ས་ཡི་ཐིག་ལེ་དྭགས་པོ་གཉལ་སྙི་ནས།།

ས་བོན་ཐིག་ལེ་རྣམ་པར་རོལ་བ་ལས།།

སྤྲུལ་བའི་ཐིག་ལེ་དྭགས་པོ་ལྷ་རྗེ་བྱོན།།

ཆོས་ཀྱི་ཐིག་ལེ་ཐར་བའི་རྒྱན་གཅིག་བརྩམས།།

འོ་མ་ལ་ནི་མར་གྱིས་ཁྱབ་པའི་དཔེས།།

འགྲོ་དྲུག་སེམས་ཅན་ཐར་བའི་རྒྱུ་མངའ་བ།།

གཞི་རྒྱུ་བདེ་གཤེགས་སྙིང་པོ་གསལ་བྱས་པས།།

ཤེས་རབ་ཐིག་ལེའི་རང་མདངས་འོད་དུ་འཚེར།།

དལ་འབྱོར་རྣམ་གཉིས་དད་པ་རྣམ་གསུམ་དང་།།

ལྡན་པའི་འགྲོ་བ་མི་ཡི་ལུས་རྟེན་ནི།།

སངས་རྒྱས་བསྒྲུབ་པའི་རྟེན་མཆོག་བཟང་པོར་བསྒྲུབས།།

ཤེས་རབ་ཐིག་ལེ་ས་བོན་རྣམ་པར་སྤྲུལ།།

ལུང་རིགས་དཔེ་གསུམ་རིག་པའི་རླབས་རྩེ་ལས།།

ཐར་བའི་རྐྱེན་ལ་མཉན་པ་ལྟ་བུ་ཡི།།

དགེ་བའི་བཤེས་གཉེན་བསྟེན་པའི་ཕན་ཡོན་བསྟན།།

ཤེས་རབ་ཐིག་ལེ་ས་ཆེན་ཨ་མས་བཟུང་།། 

ཉི་མ་ནུབ་རིའི་ཕག་ཏུ་འགྲོ་བ་ལ།།

སུས་ཀྱང་བཤོལ་འདེབས་བཟུང་བར་མི་ནུས་བཞིན།།

མཐའ་བཞི་མི་རྟག་བསྒོམས་པའི་མཆོད་ཡོན་བཤམས།།

ཤེས་རབ་ཐིག་ལེ་བསིལ་རླུང་འཇམ་པོས་གཡོབ།།  

སྡུག་བསྔལ་གསུམ་གྱི་མེ་ལྕེ་རྣོན་པོ་ཡིས།།

སྲེག་ཅིང་བཙོ་བའི་ཁམས་གསུམ་བཙོན་ར་ནས།།

འཁོར་བའི་ཉེས་དམིགས་ལག་པའི་མཐིལ་དུ་བཀྲམས།།

ཤེས་རབ་ཐིག་ལེ་སྦྲང་ཆར་ཟེགས་མས་བྲན།།

སེམས་དང་བསམ་པའི་ལས་གཉིས་ཞགས་པ་ཡི།།

སྣེ་མོར་འཆིང་བའི་འགྲོ་བ་སྣ་ཚོགས་ལྟར།།

རེ་བའི་མིག་ལ་ལས་འབྲས་ཞིབ་མོར་འཐག།།

ཤེས་རབ་ཐིག་ལེའི་ནམ་མཁའ་ཡངས་པོར་ཕྱེས།།

བདག་ཉིད་གཅིག་པུ་མྱང་འདས་ཐོབ་འདོད་བློ།།

བརྩེ་བྲལ་གཞན་དོན་ཁུར་དུ་མི་འཁྱེར་པར།།

བྱམས་དང་སྙིང་རྗེའི་འབྱུང་བཞིའི་ཁུད་དུ་གཅུད།།

