བྱ་ཁྱུང་རྗེ་བདེ་ཁང་བའི་རྟོགས་བརྗོད། བྱ་ཁྱུང་སྲས།

སྣང་སྲིད་འཁོར་འདས་ཇི་ལྟ་ཇི་སྙེད།།

རྒྱུ་འབྲས་རྟེན་འབྲེལ་ཉིད་ལས་གྲུབ་ཞེས།།

ཀུན་མཁྱེན་ཤེས་རབ་ཉི་མའི་འོད་ཀྱིས།།

གཟིགས་ཤིང་འདོམས་པ་དེ་ལ་འདུད་དོ།།

ཞལ་རས་ཟླ་ཟེར་ཨུཏྤལ་མིག་ཟུང་།།

བདེ་སྟོང་ཕྱག་རྒྱའི་ཐུན་མཚམས་བར་ནས།།

བརྩེ་བའི་དངོས་གྲུབ་འཛུམ་པ་དང་བཅས།།

ངག་གི་མཆོག་སྩོལ་དབྱངས་ཀྱི་རྒྱལ་མོ།།

མཁས་གྲུབ་གནམ་གྱིས་ས་ཆེན་བཀབ་པའི།།

གངས་རིའི་ལྗོངས་ཀྱི་སྐར་ཆེན་དག་གི།

གསང་གསུམ་མཛད་རྣམ་ཡི་གེར་འགོད་ལ།།

བློ་ལྡན་སུ་ཞིག་བརྩོན་པ་འདོར་ཨང་།།

བསྟན་ལ་གནོད་པའི་འབྱུང་བོའི་སྐད་ངན།།

སྙིང་ལ་ཞུགས་པའི་སྐྱེ་བོ་རྣམས་ནི།།

ལོག་སྨྲའི་གཡང་ལ་འཁྱམས་པའི་ཚེ་ན།།

སྙིང་རྗེ་ལྷ་ཡིས་ཐུགས་རྗེས་གཟིགས་རོགས།།

ཝ་སྐྱེས་སེང་གེར་བརྫུ་བའི་མཁས་ཉམས།།

འབྱུང་བོས་མི་སེམས་དཀྲུགས་པའི་གྲུབ་རྫུན།།

ས་སྟེང་ཁྱབ་སྟེ་རྒྱལ་བསྟན་གཡོགས་དུས།།

བསྟན་སྲུང་རྒྱལ་མོས་གཟིགས་པ་མ་གཡེངས།།

རྣམ་འདྲན་ཉི་མ་སྟོང་གི་ཐ་མ།།

བདེ་གཤེགས་མོས་པ་སྣང་མཛད་ཀྱི་ངོར།།

འཚང་རྒྱའི་ལུང་བསྟན་བརྙེས་པའི་བླ་མ།།

དོན་གྲུབ་རིན་ཆེན་ཞབས་ལ་ཕྱག་འཚལ།།

རྩ་བ་བྱ་ཁྱུང་བྲག་ལ་བརྟེན་ཞིང་།།

ཡབ་འདབ་དབུས་གཙང་ཞིང་དུ་རྒྱས་པ།།

འབྲས་བུ་གླིང་བཞིའི་ཁྱོན་ལ་སྨིན་པའི།།

རྒྱལ་བ་གཉིས་པ་བློ་བཟང་གྲགས་པ།།

བྱ་དཀའི་ཐོས་བསམ་ལོ་ཟླ་སྦྲེལ་ཞིང་།།  

རྫོགས་པའི་རྣམ་དཔྱོད་མེ་ལྟར་འབར་བ།།

སྦྱངས་པའི་འབྲས་བུ་ཁུར་དུ་ལོངས་པའི།།

བསྟན་སྲིད་འདེགས་པའི་མཁས་རྣམས་ཞབས་བརྟན།།

ཕྱི་ནང་རྒོལ་བས་གནམ་ས་འཁྲིགས་རུང་།

བྱམས་པའི་སྟོབས་ཀྱིས་དཀྱིལ་དཀྲོང་མ་བཤིག།

རིགས་རུས་གཉེན་གྱིས་བླ་ན་བཀུར་ཡང་།།

