ཉེ་ཆར། གཞིས་རྩེ་གྲོང་ཁྱེར་གྲོང་ཁྱེར་དོ་དམ་ཅུས་ཀྱིས་གྲོང་ཁྱེར་གྱི་སྤྱི་པའི་སྒྲིག་ཆས་ལ་རང་དགར་གཏོར་བཤིག་བཏང་བའི་བྱེད་སྤྱོད་ཅིག་རྩད་ཆོད་ནས་ཐག་གཅོད་བྱས་པ་དང་། འབྲེལ་ཡོད་ཇ་ཁང་ལ་སྲིད་འཛིན་གྱི་ཆད་པ་བཅད་འདུག
དོན་རྐྱེན་ཐོན་པའི་བརྒྱུད་རིམ།
2024ལོའི་ཟླ་10ཚེས་23ཉིན་གྱི་ཆུ་ཚོད་16དང་སྐར་མ་55ཙམ་ལ། གཞིས་རྩེ་གྲོང་ཁྱེར་གྲོང་ཁྱེར་དོ་དམ་ཕྱོགས་བསྡུས་སྲིད་འཛིན་ཁྲིམས་སྒྱུར་རུ་ཁག་དང་པོས་ཁོངས་གཏོགས་ཁུལ་དུ་སྐོར་ཞིབ་གྲལ་བཤེར་བྱེད་སྐབས། ཁོངས་གཏོགས་ཁུལ་གྱི་ཇ་ཁང་ཞིག་གིས་ཆོག་མཆན་མ་ཐོབ་པར་སྤྱི་པའི་སྒྲིག་ཆས་རང་དགར་གཏོར་བཤིག་བཏང་བའི་གནས་ཚུལ་ཤེས་རྟོགས་བྱུང་བ་རེད།
ཟ་ཁང་དེས་ཆོག་མཆན་མ་ཐོབ་པར་སྤྱི་པའི་སྒྲིག་ཆས་རང་དགར་གཏོར་བཤིག་བཏང་བའི་བྱེད་སྤྱོད་དེ《གཞིས་རྩེ་གྲོང་ཁྱེར་གྱི་གྲོང་ཁྱེར་དོ་དམ་སྲོལ་ཡིག》གི་དོན་ཚན་བཅུ་གཅིག་པའི་ནང་གསེས་གཉིས་པའི་གཏན་འབེབས་ལས་འགལ་བ་དང་།《གཞིས་རྩེ་གྲོང་ཁྱེར་གྱི་གྲོང་ཁྱེར་དོ་དམ་སྲོལ་ཡིག》གི་དོན་ཚན་སོ་བརྒྱད་པའི་ནང་གསེས་གཉིས་པ་གཞིར་བཟུང་དངུལ་ཆད་སྒོར་300ཡི་སྲིད་འཛིན་ཆད་པ་བཅད་པ་རེད།
འབྲེལ་ཡོད་སྲོལ་ཡིག
《གཞིས་རྩེ་གྲོང་ཁྱེར་གྱི་གྲོང་ཁྱེར་དོ་དམ་སྲོལ་ཡིག》གི་དོན་ཚན་བཅུ་གཅིག་པའི་ནང་གསེས་གཉིས་པའི་ནང་། ཚན་པ་དང་མི་སྒེར་གང་རུང་གིས་སྤྱི་པའི་སྒྲིག་ཆས་ལ་སྲུང་སྐྱོབ་བྱེད་དགོས་པ་ལས་སྤྱི་པའི་སྒྲིག་ཆས་ཧམ་བཟུང་དང་གཏོར་བཤིག གཏོར་བརླག སྤོ་བ་བཅས་བྱེད་མི་ཆོག་ཞེས་འཁོད་ཡོད།
དོན་ཚན་སོ་བརྒྱད་པའི་ནང་གསེས་གཉིས་པའི་ནང་། སྤྱི་པའི་སྒྲིག་ཆས་ཧམ་བཟུང་དང་གཏོར་བཤིག གཏོར་བརླག སྤོ་བ་བཅས་བྱེད་པའམ་ཡང་ན་སྤྱི་པའི་སྒྲིག་ཆས་ཡོད་སའི་ཁྱབ་ཁོངས་སུ་རང་དགར་ཁྲོམ་འདོན་པ་དང་། ཁང་པ་རྒྱག་པ། བྱེ་མ་བསྔོགས་པ། ས་ལེན་པ། རྡོ་བསྔོགས་པ་སོགས་བྱས་ནས་སྤྱི་པའི་སྒྲིག་ཆས་ཀྱི་བདེ་འཇགས་ལ་གཏོར་བཤིག་བཏང་རིགས། གྲོང་ཁྱེར་དོ་དམ་གཙོ་གཉེར་སྡེ་ཚན་གྱིས་དག་ཐེར་བྱེད་དགོས་པའི་བཀའ་གཏོང་བ་དང་། གྱོང་གུན་གསབ་འཇལ་བྱེད་དགོས་པ་མ་ཟད་སྒོར་500མན་གྱི་དངུལ་ཆད་གཅོད་རྒྱུ་ཡིན་ལུགས་འཁོད་ཡོད།
