པོད་ལྔའི་གནད་ལ་འཇུག་པ་ཆེར་ཡངས་པའི།།

དམ་པ་གང་གི་རླབས་ཆེན་མཛད་བཟང་ལ།། 

མི་ཕྱེད་དད་གསུམ་ནང་ནས་འཕྱུར་བའི་བརྡར།། 

ངག་རིག་མེ་ཏོག་གཏོར་བའི་ལས་འདིར་སྤྲོ།། 

དུས་མཐར་བྱོན་པའི་ཞི་ཐོབ་དགེ་སྦྱོང་བཞིན།། 

དབང་བོ་ཞི་ཞིང་ཚངས་སྤྱོད་དཔལ་གྱིས་སྒེག། 

བསླབ་གསུམ་གཞི་ལ་འཕགས་ནོར་བདུན་ལྡན་སོགས།།

དད་གུས་དབང་མེད་འགུགས་པའི་དཔྱིད་དུ་ཆེ།།

མདོ་རྒྱུད་གཙུག་ལག་རྒྱ་མཚོའི་འཇིང་བརྒལ་ཏེ།། 

ཟབ་རྒྱས་དོན་བཟང་མི་ཟད་དབྱུག་གི་ནོར།། 

མཁྱེན་ཀློང་ནམ་མཁའ་མཛོད་དུ་ཉེར་དྲངས་པས།། 

དཔལ་ལྡན་མཁས་པའི་རྒྱལ་ཐབས་ངང་གིས་རྙེད།། 

བཤེས་ཆེན་འདི་འདྲ་དམ་བཅར་ཁེལ་དཀའ་བས།། 

རང་རང་བློ་བསྐྱེད་གང་ལོན་བྱེད་གལ་ཞེས།། 

དགོན་འདིའི་ཁྲི་ཆེན་ཞལ་གྱི་བུམ་བཟང་ལས།། 

འདུས་པ་རྒྱ་མཚོའི་ཐོས་འཛིན་བཅུད་དུ་སྨིན།།

རྣམ་དཔྱོད་ཆུ་འཛིན་རྒྱས་པའི་མཁའ་མཐའ་ལས།།

ལུང་རིགས་འོད་བརྒྱའི་དྲ་བ་ཕྱོགས་སུ་འགྱེད།། 

རྩོད་ངག་དབྱར་སྐྱེས་རྔ་གསང་ཆེར་ལྡིར་བས།། 

དྲེགས་མྱོས་ཁེངས་བའི་རི་ཚོམ་ས་རུ་བསྙིལ།། 

རབ་འབྱམས་གཙུག་ལག་རྒྱ་མཚོའི་དཀའ་བའི་གནད།། 

ཕྲ་ཞིབ་རིགས་པའི་ལམ་ནས་ཉེར་དྲངས་ཚེ།། 

ཁེངས་ལྡན་རྒོལ་བའི་ལུས་སྐྱེས་ལྗོན་པ་ཡང་།། 

སྙིང་དང་ལྷན་ཅིག་འདར་བའི་ངལ་བ་བསྟེན།། 

གསེར་མདོག་ཅོད་པན་འཆང་བའི་རིང་ལུགས་ལ།། 

མདོ་དང་ཚད་ཐུབ་རྒྱ་གཞུང་དཔང་བཙུགས་ནས།།

རིགས་ལམ་མཆོག་ཏུ་མྱུར་བའི་རྩོད་བཟང་ཚོགས།། 

མི་སྨྲ་བརྟུལ་ཞུགས་གནས་ལ་ཁྱེད་ཀྱིས་བཀོད།།

ཧ་ས་བཛྲའི་སྔོན་མེད་ལེགས་བཤད་གཏམ། ། 

ཐ་སྙད་སྦྱོར་ཚུལ་ཕྲ་མོའི་ཞིབ་ཆ་ཡན། ། 

འཁྲུལ་བྲལ་ལུང་རིགས་སྐྱ་བར་ཉེར་བཅིངས་ནས། ། 

དྲན་དབང་མདུན་སར་སྨྲ་བའི་སྤོབས་པ་དགེ། 

འདུལ་ལུང་སྡེ་བཞི་མདོ་རྩ་འགྲེལ་ཆེན་དང་།།

མཚོ་ཊཱིཀ་རིན་ཕྲེང་ཡིག་ཆའི་མཐའ་སྡོམ་སོགས།། 

ལུང་རིགས་གོ་གསུམ་སྦྲེལ་བའི་བརྒལ་བརྟག་གྱིས།།

འདུལ་གཞུང་ནང་བྱན་ཆུད་པའི་རང་རྟགས་ངོམ།། 

ཟག་བཅས་ཟག་མེད་གཞི་ལྔའི་རང་སྤྱི་དང་།།

བཅོ་བརྒྱད་སྡེ་བའི་རང་རང་བཞེད་ཚུལ་སོགས།།