གཡོ་མེད་བཞུགས་པ་ཤཱཀྱའི་རྗེས་འཇུག།།

ཉི་ཟླའི་དཀྱིལ་འཁོར་ཁ་ལོ་བསྒྱུར་བའི།།

ཞྭ་སེར་ཆོས་སྡེ་སྟོང་གི་མ་དགོན།།

དགའ་ལྡན་གསེར་ཁྲི་ལྔ་ཙམ་བྱུང་བའི།།

མདོ་སྨད་བྱ་ཁྱུང་བྲག་གི་གདན་ས།།

སྡེ་འདིའི་རིན་ཆེན་གསེར་གྱི་ཁྲི་ལ།།

བཞུགས་པའི་མཁན་རབས་བརྒྱ་ཕྲག་ཁྲོད་ན།།

ཆོས་སྲིད་ཉི་ཟླའི་དྲོད་ཁོལ་ཡངས་པ།།

བདེ་ཁང་བློ་བཟང་རབ་བརྟན་གྲགས་སོ།།

ཚངས་ཆེན་གསེར་གྱི་སྒོ་བཞི་ལས་འཁྲུངས།།

གདོང་དྲུག་ཨུ་མའི་མངལ་ལས་འཛུམ་པ།།

ཇི་བཞིན་ཡུམ་ཆེན་བདེ་སྐྱོང་དྲོད་ཀྱིས།།

བསྐྱངས་པའི་རྒྱལ་སྲས་གཞན་དང་མི་འདྲ།།

དྭངས་གསལ་མཁའ་ལ་ངང་བའི་སྡེ་དཔོན།།

པད་མའི་མཚོ་ལ་ཁྱུ་མཆོག་ཇི་བཞིན།།

བསྟན་དང་འགྲོ་བའི་རྩ་ལག་གཅིག་བུར།།

སྤྲུལ་བས་རོལ་འདི་མཁའ་ལས་ཡངས་པ།།

འཁྲུངས་ཡུལ་མཚེར་ཕུག་གཡང་གི་ར་བར།།

རབ་བྱུང་བཅུ་གཅིག་བགྲང་བྱ་ལྔ་བདུན།།

སྤྱི་ལོ་ཆིག་སྟོང་དྲུག་བརྒྱ་གྱ་གཉིས།།

འཁྲུངས་པ་དོན་ལྡན་བླ་མའི་རྣམ་ཐར།།

མཚོ་སྐྱེས་ཟླ་བ་རླབས་ཀྱིས་མ་བཟུང།།

འདམ་སྐྱེས་པད་མོ་རྡུལ་གྱིས་མ་གོས།།

འཇིག་རྟེན་འཁོར་བའི་ཁྱིམ་གྱི་རྒྱ་ལ།།

མ་འཚུལ་དབེན་པའི་རི་ལ་བྲོས་པ།།

ཡོན་ཏན་འདོད་པ་ནགས་ན་བདེ་ཞེས།།

སེང་གེའི་སྒྲ་ཡིས་བསྔགས་པ་ཇི་བཞིན།།

དགུངས་ལོ་བཅུ་ལ་བྱ་ཁྱུང་ཆོས་སྡེར།།

ཕེབས་ཏེ་རབ་བྱུང་བརྟུལ་ཞུགས་བསྐྱངས་ཡོད།།

ཐོས་བསམ་ཉིན་མཚན་སྦྲེལ་བའི་བརྩོན་པ།།

བློ་ལྡན་གཞན་གྱིས་ཐེག་པར་དཀའ་བའི།།

བྱ་དཀའི་མཛད་པས་ཆེན་པོ་དག་ཀྱང།།

ངལ་བའི་ལམ་དུ་ཡང་ཡང་བཀོད་པ།།

ཅང་ཤེས་རྟ་རྨིག་ལྕགས་ཀྱིས་བཏུམས་ནས།།

ཉི་ཟླ་རྣམ་གཉིས་སྒྲོན་ལ་ཐོགས་ཏེ།།

གླིང་བཞིའི་རིན་ཆེན་འཚོལ་བའི་ངལ་བ།།

དེད་དཔོན་འདི་ལས་གཞན་ལ་དཀའ་འོ།།

