شىنجوۋ 19 ـ ءنومىرلى الەم كەمەسىنىڭ عارىشكەرلەر گرۋپپاسى 2 ـ رەتكى عارىش بولمەسىنەن شىعۋ قيمىلىن تابىسپەن ورىندادى
شينحۋا اگەنتتىگىنىڭ تىلشىلەرى حۋاڭ يچىن، لي يانچىندار 1 – ايدىڭ 21 – كۇنى بەيجيڭنەن حابارلايدى. ءتىلشىنىڭ جۇڭگو عارىشكەرلى عارىش ينجەنەرياسى كەڭسەسىنەن ۇعىسۋىنشا، 1 – ايدىڭ 21 - كۇنى ساعات بىردەن 12 مينۋت وتكەندە، عارىش بولمەسىنەن شىعۋ مىندەتىن شامامەن 8.5 ساعاتتا ورىنداعان سوڭ، شىنجوۋ 19 ـ ءنومىرلى الەم كەمەسىندەگى عارىشكەرلەر ساي شۇيجى، سۇڭ ليڭدۇڭ، ۋاڭ حاۋزى تىعىز سەلبەسىپ، عارىش بەكەتىنىڭ مەحانيكالىق بىلەگى مەن جەر بەتىندەگى عىلىمي زەرتتەۋ قىزمەتكەرلەرىنىڭ سايكەسۋىندە جانە قولداۋىندا، عارىش بەكەتىنىڭ كەڭىستىكتەگى جارىقشاقتاردان قورعانۋ قوندىرعىسىن ورناتۋ، عارىش بولمەسىنىڭ سىرتىنداعى جابدىقتار مەن قۇرىلعىلاردى شارلاۋ ـ تەكسەرۋ قاتارلى مىندەتتەردى ورىندادى. عارىش بولمەسىنەن شىققان عارىشكەرلەر ساي شۇيجى مەن سۇڭ ليڭدۇڭ ۋىنتيان تاجىريبە بولمەسىنە امان - ەسەن قايتىپ كەلىپ، عارىش بولمەسىنەن شىعۋ قيمىلى تابىستى بولدى.
شىنجوۋ 19 ـ ءنومىرلى ادام الىپ ۇشاتىن الەم كەمەسى 2024 ـ جىلى 10 – ايدىڭ 30 – كۇنى ءساتتى ۇشىرىلدى، قازىر شىنجوۋ 19 ـ ءنومىرلى الەم كەمەسىنىڭ عارىشقا ۇشۋ ساپارىنىڭ تەڭ جارىمى ورىندالىپ بولۋعا تايادى. تانىستىرۋعا قاراعاندا، الدا ولار وربيتادا قىرۋار عىلىمي تاجىريبەلەر مەن تەحنيكالىق سىناقتاردى ورىستەتەدى ءارى جىلان جىلعى كوكتەم مەرەكەسىن قاربالاس قىزمەت بارىسىندا قارسى الادى.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
