གངས་རི་ལྷུན་པོའི་སྤོ་ལ་མི་འཇིགས་སེངྒེའི་ང་རོ་བསྒྲགས་པས་ལྟ་ངན་ཝ་ཚོགས་འཇོམས་པའི་ཐུབ་བསྟན་གངས་རི་སྐྱོང་བའི་བཤེས་གཉེན་གང་གི་ཞབས་བརྟན་རྡོ་རྗེའི་གད་རྒྱངས།
སྦྱང་གཞི་དཀྱིལ་འཁོར་བཞི་ཡི་ཞིང་ས་ལ། །
སྦྱོང་བྱེད་དབང་བཞིའི་གྲུ་ཆར་ཕབ་པའི་མཐུས། །
སྦྱངས་འབྲས་སྐུ་བཞིིའི་ལོ་ཏོག་སྨིན་པ་ཡི། །
རིགས་ཀྱི་ཁྱབ་བདག་བླ་མས་དགེ་ལེགས་སྩོལ། །
རྣམ་དག་ཚུལ་ཁྲིམས་གཙང་མའི་ས་གཞི་བརྟན། །
སྨོན་འཇུག་བྱང་ཆུབ་སེམས་ཀྱི་ཡལ་ག་རྒྱས། །
བསྐྱེད་རྫོགས་ཟབ་མོའི་འབྲས་བུས་དུད་པ་ཡི། །
སུམ་ལྡན་རྡོ་རྗེ་འཛིན་པ་ཞབས་བརྟན་གསོལ། །
ཐོས་དང་བསམ་པའི་ལུས་སྟོབས་གཟི་བྱིན་འབར། །
ཉམས་དང་རྟོགས་པའི་རྩལ་ཆེན་རབ་ཏུ་རྫོགས། །
འཆད་རྩོད་རྩོམ་པའི་གཡུ་རལ་གསིག་པ་ཡི། །
སྨྲ་བའི་སེང་གེ་ཡུན་རིང་ཞབས་བརྟན་གསོལ། །
སྦྱང་གཞི་ཕུང་ཁམས་སྐྱེ་མཆེད་ལྕགས་ཀྱི་ཁམས། །
སྦྱོང་བྱེད་རིམ་གཉིས་ཟབ་མོའི་གསེར་འགྱུར་རྩིས། །
སྦྱངས་འབྲས་སྐུ་བཞིིའི་གསེར་དུ་བསྒྱུར་བ་ཡི། །
ས་སྐྱའི་ལམ་འབྲས་བླ་མ་ཞབས་བརྟན་གསོལ། །
འཁོར་བའི་འཁྲུལ་སྣང་དག་པའི་སྣང་བ་ཤར། །
ཐམས་ཅད་བདེ་ཆེན་ཡེ་ཤེས་གཅིག་ཏུ་བཟླུམས། །
ཟག་མེད་འཇའ་ལུས་རྡོ་རྗེའི་སྐུ་བརྙེས་ཏེ། །
བསྟན་འགྲོའི་ཕྲིན་ལས་འབད་མེད་ལྷུན་འགྲུབ་ཤོག །
མ་དག་སྣང་བ་ཉམས་ཀྱི་སྣང་བ་འཆར། །
ཉམས་ཀྱི་སྣང་བ་དག་པའི་སྣང་བ་འཆར། །
གསང་གསུམ་མི་ཟད་རྒྱན་གྱི་འཁོར་ལོ་ཡིས། །
བཀྲ་ཤིས་སྣང་བས་ས་གསུམ་ཁྱབ་གྱུར་ཅིག །
འཇིགས་པའི་ཉམས་ཀྱིས་མེ་དཔུང་རབ་ཏུ་འཁྲིགས། །
འཇིགས་རུང་སྒྲ་ཡིས་སྲིད་གསུམ་རབ་ཏུ་འདར། །
འཇིགས་བྱེད་ཁྲོ་བོའི་ཐུགས་ཀྱིས་རྣམ་རྟོག་འཇོམས། །
འཇིགས་མཛད་གུར་གྱི་མགོན་པོས་སྲུང་སྐྱོབ་མཛོད། །
ཅེས་མདོ་ཁམས་ཀྱི་བཤད་གྲྭ་ཆེན་མོ་རྫོང་སར་ལྔ་རིག་ནང་བསྟན་སློབ་གླིང་གི་དགེ་བའི་བཤེས་གཉེན་ཆེན་པོ་མཁན་རིན་པོ་ཆེ་གཞན་ཕན་སྙིང་པོའི་ཞབས་བརྟན་འདིའང་། དཔལ་ས་སྐྱའི་ཆོས་བརྒྱུད་འཛིན་པའི་རྫོང་སར་བཤད་གྲྭའི་ཐོས་བརྩོན་པ་གྲྭ་འཇམ་དབྱངས་སྦྱིན་པས་བསྐུལ་ངོར་ཁྲོྃ་སྨྱོན་ཧེ་རུ་ཀས་ཆོས་སྐྱོང་ལ་འཕྲིན་བཅོལ་ཡང་ཡང་བགྱིས་ཤིང་བྲིས་པའི་དགེ་བས་དམ་པ་གང་གི་ཞབས་པད་རྡོ་རྗེའི་ཁམས་སུ་བརྟན་ཞིང་མཛད་འཕྲིན་མཁའ་ལྟར་མཉམ་པའི་རྒྱུར་གྱུར་ཅིག།