བཟའ་བཏུང་འཚོ་བ་ཉག་ཙམ་ཕྲ་བས།།

ལུས་ཀྱི་ཟུངས་ཟད་འགྱེལ་བ་ན་ཡང་།།

འདུན་མའི་དམ་བཅའ་སྲོག་ལ་བགོས་པས།།

ལུང་རྟོགས་ཡོན་ཏན་མེར་གྱིས་གཏམས་པ།།

དགོང་ལོ་བཅོ་བརྒྱད་གཞོན་པའི་རྒྱ་སྟག།

བྱ་ཁྱུང་བྲག་ལས་སྡེར་ལྔ་རྒྱས་ཏེ།།

སྐུ་འབུམ་འཇམ་མགོན་རྒྱལ་བའི་གདན་སར།།

དམ་བཅའ་བཞག་པའི་རྣམ་ཐར་མཛད་ཡོད།།

དུང་སྐྱོང་འོ་མའི་བཅུད་ཀྱིས་གསོས་པའི།།

བྱ་རྒྱལ་ཁྱུང་གི་གཤོག་པའི་འདབ་མ།།

ཙོང་ཁའི་གཡེར་མོ་གཞོང་ལ་མ་ཤོང་།།

ལྷ་ལྡན་ནམ་མཁའི་མཐོངས་ལ་རོལ་བ།།

བདེན་པ་སྟོང་གི་ཕྱག་རྒྱ་རྙེད་ལ།།

བསྟན་དང་སྟོན་པའི་བརྩེ་བ་རུམ་ནས།།

དབུས་ཀྱི་གདན་སའི་འོད་ལ་འཁྲང་བཞིན།།

དགུང་ལོ་ཉི་ཤུར་དབུས་སུ་ཆས་སོ།།

འཕགས་ཡུལ་ཆོས་ཀྱི་མཛེས་པ་འཕྲོག་ཅིང་།།

ཀླུ་སྒྲུབ་ལྟ་བུ་མཁས་མང་འབྱུང་བའི།།

སེ་ར་ཆོས་ལྡིངས་ཆོས་ཀྱི་གདན་སར།།

ཞུགས་པའི་རྟེན་འབྲེལ་ལྷུན་གྱིས་གྲུབ་པ།།

བྱ་དཀའི་ཐོས་བསམ་ལོ་ཟླ་སྦྲེལ་བས།།

ལུང་རྟོགས་ཡོན་ཏན་ཟླ་བཞིན་འཕེལ་བ།།

སྤྱོད་ལམ་ཐམས་ཅད་དོན་དང་ལྡན་པས།།

ཆེ་བའི་ཆེས་མཆོག་ཀུན་གྱིས་བཀུར་བ།།

འཇམ་མགོན་བསྟན་ལ་རྒྱལ་བ་ནང་བཞིན།།

མཛད་པའི་ཡབ་རྗེ་སྒྲུབ་ཁང་མདུན་ནས།།

ལམ་ཁྲིད་འཇམ་དཔལ་ཞལ་ལུང་སོགས་ཀྱི།།

ཁྲིད་རྒྱུན་ལུང་རྒྱུན་དུ་མ་གསན་ཡོད།།

སངས་རྒྱས་སྟོང་གི་མཐུ་ལས་གྲུབ་པའི།།

གསུང་རབ་རིན་ཆེན་སྒྲོམ་གྱི་གླེགས་བམ།།

ཐོས་བསམ་རྡོ་རྗེའི་ར་བར་དྲངས་པས།།

གཞན་ལ་མེད་པའི་རྟོགས་པ་འཁྲུངས་གསུངས།།

བཤད་པ་ལུང་གི་བསིལ་བར་མ་ཆགས།།

སྒྲུབ་པ་ཁོ་ནའི་དྲི་ལ་མ་རྨོངས།།

བཤད་སྒྲུབ་ཉི་ཟླ་ཟུང་འཇུག་མངའ་བའི།།

སེང་གེ་ལྟ་བུ་མཁས་མང་ཁྲོད་ན།།

སྤོབས་པའི་གཡུལ་རབ་མེ་ལྟར་འབར་ཞིང་།།

བརྒལ་བརྟག་ལུང་རིགས་ཐོག་ལྟར་རྣོ་བས།།

