སྔོན་འགྲོའི་ངག་འདོན་བསླབ་གསུམ་རིན་ཆེན་
འདྲེན་པའི་ཤིང་རྟ་ཞེས་བྱ་བ་
བཞུགས་སོ།།
བླ་མ་དང་ལྷག་པའི་ལྷ་འོད་དཀར་གནས་འཛིན་ལ་ཕྱག་འཚལ་ལོ།། དེ་ལ་འདིར་དོན་རྣམ་པ་བཅུ་གཉིས་ཀྱིས་བསྟན་ཏེ། ཐོག་མར་ཐོ་རངས་མལ་ནས་ལྡང་བའི་ཚེ། དུས་གསུམ་གྱི་བག་སྒྲིབ་ཐམས་ཅད་རླུང་རོ་གསུམ་མམ་དགུས་མ་ལུས་པ་ཕྱིར་དབྱུང་ཞིང་། ཤེས་པ་རྣལ་དུ་ཕབ་ནས་བསམ་གཏན་གྱི་སྣོད་དུ་རུང་པར་བྱས་ལ། དེ་ནས། བླ་མ་མཁྱེན། བླ་མ་མཁྱེན། བླ་མ་མཁྱེན་ནོ།། ཞེས་གདུང་ཤུགས་དྲག་པོས་བོས་ལ། སྙིང་དབུས་ཀྱི་བླ་མ་རྩ་དབུ་མའི་ལམ་བརྒྱུད་དེ་སྤྱི་བོའི་གཙུག་གི་ནམ་མཁའ་ལ་ཡེ་རེ་བཞུགས་པར་བསམ་ཞིང་། སྙན་པའི་དབྱངས་ཀྱིས་འདི་སྐད་བརྗོད་དོ། སྙིང་དབུས་དག་པ་བདེ་ཆེན་ཞིང་ཁམས་ནས། ལྷན་སྐྱེས་ཡེ་ཤེས་ངོ་བོ་བླ་མ་རྗེ་། ཉོན་མོངས་གདོན་གྱིས་གཟེར་བའི་སྐལ་ངན་བདག། ཐར་མེད་འཁོར་བའི་མཚོ་ལས་བསྒྲལ་བའི་ཕྱིར། དབུ་མ་རྩ་མཆོག་ལམ་ནས་ཡར་བྱོན་ལ། སྤྱི་བོ་བདེ་ཆེན་འཁོར་ལོའི་དབུས་བཞུགས་ནས། སྣང་བ་སྒྱུ་མར་འབྱོང་པར་བྱིན་གྱིས་རློབས། གཉིས་པ་དལ་འབྱོར་རྙེད་དཀའ་བ་ནི། ད་རེས་དམྱལ་བ་ཡི་དྭགས་དུད་འགྲོ་དང་། ཚེ་རིང་ལྷ་དང་ཞིང་ཁམས་སྟོང་པ་དང་། མཐའ་འཁོབ་ཀླ་ཀློ་དབང་པོ་མ་ཚང་པ། ལྟ་བ་ལོག་དང་མི་ཁོམ་བརྒྱད་སྤངས་ནས། མི་ཡི་དབུས་སྐྱེས་དབང་པོ་སྒོ་ལྔ་ཚང་། ལས་མཐའ་མ་ལོག་སངས་རྒྱས་བསྟན་ལ་དད་། སྟོན་པ་བྱོན་དང་བོན་གསུང་དེ་ཉིད་གནས། འཇུག་པའི་སྟོབས་ཡོད་དགེ་བའི་བཤེས་ཀྱིས་ཟིན། འདི་འདྲའི་ལུས་རྟེན་རྙེད་པ་ད་རེས་ཙམ། བློ་སྣ་དགེ་ལ་བསྒྱུར་ཅིག་སྙིང་རྗེའི་ལྷ། ལོག་པའི་ལམ་ལ་མ་གཏོང་གྱེར་སྤུངས་ཆེ། མྱུར་དུ་ཐར་པར་དྲོངས་ཤིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། དུག་ལྔས་སེམས་ད