ཀླུ་ཤིང་འོམ་བུའི་ངོ་སྤྲོད་མདོར་བསྡུས།
འཁྲུངས་དཔེ་ལས། ཀླུ་ཤིང་འོམ་བུ་ཞེས་བྱ་བ། ། ཆུ་ཀླུང་བྱེ་མའི་འགྲམ་ལས་སྐྱེ། ། སྡོང་པོ་སྨུག་ལ་རིང་བ་སྟེ། ། མེ་ཏོག་དམར་སྨུག་ཕུང་པོར་འཁྲིགས། ། ལོ་མ་ཕྲ་སིབ་སྔོ་བ་ཡིན། ། རོ་ནི་བསྐ་ལ་མངར་བ་སྟེ། ། རང་གི་ནུས་པས་དུག་ནད་སེལ། ། ཤ་དུག་ལ་སོགས་དུག་རིགས་ལ། ། འདི་ཡིས་མི་ཐུབ་གང་ཡང་མེད། ། ཅེས་གསུངས་པ་ལྟར་ཀླུ་ཤིང་འོམ་བུ་ཞེས་བྱ་བ་འདི་ནི་རང་ལྗོངས་ཀྱི་ས་ཁད་རྨིས་༡༣༠༠~༤༠༠༠བར་གྱི་ཡུལ་གར་སར་ཡོད་པ་དང་། མང་ཆེ་བ་ཆུ་ཀླུང་དང་གྲམ་ཐང་གཙང་འགྲམ་སོགས་ཀྱི་བྱེ་མ་དང་། རླན་གཤེར་ཆེ་བའི་ཤིང་གསེབ་སོགས་སུ་འཁྲུངས་པའི་ཤིང་ཕྲན་ཞིག་ཡིན།
ཤིང་ཕུང་འདི་ཡི་མཐོ་ཚད་ལ་རྨིས་༠. ༥~༢. ༨ཙམ་ཟིན་པ་དང་། སྡོང་པོའི་ཁོང་དུ་རྐང་སྐྱ་སོབ་ཀྱིས་ཁེངས་པ། ཤུན་པ་སྨུག་པོ་དང་ཤིང་ཕྱི་ལ་ཐལ་རྩི་སྔོ་སྐྱ་ཆགས་པ། གསར་དུ་སྐྱེས་པའི་ཡལ་ཕྲན་ལྗང་གུ་རིམ་བཞིན་སྨུག་པོར་འགྱུར་བ། ལོ་མ་ལྗང་སྐྱ་ཞིབ་པ་མང་པོ་སྤུངས་ནས་སྐྱེ་བའི་ཡལ་གསར་ཛར་བུར་འཕྱངས་པ།
ཟླ་བ་ལྔ་པ་ནས་དྲུག་པའི་བར་དུ་མེ་ཏོག་ཟིང་དམར་ཆུང་ངུ་འདབ་མ་ལྔ་པ་མང་པོ་སྤུངས་ནས་འཆར་བའི་སྙེ་མ་རིང་པོ་གུག་ནས་བཞད་པ་དང་། མེ་ཏོག་ཡལ་རྗེས་ཟླ་བ་༨~༩བར་འབྲས་བུ་ལྗང་གུ་ནས་འབྲུ་ཙམ་མེ་ཏོག་གི་གྲངས་དང་མཉམ་པ་འདོགས་ཏེ། སྨན་དུ་སྤྱོད་ཆོག་པ་ནི་ལོ་མ་དང་ཡལ་ཕྲན་གསར་པ། མེ་ཏོག་བཅས་རུང་བས་མཉམ་དུ་བཏུས་ནས་སྔོ་ཆོལ་རྨ་འབེབས་ཟིན་རྗེས་སྐམ་གསེད་ལེགས་པར་བྱས་ནས་སྨན་སྦྱོར་དུ་སྤྱོད་ཆོག།
འོམ་བུའི་ནུས་པ། དེའུ་དམར་བས། འོམ་བུས་དུག་ཚད་རྙིང་ཞེན་བྱེར་བསྡུ་གསོད། ཞེས་དང་། རང་བྱུང་པས། འོམ་བུས་དུག་ཚད་མ་ལུས་འཇོམས། ། ཞེས་དང་། དཔག་བསམ་ལྗོན་ཤིང་ལས། སྤོར་ཤིང་རོང་དུ་སྐྱེ་བ་ཡིན། ། ཆུ་སེར་ཁྲག་ཚད་སེལ་བར་བྱེད། ། མཆོག་ཏུ་དུག་ཚད་ཁོང་དུ་འཇོམས། ། ཞེས་གསུངས་སོ། ། འདི་ཡི་རོ་ནུས། རོ་བསྐ་བ་དང་ཞུ་རྗེས་བསིལ་བ། ནུས་པས་དུག་ཚད་རྙིང་པ་ལུས་ལ་ཞེན་ཅིང་བྱེར་བ་རྣམས་བསྡུ་ཞིང་གསོད། ཆུ་སེར་སྐེམ། ཁྲག་ཚད་སེལ། འཁྲུ་བ་གཅོད། ཁྱད་པར་སྨན་ཆེན་གྱི་དུག་དང། ཤ་དུག། སྦྱར་དུག་བཅས་ལ་མཆོག བདུད་རྩི་ལྔ་ཡི་ཡ་གྱལ་ཏེ་ལུམས་ཀྱིས་རུས་དུག་འབྱིན། རྙིངས་ཚད་རུས་ལ་ཞེན་པ་འདོན་ནོ།