གདན་ས་གསུམ་གྱི་མཁས་མང་ཁྲོད་ནས།།

བཀའ་བཅུ་རབ་འབྱམས་མཚན་རྟགས་བཞེས་པ།།

གདན་ས་གསུམ་གྱི་ལུང་གི་འཆད་ཉན།།

ཡར་ཀླུང་གཙང་བོའི་རྒྱུན་དང་བསྡེབས་པ།།

བསླབ་པ་གསུམ་ལྡན་རྟོགས་པའི་ཉམས་ལེན།།

རྒྱལ་ཀུན་ཞིང་གི་དཔལ་ལས་མཐོ་བ།།

དགུང་ལོ་སུམ་ཅུ་ཉི་མ་གཞོན་ནུ།།

ར་ས་འཕྲུལ་སྣང་གཙུག་ལག་ཁང་གི།།

ཆོས་ཀྱི་རྒྱལ་མཚན་དཀར་བོའི་འོག་ཏུ།།

བཀའ་པོད་ལྔ་ཡིས་གྲྭ་སྐོར་མཛད་པ།།

ཡིད་འཕྲོག་མཚན་མའི་རྣམ་པ་རེར་ཡང་།།

ཚོགས་གཉིས་ལས་འཁྲུངས་སྟོབས་ཀྱིས་ཟིན་པས།།

གདན་ས་གསུམ་ན་གདོང་ལྔ་ཇི་བཞིན།།

ལྷང་ངེར་རྒྱུ་བའི་གྲགས་པ་འབར་བ།།

ཐོས་པའི་མེ་ཏོག་འཛུམ་པའི་ཟེ་བར།།

བསམ་སྒོམ་སྦྲང་རྩི་བྱུར་བུར་གཏམས་པས།།

རྐང་བ་དྲུག་པའི་དགའ་སྟོན་གླུ་དབྱངས།།

ཕྱོགས་ཀྱི་འཁོར་ལོའི་མཐའ་ལ་འཁྲིལ་བ།།

ཟབ་རྒྱས་མདོ་སྔགས་ནམ་མཁའི་རྒྱ་ཁྱོན།།

སྦྱངས་བརྩོན་ཉི་ཟླའི་འོད་ཀྱིས་ཡོངས་བཟུང།།

ས་དང་ལམ་གྱི་ཡོན་ཏན་རབ་རྫོགས།།

བདེ་ཁང་བ་ཞེས་གྲགས་པའི་ཚེ་ན།།

ལྷ་ལྡན་ཞིང་གི་མཁས་པའི་གཙུག་རྒྱན།།

པྲ་སྟི་རིན་ཆེན་དོན་གྲུབ་མཆོག་གིས།།

མདོ་སྨད་བྱ་ཁྱུང་བདེ་ཁང་བ་ཞེས།།

བསྔགས་པའི་མེ་ཏོག་ཡང་ཡང་འཐོར་བ།།

རྒྱལ་ཀུན་མཚན་གྱི་སྙན་པ་འཕྲོག་པའི།།

པྲ་སྟི་རིན་ཆེན་དོན་གྲུབ་མཆོག་ལ།།

མགོན་འདིས་དྲིས་པའི་ལན་དུ་བསྐུར་བ།།

པྲ་སྟིའི་གསུང་འབུམ་ཁྲོད་ན་གསལ་ཡོད།།

ས་ལ་ཟེའུ་འབྲུ་འཐོར་བ་ཇི་བཞིན།།

གདན་ས་གསུམ་གྱི་རིགས་སྨྲའི་ཁྲོད་ན།།

གང་གི་བརྒལ་བརྟག་གཞན་ལས་མཐོ་བས།།

རྒྱལ་མཆོག་བདུན་པས་དགྱེས་འཛུམ་མཛད་ཡོད།།

ཡབ་རྗེ་ཕུར་ལྕོགས་ངག་དབང་བྱམས་པས།།

མདོ་སྨད་བཀའ་བཅུ་བདེ་ཁང་བ་ནི།།

ཐོས་པའི་མེ་ཏོག་བསམ་པའི་སྦྲང་རྩི།།

