ཟླ་11ཚེས་2ཉིན། “འགྲན་སློང་བུམ་པའི”ཆིན་ཁྲོང་ཡོན་ཀྲུང་གོའི་སློབ་གྲྭ་ཆེ་མོ་བའི་ལས་གཏོད་འཆར་འགོད་འགྲན་བསྡུར་སྐབས་བཅུ་བཞི་པའི་འགྲན་བསྡུར་མཐའ་མ་ཧྲའན་ཤིས་ཤིས་ཨན་དུ་ཐུགས་གྲ་ལེགས་འགྲིག་བྱུང་བ་རེད།
བོད་ལྗོངས་ལས་རིགས་ལག་རྩལ་སློབ་གླིང་ལ་འགྲན་བསྡུར་གཙོ་བོའི་གསེར་གྱི་བྱ་དགའ་1དང་ཟངས་ཀྱི་བྱ་དགའ་3ཐོབ་ནས། “འགྲན་སློང་བུམ་པའི”རྒྱལ་ཁབ་འགྲན་བསྡུར་ཐོག་རང་སྐྱོང་ལྗོངས་ལ་གསེར་གྱི་བྱ་དགའ་ཐོབ་མྱོང་མེད་པའི་ལོ་རྒྱུས་མཇུག་འགྲིལ་ཡོད། དེ་དང་ཆབས་ཅིག་སློབ་གྲྭ་དེ་ནི་རང་ལྗོངས་ཀྱི་སྐབས་འདིའི་འགྲན་བསྡུར་ཆེ་མོའི་ནང“ཕུལ་བྱུང་བུམ་པ”ཐོབ་པའི་སློབ་གྲྭ་གཅིག་པུ་དེར་གྱུར་ཞིང་། དེ་ནི་རང་ལྗོངས་ལའང་ཐོབ་ཐེངས་དང་པོ་དེ་རེད།
འགྲན་བསྡུར་ཆེ་མོར་མཐོ་སློབ་2700ལྷག་ཙམ་ནས་སློབ་མ་ཁྲི་300ལྷག་ཙམ་ཞུགས་ཡོད་པ་དང་རིམ་རྩིས་བྱས་ན་རྣམ་གྲངས་ཁྲི་39ལྷག་ཙམ་རེ་ཞུ་བྱས་ཡོད། སློབ་གྲྭ་རིམ་པའི་འགྲན་བསྡུར་ཐོག་མ་དང་ཞིང་ཆེན་རིམ་པའི་འགྲན་བསྡུར་བསྐྱར་མ་བརྒྱུད། རྒྱལ་ནང་གི་མཐོ་སློབ་412དང་རྒྱལ་སྤྱིའི་མཐོ་སློབ་14ཡི་རྣམ་གྲངས་839རྒྱལ་ཡོངས་ཀྱི་འགྲན་བསྡུར་མཐའ་མའི་དཔྱད་འདེམས་ནང་ཚུད་ཡོད་པ་རེད།
རང་ལྗོངས་ཀྱི་མཐོ་སློབ་7གྱིས་རིམ་པ་བཞིན་འདེམས་སྒྲུག་དང་འོས་སྦྱོར་བྱས་པ་བརྒྱུད། ཁྱོན་རྣམ་གྲངས་79རང་སྐྱོང་ལྗོངས་ཀྱི་འགྲན་བསྡུར་བསྐྱར་མའི་ནང་ཚུད་པ་དང་། རྣམ་གྲངས་21རྒྱལ་ཁབ་ཀྱི་འགྲན་བསྡུར་ཐོག་མའི་དཔྱད་འདེམས་ནང་ཚུད་པ། རྣམ་གྲངས་3རྒྱལ་ཡོངས་ཀྱི་འགྲན་བསྡུར་མཐའ་མའི་དཔྱད་འདེམས་ནང་ཚུད་ཡོད། མཐར་བོད་ལྗོངས་ལས་རིགས་ལག་རྩལ་སློབ་གླིང་གིས་འོས་སྦྱོར་བྱས་པའི་རྣམ་གྲངས《བཀྲ་ཤིས་མཆོག་ནོར། ས་མཐོའི་ལེགས་ལྡན་ཀོ་ཤའི་སྣ་ཁ་གསར་པར་བརྟེན་ནས་བོད་རིགས་ས་ཁུལ་གྱི་ཐོན་ལས་དར་རྒྱས་ལ་རམ་འདེགས་བྱེད》ཅེས་པར་གསེར་གྱི་བྱ་དགའ་ཐོབ་ཡོད་པ་རེད།
