གང་གིས་སྟོང་དང་རྟེན་འབྱུང་དག །
དབུ་མའི་ལམ་དུ་དོན་གཅིག་པར། །
གསུང་མཆོག་འཚུངས་པ་མེད་པ་ཡི། །
སྨྲ་བའི་བླ་མར་ཕྱག་འཚལ་ནས། །
གང་ཞིག་རྟོགས་པས་གྲོལ་འགྱུར་ཞིང་། །
མ་རིག་རྨོངས་པས་འཁོར་བྱེད་པའི། །
འཁོར་འདས་དབྱེ་བ་མེད་པ་རུ། །
ལྟ་བའི་གནད་དག་བགྲོ་ལ་སྤྲོ། །
སྔོོན་དུས་སྤྱི་དངོས་སྨྲ་བ་འགས། །
སྤྱི་དངོས་འགོག་པའི་རིགས་པ་ལ། །
རང་ལྡོག་དགག་བྱའི་ཁྲལ་ལ་བཞག །
རང་ལྡོག་ཡིན་པ་མི་འགོག་ལོ། །
ཕྱིས་དུས་དབུ་མ་སྨྲ་བ་འགས། །
དབུ་མའི་རྟགས་ཆེན་ལྔ་པོ་ལ། །
བདེན་གྲུབ་དགག་བྱའི་ཁྲལ་ལ་བཞག །
རྒྱུ་འབྲས་ཚད་གྲུབ་ཡིན་ནོ་ལོ། །
དེང་དུས་ཚད་གྲུབ་སྨྲ་བ་འགས། །
སྒྲ་ཉིད་མཉན་བྱ་ཡིན་པ་བཞིན། །
རང་ལྡོག་ཚད་གྲུབ་ཡིན་ནོ་ལོ། །
མཉན་བྱར་ཡོད་པས་མ་ཁྱབ་བཞིན། །
རང་ལྡོག་ཡིན་མིན་འགོག་གོ་ཞེས། །
རང་སྲུང་ཚིག་གི་རྫོང་བརྩིགས་ནས། །
རང་མཚང་འགེབ་པའི་ངང་ཚུལ་དག །
རྟོན་པ་བཞི་པོ་གོ་ལྡོག་ནས། །
བསྟན་པ་བཤིག་པ་མ་ཡིན་ནམ། །
ཆོས་དང་གང་ཟག་ཏུ་འཛིན་པའི། །
ལུས་ལ་ལུས་དབང་ཇི་བཞིན་དུ། །
མ་རིག་ལས་གཞན་སོ་སྐྱེའི་བློ། །
མེད་ཕྱིར་ཚད་མའི་གཞི་མཐུན་མེད། །
སྒྲིབ་གཉིས་གློ་བུར་བར་སྨྲ་ཞིང་། །
འདུ་བྱེད་མི་སླུར་སྨྲ་བ་ནི། །
མ་ཉིད་མོ་གཤམ་ཡིན་ནོ་ཞེས། །
སྨྲ་བར་བྱེད་དང་མི་མཚུངས་སམ། །
མ་རིག་རྨོངས་པའི་རྒྱལ་ཁམས་ན། །
བག་ཆགས་བརྟན་དང་མི་བརྟན་ལས། །
བདེན་དང་རྫུན་པའི་ཁྲིམས་ཡོད་པས། །
འདུ་བྱེད་བསླུ་བར་དོགས་མི་དགོས། །
སེམས་ཅན་ཚད་མས་མ་དམིགས་ན། །
སྙིང་རྗེའི་རྒྱུན་ནི་ཆད་སྐད་པ། །
སྐྱེ་མེད་མངོན་དུ་གྱུར་པ་ན། །
སྙིང་སྐྱེ་འགོག་པའི་བདུད་ཚིག་དངོས། །
སྲིད་འདིར་རིག་པ་ན་ཕྲ་ཞིང་། །
སྲེད་པའི་དམག་དཔོན་ངམ་གནག་པས། །
ཚུལ་ཁྲིམས་གོ་ཆ་བཙན་པ་དང་། །
བསམ་གཏན་གྲོགས་དང་འགྲོགས་པ་གཅེས། །
རིག་པ་ཡེ་ཤེས་རྒྱལ་ཁམས་ན། །
སྲེད་པའི་དམག་དཔོན་ཤི་ཚར་བས། །
སྲིད་པའི་དཔུང་ལ་ཉམ་ང་ཅི། །
ཟུང་འཇུག་གཉིས་སུ་མེད་པ་ལ། །
གཉིས་ཚང་དགོས་པ་རྨོངས་གཏམ་སྟེ། །
རིགས་པའི་རྒྱལ་པོ་རྟེན་འབྲེལ་ལ། །
ཡོད་པས་ཁྱབ་སྨྲ་དེ་ལས་ལོད། །
གཉིས་སུ་ཞན་པས་མ་སླད་རྣམ་དཀར་དགེས། །
གཉིས་སུ་འཛིན་པས་འཁོར་བར་འཆིང་བའི་འགྲོ། །
གཉིས་སུ་མེད་པའི་བདེན་པའི་དོན་རྟོགས་ནས། །
གཉིས་མེད་ཆོས་ཀྱི་དབྱིངས་དང་རོ་གཅིག་ཤོག །
ཅེས་ཀུན་ཏུ་བཟང་པོའི་བསྟི་གནས་སུ་གྲགས་པ་རྒྱ་ནག་གླང་ཆེན་འགྱིང་རིར་གནས་མཇལ་དུ་འགྲོ་ཞོར་བྲིས་པ་དགེ་བར་གྱུར་ཅིག །དུང་བརྡ་ནས་༢༠༢༤ལོའི་ཟླ་༡༡ པའི་ཚེས་༢ ལ།