ཀྲུག་ལུས་ལ་ནད་ཀྱིས་གདུངས། བགེགས་ཀྱིས་རྒྱུད་རློམས་དགྲ་གཉེན་གྱིས་འཚེ་བ། འཁོར་བས་བསླུས་དང་ཤེས་རབ་དམན་པ་དང་། འདུ་འཛིས་གཡེང་ཞིང་དགེ་བསམ་མི་འགྲུབ་དུས། བློ་སྣ་དགེ་ལ་བསྒྱུར་ཅིག་སྙིང་རྗེའི་ལྷ། ལོག་པའི་ལམ་ལ་མ་གཏོང་གྱེར་སྤུངས་ཆེ། མྱུར་དུ་ཐར་པར་དྲོངས་ཤིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། གསུམ་པ་ཚེ་མི་རྟག་པ་ནི། ཕྱི་སྣོད་འཇིག་ཅིང་ནང་བཅུད་སེམས་ཅན་སྟོང་། སངས་རྒྱས་སྐུ་འདས་སྐྱེ་དགུའི་བདག་པོའང་འཆི། དེ་བཞིན་བདག་ཀྱང་ངེས་པར་འཆི་དགོས་ཤིང་། ནམ་འཆི་ཆ་མེད་འཆི་ཁར་ཅིས་མི་སྟོང་། འཆི་བའི་དུས་བབ་འབྱུང་བ་འཇིག་སྡུད་ཚེ། ལུས་ལ་ན་ཚ་སེམས་ལ་འཇིགས་སྐྲག་ཆེ། འདི་འདྲའི་སྡུག་བསྔལ་ཆེན་པོས་བདག་གནོན་ཚེ། ཐུགས་རྗེས་སྐྱོབས་པ་མ་ཆུང་སྙིང་རྗེའི་ལྷ། ངན་སོང་གཡང་ལ་མ་གཏོང་གྱེར་སྤུངས་ཆེ། ཕྱི་མའི་ལམ་སྣ་འདྲེན་ཅིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། བཞི་པ་འཁོར་བའི་ཉེས་དམིགས་ནི། བདག་ནི་ཉོན་མོངས་དུག་གསུམ་དབང་གྱུར་པས། ཕྱི་མར་ངན་སོང་སྡུག་བསྔལ་མྱོང་འགྱུར་ན། ཡང་སོས་ཐིག་ནག་བསྡུས་འཇོམས་ངུ་འབོད་དང་། ངུ་འབོད་ཆེན་པོ་ཚ་བ་ཚ་བ་ཆེ། མནར་མེད་པ་དང་ཉེ་འཁོར་བཅུ་དྲུག་སོགས། ལྕགས་བསྲེགས་གཞི་ལ་འབར་བ་མེས་སྲེག་ཅིང་། རྣོ་གཅོད་མཚོན་ཆས་ཡང་ཡང་གཤའ་བཏུབ་དང་། སོག་ལེས་གཤོགས་ཅིང་རི་རབ་བར་དུ་གཅུར། ལྕགས་བསྲེགས་ཁང་པ་མེ་འབར་ནང་དུ་སྲེག། ཁྲོ་ཆུའི་ཀློང་འཚོད་གསལ་ཤིང་འབར་བས་ཕུག། མེ་མ་མུར་གྱིས་རྐང་ལུས་གང་རེག་འཚིག། རོ་མྱག་འདམ་དུ་མཆུ་རྣོན་འབུ་ཡིས་ཟ། སྤུ་གྲིའི་ལམ་ཕྱིན་རྐང་པའི་ཤ་རུས་གཅོད་། རལ་གྲིའི་ཚལ་གྱིས་རང་ལུས་ཚལ་པར་གཤག། ཐལ་ཚན་