ཀྱེ་རྡོར་རྒྱུད་ཀྱི་བཀླག་ཐབས་ཟུང་འཇུག་གྲུབ་སྟེར་ཞེས་བྱ་བའི་མཇུག་གཏམ།
ཀུན་གཟིགས་མཁྱེན་བརྩེ་རིན་པོ་ཆེས་ཡོངས་རྫོགས་བསྟན་པའི་མངའ་བདག་ས་སྐྱ་པ་ཀུན་དགའ་སྙིང་པོའི་དུས་ཆེན་ས་སྐོར་ཞེས་གྲགས་པ་འདི་ལ་ཇ་ཡུན་ཙམ་ཚོགས་འདོན་ལས། བླ་མཆོད་སྒྲུབ་མཆོད་སོགས་རྒྱ་ཆེ་བ་གང་ཡང་མི་འདུག་པས། ས་ཆེན་སོགས་ཀྱི་དུས་ཆེན་ཁྱད་འཕགས་རྣམས་སུ་སྒྲུབ་མཆོད་སོགས་རྣམ་དཀར་རྒྱ་ཆེ་བ་རེ་བསྒྲུབ་རྒྱུ་ཡོད་ན། ཕྱི་ནང་དགོས་གནད་ཁྱད་པར་བརྟེན། བསྟན་འགྲོ་སྤྱི་དང་། ཁྱད་པར་ས་སྐྱ་པའི་བསྟན་པ་འཕེལ་རྒྱས་འོང་བའི་རྒྱུ་རྐྱེན་ཕུན་སུམ་ཚོགས་པར་ངེས་པས་ཆོས་སྡེ་ཀུན་གྱིས་ཐུགས་ལ་བཞག་གལ་ཆེ་ཞིང་། དེ་ཙམ་རྒྱ་ཆེ་བ་མ་འགྲུབ་ན་ཡང་། སྔར་འདོན་སྲོལ་གཞིར་བཞག་ཐོག་ཏུ་རྒྱུད་ཀྱི་བཀླག་ཐབས་འདི་ལ་བརྟེན་ནས་རྩ་རྒྱུད་བརྟག་གཉིས་ཚོགས་པ་སྤྱི་མགོ་ནས་ཚར་རེ་ཡང་གང་འགྲུབ་འདོན་རྒྱུ་བྱུང་ན་དགོས་གནད་མི་ཆུང་བས་དེ་ལྟར་བགྱི་འོས་སོ་ཞེས་རྒྱུད་ཀྱི་བཀླག་ཐབས་རྡོ་རྗེའི་ཚིག་དོན་རབ་ཏུ་གསལ་བ་ལྗགས་ཙམ་མཛད་པ་ཆེད་གནང་བཅས་བཀའ་ལུང་སྤྱི་བོར་ཕེབས་པའི་བཀའ་དྲིན་སྙིང་བཅང་གིས་རྒྱུད་ཀྱི་བཀླག་ཐབས་སྤར་དུ་བསྒྲུབས་པ་དང་བཅས་མཆེད་དགོན་རྣམས་ལ་འཕྲོས་ཞུས་ཀྱི་མཇུག་དགེའི་ཤིས་སྨོན་རིམ་པ་ཡང་།
དུས་གསུམ་རྒྱལ་བའི་གསང་བ་སྔགས་ཀྱི་མཛོད།།
རྡོ་རྗེའི་རྒྱུད་སྡེར་འཕོས་པ་ཀུན་གྱི་མཆོག།
ཐབས་ཤེས་ཟུང་འཇུག་རྒྱ་མཚོའི་ཁྱབ་བདག་ཆེ།།
དཔལ་ལྡན་བརྟག་པ་གཉིས་པའི་བཀྲ་ཤིས་ཤོག། ༡
རྡོ་རྗེ་ཐེག་པའི་ཉེ་ལམ་ཀུན་གྱི་ཕུལ།།
ཕུལ་བྱུང་ལམ་དང་འབྲས་བུའི་གདམས་ངག་མཆོག།
མཆོག་ཐུན་དངོས་གྲུབ་འདོད་རྒུ་འཇོ་བའི་དཔལ།།
དཔལ་ལྡན་ས་སྐྱའི་བསྟན་པ་རྒྱས་གྱུར་ཅིག། ༢
སྣང་གྲགས་རྟོག་ཚོགས་ལྷ་སྔགས་ཏིང་ངེ་འཛིན།།
སྨྲ་བརྗོད་སྒུལ་བསྐྱོད་རྡོ་རྗེའི་གླུ་གར་བསྒྱུར།།
གོས་རྒྱན་བཟའ་བཏུང་འདོད་ཡོན་ཚོགས་སུ་རོལ།།
འཁོར་འདས་རིག་སྟོང་དབྱེར་མེད་མངོན་འགྱུར་ཤོག། ༣
ཅེས་རྣམ་དཀར་སྒྲུབ་པ་པོ་གསེར་ལྗང་མཁན་མིང་འཇམ་དབྱངས་དགེ་ལེགས་ཀྱིས་གསོལ་སྨོན་བགྱིས་པའོ།། །།
