གསོལ་འདེབས་སྣ་ཚོགས་བཞུགས་སོ།།
ཨེ་མ་ཧོ། བདེ་ཆེན་རྒྱལ་བོ་ཀུན་བཟང་རྒྱལ་བ་འདུས།།
ཀུན་མཁྱེན་དབང་པོ་ཤེས་རབ་སྨྲ་བའི་སེང༌།།
འཛམ་གླིང་མཁས་མང་གཙུག་རྒྱན་མཉམ་མེད་པ།།
ཤེས་རབ་རྒྱལ་མཚན་ཞབས་ལ་གསོལ་བ་འདེབས།།
༧ཤེས་རབ་ཕར་ཕྱིན་ཀུན་བཟང་བོན་སྐུ་རྗེ།།
ཤེས་རབ་སྨྲ་སེང་ཀུན་གསལ་རྫོགས་སྐུ་རྗེ།།
ཤེས་རབ་རྒྱལ་མཚན་ཀུན་མཁྱེན་སྤྲུལ་སྐུ་རྗེ། །
ཤེས་རབ་དགོངས་རྒྱལ་རྗེ་ལ་གསོལ་བ་འདེབས།།
༧སྐྱབས་གནས་མ་ལུས་འདུས་པའི་ངོ་བོ་ཉིད།།
བླ་མེད་ཐེག་པའི་མཛོད་འཛིན་རྣལ་འབྱོར་བ།།
ཡང་སྲིད་ཆེན་པོ་ནམ་མཁའ་རྒྱལ་མཚན་ལ།།
གསོལ་བ་འདེབས་སོ་བྱིན་གྱིས་བརླབ་ཏུ་གསོལ།།
༧ཟླ་བྲལ་ཨ་དཀར་བོན་བསྟན་དར་རྒྱས་ཡུལ།།
མདོ་སྨད་སྣང་ཞིག་གདུང་ལས་འཁྲུངས་པའི་སྟོན།།
རྒྱལ་ཀུན་ངོ་བོ་མཚན་དཔེའི་ཡོན་ཏན་རྫོགས།།
སངས་རྒྱས་མི་གཟུགས་སྤྲུལ་ལ་གསོལ་བ་འདེབས། །
༧འགྲོ་མགོན་ཚེ་དབང་ཐུགས་ཀྱི་སྤྲུལ་བ་ལས།།
དབང་དྲག་རྒྱ་མཚོ་ཚེ་དབང་ལྷུན་གྲུབ་དང༌།།
ཀུན་བཟང་ལྷུན་གྲུབ་ཚེ་དབང་མཆོག་ལེགས་དང༌།།
གཡུང་དྲུང་དབང་རྒྱལ་རྗེ་ལ་གསོལ་བ་འདེབས།།
༧ཐུགས་རྗེ་བྱིན་རླབས་མཆོག་ཐུན་དངོས་གྲུབ་སྩོལ།།
མི་འགྱུར་གཡུང་དྲུང་དབྱིངས་ཀྱི་རང་བཞིན་ཉིད།།
མ་འགག་གསལ་བ་སྲིད་པའི་དབལ་བོན་རྗེ།།
སྔོན་བྱོན་བསྟན་པའི་སྲོལ་འཛིན་སྤྲུལ་བའི་སྐུ།།
རིགས་ཀུན་ཁྱབ་བདག་རྗེ་ལ་གསོལ་བ་འདེབས།།
༧བསླབ་གསུམ་བསྟན་པའི་བདག་ཉིད་འགྲོ་བའི་མགོན།།
སྔོན་ཚེ་བྱ་བཏང་རྣལ་འབྱོར་དྲུང་མུའི་མཚན།།
ཐང་གཤེན་ཆབ་དཀར་འགྲོ་འདུལ་ཐབས་མཁས་པ།།
ངག་དབང་རྣམ་རྒྱལ་ཞབས་ལ་གསོལ་བ་འདེབས།།
༧རྒྱལ་གཤེན་དྲན་པའི་ཐུགས་བསྐྱེད་རྣམ་རོལ་བ།།