ཕྲ་ཞིབ་དགག་བཞག་སྐྱ་བར་ཉེར་དྲངས་ཏེ།། 

ཟ་འོག་རིས་བཞིན་མ་འདྲེས་གསལ་བར་བྱས།།

རིགས་དབང་ཡབ་སྲས་གཞུང་ལ་ཆེར་གོམས་པས།། 

རྟོག་གེའི་ཚིག་དོན་རིག་པའི་གསང་ཚིག་སོགས།།

མ་འདྲེས་ཕྲ་ཞིབ་རིགས་ལམ་གཙང་མའི་ངོས།། 

རྩོད་ངག་ཆོས་གྲྭ་མཛེས་པའི་རྒྱན་དུ་བབས།།

བློ་བཟང་འཇམ་དཔལ་སྙིང་བོའི་ཐུགས་ཀྱི་བཅུད།། 

རྩ་འཇུག་བཞི་གསུམ་ཁོང་ནས་བཏོན་པ་ཡི།། 

ཐུན་མོང་མིན་པའི་དཀའ་བའི་གནད་བརྒྱད་སོགས།།

དྲན་དབང་མཉེས་པའི་ཡོན་དུ་ཅི་ཡང་སྤྲོས།།

ཟབ་མདོའི་སྦས་དོན་དངོས་བརྒྱད་བདུན་ཅུའི་དོན།། 

གསེར་རྣམ་རྟོགས་གསུམ་མཐའ་དཔྱོད་གུང་བསྒྲིགས་ནས།། 

འཕགས་སེང་དགོངས་བཞེད་ཇི་བཞིན་སྨྲ་བ་ལ།། 

མཁྱེན་དཔྱོད་འཇུག་པ་ཟབ་པའི་མཐའ་མ་རིག། 

པོད་ལྔའི་དམ་བཅའ་རི་ལྟར་བཙུགས་པ་ལ།། 

དེར་འཁོད་མཆོག་དམན་བར་མའི་སྐྱེ་འགྲོའི་ཚོགས།།

མཆོག་ཏུ་སིམ་པའི་ངོ་མཚར་དང་འགྲོགས་ནས།། 

གྲགས་པའི་རོལ་མོ་དཀྲོལ་ལ་ཅི་ཡང་བྲེལ།།

གདན་གསུམ་མཁས་མང་དབུས་ནས་ཐོན་པ་ཡི།། 

ལྷ་ལྡན་གདུགས་དཀར་འོག་གི་དམ་བཅའ་ཡང་།། 

འདི་ལས་མཆོག་ཏུ་གྱུར་པ་ཡོད་མིན་ཞེས།། 

བདག་གི་ཡིད་ནི་དད་འདུན་སྤྲོ་བས་མྱོས།།

སྐྱེས་སྦྱངས་སྤོབས་པས་བཏེགས་པའི་མཁྱེན་དཔྱོད་དང་།།

ཡོངས་དག་བཙུན་པའི་དཔལ་སོགས་མཁས་ཀུན་ཡིད།།

དབང་མེད་འགུགས་པའི་ཡོན་ཏན་ལྷུན་རྫོགས་པས།། 

གཟུ་བོར་གནས་རྣམས་དད་པའི་སྤུ་ལོང་འཛིན།།

མཁས་བཙུན་བཟང་བོའི་ཡོན་ཏན་ལྷུན་རྫོགས་ཤིང་།།

འཆད་རྩོད་རྩོམ་པའི་ལས་ཀྱི་འཁོར་ལོ་ཡིས།།

སྐུ་ཚེ་གཙུག་ལག་གམ་ནས་ཟད་བྱེད་པ།།

འདི་ཉིད་ཁོ་ན་མཛད་པའི་ཕུལ་དུ་དགོངས།། 

བཤད་སྒྲུབ་མཛད་བཟང་མཁྱེན་བརྩེའི་ཀློང་ན་མཐོ།། 

གསུང་སྐྱེས་བུ་སློབ་རྒྱུ་སྐར་གྲངས་ལ་འཕྱ།།

དུས་འདིར་བསྟན་པ་འཛིན་པའི་ཐབས་ཀྱི་ཚུལ།།

འདི་ལས་རྨད་དུ་བྱུང་བ་གཞན་ཡོད་མིན།། 

མགོན་ཁྱོད་ཞབས་ཟུང་རེ་ཁཱ་ཡིད་བཞིན་ནོར།། 

དད་གསུམ་མཛེས་པའི་རྒྱན་དུ་གཡོ་མེད་ཅིང་།། 

གསུང་གི་མཛད་བཟང་ག་བུར་ཐིགས་པ་ལ།། 

སྤྱོད་པའི་སྐལ་བཟང་ནམ་ཡང་ཉམས་མེད་ཤོག།