شىڭگىل لاڭشان حالىقارالىق قار شاڭعى دەمالىس رايونى 11-ايدىڭ 23-كۇنىنەن باستاپ جاڭا قار ماۋسىمىنداعى شاڭعى تەبۋشىلەردى قارسى الىپ، شاڭعى اۋەسكەرلەرىنە شىت جاڭا قار-مۇز شاتتىعىن سيلايدى. شاڭعى الاڭىنداعى قىزمەتكەرلەر شاڭعى جولى قۇرىلعىلارى، اسپالى كۇيمە سياقتىلارعا ءبىر رەت تەكسەرۋ جۇرگىزدى، سونداي-اق، شاڭعى جابدىقتارىن مايلاۋ، شاڭعىلاردى تازالاۋ جۇمىستارىن ىستەپ، جاڭا قارلى ماۋسىمدا ويداعىداي قىزمەت وتەۋگە ساقاداي سايلاندى.
ساياحاتشىلاردىڭ اماندىعىنا شىنايى كەپىلدىك ەتۋ ءۇشىن، شاڭعى تەبۋ جولىندا ون نەشە قار جاساۋ ماشيناسىمەن جاساندى جولمەن قار جاساۋ جۇمىسى بار كۇشپەن ىستەلۋدە.
شىڭگىل لاڭشان حالىقارالىق قار شاڭعى دەمالىس رايونى شاڭعى جابدىقتارى زالىنىڭ مەڭگەرۋشىسى سايرا نۇرلان قىزى: قازىر قىزمەتكەرلەردىڭ بارلىعى شاڭعى تەبۋشىلەردى قابىلداۋعا دايىندالىپ، ويداعىداي قىزمەت وتەۋگە كىرىستى، شينجياڭنىڭ ءىشى-سىرتىنداعى ساياحاتشىلاردى شىڭگىلگە كەلىپ قار شاڭعى تەبۋگە شاقىرامىز،-دەدى.
ايماعىمىزداعى 4 ءىرى حالىقارالىق قار شاڭعى دەمالىس رايونىنىڭ ءبىرى سانالاتىن شىڭگىل لاڭشان حالىقارالىق قار شاڭعى دەمالىس رايونىندا شامامەن ءبىر ميلليون 630 مىڭ شارشى مەترلىك اۋماقتا جاساندى قار دايىندالادى، جوباداعى 42 شاڭعى جولىنىڭ جالپى ۇزىندىعى 39 كيلومەتردەي. 2024-، 2025-جىلعى جاڭا قارلى ماۋسىمدا شىڭگىل لاڭشان حالىقارالىق قار شاڭعى دەمالىس رايونىنا جوعارى دارەجەلى ەكى شاڭعى جولى تىڭنان قوسىلدى، سونىمەن قاتار، سىرعىما جول، اسپالى كۇيمە سياقتىلاردى قامتىعان كەمەلدى قۇرىلعىلارى ساياحاتشىلاردىڭ، قار شاڭعى اۋەسكەرلەرىنىڭ قار شاڭعى تەبۋدىڭ شاتتىعىنا شومۋىنا مۇمكىندىك جاسايدى.
来源：雪都嘟/阿勒泰地区融媒体中心
记者：古丽娜 张福新
编辑：米拉木古丽·穆斯那提
一审：米拉木古丽·穆斯那提
二审：铁木尔哈孜·木坦
终审：吐尔德别克·哈力别克