ལྷན་ཅིག་འཛོམ་པ་གཞན་ལས་མཐོ་གསུངས།།

གསུང་གི་དྲི་བ་མང་དུ་མཛད་པ།།

འགའ་ཞིག་ཕུར་ལྕོགས་གསུང་འབུམ་ནང་བཞུགས།།

མགོན་དེའི་གསུང་གི་བདེན་པའི་སྟོབས་ཀྱིས།།

ལས་རྣམས་གང་རྩམ་ཡིད་བཞིན་འགྲུབ་གསུངས།།

མི་འཇིགས་བཞི་ལྡན་སེང་གེ་དཀར་མོ།།

གངས་ཀྱི་རི་ལ་འགོས་པའི་མཚན་མ།།

བདེན་པའི་ལུང་གིས་ཇི་ཙམ་བཏབ་ཀྱང་།།

ཐུགས་བསྐྱེད་དབེན་པའི་རི་ལ་ཤོར་བ།།

གནམ་བསྐོས་གོང་མའི་རིགས་ཀྱི་བདག་པོ།།

ལྕང་སྐྱ་རོལ་བའི་རྡོ་རྗེ་མཆོག་གིས།།

འཇམ་མགོན་བསྟན་པ་འཛིན་པའི་རིགས་ནི།།

ཁྱོད་འདྲ་ཡིན་ཞེས་བསྔགས་བརྗོད་མཛད་ཡོད།།

འདི་ལྟའི་ལུང་རིགས་ཉི་ཟླའི་སྣང་བ།།

ཚངས་པ་ཡིས་ཀྱང་བསྒྲུན་པ་མིན་ཞེས།།

རིགས་སྨྲའི་ཁྲོད་ན་དབྱངས་ཀྱི་སྙན་པ།།

འཕུར་བའི་གྲགས་པ་སྲིད་ལས་བརྒལ་ཡོད།།

ཁྱད་པར་དགེ་ལྡན་བསྙན་བརྒྱུད་འཛིན་པའི།།

ཕུར་ལྕོགས་ངག་དབང་བྱམས་པ་མཆོག་གིས།།

མདོ་སྨད་བྱ་ཁྱུང་རང་གི་གདན་སར།།

ཆོས་འཁོར་རྒྱ་ཆེན་བསྐོར་དགོས་གསུངས་པས།།

བླ་མའི་བཀའ་དང་ཡི་དམ་ལུང་གིས།།

ཟིན་པའི་རྟེན་འབྲེལ་དུས་ལ་བབས་ཏེ།།

རྒོད་པོ་རང་གི་ཁྱིམ་ལ་ཇི་བཞིན།།

ཨ་མདོ་བྱ་ཁྱུང་བྲག་ལ་ཕེབས་སོ།།

ཙན་དན་ལྗོན་པ་རི་ན་གནས་ཀྱང་།།

དྲི་བསུང་ཞིམ་པོ་རླུང་གིས་ཁུར་བས།།

སྦྲང་མའི་ཚོགས་ལ་དགའ་བ་ཇི་བཞིན།།

སློབ་ཚོགས་གང་གཱའི་རྒྱུན་ལ་བསྡེབས་པ།།

བགྲང་བྱ་བཅུ་ལྷག་མཁན་ཁྲི་བསྐྱངས་པས།།

བཤད་སྒྲུབ་འཆད་ཉན་ཟླ་བཞིན་འཕེལ་ཞིང་།།

སྡེ་བཞིའི་ལང་ཚོ་ཆར་ལྟར་བརྡོལ་བས།།

གཞན་ལ་མེད་པའི་རྟགས་མཚན་ངོམ་པ།།

ཐབས་མཁས་ཐུགས་རྗེའི་ལྕགས་ཀྱུ་རྣོན་པོ།།

སྐལ་ལྡན་འདྲེན་པའི་ཨ་ལོང་ལ་དྲངས།།

པད་མའི་མཚོ་ལ་ངང་བ་ཇི་བཞིན།།

འབུམ་ཕྲག་རྒྱལ་སྲས་སྡེ་རུ་གྲུབ་པ།།

དགུང་ལོ་གྱ་བཞི་བརྙེས་པའི་ཚེ་ན།།

ཆོས་རྣམས་མི་རྟག་འདི་འདྲ་ཡིན་ཞེས།།

མྱོང་དང་གཞན་ལ་སྟོན་པའི་ཆེ་བ།།

བསམ་བཞིན་མཛད་པའི་དགོངས་པ་ཡངས་པ།།

རེ་ཞིག་གདུལ་བྱ་རྫོགས་པའི་དུས་ན།།

མཉམ་བཞག་ནམ་མཁའ་ལྟ་བུ་སྟོང་ཉིད།

རྗེས་ཐོབ་སྒྱུ་མ་ལྟ་བུ་ཏིང་འཛིན།།

དབྱེར་མེད་ཁ་སྦྱོར་དབྱིངས་ལ་ཐིམ་ཚུལ།།

རྣམ་ཐར་དངོས་གྲུབ་ཆར་འབེབས་གཙོ་བའི།།

དམ་པའི་ངག་ལས་ཐོས་པ་ཇི་བཞིན།།

མཛད་འཕྲིན་ཕྱག་རྗེས་རི་ལས་མཐོ་བ།།

རག་ཙམ་དད་པའི་རྒྱན་ཏུ་བཀོད་པ།།

དང་བོ་ཐོས་བསམ་བདུད་ཀྱིས་མ་ཟིན།།

བར་དུ་བཤད་སྒྲུབ་རིས་སུ་མ་བཅད།།

ཐ་མར་མཉམ་རྗེས་སོ་སོར་མ་དབྱེ།།

བདེ་ཁང་བླ་མའི་རྣམ་ཐར་ཡིན་འདྲ།།

བྱང་བལྟས་ཁ་ལ་ཉི་འོད་སྲིད་ཀྱང་།།

རྙོག་པའི་མཚོ་ལ་ཟླ་གཟུགས་སྣང་ཡང་།།

ཐོས་བསམ་བློ་མིག་ལྡོངས་པའི་སྐྱེ་བོར།།

བྱུང་བ་འདི་ཡི་དགོས་པ་ཕྲའོ།།

འདི་བྲིས་བསམ་སྦྱོར་དག་པའི་དགེ་བ།།

ཇི་སྙེད་འགྲོ་ཀུན་བདེ་བའི་རྒྱུ་རུ།།

སྨིན་དང་ལྷན་ཅིག་ཁོ་བོས་ཀྱང་ནི།།

སྐྱེས་བུ་དེ་དང་དེ་བཞིན་འགྲུབ་ཤོག །

ཅེས་བྱ་ཁྱུང་རྗེ་བདེ་ཁང་བའི་རྟོགས་བརྗོད་བདེ་གཤེགས་འཛུམ་པའི་མེ་ཏོག་ཅེས་བྱ་བ་འདི་ནི་མགོན་པོ་གང་གི་རྣམ་ཐར་གཙོ་བའི་ལྕང་སྐྱ་རོལ་བའི་རྡོ་རྗེ་དང་། རྗེ་ཕུར་ལྕོགས་ངག་དབང་བྱམས་པ། པྲ་སྟི་རིན་ཆེན་དོན་གྲུབ་སོགས་ཚད་མའི་སྐྱེས་བུ་དུ་མའི་གསུང་ལས་ཡང་ཡང་བསྔགས་བརྗོད་མཛད་ཡོད་པ་གཞིར་བྱས་བྱ་ཁྱུང་གདན་རབས་དང་ངག་རྒྱུན་དུ་མ་ལས་མགོན་པོ་གང་གི་ཕྱག་རྗེས་གཞན་ལས་ཆེ་བ་མཐོང་ཐོས་སུ་གྱུར་པས་དད་གུས་དང་སྤྲོ་བས་མཚམས་སྦྱར་ཏེ་མཆོད་ཚོགས་ངག་གི་ཕྲེང་བ་ལྷུར་ལེན་པ་པོ་བློ་བཟང་རྒྱ་མཚོ་དབྱངས་ཅན་དགྱེས་པའི་སྡེས་བྲག་བྱ་ཁྱུང་རྒྱལ་བའི་དབེན་གནས་སུ་བྲིས་སོ།།