རྒྱལ་བསྟན་འཛིན་པའི་དཔལ་ཤར་སྣང་ཞིག་པ།།
རྒྱལ་ཚབ་ཤེས་རབ་བློ་ལྡན་དབང་རྒྱལ་ཞབས།།
རྒྱལ་བསྟན་ཉིན་མོར་བྱེད་མཛད་གསོལ་བ་འདེབས།།
༧དྲི་མེད་རྒྱལ་བསྟན་སྙིང་བོ་མཛོད་བརྒྱའི་སྒོ།།
འབྱེད་ལ་འཇིགས་མེད་སྨྲ་བའི་དབང་བོ་མཆོག།
ཀ་དག་རིག་པའི་རང་མདངས་རང་ཤར་བ།།
འདྲེན་མཆོག་མངྒ་ཝེར་ཞིར་གསོལ་བ་འདེབས།།
༧ཨེ་མ་ཧོ།སྐུ་གསུམ་རྣམ་རོལ་གྲུབ་བརྙེས་གྱེར་མི་འོད།།
རང་གྲོལ་སྐྱང་ལ་འགྲོ་བའི་མགོན་དུ་སྤྲུལ།།
བསྟན་པ་མཁའ་མཐར་སྤེལ་བའི་སྲོལ་འཛིན་པ།།
བསླབ་གསུམ་དབང་གི་རྒྱལ་བོར་གསོལ་བ་འདེབས།།
གང་ཁྱོད་གཡུང་དྲུང་ལྷུན་པོར་སྐུ་རུ་བསྟན།།
བཤད་སྒྲུབ་སྒོམ་པའི་བསྟན་པ་རིན་པོ་ཆེ།།
ཆུ་བོའི་རྒྱུན་དང་མེ་བཞིན་རབ་འཕེལ་ཏེ།།
འགྲོ་རྣམས་སྲིད་པའི་མཚོ་ལས་བསྒྲལ་བར་ཤོག།
༧ཨེ་མ་ཅི་པར་རཏྣ་པ་ཏ་ཡ།།
ཐོས་པས་རྒྱུད་སྦྱོང་བསམ་པའི་སྒྲོ་འདོགས་ཆོད།།
སྒོམ་པས་ལ་བཟླ་ཤུགས་འབྱུང་གཉུག་མའི་ངང༌།།
བསྟན་འགྲོ་ཕན་བདེ་བསྐྱེད་ལ་བདག་གིར་བ།།
ལུང་རྟོགས་སྐལ་བཟང་རྒྱ་མཚོར་གསོལ་བ་འདེབས།།
༧རྨད་བྱུང་རྣམ་དཀར་དགེ་བའི་གྲུ་ཆར་གྱིས།།
སྐལ་ལྡན་ཞིང་སར་ངེས་ལེགས་མྱུ་གུའི་རྩེར།།
སྤང་རྟོགས་ལྷུན་གྱིས་གྲུབ་པའི་འབྲས་བཟང་སྨིན།།
གདུལ་བྱ་རྒྱ་མཚོའི་དཔལ་ལ་གསོལ་བ་འདེབས།།
བསླུ་མེད་མཆོག་གསུམ་སྲུང་མའི་བྱིན་རླབས་ལས།།
དཔལ་ལྡན་བླ་མའི་ཡང་སྤྲུལ་མྱུར་བྱོན་ཏེ།།
བཤད་སྒྲུབ་སྒོམ་པའི་བསྟན་པ་ཡུན་རིང་དུ།།
འཛིན་སྐྱོང་སྤེལ་བ་གེགས་མེད་འགྲུབ་པར་ཤོག།
༧དཔལ་ལྡན་བླ་མའི་རྣམ་པར་ཐར་བ་ལ།།
སྐད་ཅིག་ཙམ་ཡང་ལོག་ལྟ་མི་སྐྱེ་ཞིང༌།།
ཅི་མཛད་ལེགས་པར་མཐོང་བའི་མོས་གུས་ཀྱིས།།
བླ་མའི་བྱིན་རླབས་སེམས་ལ་འཇུག་པར་ཤོག།
