རིག་གནས་ཡུལ་སྐོར་མཉམ་འདྲེས་བྱས། ཀ་རྟེན་ཐོན་ལས་ཧུར་ཐག་བཏོད།
——རང་ལྗོངས་ཀྱིས་རིག་གནས་དང་ཡུལ་སྐོར་ཐོན་ལས་འཕེལ་རྒྱས་ལ་སྒུལ་ཤུགས་བསྣན་ནས་རྣམ་པ་གསར་པ་བཏོད་པ།
བསྡོམས་རྩིས་ལས་མངོན་པར་གཞིགས་ན། འདི་ལོའི་ཟླ་1པོ་ནས་9པའི་བར། ལྗོངས་ཡོངས་ཀྱིས་རིམ་རྩིས་བརྒྱབ་ན་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་5700ལྷག་ཙམ་ལ་སྣེ་ལེན་ཞུས་པ་དེ་དུས་མཚུངས་ལས་15.3%འཕར་བ་དང་། ཡུལ་སྐོར་གྱི་སྤྱིའི་འཛད་སྤྱོད་སྒོར་དུང་ཕྱུར་670.55ཟིན་པ་དེ་དུས་མཚུངས་ལས་12.9%འཕར་བ། ལྗོངས་ཡོངས་ཀྱི་རིག་གནས་ཐོན་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་89ཙམ་ཟིན་པ་དེ་དུས་མཚུངས་ལས་22%འཕར་ཡོད་པ་རེད།
སྲིད་ཇུས་ལེགས་པས་ཁྲོམ་རའི་ཚ་རླབས་དྲག་ཏུ་འཕྱུར།
ཟླ་10ཚེས་15ཉིན་ནས་སང་ལོའི་ཟླ་3ཚེས་15ཉིན་བར། 2024ལོའི“དགུན་དུས་བོད་ལ་ཡུལ་སྐོར་བྱེད་པའི”སྲིད་ཇུས་ལག་བསྟར་བྱེད་པའི་དུས་ཚོད་ཡིན་པ་དང་། བྱེད་སྒོར་ཕོ་བྲང་པོ་ཏ་ལ་དང་ནོར་བུ་གླིང་ཁ་སོགས་མཛེས་ལྗོངས་ཁུལ་དུ་སྤ་སེ་ཉོ་མི་དགོས་པ་དང་གསོལ་མགྲོན་ཁང་དུ་ཞག་སྡོད་དང་མཁའ་འགྲུལ་ཀུང་སིའི་སྤ་སེར་ཡུལ་སྐོར་བ་ཉུང་བའི་དུས་ཚིགས་ཀྱི་རིན་གོང་ལག་བསྟར་བྱེད་པ་མ་ཟད། ད་དུང་བོད་དུ་ཡོང་བའི་གནམ་གྲུའི་སྤ་སེ་དང་མེ་འཁོར་གྱི་སྤ་སེ་སྤྲོད་པ། “ཕ་མ་བུ་ཕྲུག་གི་ཡུལ་སྐོར”དང“དབུ་དཀར་ཡུལ་སྐོར”གྱི་འཛད་སྤྱོད་འཛིན་ཤོག་སྤྲད་དེ་བོད་དུ་ཡུལ་སྐོར་བྱེད་པའི་ཚ་རླབས་མུ་མཐུད་འཕྱུར་བར་བྱེད་ཀྱི་ཡོད་པས་དགུན་དུས་ཀྱི་ཁྲོམ་ར་འཁྲུག་ཆ་དོད་དུ་གཏོང་རྒྱུར་སྒུལ་ཤུགས་ཆེན་པོ་བསྣན་ཡོད་པ་རེད།
“‘དགུན་དུས་བོད་དུ་ཡུལ་སྐོར་བྱེད་པའི’བྱེད་སྒོ་ལོ་མང་སྤེལ་བས་བོད་ཀྱི་ཡུལ་སྐོར་གྱི་དུས་ཚོད་རིང་དུ་ཕྱིན་པ་དང་གཟིགས་སྐྱོང་བྱེད་ཐབས་ཁག་གིས་ཁེ་ལས་ཀྱི་ཧུར་བརྩོན་རང་བཞིན་ཆེ་རུ་ཕྱིན་པ་མ་ཟད། རྒྱ་ཆེའི་ཡུལ་སྐོར་བ་བོད་དུ་ཡོང་བའི་སྤྲོ་སེམས་ཀྱང་ཆེ་རུ་ཕྱིན་ཡོད”ཅེས་བོད་ལྗོངས་ཁམས་བདེ་ཡུལ་སྐོར་ལས་དོན་ཚད་ཡོད་འགན་འཁྲི་ཀུང་སིའི་སྡེ་ཚན་གྱི་འགན་འཁུར་བ་ལིའུ་ཆང་གིས་བཤད།
“རིག་གནས་ཡུལ་སྐོར+N”ལ་བརྟེན་ནས་མཉམ་འདྲེས་ནུས་པ་འཕེལ་བར་བྱས།
“རིག་གནས་ཡུལ་སྐོར+N”ནི་རིག་གནས་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་དང་དཔལ་འབྱོར་གྱི་གསོན་ཤུགས་འཕེལ་བར་བྱེད་པའི་ཐབས་ལམ་གལ་ཆེན་ཞིག་རེད། འདི་ལོའི“3·28”བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པར་དྲན་གསོ་ཞུ་བའི་ཉིན་མོ་མཚམས་ཚིགས་སུ་བྱས་ཏེ་རང་ལྗོངས་སུ“སྐལ་བཟང་མེ་ཏོག་འཁྲབ་སྟོན་དུས་ཚིགས”ཀྱི་འགོ་བརྩམས་པ་ནི“རིག་གནས་ཡུལ་སྐོར+N”ལ་སྐུལ་འདེད་ཧུར་ཐག་གཏོང་བའི་གལ་ཆེའི་ལག་ལེན་ཞིག་རེད།
བོད་རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གི་ཐིང་ཀྲང་གཞོན་པ་ཧྲི་ཡུས་ཧུའེ་ཡིས་བརྗོད་དོན“སྐལ་བཟང་མེ་ཏོག་འཁྲབ་སྟོན་དུས་ཚིགས”ཀྱིས་སྔ་རྗེས་སུ་རིགས་ཁག་གི་བརྗོད་དོན་གཙོ་བོའི་རིག་རྩལ་དགོང་ཚོགས་དང་རིག་རྩལ་འཁྲབ་སྟོན་སྣ་ཚོགས་སྤེལ་ཡོད། གླུ་གཞས་ལ་བརྟེན་ནས་གྲོགས་པོ་སྒྲིག་པ་དང་། ཞབས་བྲོ་འཁྲབ་ནས་བརྩེ་སེམས་བརྒྱུད་སྤྲོད་བྱེད་པ། དབྱིངས་བཞུགས་རྣམ་པའི་སྒྱུ་རྩལ་མྱོང་རོལ་བྱེད་པ་སོགས་ཀྱི་བྱེད་ཐབས་བརྒྱུད་ཡུལ་སྐོར་བས་བོད་ཀྱི་རིག་གནས་ལ་སྔར་བས་མྱོང་རོལ་ཐུབ་པ་དང་ཐོན་ལས་མཉམ་འདྲེས་སྔར་བས་གཏིང་ཟབ་ཡོང་བར་བྱས་ཡོད།
སྤུས་འབྲས་ལེགས་གཉེར་བྱས་ནས་ཞབས་ཞུའི་མཁོ་སྤྲོད་ལེགས་སུ་བཏང་།
