སྤྱི་བདེ་པུས། འཕྲུལ་སྒུལ་འཁོར་རིགས་ཀྱི་འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མ་དེ་སྤྱི་ཟླ་11ཚེས་4ཉིན་ནས་བཟུང་ཁག་གསུམ་དུ་བགོས་ནས་རྒྱལ་ཡོངས་སུ་ཁྱབ་གདལ་གཏོང་གཏོང་མུས་ཡིན་པ་རེད།
བསྒྱུར་བཅོས་ལས་ཕན་པ་ཐོབ་ཁྱོན་སྔར་བས་ཆེ་རུ་གཏོང་ཆེད། སྤྱི་བདེ་པུས་སྤྱི་ཟླ་11ཚེས་4ཉིན་ནས་སྤྱི་ཟླ་12ཚེས་2ཉིན་བར་རྒྱལ་ཡོངས་སུ་ཁག་གསུམ་དུ་བགོས་ནས་འཕྲུལ་སྒུལ་འཁོར་རིགས་ཀྱི་འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མ་ཁྱོན་ཡོངས་ནས་ཁྱབ་གདལ་བེད་སྤྱོད་བཏང་སྟེ་ལས་སྒྲུབ་འགྲོ་ལུགས་དང་དཔྱད་གཞིའི་ཡིག་རིགས་མཁོ་འདོན་བྱ་རྒྱུ་སྔར་བས་སྟབས་བདེ་རུ་དང་ལག་ཁྱེར་སྤྱོད་རྒྱུ་སྟབས་བདེ་རུ་བཏང་ནས། རྒྱ་ཆེའི་མང་ཚོགས་ཀྱི་ལས་སྒྲུབ་ཕྱིར་སྐྱོད་ལ་སྔར་བས་སྟབས་བདེ་རུ་གཏོང་རྒྱུའི་བཀོད་སྒྲིག་བྱས་ཡོད། རླངས་འཁོར་གྱི་བདག་པོ་ཚོས་ས་གནས་སོ་སོའི་གློག་རྡུལ་ལག་ཁྱེར་ལེན་པའི་དུས་ཚོད་གཞིར་བཟུང་། རྒྱལ་ཡོངས་གཅིག་གྱུར་གྱི“འགྲིམ་འགྲུལ་དོ་དམ་12123”APPབརྒྱུད་དེ་གློག་རྡུལ་འགྲོ་སྐྱོད་ལག་ཁྱེར་ལེན་རྒྱུའི་རེ་ཞུ་བྱེད་ཆོག
ད་ལོའི་སྤྱི་ཟླ་7ཚེས་1ཉིན། སྤྱི་བདེ་པུས་སྤྱི་བདེ་འགྲིམ་འགྲུལ་དོ་དམ་གྱི་དམངས་ལ་ཕན་པ་བསྐྲུན་པ་དང་ཁེ་ལས་ལ་སྟབས་བདེ་བསྐྲུན་པའི་བསྒྱུར་བཅོས་བྱེད་ཐབས་གསར་པ་ཁག་8ལག་ལེན་བསྟར་རྒྱུའི་ནང་པེ་ཅིང་དང་། ཐེན་ཅིན། སུའུ་ཀྲོའུ་སོགས་གྲོང་ཁྱེར་60རུ་འཕྲུལ་སྒུལ་འཁོར་རིགས་ཀྱི་འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མ་ཚོད་ལྟ་ཁྱབ་གདལ་བཏང་ཞིང་། མིག་སྔར་རིམ་རྩིས་བྱས་ན་འཕྲུལ་འཁོར་བདག་པོ་བྱེ་བ་ལྔ་ལྷག་ཙམ་ལ་གློག་རྡུལ་འགྲོ་སྐྱོད་ལག་ཁྱེར་སྤྲད་པས་ཕན་པ་ཐོབ་ཡོད།
འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མས་འགྲིམ་འགྲུལ་དོ་དམ་གྱི་སྲིད་དོན་ཞབས་ཞུའི་གྲངས་འཛིན་གྱི་ནུས་པ་སྔར་བས་ཆེ་རུ་བཏང་བ་དང་། གློག་རྡུལ་ལག་ཁྱེར་སྤྱོད་རྒྱུ་གཏིང་ཟབ་ཏུ་བཏང་ནས། རླངས་འཁོར་གྱི་བདག་པོར་དྲ་ཐོག་ནས་ལག་ཁྱེར་དང་ཨང་རྟགས་སྟོན་པའི་ཞབས་ཞུ་མཁོ་འདོན་བྱེད་བཞིན་ཡོད། གློག་རྡུལ་འགྲོ་སྐྱོད་ལག་ཁྱེར་གྱི་བཟོ་དབྱིབས་རྒྱལ་ཡོངས་སུ་གཅིག་གྱུར་ཡིན་པ་དང་། མང་ཚོགས་ཀྱིས་འཁོར་རིགས་ཐོ་འགོད་དང་། ཁྲིམས་འགལ་ཐག་གཅོད། འགྲིམ་འགྲུལ་ལས་འཛོལ་ཐག་གཅོད་སོགས་རྩིས་སྤྲོད་དོ་དམ་གྱི་སྐར་ཁུང་ལས་སྒོ་གཉེར་སྐབས་སྤྱོད་ཆོག་པ་དང་། འཕྲུལ་སྒུལ་འཁོར་རིགས་ཀྱི་བདག་པོས་མི་གཞན་ལ་འཕྲུལ་འཁོར་དེ་སྤྱོད་རྒྱུའི་དབང་ཆ་སྤྲོད་རྒྱུར་རྒྱབ་སྐྱོར་བྱས་པ། མི་གཞན་ལ་ལས་སྒོ་ཚབ་སྒྲུབ་བྱ་རྒྱུར་སྟབས་བདེ་སྐྲུན་བཞིན་ཡོད། དེ་དང་ཆབས་ཅིག་འགྲུལ་ཟོག་སྐྱེལ་འདྲེན་གྱི་ལག་ཁྱེར་དང་འགན་བཅོལ་གུན་གསབ་སོགས་ཀྱི་འགྲོ་ལུགས་གཉེར་བའི་རྣམ་པ་མང་གཏོང་ཆོག འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མ་དེ་རྒྱལ་ཡོངས་ཀྱི་སྤྱི་བདེ་འགྲིམ་འགྲུལ་དོ་དམ་གྱི་གློག་རྡུལ་ལག་ཁྱེར་མ་ལག་བརྒྱུད་བཟོས་ཆོག་པ་དང་། འཕྲུལ་སྒུལ་འཁོར་རིགས་ཞིབ་བཤེར་དང་། གཏའ་འཇོག འགྲིམ་འགྲུལ་སྒྲིག་འགལ། འགྲིམ་འགྲུལ་ལས་འཛོལ་ཐག་གཅོད་སོགས་ཀྱི་གནས་ཚུལ་མངོན་གྱི་ཡོད་པས། དུས་ཐོག་ཏུ་རྩད་ཞིབ་དང་། དུས་ཐོག་ཏུ་སྟོན་པ། དུས་ཐོག་ཏུ་ཞིབ་དཔྱད་བཅས་བྱེད་བདེ་བ་དང་། འཁོར་རིགས་གཏའ་འཇོག་དང་ལག་བརྒྱུད་རླངས་འཁོར་ཉོ་ཚོང་སོགས་ཀྱི་ལས་སྒོ་བསྒྲུབ་རྒྱུར་སྟབས་བདེ་སྐྲུན་བཞིན་ཡོད།
