ཉེ་ཆར། ལྷ་ས་གྲོང་ཁྱེར་སྤྱི་བདེ་ཅུས་ཉེས་དོན་ཉེན་རྟོག་ཉིང་ལག་རུ་ཁག་གིས་ཁྱིམ་དུ་འཛུལ་ནས་རྐུ་བརྒྱབ་བའི་གྱོད་གཞི་ཞིག་དུས་ཐོག་ཏུ་རྩད་བཅད་ནས་མང་ཚོགས་ཀྱི་གྱོང་གུན་གསབ་གང་ཐུབ་བྱས་པ་རེད།
གྱོད་གཞིའི་གནས་ཚུལ།
ཟླ་11ཚེས་6ཉིན་གྱི་ཆུ་ཚོད་16ཙམ་ལ། ལྷ་ས་གྲོང་ཁྱེར་ཁྲེང་ཀོན་ཆུས་ཚེས་གསུམ་ཐང་ཤར་ལམ་གྱི་སྡེ་ཁུལ་ཞིག་ཏུ་སྡོད་མཁན་བུད་མེད་བཀྲ་ཤིས（མིང་ཚབ）ཀྱིས་ལྷ་ས་གྲོང་ཁྱེར་སྤྱི་བདེ་ཅུས་ཉེས་དོན་ཉེན་རྟོག་ཉིང་ལག་རུ་ཁག་ལ། ངའི་ཁྱིམ་ནས་སྒོར་ཁྲི་26.1རི་བའི་གསེར་དངུལ་གྱི་རྒྱན་ཆ་བརླགས་འདུག་ཅེས་སྙན་སེང་ཞུས།
སྙན་སེང་འབྱོར་རྗེས། ལྷ་ས་གྲོང་ཁྱེར་སྤྱི་བདེ་ཅུས་ཉེས་དོན་ཉེན་རྟོག་ཉིང་ལག་རུ་ཁག་རུ་ཆེན་བཞི་པས་ཉེས་དོན་ཚན་རིག་ལག་རྩལ་ཞིབ་འཇུག་ཁང་སོགས་ཚན་པ་དང་མཉམ་དུ་གནས་ཚུལ་ཐོན་སར་རྩད་ཞིབ་བྱེད་པར་བསྐྱོད་ཅིང་། མྱུལ་ཞིབ་པས་སྔར་བས་བརྟག་དཔྱད་བྱས་པ་བརྒྱུད། དོ་བདག་གི་བཟའ་ཟླའི་སྤུན་མཆེད་ཀྱི་ཕྲུ་གུ་ཟླ་ཆེ་གེ་མོར་དོགས་པ་ཆེན་པོ་ཡོད་པ་ཤེས། དེའང་ཉེས་དོན་ཚན་རིག་ལག་རྩལ་ཞིབ་འཇུག་ཁང་གི་ཚན་རྩལ་གྱི་འདེགས་སྐྱོར་དང་འགག་རྩའི་ཁུངས་སྣེ་ཟུང་འབྲེལ་བྱས་རྗེས་ཟླ་ཆེ་གེ་མོར་དོགས་པ་དེ་བས་ཆེ་བ་ཡོད་པ་གཏན་འཁེལ་བྱུང་བ་རེད།
ཟླ་11ཚེས་7ཉིན། ཉེན་རྟོག་ཕྱོགས་ནས་འཕྲལ་མར་བྱ་སྤྱོད་སྤེལ་ཏེ་ཟླ་ཆེ་གེ་མོ་སྐད་བཏང་བ་དང་། དཔང་རྟགས་ཁུངས་བཙན་གྱི་མདུན་དུ། ཟླ་ཆེ་གེ་མོས་རང་ཉིད་ཀྱི་ནག་ཉེས་ཇི་མ་ཇི་བཞིན་ངོས་ལེན་ཞུས། ཁོ་པས་ངོས་ལེན་ཞུས་པ་ལྟར་ན། རང་ཉིད་ཀྱིས་དྲ་ཐོག་ནས་དངུལ་བུན་གཡར་ཏེ་གཏོང་ཡོང་མགོ་མ་ཐུག་པས་ཞང་པོའི་ཁྱིམ་ནས་རྐུ་རྒྱག་པའི་བསམ་བློ་འཁོར་བ་རེད།
2024ལོའི་ཟླ་3ཚེ་6ཉིན། ཞང་པོ་དང་ཁོང་གི་ནང་མི་ས་ཆ་གཞན་དུ་ཡུལ་སྐོར་ལ་འགྲོ་བའི་སྐབས་དང་བསྟུན་ནས་སྔ་རྗེས་སུ་ཞང་པོའི་ཁྱིམ་དུ་ཐེངས་4འཛུལ་ཏེ་གསེར་དངུལ་གྱི་རྒྱན་ཆ་སོགས་བརྐུས་པ་མ་ཟད། དེ་དག་རིན་གོང་དམའ་པོས་བཙོངས་ནས་སྒོར་ཁྲི་7ལྷག་ཙམ་བྱུང་ཡོད་པ་རེད།
མིག་སྔར། ཉེས་གསོག་དོགས་ཅན་ཟླ་ཆེ་གེ་མོ་སྤྱི་བདེ་ལས་ཁུངས་ཀྱིས་ཁྲིམས་ལྟར་ཉེས་དོན་བཀག་ཉར་བྱས་ཟིན་པ་དང་། གྱོད་གཞི་འདི་སྔར་བས་བརྟག་དཔྱད་བྱེད་བཞིན་ཡོད་པ་རེད།
