وتباسىلىق ەلەكتر جابدىقتارىن ساتىپ العاندار ەڭ جوعارى بولعاندا %20 تىك قوسىمشا قاراجاتتان يگىلىكتەنەدى! ناقتى جاڭا شارالار ورتاعا قويىلدى
1 – ايدىڭ 8 – كۇنى مەملەكەتتىك كەڭەستىڭ اقپارات كەڭسەسى كەزەكتى ساياسات جونىندەگى قۇلاقتاندىرۋ ءماجىلىسىن اشىپ، مەملەكەتتىك دامۋ – رەفورما كوميتەتىنىڭ، قازىنا مينيسترلىگىنىڭ، ساۋدا مينيسترلىگىنىڭ، جۇڭگو حالىق بانكەسىنىڭ، بازاردى باقىلاۋ – باسقارۋ باس مەكەمەسىنىڭ قاتىستى جاۋاپتىلارى ”ەكىنى جاڭالاۋ“ ساياساتىنىڭ كولەمىن كۇش سالا كەڭەيتۋگە قاتىستى جاعدايلاردى تانىستىردى. مەملەكەتتىك دامۋ – رەفورما كوميتەتىنىڭ قاتىستى جاۋاپتىسىنىڭ تانىستىرۋىنشا، تۇتىنۋ بۇيىمدارىنىڭ كونەسىن جاڭاسىنا الماستىرۋعا قولداۋ كورسەتۋ كولەمى كەڭەيتىلەدى.
› شارتقا ساي كەلەتىن مەملەكەتتىك 4 – كەزەڭدەگى موتورلى كولىكتەردىڭ لاس زاتتاردى ىعىستىرۋ ولشەمىندەگى جانارمايمەن جۇرەتىن اۆتوموبيلدەر (اتاپ ايتقاندا، مەملەكەتتىك 4 – كەزەڭدەگى موتورلى كولىكتەردىڭ لاس زاتتاردى ىعىستىرۋ ولشەمىندەگى جانارمايمەن جۇرەتىن اۆتوموبيلدەر دەگەنىمىز 2012 – جىلى 6 – ايدىڭ 30 – كۇنىنەن بۇرىن تىركەۋگە الىنعان بەنزينمەن جۇرەتىن اۆتوموبيلدەردى، 2014 – جىلى 6 – ايدىڭ 30 – كۇنىنەن بۇرىن تىركەۋگە الىنعان ديزەل مايىمەن نەمەسە باسقا جانارمايمەن جۇرەتىن اۆتوموبيلدەردى قامتيدى) كۇشىنەن قالدىرۋ – جاڭالاۋ قوسىمشا قاراجاتىنىڭ كولەمىنە ەنگىزىلەدى، ەلىمىز بويىنشا اۆتوموبيلدەردى اۋىستىرۋ – جاڭالاۋ قوسىمشا قاراجاتىنىڭ ەڭ جوعارى شەكتەۋلى سوماسى بىرلىككە كەلتىرىلەدى.
› وتباسىلىق ەلەكتر جابدىقتارىنىڭ كونەسىن جاڭاسىنا اۋىستىرعاندا قوسىمشا قاراجات بەرىلەتىن جابدىقتار بىلتىرعى 8 تۇرلىدەن 2025 – جىلى كوبەيتىلىپ 12 ءتۇرلى بولدى، جالعىز داناسىنا ەڭ كوپ بولعاندا ساتىلىم باعاسىنىڭ %20 ندەي قوسىمشا قاراجات بەرىلەدى.
› تۇرعىنداردىڭ ءىس جۇزىندىك سۇرانىسىن ويلاستىرا وتىرىپ، ءاربىر تۇتىنۋشى اۋا رەتتەگىشتى ساتىپ العاندا ەڭ كوپ بولعاندا ءبىر داناسىنا قوسىمشا قاراجات بەرۋدەن 3 داناسىنا دا قوسىمشا قاراجات بەرىلەتىن بولىپ كوبەيتىلدى.
› وتە – موتە، جۇرتشىلىقتىڭ تىلەگىنە ساي، قول تەلەفون قاتارلى سيفرلى بۇيىمداردىڭ جاڭاسىن ساتىپ العاندارعا قوسىمشا قاراجات بەرىلەدى.
› ءۇي اشەكەيلەۋگە قاجەتتى تۇتىنۋ بۇيىمدارىن جاڭالاۋعا جانە ەلەكترلى ۆەلوسيپەتتىڭ كونەسىن جاڭاسىنا اۋىستىرۋعا جالعاستى كۇش سالا قولداۋ كورسەتىلەدى.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
