་མདོག་དཀར་ལྗང་དར་གྱི་ན་བཟའ་དང་ཟོར་བ་དང་ཞགས་པ་ཐོགས་ནས་བཞུགས་པ། བདུད་མོ་རྣམས་ནི་རྐྱང་ལ་བཅིབས་ནས་བསྟན་པའི་བྱ་ར་མཛད་པ་དང་། གནོད་སྦྱིན་བཞི་ནི་ཤ་བ་ལ་བཅིབས་ནས་བསྟན་པའི་སྲུང་བར་མཛད་པ་དང་། སྨན་བཙུན་བཞི་ནི་རྟ་མཆོག་ལ་བཅིབས་ནས་སངས་ཀྱི་བསྟན་པ་སྲུང་བར་གྲགས།
༡ ཀུན་གྲགས་མ་དང༌། ༢ གཡའ་མ་སྐྱོང༌། ༣ ཀུན་བཟང་མོ། ༤ བགེགས་ཀྱི་གཙོ་སྟེ། བདུད་མོ་བཞི་དང༌། ༥ སྤྱན་གཅིག་མ་དང༌། ༦ དཔལ་གྱི་ཡུམ། ༧ དྲག་མོ་རྒྱལ། ༨ ཀླུ་མོ་དཀར་མོ་སྟེ་གནོད་སྦྱིན་མོ་བཞི། ༩ བོད་ཁམས་སྐྱོང་དང༌། ༡༠ སྨན་གཅིག་མ། ༡༡ གཡར་མོ་སིལ། ༡༢ གཡུ་སྒྲོན་མ་སྟེ་སྨན་མོ་བཞི་བཅས་ཁྱོན་བསྡོམས་བཅུ་གཉིས་སོ། །