ཆུ་བོས་ཤ་རུས་སོ་སོར་བྱེ། ཤ་མ་རིར་འཛེག་མི་ཐར་ཆུ་གྲིས་གཅོད་། འདི་འདྲའི་འཇིགས་པའི་ཡུལ་དུ་བདག་ལྷག་ཚེ། ཐུགས་རྗེས་གཟིགས་པ་མ་རལ་སྙིང་རྗེའི་ལྷ། སྡུག་བསྔལ་འདི་ལས་སྐྱོབས་ཤིག་གྱེར་སྤུངས་ཆེ། གནས་ངན་འདི་ལས་དྲོངས་ཤིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། དེ་བཞིན་གངས་སྦུབས་རླུང་ནག་འཚུབ་མའི་ནང་། རང་ལུས་གྲང་ལྷགས་ཆེན་པོས་གཟིར་བའི་ཚེ། ལུས་ལ་ཆུ་བུར་རྡོལ་དང་རྣག་ཁྲག་ཟག། ཨ་ཆུ་ཀྱི་ཧུད་མྱ་ངན་སྨྲེ་ངག་འདོན། སྐད་འདོན་མི་ནུས་སོ་གཉིས་ཐུམ་ཐུམ་འགྲིག། རང་ལུས་ཨུ་དཔལ་དང་ནི་པདྨ་དང་། པདྨ་ཆེ་ལྟར་ཚལ་པར་འགས་གྱུར་ཏེ། གྲང་བའི་སྡུག་བསྔལ་ཤིན་ཏུ་བཟོད་དཀའ་ཞིང་། ཉི་ཚེ་པའང་དེ་བཞིན་ཡ་ངའི་གནས། འདི་འདྲའི་སྡུག་བསྔལ་དྲག་པོས་བདག་མནར་ཚེ། ཐུགས་རྗེས་གཟིགས་པ་མ་རལ་སྙིང་རྗེའི་ལྷ། སྡུག་བསྔལ་འདི་ལས་སྐྱོབས་ཤིག་གྱེར་སྤུངས་ཆེ། གནས་ངན་འདི་ལས་དྲོངས་ཤིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། ཡི་དྭགས་གནས་ན་འདུག་དང་མཁའ་ལ་རྒྱུ་། རྒྱུ་དྲུག་འཁོར་བ་ལ་སོགས་བཀྲེས་སྐོམ་དང་། ལུས་ལ་སྐྱོན་ཆགས་ཟས་སྐོམ་ཁར་མི་ཐར། སེམས་ལ་སྐྱོན་ཆགས་བཟའ་བཏུང་མི་གཙང་མཐོང་། མེ་ལྕེའི་ཕྲེང་བ་ཁ་ནས་འབར་བ་སོགས། འཇིགས་སྐྲག་ཡ་ངའི་སྣང་བ་དཔག་ཏུ་མེད་། བྱོལ་སོང་གནས་ན་ལས་ཀྱིས་སྦྱོང་བ་དང་། བར་ན་འཐུམ་དང་མཁའ་ལ་རྐྱེན་ཐར་སོགས། གཅིག་གིས་གཅིག་ཟ་གནོད་ཅིང་འཚེ་བ་དང་། མུན་པ་ནག་པོ་རབ་ཏུ་གཏིབས་པ་དང་། གསོད་གཅོད་བཤའ་གཏུབ་བརྡུང་བརྡེག་ལ་སོགས་པའི། བཀོལ་སྤྱོད་ངལ་དུབ་ལས་ལ་ཟད་པ་མེད་། འདི་འདྲའི་མ་དག་ཡུལ་དུ་བདག་ལྷག་ཚེ། ཐུགས་རྗེའི་གཟིགས་པ་མ་རལ་སྙིང་རྗེའི་ལྷ། སྡུག་བསྔལ་འདི་ལས་སྐྱོབས་ཤིག