ཤེས་རྟོགས་བྱུང་བར་གཞིགས་ན། ད་ལོའི་སྤྱི་ཟླ་7ཚེས་1ཉིན། སྤྱི་བདེ་པུས་འགྲིམ་འགྲུལ་དོ་དམ་བསྒྱུར་བཅོས་ཀྱི་བྱེད་ཐབས་གསར་པ་ཁག་8བཏོན་ཚུན། མི་ཐེངས་དུང་ཕྱུར་1ལྷག་ཙམ་ལ་ཕན་པ་ཐོབ་ནས་མང་ཚོགས་དང་ཁེ་ལས་ལ་སྒོར་དུང་ཕྱུར་30ལྷག་ཙམ་གྱི་ཁུར་པོ་ཡང་དུ་བཏང་ཡོད། སྦག་སྦག་གཏོང་མཁན་གསུམ་འབུམ་ལྷག་ཙམ་གྱིས་ཐོབ་ཐང་ལག་ཁྱེར་འཁྱེར་ནས་ཞིང་ཆེན་ལས་སྒྲོལ་ནས་ཡུལ་གཞན་དུ་སྦག་སྦག་ཐོ་འགོད་སོགས་ཀྱི་ལས་སྒོ་གཉེར་བར་གནས་སྡོད་བྱ་ཡུལ་གྱི་དཔང་ཡིག་སྤྲོད་དགོས་ཀྱི་མེད། ས་གནས་ཁག་གི་སྤྱི་བདེ་འགྲིམ་འགྲུལ་དོ་དམ་སྡེ་ཚན་གྱིས“འགྲིམ་འགྲུལ་དོ་དམ་12123”Appབརྒྱུད་རླངས་འཁོར་བདག་པོ་ས་ཡ་གསུམ་དང་ལྔ་འབུམ་ལྷག་ཙམ་ལ་འཕྲུལ་སྒུལ་འཁོར་རིགས་ཀྱི་ཐོ་སུབ་ལག་ཁྱེར་གྱི་གློག་རྡུལ་དཔར་མ་སྤྲད་དེ་མང་ཚོགས་ཀྱིས་དྲ་ཐོག་ནས་རླངས་འཁོར་རྙིང་ཚབ་གསར་བརྗེའི་རེ་ཞུ་བྱེད་པར་སྟབས་བདེ་བསྐྲུན་ཡོད།
གཞན་ཡང་། ད་དུང་བོད་ལྗོངས་སུ་རླངས་འཁོར་གྱི་འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མ་བཟོ་རྒྱུའི་འགྲོ་ལུགས་གཉེར་བའི་དུས་ཚོད་ཐད་ནས་བརྗོད་ཚེ། ཆབ་མདོ་གྲོང་ཁྱེར་དུ་སྤྱི་ཟླ་11པའི་ཚེས་4ཉིན་ནས་བཟུང་བཟོ་ཆོག་པ་དང་། ལྷོ་ཁ་གྲོང་ཁྱེར་དང་ནག་ཆུ་གྲོང་ཁྱེར་དུ་སྤྱི་ཟླ་11པའི་ཚེས་18ཉིན་ནས་བཟོ་ཆོག་པ། མངའ་རིས་ས་ཁུལ་དང་ཉིང་ཁྲི་གྲོང་ཁྱེར་དུ་སྤྱི་ཟླ་12པའི་ཚེས་2ཉིན་ནས་བཟོ་ཆོག དེའི་གོང་གི་འགྲོ་སྐྱོད་ཆོག་པའི་ལག་ཁྱེར་གྱི་གློག་རྡུལ་དཔར་མ་དེ་སྤྱི་ཟླ་7པའི་ཚེས་1ཉིན་ནས་ལྷ་ས་གྲོང་ཁྱེར་དང་གཞིས་རྩེ་གྲོང་ཁྱེར་དུ་ཚོད་ལྟའི་ཐོག་ནས་བེད་སྤྱོད་འགོ་ཚུགས་ཡོད།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
འགན་འཁུར་རྩོམ་སྒྲིག་པ། བསོད་ནམས་བསྟན་པ།
ལག་བསྟར་རྩོམ་སྒྲིག་པ། ཡེ་ཤེས་བཟང་མོ།
ཞུ་དག བསོད་ནམས་དོན་གྲུབ།
