རིང་རྒྱུ་ཐུང་རྒྱུ་མེད་པའི་མི་ལོ་བཅུ་གསུམ། འཇིགས་མེད་བརྩོན་འགྲུས།

གཡུ་ཆུང་དྲུག་དཀར་ལྟ་བུའི་ཁྱེད་ཚོ། 

འཇིགས་བརྩོན།

ང་ཚོའི་གདོང་ལ་འཛུམ་མདངས་འཁྱིལ་ལེ་དང་།།

མངོན་ལྐོག་བར་ལ་གཡེར་བག་མ་སིམ་པར།།

ལས་དང་སྨོན་ལམ་སྡེ་འདིར་བཞད་པ་ཡི།།

ང་དང་ཁྱེད་ཚོ་ལས་ཀྱི་ལམ་ན་ཡོད།། 

ཁྱེད་ཚོ་མཁའ་ན་རྒྱུ་བའི་སྐར་ཚོགས་ཏེ།།

བྱང་ཕྱོགས་ས་འཛིན་གཡུ་ཡི་པང་ལ་ལྷུང་།།

དེའི་ཕྱིར་སྲིད་པའི་རྨུ་ཐག་དཀར་པོ་དེས།།

ཡར་ལ་འཐེན་པ་བསོད་ནམས་རི་བོ་ཡིན།།

ཁྱེད་ཚོ་ང་ཡི་སེམས་ཀྱི་དྲོད་ལ་ལྷུང་།།

ང་ཡང་ཁྱེད་ཚོའི་བརྩེ་བའི་མཚོ་ལ་བསྲིངས།།

ཐོད་པའི་ཁ་ཡིག་གསེར་གྱི་རི་མོ་ཅན།།

གསང་བ་སྔགས་ཀྱི་རྡོ་རྗེ་སྤུན་དུ་གྱུར།།

མ་བསྒྲིགས་རང་འགྲིག་ནགས་མའི་བྱ་ཚོགས་བཞིན།།

མཉམ་དུ་འདུས་པས་ཉིན་མཚན་འདའ་བར་བྱེད།།

གཡུ་ཆུང་དྲུག་དཀར་ལྟ་བུ་ཁྱེད་ཚོ་ནི།།

ང་དང་མངོན་སུམ་ཕྲད་པ་སྐྱིད་ཅིག་ཨང་།།

འདི་ནས་བརྩིས་ན་བགྲང་བྱ་བཅུ་གསུམ་ཕྱིན།།

ལམ་ནི་གྱ་གྱུ་སྨིག་རྒྱུའི་གསེང་ལ་ཟུག །

ཡིན་ཡང་ང་ཚོའི་ནམ་མཁའ་སྔོན་མོ་ལ།།

གསེར་གྱི་མདངས་འཛིན་ཉི་ཟླའི་གུར་ཁྱིམ་ཕུབ།།

སེམས་ཐག་ལོ་ཟླའི་ལམ་གྱིས་མ་ཆོད་ལ།།

མི་ཁའི་བྱང་རླུང་ཅི་ཙམ་རྒོད་ན་ཡང་།།

ལས་ཀྱི་རི་མོ་སྤུ་གྲིས་མ་བཅད་པར།།

འདི་ལ་ཐུག་རག་མཉམ་དུ་སྡོད་དགོས་བྱུང་།།

མཛོད་གཡང་ཕྱུག་མོ་ལྷ་ཡི་ཐང་ཆེན་ན།།

མགོ་སྦྲ་རོག་རོག་ཅན་གྱི་ཁྲི་སྡེ་ཞིག།

ང་ཚོ་དེ་གའི་བར་ཐག་ཆོད་ས་ནས།།

ངུར་སྨུག་མཚོ་ལ་གཡས་བསྐོར་བྱས་ནས་ཡོད།།

གངས་རི་ཞུ་བའི་ཆུ་མོ་མཚོ་ལ་འདྲེས།།

མཚོ་མོའི་ཁ་ཞེང་ཡིད་ཀྱིས་ག་ལ་དཔོག །

