ەلىمىز 1250 توننا جۇك كوتەرەتىن دوڭگەلەكتى ارقالىقتى جوتكەۋ ماشيناسىن ءساتتى زەرتتەپ جاسادى
شينحۋا اگەنتتىگىنىڭ 1 – ايدىڭ 8 – كۇنى بەيجيڭنەن بەرگەن حابارى. ءتىلشىنىڭ 1 – ايدىڭ 8 – كۇنى جۇڭگو تەمىر جول قۇرىلىسى شەكتى جارنا سەرىكتەستىگىنەن ۇعىسۋىنشا، اتالعان سەرىكتەستىكتىڭ كوپىر سالۋ مەكەمەسىنىڭ جيڭجياڭ اۋىر ونەركاسىپ سەرىكتەستىگى 1250 توننا جۇك كوتەرەتىن ”ساڭلۇڭ“ اتتى دوڭگەلەكتى ارقالىقتى جوتكەۋ ماشيناسىن ءساتتى زەرتتەپ جاساعان. بۇل تيپتەگى ارقالىقتى جوتكەۋ ماشيناسى ۇزىندىعى 60 مەتر، سالماعى 1700 توننا كەلەتىن اسا زور ساندىقشا ارقالىقتى جوتكەۋ قاجەتىن قاناعاتتاندىرا الادى، مەملەكەتتىڭ جوعارى قارقىندى پويەز جولى قاتارلى نىسان قۇرىلىسىن ورىستەتۋىنە قىزمەت وتەيدى.
جۇڭگو تەمىر جول قۇرىلىسى شەكتى جارنا سەرىكتەستىگى كوپىر سالۋ مەكەمەسى جيڭجياڭ اۋىر ونەركاسىپ سەرىكتەستىگىنىڭ زەرتتەۋشى قىزمەتكەرىنىڭ تانىستىرۋىنشا، ەلىمىزدىڭ جوعارى قارقىندى پويەز جولى تەحنيكاسىنىڭ جەدەل دامۋىنا بايلانىستى، ءداستۇرلى 32 مەترلىك جانە 40 مەترلىك ساندىقشا ارقالىق ۇزىن كوپىر قۇرىلىسىنىڭ جانە تەڭىز اتتاعان كوپىر قۇرىلىسىنىڭ قاجەتىن قاناعاتتاندىرا المايتىن بولدى، كوپىر تۇعىرىمەن ۇشتاسقان جەردەگى ورتاق تەربەلىس تۇيىندەرىن ازايتۋ، پويەز وتكەن كەزدە تۋىلاتىن كەدەرگى كۇش پەن تەربەلىستى تومەندەتۋ، كوپىر ارقالىعىنىڭ جالپى تۇلعاسىنىڭ ورنىقتىلىعى مەن حاۋىپسىزدىگىن جوعارىلاتۋ ءۇشىن، تەمىر جولدىڭ ساندىقشا ارقالىعىنىڭ ۇزىندىعىن 60 مەتر، ءتىپتى ودان دا ۇزىن ەتىپ جوبالاۋ قاجەت.
اتالعان ارقالىقتى جوتكەۋ ماشيناسىنىڭ ءاربىرىنىڭ وزىندىك سالماعى 830 توننا، ناق كوتەرۋ بيىكتىگى 23 مەتر، جەل تولتىرىلاتىن 88 ءىرى تيپتى دوڭگەلەگى بار. ونىڭ اۋىرلىق كوتەرۋ قۋاتى جوعارى، ءبىر داناسىنىڭ جۇك كوتەرۋ قۋاتى 1250 توننا، اۋىر جۇكتى جوتكەگەن كەزدەگى قارقىنى مينۋتىنا 17 مەتر.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
