مىناداي زاتتاردى پويەزگە الىپ شىعۋعا بولمايدى
جۋىردا تاي – ان بەكەتىندەگى ساقشى بولىمشەسىنىڭ حالىق ساقشىلارى تەمىر جول قىزمەتكەرلەرىنىڭ ساقشىعا مالىمدەگەن تەلەفونىن قابىلداعان، ولار جولاۋشى لي مىرزانىڭ قارا ءتۇستى بەيمالىم ۇنتاقتى الىپ پويەز بەكەتىنە كىرگەنىن، بۇل زاتتىڭ وڭاي جاناتىن، وڭاي جارىلىس تۋدىراتىن زات بولۋى ىقتيمال ەكەنىن ايتقان. حالىق ساقشىلارى مالىمەتتى تاپسىرىپ العان سوڭ، دەرەۋ بارىپ ءبىرجاقتى ەتكەن. لي مىرزانىڭ حالىق ساقشىسىنا ايتۋىنشا، ول الىپ جۇرگەن قارا ءتۇستى بەيمالىم ۇنتاق مارگانسوپ ەكەن، ول مۇنى ۇيىنە الىپ قايتىپ، بالىق باعاتىن كۇبىنى تازالاماقشى بولعان. حالىق ساقشىلارى وعان سىن ايتىپ، تاربيە بەرگەن سوڭ، جولاۋشى لي مىرزا بۇل زاتتى تاستاعان.
قوراپتالماعان اراق تا جولاۋشىلار وڭايلىقپەن ءمان بەرمەيتىن، الىپ جۇرۋگە تيىم سالىناتىن زاتتاردىڭ ءبىرى. جۋىردا جولاۋشى لو مىرزا يۇڭ – ان وڭتۇستىك بەكەتىنەن پويەزگە وتىرعان كەزدە، حاۋىپسىزدىكتى تەكسەرۋشى قىزمەتكەر ونىڭ ءوزى اشىتقان قوراپسىز بىرنەشە بوتەلكە اراقتى الىپ جۇرگەنىن بايقايدى.
اراق — الىپ جۇرۋگە شەكتەمە قويىلاتىن زات، ساڭلاۋسىز قوراپتالۋى، بەلگىسى انىق بولۋى ءارى سپيرت كولەمىنىڭ پايىزدىق قۇرامى %24 تەن جوعارى نەمەسە وعان تەڭ بولۋى، %70 تەن تومەن نەمەسە وعان تەڭ بولۋى كەرەك. لو مىرزا الىپ جۇرگەن اراق ءوزى اشىتقان اراققا جاتادى، الىپ جۇرۋگە تيىم سالىنادى. حالىق ساقشىلارى لو مىرزاعا حاۋىپسىزدىكتى تەكسەرۋگە قاتىستى بەلگىلەمەلەردى ۇگىتتەگەن سوڭ، لو مىرزا تۇسىنەتىنىن بىلدىرگەن ءارى تۋىس – تۋعاندارىمەن حابارلاسىپ، ولارعا قوراپسىز اراقتى الىپ كەتۋدى تاپسىرعان.
مۇنان سىرت، ەڭ كوپ كەزدەسەتىن، الىپ جۇرۋگە تيىم سالىناتىن زاتتاردىڭ ءبىرى — قىسىممەن سۇيىقتىق بۇركەتىن اسپاپ. حەيلۇڭجياڭ ولكەسىنىڭ مۋدانجياڭ پويەز بەكەتىندە ءبىر جولاۋشى حاۋىپسىزدىكتى تەكسەرەتىن اسپاپتان وتكەن كەزدە، حاۋىپسىزدىكتى تەكسەرۋشى قىزمەتكەر ونىڭ سومكاسىنىڭ ىشىندە قىسىممەن سۇيىقتىق بۇركەتىن اسپاپتىڭ بار ەكەنىن بايقاپ، ونى حاۋىپسىزدىكتى تەكسەرۋ تەكشەسىنە الىپ بارادى. تەمىر جول قىزمەتكەرلەرى وعان كەڭەس بەرگەننەن كەيىن، جولاۋشى بۇل زاتتى الىپ ءجۇرۋ رايىنان قايتادى.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