ཁྱེད་ཅག་རིག་པའི་རླབས་ཕྲེང་གཡོ་བ་དེ།།

མཚོ་མོ་དྲན་པའི་རྒྱུ་མཚན་ཡིན་ནམ་སྙམ།།

ཕྱི་ཡི་བཀོད་པ་ལེགས་བྲིས་ལྷ་ཡི་ཞིང་།།

ཁྱེད་ཚོའི་མཛེས་པ་མཁར་ཉལ་ཀུན་ལས་རྒྱལ།།

ཡིད་སེམས་མུན་པའི་གཅོང་རོང་རལ་བ་ན།།

ང་དང་ཁྱེད་ཚོའི་གོམ་སྟབས་རིམ་གྱིས་འགྲིག། 

ཁྱེད་ཚོ་དབྱར་ནས་ཞུགས་ཀྱང་དབྱར་ལ་རྫོགས།།

དགུན་དང་གདོང་ཐུག་བརྒྱབ་སྟེ་བཙག་དང་འགྲན།།

ཞེ་རྩའི་དར་ཁ་ཞུ་བའི་གཞི་མ་ཡང་།།

དགུན་དང་གདོང་ཐུག་བརྒྱབ་པས་ཡིན་པ་འདྲ།།

ཆོལ་གསུམ་ལུང་རིགས་གངས་ལྗོངས་ལུང་བ་རུ།།

མི་ལུས་ལོན་པ་བསོད་ནམས་ཚོགས་ཀྱི་རྩེ།།

མ་ཟད་མདོ་སྔགས་བསྟན་དང་མཇལ་བ་འདི།།

ང་དང་ཁྱོད་ཀྱི་ཐོད་པའི་ཨ་ཡིག་ཡིན།།

འདི་ནས་མི་ལོ་དུ་མའི་ཡར་སྔོན་ནས།།

འགྲོ་བའི་ལམ་དང་གོམ་པའི་སྟངས་སྟབས་སོགས།།

བྱིས་པ་སྣང་ཆུང་ཞིག་དང་ལྟར་མཚུངས་ཀྱང་།།

ད་ནི་ནང་སེམས་དྲོད་ཁོལ་ཅན་ཁྱོད་སྐྱིད།།

མཛོད་གཡང་ཕྱུག་མོའི་རི་ལམ་འཕྲད་ཀྱིས་བཅད།།

སྐུ་བླ་གུར་དཀར་ཡུལ་མཐའ་བསྲུངས་ཏེ་འགྱིངས།།

ས་ཡི་རྩི་བཅུད་གཞན་དང་འགྲན་མིན་ན།།

ང་དང་ཁྱོད་ཀྱང་ལང་ཚོ་ཇེ་དར་ཡིན།།

མཛོད་དགེའི་རྩྭ་ཐང་གནམ་གྱི་མཐའ་ལ་འདྲེས།།

བགྲོད་པས་ཕ་མཐའ་གཞལ་བར་ག་ལ་ནུས།།

སེམས་ཀྱི་རོལ་རྩེད་གར་ལ་རྩེན་པ་གང་།།

དེ་རུ་བཞུགས་སྙམ་ཁྱེད་ཀྱི་ལང་ཚོར་བལྟ།།

ཡུལ་འདིའི་བཙུན་ཆུང་ཁྱེད་ཚོའི་མཛེས་སྡུག་ནི།།

ང་དང་མགྲིན་པའི་མགུལ་དུ་དཔྱངས་པ་ན།།

སེམས་ཀྱི་མུ་ཁྱུད་ཟླུམ་པོར་འཁྱིལ་བ་ཡིས།།

དམར་པོའི་བརྩེ་མགུར་ཁྱེད་མིན་སུན་ལ་ལེན།།

ལོ་དང་ཟླ་བས་ང་ཚོ་བཙན་གྱིས་དེད།།

བྱིས་པའི་རྨི་ལམ་རིང་ནས་རིང་དུ་བོར།།