ཤེས་རབ་ཐིག་ལེའི་ནུས་སྟོབས་རྩལ་དུ་སྤྲུགས།།

འཇིག་རྟེན་དྲག་རྩལ་ཅན་ལ་སྐྱབས་འགྲོ་བ།།

མཐར་ཐུག་མ་ཡིན་གང་ལ་ཇི་ལྟར་སྐྱབས།།

སྒོ་གསུམ་སྡོམ་ཚུལ་མན་ངག་སྒོ་གླེགས་བརྒྱངས།།

ཤེས་རབ་ཐིག་ལེ་མྱུ་གུ་ཁོང་ནས་འཛུམ།།

སེམས་བསྐྱེད་ཉི་མ་ཤར་བའི་དུས་མཚུངས་སུ།།

འགྲོ་དྲུག་མུན་པའི་སྨག་ལས་འདྲེན་པ་ཡི།།

བྱང་ཆུབ་སེམས་ཀྱི་འོད་གུར་མཁའ་ལ་བྲེས།།

ཤེས་རབ་ཐིག་ལེ་ཡལ་འདབ་རྣམ་པར་རྒྱས།།  

བྱང་སེམས་མི་ཉམས་འཕེལ་ཞིང་མི་བརྗེད་པའི།།

ཐབས་ལྔ་རིལ་བུ་གཅིག་ཏུ་བྱས་པ་ཡི།།

སྨོན་པ་བྱང་ཆུབ་སེམས་བསྐྱེད་བསླབ་བྱ་བསྟན།།

ཤེས་རབ་ཐིག་ལེ་ལང་ཚོའི་གང་བུ་ཐོན།།   

བསླབ་གསུམ་འཇུག་སེམས་བསྐྱེད་པའི་ཟམ་ཆེན་སྟེང་།།

མྱུར་དུ་མངོན་རྫོགས་གོ་འཕང་སྙེག་པའི་ཕྱིར།།

ཕ་རོལ་ཕྱིན་དྲུག་རྣམ་གཞག་དམིགས་བུར་དྲངས།།

ཤེས་རབ་ཐིག་ལེ་ཟིལ་བ་ཁྲོམ་མེར་ཆགས།།  

འགྲོ་བ་ཡི་དྭགས་གྲས་སུ་ལྷུང་བ་གཅོད།།

ལོངས་སྤྱོད་མཐའ་ཡས་འབྱུང་བའི་གཏེར་ཆེན་སྒོ།།

བྱང་ཆུབ་མྱུར་རྙེད་སྦྱིན་པའི་ཕར་ཕྱིན་བསྟན།།

ཤེས་རབ་ཐིག་ལེ་མེ་ཏོག་བཞད་ཁ་ཕྱེས།།   

ལོ་ལེགས་རྟེན་གཞི་ཞིང་ས་གཤིན་པོ་སྟེ།།

ཡོན་ཏན་ཀུན་གྱི་གཞི་མར་གྱུར་པ་ཡི།།

ཚུལ་ཁྲིམས་ཕར་ཕྱིན་བསྲུངས་པའི་ཐང་ཆེན་བསྐྲུན།།

ཤེས་རབ་ཐིག་ལེ་བསུང་ངད་ཕྱོགས་བཅུར་ལྡང་།།

ཁོང་ཁྲོ་གཅིག་གིས་ཐམས་ཅད་འཇོམས་བྱེད་པས།།

བདུད་ཀྱིས་གླགས་རྙེད་བར་ཆད་མི་འབྱུང་བའི།།

བཟོད་པའི་ཕར་ཕྱིན་རྡོ་རྗེའི་གོ་ཁྲབ་བགོས།།

ཤེས་རབ་ཐིག་ལེ་གེ་སར་སོ་ཕྲེང་དགོད།། 

ལེ་ལོ་ཅན་ལ་ཤིན་ཏུ་རིང་བ་ཡི།།

