བོན་འདི་ནི་སྲི་གསས་བདར་བ། བུང་བ་སྟག་ཆུང་ལ་ཕྱག་འཚལ་ལོ།།
བསྭོ་ཡུལ་ཅུང་མ་གི་ན། དབལ་ཡུལ་ཡ་གི་ན། དབལ་གཡག་གནམ་དུ་ཟངས་སེ་ཟངས། དབལ་མཚོ་འཁྱིལ་ལི་ལི། དབལ་རི་སྤུངས་སེ་སྤུངས། ཡུལ་ཁ་དེ་ཤེད་ན། ཕ་དང་ཡབ་ཀྱི་མཚན། དབལ་ལྕེ་རྒོད་པོ་ལགས། མ་དང་ཡུམ་གྱི་མཚན། དབྱིག་དབལ་སྔོན་མོ་ལགས། སྟང་དབྱལ་གཉིས་ཀྱི་བུ། ལྕགས་ཀྱི་སྒོང་ང་སྲན་མ་ཙམ་ཅིག་བྱུང་། ཡབ་གཅིག་ལྕེས་བྱིན་གྱིས་རླབས། ཡུམ་གཅིག་དབྱིག་གིས་འཁོར་ལོས་བཀྱག སྒོང་ང་མཐུ་འཚོལ་ཡོངས་སུ་གཤེགས། གནམ་ཕྱི་དགུང་རྒྱལ་སྤྱན་སྔར་བྱོན། གནམ་ཕྱི་དགུང་རྒྱལ་དབང་གཅིག་བསྐུར། ཁ་འོག་ཡུལ་དུ་བྱོན། དབལ་སོ་གནོན་པོས་དབང་གཅིག་བསྐུར། བདུད་རྗེ་ཁྱབ་པས་སྤྱན་སྔར་བྱོན། བདུད་རྗེ་ཁྱབ་པས་དབང་གཅིག་བསྐུར། དམུ་རྗེ་འཚིགས་པའི་སྤྱན་སྔར་བྱོན། དམུ་རྗེ་འཚིགས་པས་དབང་གཅིག་བསྐུར། བཙན་རྗེ་འཕྲོ་བའི་སྤྱན་སྔར་བྱོན། བཙན་རྗེ་འཕྲོ་བས་དབང་གཅིག་བསྐུར། ཏི་སེ་གངས་དཀར་རྩེ་ལ་བྱོན། སེང་གེ་དཀར་མོས་དབང་གཅིག་བསྐུར། གཡའ་མ་སྔོ་ལ་བྱོན། གར་གཅོག་འབྲོང་གིས་དབང་གཅིག་བསྐུར། བྲག་དམར་ཁ་ལ་བྱོན། བྱ་རྒྱལ་རྒོད་ཀྱིས་དབང་གཅིག་བསྐུར། ནགས་ཚལ་གསེབ་ཏུ་བྱོན། རྒྱ་སྟག་ཁྲ་བོས་དབང་གཅིག་བསྐུར། རྒྱ་མཚོའི་ནང་དུ་བྱོན། ཆུ་རྗེ་དུང་གིས་དབང་གཅིག་བསྐུར། ས་བདག་གཉན་གྱི་ཡུལ་དུ་བྱོན། ས་བདག་ཀླུ་གཉན་དབང་གཅིག་བསྐུར། གཤེན་རབ་བོན་གྱི་སྤྱན་སྔར་བྱོན། གཤེན་རབ་བོན་གྱིས་དབང་གཅིག་བསྐུར། སྒོང་ང་འཕེལ་ཞིང་འདྲིལ་ཏེ་སོང་། ཡང་གཅིག་དབལ་གྱི་ཡུལ་དུ་སོང་། ཡབ་ལྕེ་རྒོད་དཀར་པོའི་བྱིན་རླབས་དང་། ཡུམ་དབྱིག་དབལ་སྔོན་མོའི་བྱིན་རླབས་ཀྱིས། ལྕགས་ཀྱིས་སྒོང་ང་སྲན་མ་ཙམ། བྲག་དཀར་པོའི་ཁ་ལ་བྱོན། སྒོང་ང་རྡོལ་བའི་ནང་ཤེད་ནས། ཡ་མཚན་རྨད་ཀྱི་སེམས་ཅན་གཅིགལུས་པོ་སྟག་རིས་ཁྲ་བོ་ཅན། མགོ་བོ་གར་གཤོག་འབྲོང་རུ་ཅན། ཐང་དཀར་རྒོད་པོའི་གཤོག་པ་ཅན། སེང་གེ་དཀར་མོའི་དབལ་སོ་ཅན། བདུད་རྩི་སྨན་གྱི་རྐྱལ་བུ་ཅན། རྣོ་ངར་དབལ་གྱི་མདུང་རྩེ་ཅན། ཆེ་ཆུང་ཀུན་གྱི་སྐད་སྙན་ཅན། གཉན་གྱི་ལག་པ་ཅན། གཤེན་བོན་མིའི་ཆས་བྱད་ཅན། དེ་ལ་མིང་འདོག་མ་མཆིས། རུས་རང་གིས་བཏགས་པའི་མིང་། ལྕེན་བུ་དབྱིག་ཚ་དབལ་གྱི་སྲས། སྲི་སྲས་བུང་བ་སྟག་ཆུང་གིས། ངས་གནམ་ཕྱི་གུང་རྒྱལ་དབང་ཐོབ་པར། བདུད་རྩི་རྐྱལ་བུ་ཡོད་པ་ཡིན། དབལ་སོ་རྣོན་པོའི་དབང་ཐོབ་པར། རྣོ་ངར་དབལ་སོ་ཡོད་པ་ཡིན། བདུད་རྗེ་ཁྱབ་པའི་དབང་ཐོབ་པར། ཁྲོ་གཏུམ་བདུད་ལས་ཆེ་བ་ཡིན། དམུ་རྗེ་འཚིགས་པའི་དབང་ཐོབ་པར། ཁྲོ་འཚིགས་དམུ་ལས་ཆེ་བ་ཡིན། བཙན་རྗེ་འཕྲོ་བའི་དབང་ཐོབ་པར། ཞེ་སྡང་བཙན་ལས་ཆེ་བ་ཡིན། སེང་གེ་དཀར་མོའི་དབང་ཐོབ་པར། ཁ་ལ་དབལ་སོ་ཡོད་པ་ཡིན། ཁོ་མོ་འབྲོང་གི་དབང་ཐོབ་པར། མགོ་ལ་འབྲོ་རུ་ཡོད་པ་ཡིན། ཐང་དཀར་རྒོད་པའི་དབང་ཐོབ་པར། གཤོག་དྲུག་ལུས་ལ་རྒྱས་པ་ཡིན། རྒྱ་སྟག་ཁྲ་བོའི་དབང་ཐོབ་པར། ལུས་ལ་སྟག་རིས་ཡོད་པ་ཡིན། ཆུ་རྗེ་དུང་གི་དབང་ཐོབ་པར། སྐད་ཀྱང་དུང་སྐད་འདོན་པ་ཡིན། ས་བདག་ཀླུ་གཉན་དབང་ཐོབ་པར། སའི་ཁུང་ལ་བུག་པ་ཡིན། གཤེན་རབ་མི་བོས་དབང་ཐོབ་པར། ཚུལ་ཡང་གཤེན་ཚུལ་སྟོན་པ་ཡིན། སྐད་ཀྱང་རང་སྐད་འདོན་པ་ཡིན། ང་བོན་གྱི་སྲས་བུ་ཆེ་བ་ཡིན། ང་ལ་འཕྲིན་ལས་སྐལ་ཕོག་པ། ཆུང་སྲི་བུ་རྐུན་འདུལ་བ་ཡིན། སྲི་ཡི་ལྷ་དང་གསས་སུ་བསྐོས། སྲི་བོན་དམུ་འཕེན་བེའུ་ར་དང་། སྟོན་པ་གཤེན་རབ་ཀྱིས། ལྷ་དང་གསས་སུ་བསྐོས། དོ་ནུབ་གཤེན་བོན་བདག་གིས། ལྷ་དང་གསས་སུ་བྱོན། ཡུལ་ནི་སྨྲ་ཡུལ་ཐང་བརྒྱད་ན། མཁར་ནི་སྨྲ་མཁར་ལྡེམ་པ་ན། ཕ་དང་ཡབ་ཀྱི་མཚན། སྨྲ་རྗེ་བཙུན་པ་ལགས། མ་དང་ཡུམ་གྱི་མཚན། སྐྱི་ཟ་འབྲང་ཁུག་མ། དེ་གཉིས་བཤོས་པའི་སྲས། བུ་ཚ་ཁྱེའུ་ཆུང་། བུ་ལ་མིང་བཏག་པ། སྨྲ་སྲས་ལྗོན་པ་སྐྱེས། ཡང་གཅིག་ལྕམ་སྲིད་པ། སྨྲ་ལྕམ་བཙུན་མོ་རན། བུ་ཚ་མིང་སྲིང་ཡང་། འཛུམ་དང་ཡ་ལ་ལ། འགྲོ་མདངས་རྐྱ་ལ་ལ། དུས་ཀ་དེ་ཙམ་ན། ཡབ་གཅིག་ཤ་བ་བཤོར་དུ་སོང་། ཡུམ་གཅིག་སྐྱི་ཟ་འབྲོང་ཁུག་གིས། གསེར་གྱི་སོར་གདུབ་དང་། དངུལ་གྱི་མེ་ལོང་དང་། དུང་གི་གདུབ་བུ་རྣམ། བུ་ཚ་མིང་སྲིང་ལག་ཏུ་གཏད། མ་ཟ་བའི་སྐྱིལ་བུ་ཕྲག་ལ་བཀལ། ལྕགས་ཀྱི་མཁར་བུ་ལག་ན་ཐོགལུང་གསུམ་མདོ་ཡི་མ་ཐ་རུ། གྲོ་རྐོ་གྲོ་མ་ཐུ་རུ་ཕྱིན། བུ་ཚ་མིང་སྲིང་ཡང་། གདུགས་གི་སྔ་དྲོ་ལ། གསེར་གྱི་སོར་གདུབ་དང་། དངུལ་གྱི་མེ་ལོང་དང་། དུང་གི་གདུབ་བུ་ལ། རྩེད་རྩེད་འགྲོ་འགྲོ་ནས། གདུགས་ཀྱི་ཕྱི་ཕྱེད་ལ། བུ་སྐྱོ་མ་ལ་སྐྱོ། བུ་འབོད་མ་ལ་འབོད། བུ་སྐད་མས་མ་ཚོར། བུ་སྐད་སྲི་ཅན་གྱིས་ཚོར། སྲིའི་ཡུལ་སྨོས་པ་ནས། སྲི་ཡུལ་ཐི་ལི་ནིལ་བུ། སྲི་མཁར་སྒོ་རིང་ཁྱུད་གོང་ནས། སྲིའི་རྒྱལ་པོ་ཐ་པོམ་རྗེ། སྲིའི་རྒྱལ་མོ་སྲི་ཟ་མོང་བུ་ཐུང་། དེ་གཉིས་བཤོས་པའི་གསས། སྲིའི་ཟ་སྟེ་མོང་བུ་ཐང་ལགས། ཟངས་ཀྱི་མི་ཆུང་མོ་འཕང་ཙམ་གཅིགསྲིའི་ཕ་བོང་བུ་རྐུན་ནང་དུ་ཉལ། སྨྲ་སྲས་ལྗོན་པ་སྐྱེས་དང་། སྨྲ་ལྕམ་བཙུན་མོ་རན། སྨྲ་སྲས་གཙུག་ལག་གཉིས་ཀྱི། ཁ་རུ་ཆག་བཅུག་ནས། ཁོང་ནས་སྙིང་ཡང་ཕྱུང་། སྲིའི་ཕ་བོང་བུ་རྐུན་ནང་དུ་བྲོས་ཏེ་སོང་། དོ་ནུབ་མུན་གྱི་དགོང་མོ་ལ། ཡུམ་གཅིག་ཁབ་ཏུ་བྱོན་ཙམ་ན། བུ་ཚ་མིང་སྲིང་གཉིས། མ་གསོན་དང་མ་བོར་བ། ཤི་བའི་སྤུར་མཇལ། མ་ཡིས་ངུ་འབོད་རྒྱང་ཞིག་བཏབ། ངུས་པའི་མཆི་མ་ཤངས་ཀྱི་ཟོམ་ལ་འཁྲིལ། བུའི་སྤུར་དེ་ས་དང་དོག་ལ་མནན་ཏེ་བཞགཤི་འགབ་གཅོད་པའི་བོན་པོ་གཅིགགནམ་གྱི་བོན་པོ་ཁོ་ར་ཁོད་ཆུང་ལ། མོ་དང་ལྟས་གཅའ་བ། བོན་གྱི་ཞལ་ན་རེ། ཁྱོད་ཀྱི་བུ་ཚ་མིང་སྲིང་གཉིས། ཁ་སང་སྔོན་གྱི་དུས་ཙམ་ན། སྲིའི་ཟ་སྟེ་མོ་ཐུང་གིས། ཟོས་ནས་ཕ་བོང་བུ་རྐུན་འོག་ཏུ་བྲོས་ཏེ་འདུགམི་ཤ་སྲི་ལ་ལེན་དགོས་སོ། གཡག་ཤ་བོང་ལ་འགེལ་དགོས་སོ། དོན་ཁྲག་རྗེ་ལ་བཏུང་དགོས་སོ། དེར་སུ་ལ་གཏོ་དང་དཔྱད་ཞུས་པ། གཤེན་རབ་མི་བོ་དང་། སྲི་བོན་དམུ་འཕེན་བེའུ་རས། གཏོ་དང་དཔྱད་དུ་བྱས། སྲི་དོང་གྲུ་གསུམ་རྐོས། སྲི་རྩང་ཁ་དམར་བཙུགས། སྲི་ཅན་བླ་བྱང་བཙུགས། སྲི་བོན་བེའུ་རས། ཡི་དམ་ལྷ་གསས་བདར། སྲི་དོན་ཁ་དམར་དུ། ཆུང་སྲིའི་བླ་བྱང་རྣམས། སྲི་བྱང་སྙི་མོས་བསྡམ། ཀླད་ལ་གཡུག་གཡུག་ན། ས་ལ་བརྡབ་བརྡབ་ནས། སྲི་ཅན་བླ་དང་ཕྲལ། ཆུང་སྲི་བཏལ་བཏུལ་ནས། བླ་ཡིད་རྡུལ་དུ་རླགསྲིའི་ཟ་སྟེ་མོང་བུ་ཐུང་། རྫུ་འཕྲུལ་སྣ་ཚོགས་སྟོན། རྫུ་འཕྲུལ་ཅི་རྫུས་ན། ཟངས་ཀྱི་སྦྲང་བུར་རྫུས། གནམ་ཕྱི་གུང་རྒྱལ་སྤྱན་སྔར་བྱོན། སྲི་བོན་དམུ་འཕེན་རིས། སྲི་སྲས་བུང་བ་སྟག་ཆུང་བདར། བུང་བ་སྟག་ཆུང་ལྡིང་ཏེ་སོང་། གནམ་ཕྱི་གུང་རྒྱལ་སྤྱན་སྔར་སོང་། བདུད་རྩི་སྨན་གྱི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཡང་ཟངས་ཀྱི་བྱེ་མ་ལེབ་ཙེར་རྫུས། དབལ་སོ་རྣོན་པོས་དབང་ཐོབ་པས། རྣོ་དབལ་མདུང་རྩེ་རྒྱབ་ནས་བྱུང་། ཡང་ཆུང་སྲི་བུ་རྐུན་བྲོས་ཏེ་སོང་། བདུད