«زەينەتكە شىعۋداعى يكەمدى ءتۇزىمدى اتقارۋدىڭ ۋاقىتتىق ءادىسى» جاريالاندى
شينحۋا اگەنتتىگىنىڭ ءتىلشىسى جياڭ لين 1 – ايدىڭ 1 – كۇنى بەيجيڭنەن حابارلايدى. «مەملەكەتتىك حالىق قۇرىلتايى تۇراقتى كوميتەتىنىڭ زاڭدا بەلگىلەنگەن زەينەتكە شىعۋ جاسىن بىرتىندەپ ۇزارتۋ تۋرالى قاۋلىسىن» دايەكتى تياناقتاندىرۋ ءۇشىن، ادام كۇشى بايلىعى جانە قوعامدىق قامتاماسىزداندىرۋ مينيسترلىگى، ورتالىق كوميتەتتىڭ ۇيىمدىق قىزمەت ءبولىمى، قازىنا مينيسترلىگى قاتارلى ءۇش تاراۋ 1 – ايدىڭ 1 – كۇنى «زەينەتكە شىعۋداعى يكەمدى ءتۇزىمدى اتقارۋدىڭ ۋاقىتتىق ءادىسىن» جاريالادى.
قاۋلىعا ساي، 2025 – جىلى 1 – ايدىڭ 1 – كۇنىنەن باستاپ، ەلىمىز 15 جىل ۋاقىت ىشىندە ەر جۇمىسشى – قىزمەتكەرلەردىڭ زاڭدا بەلگىلەنگەن زەينەتكە شىعۋ جاسىن بۇرىنعى 60 جاستان 63 جاسقا ۇزارتادى، ايەل جۇمىسشى – قىزمەتكەرلەردىڭ زاڭدا بەلگىلەنگەن زەينەتكە شىعۋ جاسىن 50 جاستان، 55 جاستان جەكە – جەكە 55 جاسقا، 58 جاسقا ۇزارتادى.
«زەينەتكە شىعۋداعى يكەمدى ءتۇزىمدى اتقارۋدىڭ ۋاقىتتىق ءادىسى» ورتاعا قويىلعان سوڭ، 2025 – جىلى 1 – ايدىڭ 1 – كۇنىنەن باستاپ، جۇمىسشى – قىزمەتكەرلەر مەملەكەت بەلگىلەگەن اي سايىن نەگىزدىك زەينەتاقىنى الۋعا قاجەتتى ەڭ تومەنگى اقى تاپسىرۋ جىل شەگىنە جەتكەن سوڭ، ءوز ەركىمەن يكەمدى تۇردە الدىن الا زەينەتكە شىعۋدى تاڭداۋىنا بولادى، الدىن الا زەينەتكە شىعۋ ۋاقىتى مەن زاڭدا بەلگىلەنگەن زەينەتكە شىعۋ ۋاقىتىنىڭ ارالىعى 3 جىلدان اسىپ كەتپەۋى كەرەك، ونىڭ ۇستىنە، ايەل جۇمىسشى – قىزمەتكەرلەردىڭ زەينەتكە شىعۋ جاسى بۇرىنعى زاڭدا بەلگىلەنگەن 50 جاستان، 55 جاستان تومەن بولماۋى، ەر جۇمىسشى – قىزمەتكەرلەردىڭ زەينەتكە شىعۋ جاسى بۇرىنعى زاڭدا بەلگىلەنگەن 60 جاستان تومەن بولماۋى كەرەك. جۇمىسشى – قىزمەتكەرلەر زاڭدا بەلگىلەنگەن زەينەتكە شىعۋ جاسىنا جەتكەن كەزدە، قىزمەت ورنى مەن جۇمىسشى – قىزمەتكەر ەكى جاق كەڭەسىپ بىرلىككە كەلگەن جاعدايدا، زەينەتكە شىعۋ جاسىن يكەمدى تۇردە ۇزارتۋعا بولادى، ۇزارتىلعاننان كەيىنگى ۋاقىتى مەن زاڭدا بەلگىلەنگەن زەينەتكە شىعۋ ۋاقىتىنىڭ ارالىعى ەڭ كوپ بولعاندا 3 جىلدان اسىپ كەتپەۋى كەرەك.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
