مازمۇنى ماعىنالى،
تاريحى ۇزاق،
وقىرمان سانى كوپ
كۋابول ءۇنحات تەكشەسى
ءار كۇنى سىزبەن بىرگە!
ەگەر بىرەۋ سەنى جەك كورىپ نە شابۋىل جاساسا، وسى ءبىر ءسوزدى ەستە ساقتا: «يت ۇرەدى، كەرۋەن كوشەدى».
«ومىردە وسىنداي جاعدايعا تاپ بولعان كەزىڭ بولدى ما؟» كەيدە بىرەۋ «مەن سەنى ۇناتپايمىن» دەپ، ءتىپتى نەشە ءتۇرلى مىندەرىڭدى بەتىڭە باسىپ جاتادى: ءوزىمشىلسىڭ، تىم سەزىمتالسىڭ، قىرسىقسىڭ دەگەندەي.
سول كەزدە سەن ابدىراپ، ءبارىن وزگەرتۋگە تىرىساسىڭ، ءبىراق ءبارىبىر ول ادامنىڭ كوڭىلىنەن شىعا المايسىڭ.
ءسويتىپ، قايتا- قايتا ساتسىزدىككە ۇشىراعان سوڭ، ءوزىڭدى جەك كورىپ، «مەن شىنىمەن- اق تۇككە تۇرمايتىن اداممىن با؟» دەپ ويلاي باستايسىڭ.
اسىرەسە، حالقىمىزدا «وزگەلەر ءۇشىن ءومىر ءسۇرۋ» باسىم. ونىڭ ءبىر بەلگىسى - بارىن شاشىپ، قارىزدانىپ توي جاساۋ بولسا، ەندىگى ءبىر بەلگىسى- ۇيات بولادى دەپ بار جاقسىسىن قوناعىنىڭ اۋزىنا توسۋ.
ءبىزدىڭ ءبىر تۋىسىمىز بار تۇعىن، وزدەرىنىڭ جاتىن بولمەلەرى تار ءارى جۇپىنى، ءبىراق ۇيدەگى ەڭ كەڭ بولمەنى «قوناق كەلسە قىسىلماسىن» دەپ ارناعان. ايىنا، جىلىنا ءبىر كەلەتىن قوناق ءۇشىن وزدەرى سول شاعىن بولمەدە قىسىلىپ ءومىر ءسۇرىپ كەلەدى...
ءبىز كوبىندە «قوناعۋارمىز» دەپ ماقتانامىز، ءبىراق ءومىردى ءوزىمىز ءۇشىن ەمەس، باسقالار ءۇشىن ءسۇرىپ جۇرگەن جوقپىز با دەگەن سۇراقتى قويساق ويلانىپ قالامىز. ۇيتكەنى كەز-كەلگەن وتباسىنىڭ قىستايعى سوعىمىن، قوناققا الا بارارى مەن توي-تومالاققا بەرەر شىعىندارىن قوسساق، كەز-كەلگەن شەتەلدى قىدىرىپ كەلەتىندەي قوماقتى قارجى جينالار ەدى. ءبىراق ءبىز بالالارعا ونداي مۇمكىندىك قيماساق تا، ءوزىمىز جيماساق تا، «سوگىپ كەتپەسىنشى» دەپ بارىمىزدى سالامىز...
كەيدە قانشا بارىمىزدى سالساق تا سوگىپ كەتەتىن، ءتىپتى، ومىرىندە كورمەگەن ادام بولسادا سىرتتاي جاماندالاتىن كەزگە دۋشار بولامىز. ونداي شاقتا كوڭىلىمىز ءتۇسىپ، «شىنىمەن قانداي ءومىر ءسۇرىپ ءجۇرمىن؟» دەگەن سۇراقتى وزىمىزگە قويۋىمىزعا تۋرا كەلەدى...
بۇگىنگى ماقالادا باسقاشا ءبىر پسيحولوگيالىق شىندىقپەن بولىسكىم كەلەدى:
وزگەلەردىڭ باعاسى – سەنىڭ ناعىز بولمىسىڭدى كورسەتە بەرمەيدى، كەرىسىنشە سول ادامنىڭ ىشكى جان دۇنيەسىن اشىپ بەرەدى.
«باسقانىڭ ايتقانى كەيدە وزىنەن حابار بەرەدى»
جاقىندا مەن كوڭىل كۇيدى كوتەرەتىن ءبىر قىسقا مۋلتفيلمگە كوزىم ءتۇستى. ونىڭ اتاۋى –«جالىنىشتى بولماۋ»(«不迎合»).
وندا ەكى قۇس بەينەلەنەدى (قاراپايىم تۇسىنىستىك ءۇشىن ولاردى ا جانە ب دەپ اتايىق):
•
قۇس ا:
«مەن ەندى سەنىڭ جانىڭدا بولعىم كەلمەيدى».
•
قۇس ب:
«جارايدى، ماسەلە جوق».
•
قۇس ا:
«توقتا، قالايشا ماسەلە جوق؟»
•
قۇس ب:
«ماعان وسىلاي اشىق ايتقانىڭ جاقسى بولدى. مەن ءوزىمدى باعالاي بىلەتىن، مەنىمەن بولۋعا شىنىمەن نيەتتى اداممەن بىرگە بولعانىمدى قالايمىن. سەنىڭ شەشىمىڭ، كەرىسىنشە، مەنىڭ بۇل قارىم- قاتىناستان وڭاي كەتۋىمە كومەكتەسىپ تۇر. راقمەت!»
•
قۇس ا:
«سەن ماعان رەنجىمەيسىڭ بە؟»
•
قۇس ب:
«جوق. ويتكەنى بىرەۋدىڭ مەنى ۇناتۋى نەمەسە ۇناتپاۋى – ماعان بەرىلگەن باعا ەمەس، ونىڭ ءوزىنىڭ قاجەتتىلىگىنەن تۋاتىن نارسە. مەنىڭ مىندەتىم – سول ادامنىڭ مەنىمەن قالاي ارالاساتىنىن بايقاۋ جانە ول ماعان قانشالىقتى سايكەس كەلەتىنىن شەشۋ. وعان بار كۇشىمدى سالىپ جاعا قويايىن دەگەن ويىم جوق».