་རྗེ་ཁྱབ་པའི་སྤྱན་སྔར་བྱོན། བུང་བ་སྟག་ཆུང་ལྡིང་ཏེ་སོང་། བདུད་རྗེ་ཁྱབ་པའི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཡང་ཆུང་སྲི་བུ་རྐུན་བྲོས་ཏེ་སོང་། དམུ་རྗེ་འཚིགས་པའི་སྤྱན་སྔར་སོང་། བུང་བ་སྟག་ཆུང་ལྡིང་ཏེ་སོང་། དམུ་རྗེ་འཚིགས་པའི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཆུང་སྲི་ཇེ་དམའ་ཇེ་དམའ་བྱུང་། ཡང་ཆུང་སྲི་གཡའ་མ་སྔོ་ལ་བྱོན། བུང་བ་སྟག་ཆུང་ལྡིང་ཏེ་སོང་། གར་གཤོག་འབྲོང་གི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཆུང་སྲི་ཇེ་དམའ་ཇེ་དམའ་སོང་། ཡང་ཆུང་སྲི་བྲག་དམར་གོང་ལ་བྱོན། བུང་བ་སྟག་ཆུང་ལྡིང་ཏེ་སོང་། ཐང་དཀར་རྒོད་པོའི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཆུང་སྲི་ཇེ་དམའ་ཇེ་དམའ་སོང་། ཡང་ཆུང་སྲི་ནག་ཚལ་གསེབ་ལ་བྲོས། བུང་བ་སྟག་ཆུང་ལྡིང་ཏེ་སོང་། རྒྱ་སྟག་ཁྲ་བོའི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཆུང་སྲི་ཇེ་དམའ་ཇེ་དམའ་སོང་། ཡང་ཆུང་སྲི་རྒྱ་མཚོའི་གཏིང་ལ་བྲོས། བུང་བ་སྟག་ཆུང་ལྡིང་ཏེ་སོང་། ཆུ་རྗེ་དུང་གི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཆུང་སྲི་ཇེ་དམའ་ཇེ་དམའ་སོང་། ཆུང་སྲི་སྲེ་མོང་རྫུས་ཏེ་བྲོས། སྲི་བོན་དམུ་འཕེན་བེའུ་རའི་ཕག་ཏུ་འགབ། བུང་བ་སྟག་ཆུང་ལྡིང་ཏེ་སོང་། གཤེན་རབ་བོན་གྱི་དབང་ཐོབ་པས། ཆུང་སྲི་མ་བཏང་དེད་ནས་བྱུང་། ཆུང་སྲི་བྱི་བ་གཅིག་ཏུ་རྫུས། ས་ཡི་ཁུང་ཏུ་བྲོས། བུང་བ་སྟག་ཆུང་ལྡིང་ཏེ་སོང་། ས་བདག་ཀླུ་གཉན་དབང་ཐོབ་པས། ཆུང་སྲི་མ་བཏང་དེད་ནས་བྱུང་། དེ་ནས་ཆུང་སྲི་གར་རྫུས་མ་ནུས་ནས། སྲིའི་ཟ་སྟེ་མོང་བུ་ཐུང་། སྲིའི་ཕ་བོང་བུ་རྐུན་འོག་ཏུ་ཉལ། སྲི་བོན་དམུ་བོན་བེའུ་རས། གསེར་ཙོ་དམར་པོ་ཞལ་དུ་མུར། གསེར་གྱི་ཐུ་ལུམ་ཚོགས་པོར་འཕེན། སྲི་གསས་བོང་བ་སྟག་ཆུང་ནི། ཡབ་གཅིག་ལྕེའི་བྱིན་གྱིས་རླབས། ཡུམ་གཅིག་དབྱིག་གི་བྱིན་རླབས་ཀྱིས། རྫུ་འཕྲུལ་ལྷ་གསས་གནམ་བས་ཆེ། ཆེ་དགུ་གཉན་བཅུའི་དབང་ཐོབ་པས། སྲིའི་ཟ་སྟེ་མོང་བུ་ཐུང་། ཟངས་ཀྱི་བུ་ཆུང་མོ་འཕང་ཙམ། ཟངས་ཀྱི་རལ་པ་གདེང་ཁ་ཟ། སྲི་གསས་བུང་བ་སྟག་ཆུང་དེས། གནམ་ཕྱི་གུང་རྒྱལ་དབང་ཐོབ་པས། བདུད་རྩི་སྨན་གྱི་རྐྱལ་བུ་ལ། བུང་བ་སྟག་ཆུང་ལྡིང་བའི་འགུལ་ཡ་བསིལ། བདུད་རྗེ་ཁྱབ་པའི་ཁྲོ་གཏུམ་ཅན། དམུ་རྗེ་འཚིགས་པའི་རྫུ་འཕྲུལ་ཅན། བཙན་རྗེ་འཕྲོ་བའི་ཞེ་སྡང་ཅན། རྫུ་འཕྲུལ་དེ་རྣམས་འཛོམས་པ་ཡིས། ཟངས་ཀྱི་མི་ཆུང་ལག་པར་ཁུགཆུང་སྲི་ཁ་དམར་རྒྱལ་ཞིང་འགྱེལ། རྣོ་ངར་དབལ་གྱི་མདུང་གིས་རྒྱབ། གར་གཤོག་འབྲོང་གི་རུ་ཡིས་རྡུང་། སེང་གེ་དཀར་མོའི་སོ་ཡིས་མུར། ཐང་དཀར་རྒོད་པོས་གཤོག་པས་བརླབས། རྒྱ་སྟག་ཁྲ་བོས་སྤར་མོས་བྲད། ཟངས་ཀྱི་མཆུས་ཡིས་སྦད་ཀྱིས་བཅད། སྲི་ཤ་ལྷ་ལ་ཐོང་ཤ་བཀྱེས། དོ་ནུབ་ཆུང་སྲི་ཁ་དམར་དོན་སྙིང་ནི། སྲི་གསས་བུང་བ་སྟག་ཆུང་རྔམས་ཟས་གྱིས། མི་ཤ་སྲི་ལ་དེ་ལྟར་བླང་། གཡག་ཤ་བོང་ལ་དེ་ལྟར་བཀལ། ང་བོན་གྱིས་སྲི་འདུལ་དེ་ལྟར་འདུལ། སང་ཕོད་ལོ་དུས་ཟླ་མལ་དུ། མི་སྐྱིན་བུ་ཡི་སྐྱིན། མིང་ཡང་སྨྲ་གསས་འཕྲུལ་བུར་བཏགས། བོན་པོ་ཁ་དྲོ་དེ་ལྟར་བྲོ། གཏོ་ཡང་བཀྲ་ཤིས་དེ་ལྟར་ཤིས། ལྷ་ཡང་མཐུ་ཆེ་དེ་ལྟར་ཆེ། དོ་ནུབ་འདི་ཙམ་དུ། རྒྱུ་སྦྱོར་ཡོན་བདག་གི། གཤེད་དུ་གང་ཆེ་བ། སྲི་རུ་གང་གནོད་པ། སྲི་ཁུང་འདི་རུ་ཁུག་ལ་ཤོགསྲིའི་ལ་ཡོགས་དུས་ཀྱིས་དེད་ལ་ཤོགསྲི་ནི་དེ་ལྟར་བསད། ཆོམ་ཆོམ་ཁུག་ལ་ཤོགབུ་ཤ་སྲི་ལ་ལེན། སྲི་འདུལ་དེ་ལྟར་འདུལ། ང་བོན་པོ་ཞལ་རེ་དྲོ། གཏོ་ཡང་བཀྲ་རེ་ཤིས། ལྷ་ཡང་མཐུ་རེ་ཆེ། རྒྱུ་སྦྱོར་བག་རེ་བཟང་། སྲི་གསས་བདར་བ་རྫོགས་སོ།། །།
འགྲེལ་བརྗོད།
«སྲི་གསས་བུང་བ་སྟག་ཆུང་། »གི་ནང་དུ་སྔོན་དབལ་ཡུལ་ཞེས་བྱ་བ་ཞིག་ན། ཡབ་དབལ་ལྕེ་རྒོད་པོ་དང་། ཡུམ་དབྱིག་དབལ་སྔོན་མོ་གཉིས་སྟང་དང་དབྱལ་དུ་འཚོས་པ་ལས་ལྕགས་ཀྱིས་སྒོ་ང་སྲན་མ་ཙམ་ཞིག་སྐྱེས་ཏེ་དེ་བརྡོལ་བའི་ནང་ནས་ཡ་མཚན་གྱི་ཁྱེའུ་ལུས་ལ་སྟག་རིས་དང་། མགོ་ལ་འབྲོང་རུ། ཐང་དཀར་རྒོད་ཀྱི་གཤོག་པ། སེང་གེ་དཀར་མོ་དབལ་སོ་ཅན་ཞིག་བྱུང་བ་དང་། དེ་ལ་ཆེ་དགུ་གཉན་བཅུའི་དབང་ཐོབ་པས། ལྷ་སྲིན་སྡེ་བརྒྱད་ལ་བཀའ་བཙན་པ་ཞིག་བྱུང་སྟེ་སྟོན་པ་གཤེན་རབ་དང་སྲི་བོན་དམུ་འཕེན་བེའུ་ར་གཉིས་ཀྱིས་སྲི་གདུལ་བའི་གསས་སུ་བསྐོས་སོ། དུས་རེ་ཞིག་ལ་ཡུལ་སྨྲ་ཡུལ་ཐང་བརྒྱད་མཁར་སྨྲ་མཁར་ལྡེམ་པ་ན། སྨྲ་རྗེ་བཙུན་པ་དང་སྐྱི་ཟ་འབྲང་ཁུག་མ་གཉིས་ལ་སྲས་སྨྲ་སྲས་ལྗོན་པ་སྐྱེས་དང་། སྨྲ་ལྕམ་བཙུན་མོ་རན་གཉིས་སུ་སྐྱེས་ཏེ་ཁྱིམ་ཚང་བདེ་བར་གནས་ཀྱང་། དུས་རེ་ཞིག་ན་ཡབ་ཤ་བ་བཤོར་དུ་སོང་བ་དང་། ཡུམ་གྲོ་མ་བརྐོ་རུ་སོང་བ་དང་བསྟུན་སྲས་ལྕམ་སྲིང་གཉིས་སྲི་ཡིས་ཟོས། ཡུམ་ཁྱིམ་དུ་འབྱོར་བས་སྲས་མིང་སྲིང་གི་རོ་མཐོང་བས་ངུས་བ་ལས་ཐབས་གཞན་མེད་པར་མཐར་དུར་འཇུག་བྱས། དེ་ནས་ཡུམ་གྱིས་ཤི་སྒབ་གཅོད་པའི་བོན་པོ་ཁོ་ར་ཁོད་ཐུང་ཞེས་བྱ་བ་གདན་དྲངས་ཏེ། མོ་བརྟགས་པས་སྲས་མིང་སྲིང་སྲི་ཡིས་ཟོས་པའི་ལུང་བསྟན་ཏེ། ”མི་ཤ་སྲི་ལས་ལེན་དགོས་སོ། གཡག་ཤ་བོང་ལས་འགེལ་དགོས་སོ། “ ཞེས་པའི་གཏམ་འདི་བྱུང་བར་གདའ། དེ་ནས་སྲི་འདུར་བའི་བོན་པོ་སྟོན་པ་གཤེན་རབ་དང་། སྲི་བོན་དམུ་འཕེན་བེའུ་ར་གཉིས་གདན་དྲངས་ཏེ། སྲི་གསས་བུང་བ་སྟག་ཆུང་བདར་བས། སྲི་བྲོས་པའི་ཁུང་བཅད་དེ་འགྲོ་ས་མ་རྙེད་པར་སྲི་གསས་བུང་བ་སྟག་ཆུང་གིས་བརླགས་སོ། སང་ཕོད་ཀྱི་ལོ་དུས་ཟླ་མལ་དུ་མི་སྐྱིན་དང་བུ་ཡི་སྐྱིན་དུ་སྨྲ་སྲས་འཕྲུལ་བུ་ཆུང་ཞེས་པ་ཞིག་སྐྱེས་ཏེ་སྲི་ཡིས་ལག་ནས་མི་སྐྱིན་བླངས་པས་བསྟན་ཡོད། ཚན་བཤུས་འདིའི་ནང་དུ་མི་དང་ལྷ་འདྲེའི་བར་གྱི་འབྲེལ་བ་དང་། འུ་ཅག་གི་མཐོང་ལམ་དུ་མ་གྱུར་བའི་གཟུགས་མེད་ཀྱི་འདྲེ་སྲིན་དག་གིས་མི་ལ་ནད་དང་ཤི་གོད་སོགས་གཏོང་གི་ཡོད་པ་བསྟན་ཡོད་ལ། དེ་དག་ལ་གཏོ་དཔྱད་ཀྱི་ལམ་ནས་བཅོས་ཀ་བྱེད་དུ་ཡོད་པ་ལས་ཡ་མེད་ཅིག་མིན་པ་བསྟན་ཡོད། ཚན་བཤུས་འདིའི་ནང་དོན་གོ་དཀའ་བ་ཆེར་མེད་ལ་ཀློག་སྟབས་བདེ་ཞིང་ཡིད་གར་འབབ་པ་ཞིག་ཡིན། ཉམས་ཉེས་ཕོག་པའི་ཁྱིམ་ཚང་དེའི་དཀའ་སྡུག་དེ་དག་ནི་དངུལ་དངོས་སོགས་ཀྱིས་སེལ་དཀའ་བའི་ཚོད་དུ་སྣང་ཡང་། འཇིག་རྟེན་ཕན་བདེ་བསྐྲུན་པའི་རྒྱུ་བོན་དག་གིས་གཟུགས་མེད་ལྷ་སྲིན་གྱི་གནོད་པ་ལས་སྐྱོབས་ཐུབ་པར་བཤད་པ་ཡིན། འདི་ནི་རྟོག་བཏགས་ཀྱི་སྒྲུང་ལྟ་བུར་མ་ཡིན་པར་དངོས་ཡོད་ལག་ཏུ་བླངས་པའི་སྐད་ཆ་ཞིག་སྟེ། ཅི་སྟེ་ན་སྨན་ཀྱིས་བཅོས་མ་ཐུབ་པའི་ནད་པ་དག་གཏོ་བཅོས་ཀྱིས་བཅོས་སུ་ཡོད་པ་ནི་མིག་མཐོང་ལག་ཟིན་ཡིན་གཤིས་རྒྱུ་མཚན་མང་པོ་བགྲང་བའི་ངལ་བ་མི་བྱའོ། །
གསལ་བཤད་ཞུ་རྒྱུར། འདིར་མ་དཔེ་ཇི་བཞིན་བཤུས་པ་ལས་དག་བཅོས་ཡིན་ཁུལ་གྱིས་སྡུག་ལག་བསྲིང་མེད་པས་ཀློག་པ་པོ་རྣམས་ཀྱི་དེ་དོན་ཡིན་ལ་འཇག་པར་འཚལ།
ཁྱུང་ཐོག་རྒོད་ཀྱིས།
