སྒྲོལ་མའི་བསྟོད་པ།
མཁས་དབང་དགེ་འདུན་ཆོས་འཕེལ་གྱིས་མཛད།
དུས་གསུམ་རྒྱལ་བ་ཀུན་གྱི་འཕྲིན་ལས་གཟུགས།།
ཐར་འདོད་སྐྱེ་རྒུ་ཡོངས་ཀྱི་དཔུང་དང་གཉེན།།
ཉམས་ཐག་འགྲོ་བ་ཀུན་ལ་བརྩེ་བའི་མ།།
རྗེ་བཙུན་མ་སྒྲོལ་མའི་ཞབས་ལ་གསོལ་བ་འདེབས།།
གཡུ་མདོག་ལང་ཚོ་དར་བ་མཛེས་པའི་སྐུ།།
སྲིད་བཞིའི་གདུང་བ་ཀུན་སེལ་སྙན་པའི་གསུང་།།
སྒྲིབ་གཉིས་གྲིབ་མ་རྣམ་དག་སྙིང་རྗེའི་ཐུགས།།
རྗེ་བཙུན་སྒྲོལ་མའི་ཞབས་ལ་གསོལ་བ་འདེབས།།
རྒྱུས་མེད་ཡུལ་དུ་ལམ་སྟོན་ས་མཁན་མཛད།།
འཇིགས་པའི་འཕྲང་དུ་སྐྱོབས་པའི་སྐྱེལ་མ་གནང་།།
དབུལ་ཞིང་ཕོངས་ཚེ་མཁོ་བའི་ལོངས་སྤྱོད་སྩལ།།
རྗེ་བཙུན་སྒྲོལ་མའི་ཞབས་ལ་གསོལ་བ་འདེབས།།