གནམ་སའི་ཁ་ལོ་རང་ས་རང་ལ་གཤེགས།།

བཙུན་པ་ང་ཚོ་ད་ཆ་གང་དུ་འགྲོ།།

ཀྭ་ཡེ་ལྷོ་རྒྱུད་འཛམ་གླིང་བྱང་ཕྱོགས་ཆ།།

ང་དང་ཁྱེད་ཀྱི་མིག་གཉིས་བསྲིངས་ས་ཡིན།།

ཁྱེད་ཚོའི་གསེར་གྱི་གླེག་བམ་སེར་པོ་དེ།།

ང་ཡི་སེམས་ཀྱི་འོ་ཇ་མངར་མོ་ཡིན།།

ཁྱོད་ཚོའི་བྱས་རྗེས་སྨན་གྱི་ལྗོན་པ་དེ།།

ཡུལ་གྱི་གོས་ལྗང་གཡུ་ལོའི་གདན་ལ་བཞུགས།།

ངས་ནི་འདི་ལྟར་དད་ཕྱག་བགྱི་བ་འདིས།།

ཁྱེད་ཚོས་མཁས་པའི་ཚུལ་ཙམ་བཟུང་བས་ཡིན།།

གསོན་ན་ལ་རྒྱ་མ་ཟིན་སྡོད་པ་དང་།།

ཤི་ནས་བར་དོ་འགྲིམ་ནའང་དེ་ལས་དགའ།།

གོས་བཟང་ན་བཟའ་བཏུབ་པས་ཅི་ལ་ཕན།།

སྣང་བ་དགུང་དུ་འཕྱོ་ཡང་སྟོང་སང་ངེ་།།

ང་ཡི་གང་འདོད་གཏམ་གྱིས་བརྗོད་པ་འདི།།

ས་ལ་བཞད་པའི་མེ་ཏོག་དཀར་དམར་དང་།།

གནམ་ལ་ཤར་བའི་ཉི་ཟླའི་འོད་མིན་ཀྱང་།།

ཁྱེད་ཚོར་ཞུས་པའི་སྣང་བ་ཆུང་ཆུང་ཡིན།།

གསོན་དུས་མི་ཁ་བཤད་ཡམས་འཁུར་རོགས་དང་།།

ཤི་དུས་རེ་བའི་འཁྲེང་ཞེན་ཁེན་ས་སྟེ།།

བརྩེ་བ་མི་ཤུགས་དགུ་མདུད་བརྒྱབ་པ་བཞིན།།

མི་ལྷོད་དམ་ཚིག་དམ་བཅའ་བརྟན་ན་ཨང་།།

ཚུལ་ཁྲིམས་རྣམ་པར་དག་པའི་ཞིང་ས་ལ།།

ཐོས་བསམ་སྒོམ་པའི་བཅུད་ལྡན་སྙེ་མའི་ཚོགས།།

ཡོངས་སུ་སྨིན་པའི་སློབ་བུ་བཅུ་དགུ་ལ།།

དགའ་སྟོན་རྟེན་འབྲེལ་མི་ཞུ་རང་དབང་ཅི།།

ཞེས་མཛོད་དགེ་སྒར་སར་ནང་བསྟན་རིག་གནས་འཛིན་གྲྭའི་སྐབས་ལྔ་བའི་མཐར་ཕྱིན་འཛིན་གྲྭའི་སློབ་མ་བཅུ་དགུས་སློབ་གླིང་འདིའི་བསླབ་གཞི་མཐའ་དག་ཡོངས་སུ་རྫོགས་ནས་རྒྱལ་ཁ་དང་གཟི་བརྗིད་ཀྱི་ངང་ནས་སློབ་མཐར་ཕྱིན་པ་ལ་དགའ་མགུ་ཡི་རང་དང་བཅས་སྙིང་ནས་རྟེན་འབྲེལ་ཞུས་པ་ལགས། 

༢༠༢༤/༧/༦/ཉིན།