རྒྱལ་བའི་བང་མཛོད་མི་རིང་རྙེད་པའི་ལམ།།

དགེ་ལ་སྤྲོ་བའི་བརྩོན་འགྲུས་ཕར་ཕྱིན་སྦྱར།།

ཤེས་རབ་ཐིག་ལེ་བུང་བ་གར་དུ་རྩེན།། 

རྣམ་གཡེང་ཉོན་མོངས་མཆེ་བས་རྨས་འགྱུར་ཞིང་།།

མངོན་ཤེས་ཏིང་འཛིན་སྒོ་མང་མི་སྐྱེ་བས།།

ལྷ་དང་སྐལ་མཉམ་བསམ་གཏན་ཕར་ཕྱིན་བསྡུས།།

ཤེས་རབ་ཐིག་ལེ་ཤིང་ཐོག་ཁྱེའུ་འཁྲུངས།།

ལོང་ཁྲིད་མེད་པའི་ཐང་དཀྱིལ་ལོང་བའི་ཚོགས།།

མི་འདོད་གཡང་ལ་བཅར་བའི་རྐང་གཅོག་བྱེད།།

ཤེས་རབ་ཕ་རོལ་ཕྱིན་པའི་འོད་གསལ་སྤྲོས།།

ཤེས་རབ་ཐིག་ལེ་འབྲས་བུའི་ཕྱི་ནང་སྨིན།།

སེམས་བསྐྱེད་མཐའ་ཡས་ནམ་མཁའི་རྒྱ་ཁྱོན་ངོས།།

ཐར་བའི་དབྱིངས་སུ་བགྲོད་པའི་ཐེམ་པའི་སྐས།།

ལམ་ལྔ་རྣམ་པར་གཞག་པའི་རི་མོ་བྲིས།།

ཤེས་རབ་ཐིག་ལེ་ལྗོན་པ་ཚང་ཚིང་འཁྲིགས།།    

ལམ་གྱི་གནས་སྐབས་ཀུན་ཏུ་བཀྲག་པ་ཡི།།

མངོན་རྟོགས་མེ་ཏོག་ཚོམ་བུ་འཕྱུར་བའི་ཕྲེང་།།

བྱང་སེམས་ས་བཅུའི་མཛེས་སྡུག་ཡོངས་སུ་བསྟན།།

ཤེས་རབ་ཐིག་ལེ་དྭངས་མས་རིགས་དྲུག་གསོ།།

སྒྲིབ་གཉིས་སེང་རས་ཡོངས་སུ་ཕྱིས་པ་དང་།།

ཡེ་ཤེས་ཕུན་ཚོགས་འོད་གསལ་འཆར་བ་ཡི།།

འབྲས་བུ་སྐུ་གསུམ་རྫོགས་པའི་སངས་རྒྱས་བཞེངས།།

ཤེས་རབ་ཐིག་ལེ་སླར་ཡང་ཐིག་ལེར་འཐིམས།།

རྣམ་རྟོག་འབད་རྩོལ་མི་མངའ་སངས་རྒྱས་ཀྱིས།།

འགྲོ་བའི་དོན་ནི་མི་འབྱུང་སྙམ་པ་ལ།།

རྟོག་མེད་འགྲོ་དོན་མཛད་པའི་འཕྲིན་ལས་བསྟན།།

ཤེས་རབ་ཐིག་ལེའི་ངོ་བོ་ཀུན་ལ་ཁྱབ།།

བདུན་གསུམ་ལེའུས་བསྡུས་པའི་ཐར་བའི་རྒྱན།།

མཉམ་མེད་དྭགས་པོའི་ཤེས་རབ་དཔག་བསམ་ལྗོན།།

ལུས་ཅན་གདུང་སེལ་སྨན་དུ་རྒྱས་པ་ཡིས།།

ཉམ་ཆུང་བྱིས་པ་དག་ཀྱང་དགའ་འབོད་སྒྲོག།