ليڭ چىڭشيڭنىڭ پارا الۋ، مەملەكەت مەنشىگىندەگى سەرىكتەستىك قىزمەتكەرىنىڭ قىزمەت ۇقىعىنان بەتالدى پايدالانۋ دەلوسى جونىندە ءبىرىنشى سوت اشىلدى
شينحۋا اگەنتتىگىنىڭ 1 – ايدىڭ 16 - كۇنى چاڭچۇننەن بەرگەن حابارى. 1 – ايدىڭ 16 – كۇنى، جيلين ولكەسى چاڭچۇن قالالىق ورتا دارەجەلى حالىق سوت مەكەمەسى ءبىرىنشى سوتتا اشىق سوت اشىپ، ونەركاسىپ جانە ينفورماتسيالاندىرۋ مينيسترلىگى پارتگرۋپپاسىنىڭ بۇرىنعى مۇشەسى، مەملەكەتتىك تەمەكىنى ارناۋلى ساتۋ مەكەمەسى پارتگرۋپپاسىنىڭ بۇرىنعى شۋجيى، بۇرىنعى باستىعى، جۇڭگو تەمەكى باس سەرىكتەستىگىنىڭ بۇرىنعى باس ديرەكتورى ليڭ چىڭشيڭنىڭ پارا الۋ، مەملەكەت مەنشىگىندەگى سەرىكتەستىك قىزمەتكەرىنىڭ قىزمەت ۇقىعىنان بەتالدى پايدالانۋ دەلوسى جونىندە ءبىرىنشى سوت اشتى.
جيلين ولكەسى چاڭچۇن قالالىق حالىق پروكۋراتۋراسى بىلاي دەپ ايىپتادى: ايىپكەر ليڭ چىڭشيڭ جياڭشي ولكەلىك پارتكومنىڭ تۇراقتى مۇشەسى، ورىنباسار ولكە باستىعى، مەملەكەتتىك تەمەكىنى ارناۋلى ساتۋ مەكەمەسى پارتگرۋپپاسىنىڭ شۋجيى، مەكەمە باستعى، جۇڭگو تەمەكى باس سەرىكتەستىگىنىڭ بۇرىنعى باس ديرەكتورى قاتارلى مىندەتىندەگى قولايلىلىقتاردان پايدالانىپ، قاتىستى ورىندار مەن جەكەلەردىڭ نىساندى كوتەرەگە الۋى، كاسىپورىن ساۋداسى، قىزمەتىن رەتتەۋ قاتارلى جۇمىستارىنا كومەكتەسىپ، پايدا العان، 2006 - جىلدان 2023 - جىلعا دەيىنگى ارالىقتا، تىكەلەي نەمەسە باسقالار ارقىلى زاڭسىز قابىلداعان مال - مۇلىك حالىق اقشاسىنا سىندىرعاندا جيىنى 43 ميلليون 110 مىڭ يۋاننان اسقان؛ 2015 - جىلدان بەرى ليڭ چىڭشيڭ مەملەكەتتىك تەمەكىنى ارناۋلى ساتۋ مەكەمەسى پارتگرۋپپاسىنىڭ شۋجيى، مەكەمە باستىعى، جۇڭگو تەمەكى باس سەرىكتىگىنىڭ باس ديرەكتورى قاتارلى مىندەتتەردى وتەگەن كەزىندە قاتىستى قارجى قوسۋ جانە جارنا ۇقىعىن ساتىپ الۋ جۇمىستارىندا بەتكە قاراپ قارالىق ىستەپ، قىزمەت ۇقىعىنان بەتالدى پايدالانىپ، مەملەكەت مەنشىگىندەگى سەرىكتەستىككە اۋىر زيان جەتكىزىپ، مەملەكەت مۇددەسىن ەرەكشە اۋىر زيانعا ۇشىراتتى. پروكۋراتۋرا ورگاندارى پارا الۋ قىلمىسى، مەملەكەت مەنشىگىندەگى سەرىكتەستىك قىزمەتكەرىنىڭ قىزمەت ۇقىعىنان بەتالدى پايدالانۋ قىلمىسى بويىنشا ليڭ چىڭشيڭنىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.
سوتتا پروكۋراتۋرا ورگاندارى قاتىستى دالەل - سىپاتتاردى كورسەتتى، ايىپكەر ليڭ چىڭشيڭ مەن ونىڭ اقتاۋشىسى فاكت كورسەتتى، شاعىم ايتۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، ليڭ چىڭشيڭ ەڭ سوڭعى ءسوزىن سويلەدى ءارى سوت ۇستىندە قىلمىسىن تانىپ، وكىنەتىندىگىن ءبىلدىردى. ەڭ سوڭىندا سوت ءوزىلىس جاساعانىن، سوت ۇكىمىن ارتىنان جاريالايتىندىعىن ايتتى.
ءار سالاداعى بۇقارادان 40 نەشە ادام سوت تەرگەۋىن سىرتتاي تىڭدادى.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: مانەپ ەربول ۇلى
دايىنداعان: مانەپ ەربول ۇلى
كەلۋ قاينارى: حالىق تورابى