་གྱེར་སྤུངས་ཆེ། གནས་ངན་འདི་ལས་དྲོངས་ཤིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། ལྔ་པ་མཚམས་སྦྱར་ཏེ་ལས་ཀྱིས་རྣམ་བཞག་ནི། མི་ལ་སྡུག་བསྔལ་ཡ་བཞི་ཟུང་བརྒྱད་རྒྱས། ལྷ་མིན་འཐབ་རྩོད་ལྷ་ལ་ཕམ་ལྟུང་དང་། མདོར་ན་འཁོར་བའི་གནས་རིགས་དྲུག་པོ་འདིར། གར་སྐྱེས་ཅི་བྱས་སྡུག་བསྔལ་རང་བཞིན་ལས། གཅིག་མེད་གྱུར་པ་འདི་ནི་རབ་ངེས་ནས། ད་རེས་ཐར་པའི་ལམ་མཆོག་སྒྲུབ་པ་ལ། སྲོག་གཅོད་མ་བྱིན་ལེན་དང་མི་ཚངས་སྤྱོད། རྫུན་དང་ཕྲ་མ་ཚིག་རྩུབ་ངག་འཁྱལ་བ། མངན་སེམས་གནོད་སེམས་ལོག་ལྟ་ལ་སོགས་པའི། ལས་དང་ཉོན་མོངས་དྲག་པོས་བདག་གདུང་ཚེ། བློ་སྣ་དགེ་ལ་བསྒྱུར་ཅིག་གཤེན་ལྷ་འོད། ལོག་པའི་ལམ་ལ་མ་གཏོང་གྱེར་སྤུངས་ཆེ། ཐར་པའི་ལམ་ལ་དྲོངས་ཤིག་མཉམ་མེད་པ། དབྱེ་བ་མེད་དོ་དྲིན་ཆེན་བླ་མ་མཁྱེན། དྲུག་པ་སྐྱབས་འགྲོ་ནི། མདུན་མཁར་སེང་ཁྲི་པད་ཉི་ཟླ་བའི་སྟེང་། རྩ་བའི་བླ་མ་ལོངས་སྐུའི་ཆས་ཀྱིས་བརྒྱན། སངས་རྒྱས་བོན་དང་སེམས་དཔའི་ཚོགས་རྣམས་དང་། ཡི་དམ་མཁའ་འགྲོ་སྲུང་མས་བསྐོར་ནས་བཞུགས། གཤེན་རབ་བླ་མ་སྐུ་གསུམ་འབྱུང་གནས་དཔལ། དུས་གསུམ་བདེར་གཤེགས་འགྲོ་བ་ཡོངས་ཀྱི་མགོན། སྐུ་གཟུགས་ཞལ་སྐྱིན་སྐུ་གདུང་གསུང་རབ་རྟེན། ཕྱོགས་བཅུའི་གཤེན་རབ་ཐར་ལམ་སྟོན་པའི་སྒྲོན། གནས་བཞིར་ཕྱག་འཚལ་འགྲོ་ཀུན་སྐྱབས་སུ་མཆིའོ།། བདུན་པ་སེམས་བསྐྱེད་ནི། ཀྱེ་མ་ཁམས་གསུམ་འཁོར་བའི་སེམས་ཅན་རྣམས། ཀུན་ཀྱང་ཕ་མར་མ་གྱུར་མེད་ངེས་པས། ཐམས་ཅད་སྡུག་བསྔལ་ལས་གྲོལ་བདེ་ལྡན་ཏེ། རྟག་ཏུ་བདེ་སྐྱིད་དཔལ་ལ་སྤྱོད་གྱུར་ཅིག། ཇི་ལྟར་རྒྱལ་བ་འཕགས་པ་ཅི་བཞིན་དུ་། འདི་སོགས་དུས་གསུམ་དགེ་བའི་མཐུ་དཔལ་གྱིས། སེམས་ཅན་སངས་རྒྱས་ཐོབ་པར་བྱ་བའི་ཕྱིར། བདག་ནི་བྱང་ཆུབ་མཆོག་ཏུ་སེམས་བསྐྱེད་དོ།། བརྒྱད་པ་ཡིག་བརྒྱའི་སྒོམ་ཟླས་ནི། རང་གི་སྤྱི་གཙུག་པད་དཀར་ཉི་ཟླའི་སྟེང་། དྲིན་ཆེན་བླ་མ་གཤེན་ལྷའི་རྣམ་པ་རུ་། དཀར་གསལ་རྒྱན་ལྡན་གཡོ་མེད་བཞུགས་པ་ཡི། ཐུགས་ཁར་ཟླ་སྟེང་བསྭོའི་མཐར་ཡིག་བརྒྱའི་སྔགས། གཡས་སུ་ཀྱི་ལེར་འཁོར་ལས་ཡེ་ཤེས་ཀྱི། བདུད་རྩིའི་རྒྱུན་འབབ་སྐུ་དཀྱིལ་ཡོངས་ཁེངས་ནས། སྤྱི་བོ་ནས་ཐོན་ཕྱག་གི་བུམ་པར་ཞུགས། བུམ་པའི་ཁ་ལུད་བདག་གི་སྤྱི་བོ་ཡི། དབུ་མར་ཞུགས་པས་སྡིག་ལྟུང་བག་ཆགས་ཀུན། འོག་སྒོར་དུད་ཁུའི་རྣམ་པར་བྱུང་བ་ཡིས། ལན་ཆགས་བདག་པོ་ཐམས་ཅད་ཚིམས་གྱུར་ནས། རང་ལུས་འོད་ཀྱི་ཕུང་པོར་སོང་བར་བསམ། བསྭོ་དམུ་ར༴། ཅི་ནུས་བགྲང་ལ། སླར་ཡང་རང་ལུས་འོད་གསལ་བདུད་རྩིའི་ཆར། བ་སྤུ་བུག་སྒོ་ནས་བབ་འགྲོ་ལ་ཕོག། ཀུན་ཀྱི་སྡིག་ལྟུང་བག་ཆགས་དག་ནས་སུ་། ཐམས་ཅད་ཀུན་བཟང་སྐུ་རུ་གྱུར་པར་བསམ། བསྭོ་དམུ་ར་ཏ་ཧན༴། བགྲང་ལ། བདག་སོགས་ནམ་མཁའི་མཐའ་མཉམ་འགྲོ་ཀུན་གྱི། ཐོག་མའི་དུས་ནས་ད་ལྟ་ཡན་ཆད་དུ་། མི་དགེ་སྡིག་པའི་ལས་ངན་གང་བགྱིས་པ། ཐམས་ཅད་རྒྱལ་བའི་དྲུང་དུ་མཐོལ་ཞིང་བཤགས། བྱང་ཞིང་དག་ནས་ཚངས་པར་བསྩལ་དུ་གསོལ། ཁྱད་པར་དཀོན་མཆོག་ཡོན་ཏན་མ་མཐོང་དང་། སྤྱོད་ལམ་རྣམ་བཞིར་སྐྱབས་འགྲོ་མ་སློབ་པ། སྐྱབས་ཡུལ་སྨོད་དང་འཇིག་རྟེན་ལྷ་ལ་དད། གཞན་ལ་གནོད་བྱས་ལོག་ལྟ་ཅན་དང་འགྲོགས། སྐུ་གཟུགས་གླེགས་བམ་མཆེད་གྲོགས་མི་བཀུར་དང་། གཞན་ཡང་སྡོམ་གསུམ་ཉམས་འགལ་ཐམས་ཅད་བཤགས། དགུ་པ་མནྜལ་འབུལ་བ་ནི། ཨེ་མ་འབྱུང་ལྔའི་སྟེང་དུ་རི་རབ་རི་བདུན་དང་། གླིང་བཞི་གླིང་ཕྲན་ཕྱི་ནང་འདོད་ཡོན་བཅས། ཉི་ཟླས་བརྒྱན་པ་བྱེ་བ་ཕྲག་བརྒྱ་འདི་། བདག་གི་བློས་བླངས་འབུལ་ལོ་བཞེས་སུ་གསོལ། གཞན་ཡང་བདག་ལུས་ལོངས་སྤྱོད་དགེ་ཚོགས་བཅས། གང་ཡང་རྒྱལ་བའི་ཞིང་དུ་འབུལ་ལགས་ཀྱིས། ཐུགས་རྗེའི་བྱིན་གྱིས་རློབས་ལ་བཞེས་ནས་ཀྱང་། བདག་སོགས་འགྲོ་རྣམས་ཚོགས་གཉིས་རྫོགས་པར་ཤོག། བཅུ་པ་བླ་མའི་རྣལ་འབྱོར་ནི། ཨེ་མ་ཧོ། སྐུ་གསུམ་རྫོགས་པའི་སངས་རྒྱས་ལ་གསོལ་བ་འདེབས། བདེར་གཤེགས་དགོངས་པའི་བརྒྱུད་པ་ལ་གསོལ་བ་འདེབས། སེམས་དཔའ་བརྡ་ཡི་བརྒྱུད་པ་ལ་གསོལ་བ་འདེབས། གྲུབ་ཐོབ་སྙན་ཁུངས་བརྒྱུད་པ་ལ་གསོལ་བ་འདེབས། སྒྲ་བསྒྱུར་ལོ་ཙའི་བརྒྱུད་པ་ལ་གསོལ་བ་འདེབས། ལས་འཕྲོ་གཏེར་གྱི་བརྒྱུད་པ་ལ་གསོལ་བ་འདེབས། རྟོགས་ལྡན་ཉམས་ཀྱི་བརྒྱུད་པ་ལ་གསོལ་བ་འདེབས། དྲིན་ཆེན་རྩ་བའི་བླ་མ་ལ་གསོལ་བ་འདེབས། དེ་ལྟར་རྩེ་གཅིག་གསོལ་བ་བཏབས་པའི་ཚེ། བླ་མའི་ཐུགས་ལས་བདུད་རྩིའི་རྒྱུན་བབ་པས། བདག་སོགས་སེམས་ཅན་ཡོངས་ཀྱི་སྤྱི་བོར་ཐིམ། ཀུན་ཀྱང་འོད་ཀྱི་ཕུང་པོར་ལམ་ལམ་གྱུར། སྐྱབས་གནས་མ་ལུས་འོད་ཞུ་བླ་མར་ཐིམ། བླ་མ་སླར་ཡང་བདག་གི་སྤྱི་བོ་རུ། འདྲེན་པའི་དེད་དཔོན་ཆེན་པོར་བཞུགས་པར་གྱུར། སྤྱི་གཙུག་བདེ་བ་ཆེན་པོའི་ཕོ་བྲང་དུ། དྲིན་ཆེན་རྩ་བའི་བླ་མ་ལ་གསོལ་བ་འདེབས། སངས་རྒྱས་སེམས་སུ་སྟོན་པ་རིན་པོ་ཆེ། རང་ངོ་རང་གིས་ཤེས་པར་བྱིན་གྱིས་རློབས། ཀྱེ་མ་དྲིན་ཆེན་བླ་མ་རིན་པོ་ཆེ། བདག་ལ་རེ་ས་ཁྱེད་ལས་གཞན་མེད་པས། གཡེལ་མེད་ཐུགས་རྗེས་གཟིགས་ཤིག་བཀའ་དྲིན་ཅན། བར་ཆད་གཅིག་ཆར་སོལ་ཞིག་རྫུ་འཕྲུལ་ཅན། བདག་འཛིན་རྩད་ནས་ཆོད་ཅིག་ཐུགས་རྗེ་ཅན། ཉོན་མོངས་གཏིང་ནས་ཆོམས་ཤིག་མཁྱེན་པ་ཅན། དངོས་གྲུབ་ད་ལྟ་སྩོལ་ཅིག་ཡོན་ཏན་ཅན། ཉམས་རྟོགས་མངོན་དུ་སྤོར་ཞིག་བྱིན་རླབས་ཅན། འཁོར་བ་འདི་ལས་དྲོངས་ཤིག་ནུས་རྩལ་ཅན། བཙོན་དོང་འདི་ལས་བཏོན་ཅིག་མཐུ་སྟོབས་ཅན། སྡུག་བསྔལ་འདི་ལས་སྒྲོལ་ཞིག་སྙིང་རྗེ་ཅན། འཇིགས་པ་འདི་ལས་སྐྱོབས་ཤིག་བརྩེ་ཆེན་བདག། ད་ནས་བྱང་ཆུབ་སྙིང་པོ་མ་ཐོབ་བར། བསླུ་མེད་དྲིན་ཆེན་བླ་མའི་ཐུགས་རྗེས་ཟུངས། བཅུ་གཅིག་པ་དབང་བཞི་ལེན་པ་ནི། རིགས་ཀུན་འདུས་གཙོ་དཔལ་ལྡན་བླ་མ་ཡི། གསང་གསུམ་ཡིག་འབྲུ་ཨ་ཨཱོྃ་ཧཱུྃ་གསུམ་ལས། འོད་ཟེར་དཀར་དམར་མཐིང་དང་ཧཱུྃ་ཡིག་འཕྲོས། བདག་གི་སྤྱི་མགྲིན་སྙིང་ག་ནས་ཐིམ་པས། ལུས་ངག་ཡིད་དང་ཀུན་གཞིའི་ལས་ངན་བྱང་། རྩ་རླུང་ཐིག་ལེ་ཤེས་བྱའི་སྒྲིབ་པ་དག། སྐུ་གསུང་ཐུགས་དང་ཡེ་ཤེས་བྱིན་རླབས་ཞུགས། བུམ་གསང་ཤེས་རབ་དོན་གྱི་དབང་མཆོག་ཐོབ། བསྐྱེད་བཟླས་ཏིང་འཛིན་རྫོགས་ཆེན་སྣོད་དུ་གྱུར། རིག་འཛིན་རྣམ་བཞིའི་ས་བོན་རྒྱུད་ལ་ཐེབས། སྐུ་བཞིའི་འབྲས་ཐོབ་སྐལ་པ་ཅན་དུ་གྱུར། བཅུ་གཉིས་པ་ཉལ་ཁ་ཞུ་ཐིམ་ནི། དཔལ་ལྡན་རྩ་བའི་བླ་མ་རིན་པོ་ཆེ། བདག་གི་སྙིང་ཁ་པད་མའི་ཟེའུ་འབྲུ་ལ། བྱང་ཆུབ་བར་དུ་འབྲལ་མེད་བཞུགས་ནས་ཀྱང་། འཁྲུལ་པ་འོད་གསལ་འབྱོངས་བར་བྱིན་གྱིས་རློབས། ཞེས་པས་བླ་མ་སྙིང་ཤེལ་གུར་དཀར་པོའི་དབུས་སུ་མར་སྤྱན་དྲངས་ནས། ཤེས་བྱ་བུམ་གཞུག་གི་དམིགས་པའི་ངང་དུ་གཉིད་ལོག་གོ། ཞེས་སྔོན་འགྲོའི་ངག་འདོན་བསླབ་གསུམ་རིན་ཆེན་འདྲེན་པའི་ཤིང་རྟ་ཞེས་བྱ་བ། བསྟན་གཉིས་གསང་སྔགས་གླིང་པའི་ཞལ་སྔ་ནས་འདི་བཞིན་བྲིས་ཤིག་གི་བཀས་གནང་བ་མཛད་བཞིན། མཁའ་ལ་འཇའ་ཚོན་གྱི་དྲྭ་བ་དཀྲིགས་ཤིང་ལྷའི་བུ་མོས་དབྱངས་སྙན་འབྱིན་པའི་ཉིན་པར། ཌཀྐི་དབང་མོས་ཤོག་དཀར་དར་གྱིས་ཀླུབས་པ་བསྩལ་ནས་བསྐུལ་བ་དང་། གཞན་ཡང་མཆེད་གྲོགས་དམ་པ་འགའི་གསུང་གིས་རྟེན་དུ་གཤེན་གྱི་དགེ་སྦྱོར་བ་མང་གའི་མིང་གིས་བྲིས་པ་དགེ་གྱུར་ཅིག། སརྦ་དྭ་ཀལྱ་ཎི་བྷ་ཝནུ།།
