རྩོམ་པ་པོའི་ངོ་སྤྲོད་མདོར་བསྡུས།
རུས་རྐང་དྭངས་མ། མཚོ་སྔོན་ཡུལ་ཤུལ་ཁྲི་འདུ་རྫོང་མངའ་ཁུངས་ཀྱི་འབྲོག་ཁྱིམ་ཞིག་ཏུ་སྐྱེས། རིམ་བཞིན་རྩོམ་རིག་གི་ལམ་ཁར་ཞུགས། སྔ་གཞུག་ཏུ་༼ སྒྲུབ་བརྒྱུད། ༽ ལོ་དེབ་དང་༼ རྫོང་རུ། ༽ ལོ་དེབ།༼ མཚོ་མཐའི་གླུ་སྐད། ༽ ལོ་དེབ། ༼མཚོ་སྔོན་བོད་ཡིག་གསར་འགྱུར་སྤྱི་སྟེགས།༽ ༼མཚོ་སྔོན་བོད་ཡིག་ཁྲིམས་སྐྱོང་ཚགས་པར།༽ ༼མཚོ་སྔོན་བོད་ཡིག་གསར་འགྱུར་ཚགས་པར།༽ ༼ཁམས་པའི་ཚགས་པར། ༽ ༼བོད་ལྗོངས་ཁྲིམས་ལུགས་ཚགས་པར།༽ ༼བོད་ལྗོངས་ཉིན་རེའི་ཚགས་པར།༽ ༼བོད་ལྗོངས་ཉིང་ཁྲིའི་ཚགས་པར།༽ ༼རྔ་བའི་ཚགས་པར།༽ ༼གཞིས་ཀ་རྩེ་ཉིན་རེའི་ཚགས་པར།༽ ༼དཀར་མཛེས་རྩོམ་རིག་ཚགས་པར།༽༼མཆོད་མེ་བོད་ཀྱི་རྩོམ་རིག་དྲ་བ།༽ ༼ རྩོམ་པ་པོའི་དྲ་བ། ༽ ༼མདོ་ལ་བོད་ཡིག་དྲ་བ།༽ ༼ཁམས་པའི་སློབ་ཁྲིད་ཐོན་ཁུངས་དྲ་བ།༽ ༼ཁམས་པའི་དྲ་བ།༽༼ ཡུལ་ཤུལ་ཁུལ་མཉམ་འབྲེལ་སྒྱུ་རྩལ་གྱི་རྩོམ་རིག་སྤྱི་སྟེགས། ༽༼རྔ་བ་ཁུལ་གསར་འགྱུར་བརྙན་སྦྱོར་སྤྱི་སྟེགས༽སོགས་སུ་རྩོམ་ཡིག་ཐར་ཐོར་རེ་བཀོད་མྱོང་ཡོད། ད་ལྟ་བོད་ཀྱི་གཞས་ཚིག་རྩོམ་པ་པོའི་དཔུང་སྡེ་༼སྲིད་པའི་མགུར་ཆེན༽ཚང་གི་ཚོགས་མི་བཅས་ཡིན། ད་དུང་ཡང་ནང་ཆོས་ལ་སློབ་གཉེར་བྱེད་ཞོར་དུ་མུ་མཐུད་དུ་སྙན་ངག་གི་ཞིང་ས་རུ་འབད་འབུངས་བྱེད་བཞིན་མཆིས།
ཐོས་པ་དགའ་བ།
•ཡུལ་ཤུལ། རུས་རྐང་དྭངས་མ།
ཡབ་ཤེས་རབ་ཀྱི་སྙིང་གི་གཅེས་ལོ་ཡིན་ཞིང་། །
ཡུམ་མྱང་ཚ་ཡི་མིག་གི་གདུ་བུ་ཡིན་དུས། །
སྐྱིད་དགའ་སྤྲོ་ཡི་རླབས་སྒྲ་སྤང་ལ་འཐིམ་པའི། །
སྟོད་མངའ་རིས་ཀྱི་བུ་ཕྲུག་ཐོས་པ་དགའ་བ། །
གནམ་སྔོན་པོ་ཡི་ཁ་རྒྱ་མིག་གིས་དབྱེ་ཞིང་། །
ས་དོག་མོ་ཡི་སྲབ་འཐུག་ལག་པས་ཚོར་དུས། །
གནས་གུ་ཡངས་ཀྱི་སྤྱོད་ཤེས་གདན་དུ་འཛེག་པའི། །
ཡུལ་གུང་ཐང་གི་རས་ཆེན་ཐོས་པ་དགའ་བ། །
ཚེ་མི་རྟག་གི་མཛའ་བ་ཆུ་ལ་བསྐྱུར་ཞིང་། །
གཞི་འཁོར་བ་ཡི་རང་གཤིས་རླུང་ལ་སྐུར་དུས། །
བྱང་ཁ་བ་ཡི་མུན་པ་བསལ་བར་བྱེད་པའི། །
དུང་ཟླ་བ་ཡི་དཔུང་ཡ་ཐོས་པ་དགའ་བ། །
ལམ་འོད་གསལ་གྱི་ཕྱག་རྒྱ་དོན་གྱིས་བསྐྱངས་ཤིང་། །
ཆོས་བདེན་གཉིས་ཀྱི་གནས་ལུགས་རིམ་གྱིས་རྟོགས་དུས། །
གནས་རི་ཁྲོད་དང་གངས་ཁྲོད་ཕྱོགས་ཀུན་ཉུལ་བའི། །
ཕ་བྱང་སེམས་ཀྱི་ཐུགས་སྲས་ཐོས་པ་དགའ་བ། །
ཆུ་གཙང་པོ་དང་གཙང་པོ་ཡུད་ཙམ་བརྒལ་ཞིང་། །
རི་གངས་སྟོད་དང་གངས་སྨད་གོམ་པས་འཇལ་དུས། །
འོད་དཀར་སེར་གྱིས་ལུས་ལ་ཆོས་གོས་རྒྱན་པའི། །
མཐུ་ཟླ་མེད་ཀྱི་རྩལ་ཆེན་ཐོས་པ་དགའ་བ། །
ཆོས་གཤིས་བབས་ཀྱི་གནད་ལ་རང་དབང་ཡོད་དུས། །
སྤྲིན་དཀར་པོ་ཡི་འདབ་མ་གདན་དུ་བྱས་ཤིང་། །
ཆུ་གཙང་པོ་ཡི་རླབས་ཕྲེང་ཧུབ་ཀྱིས་འཐུང་བའི། །
རི་གངས་དཀར་གྱི་སྒོམ་ཆེན་ཐོས་པ་དགའ་བ། །
ཆུ་གཙང་གསུམ་གྱི་རབ་ཁ་སྒང་དང་མཉམ་ཞིང། །
སེམས་གངས་དཀར་གྱི་འདབ་མ་དབྱིངས་སུ་སྐྱོད་དུས། །
ནགས་རྒྱ་རྫོང་གི་སྟག་དམར་འགྲན་ཡར་ཡོང་ཞིང་། །
རྒོད་ཐང་དཀར་གྱི་འཕུར་ཡ་ཐོས་པ་དགའ་བ། །
སྟོད་གངས་དཀར་གྱི་དབུ་རྩེར་དལ་གྱིས་འགྱིང་ཞིང་། །
སྨད་རྒྱ་མཚོ་ཡི་གཏིང་རིམ་ལྷོད་ཀྱིས་འཁྱུག་དུས། །
ཆོས་ཏིང་འཛིན་གྱི་ཟས་ཀྱིས་ལང་ཚོ་རྫོགས་པའི། །
རི་གངས་ལྗོངས་ཀྱི་རྟོགས་ལྡན་ཐོས་པ་དགའ་བ། །
ཚེ་མི་རྟག་གི་ནམ་ཟླ་དགུན་ལ་བསླེབས་ཤིང་། །
གཉེན་ཉེ་འབྲེལ་ཡང་རིམ་བཞིན་འབྲལ་བར་འགྱུར་དུས། །
གཞི་འཁོར་བ་ཡི་གཤིས་ལ་སྐྱོ་ཤས་སྐྱེས་པའི། །
གནས་རི་ཁྲོད་ཀྱི་ཆོས་པ་ཐོས་པ་དགའ་བ། །
མ་འཁའ་འགྲོ་ཡིས་ལུང་བསྟན་དུས་ལྟར་ཐོན་ཞིང་། །
ཆོས་བདེན་གཉིས་ཀྱི་སྐྱ་རེངས་ཤར་ནས་འཛུམ་དུས། །
དྲིན་མར་པ་ཡི་བྱིན་རླབས་སྙིང་ལ་ཞུགས་པའི། །
ཕ་བཀའ་བརྒྱུད་ཀྱི་བུ་ཆེན་ཐོས་པ་དགའ་བ། །
