“བོད་ཀྱི་གསོ་བ་རིག་པས་མིའི་རིགས་ལ་ཞབས་འདེགས་ཞུ་གི་ཡོད”
2024-08-19 22:05
西藏
དབྱར་དུས་ཀྱི་བོད་ལྗོངས་ནི་ནམ་མཁའ་སྔོ་ཞིང་གཡའ་དག་པ་ཞིག་ཡོད། བོད་ལྗོངས་བོད་ལུགས་གསོ་རིག་སློབ་གྲྭ་ཆེ་མོར་སྐྱོད་སྐབས་ཐང་ཆེན་གྱི་དབུས་སུ་བོད་ལུགས་གསོ་རིག་གི་སྲོལ་གཏོད་སློབ་དཔོན་གཡུ་ཐོག་རྙིང་མ་ཡོན་ཏན་མགོན་པོའི་སྐུ་བརྙན་འགྱིང་ངེར་གནས་ཡོད་ཅིང་། སྐུ་བརྙན་གྱི་མདུན་དུ་བོད་རྒྱ་ཡིག་རིགས་གཉིས་ཀྱི་ལམ་ནས“གཤིས་བཟང་། སློབ་བརྩོན། ཉམས་ལེན། འགྲོ་ཕན”ཞེས་པའི་སློབ་གྲྭའི་གདམ་ཚིག་བརྐོས་ཡོད།
![]()
རྒྱལ་ཡོངས་ཀྱི་བོད་ལུགས་གསོ་རིག་ཁེར་རྐྱང་གི་མཐོ་རིམ་སློབ་གྲྭ་འབའ་ཞིག་དེ་ཡིན་པའི་ངོས་ནས། བོད་ལུགས་གསོ་རིག་གི་ཤེས་ལྡན་པ་གསོ་སྐྱོང་དང་བོད་ལུགས་གསོ་རིག་གི་རིག་གནས་རྒྱུན་འཛིན་བྱེད་པ་ནི་བོད་ལྗོངས་བོད་ལུགས་གསོ་རིག་སློབ་གྲྭ་ཆེ་མོས་ཐོག་མཐའ་བར་གསུམ་དུ་རྒྱུན་སྐྱོང་བའི་ལས་འགན་ཞིག་རེད།
དེའི་སྐོར་གླེང་སྐབས། བོད་ལྗོངས་བོད་ལུགས་གསོ་རིག་སློབ་གྲྭ་ཆེ་མོའི་སློབ་སྤྱི་མིག་དམར་གྱིས། ལོ་35ཡི་རིང་ང་ཚོས་མཐོ་རིམ་སློབ་གསོ་དང་། དགེ་སློབ་རྒྱུན་འཛིན། ལས་རིགས་གསོ་སྦྱོང་སོགས་ཀྱི་སློབ་གསོའི་བྱ་ཐབས་བརྒྱུད། རིམ་རྩིས་བརྒྱབ་ན་རྒྱལ་ཡོངས་སུ་བོད་ལུགས་གསོ་རིག་གི་དངོས་གཞིའི་ཚན་ཁག་དང་། རབ་འབྱམས་པ། འབུམ་རམས་པ་སོགས་རིམ་པ་ཁག་གི་ཆེད་ལས་ཤེས་ལྡན་པ་8000ལྷག་ཙམ་གསོ་སྐྱོང་བྱས་ནས། རྒྱལ་ཡོངས་ཀྱི་བོད་ལུགས་གསོ་རིག་བྱ་གཞག་འཕེལ་རྒྱས་ལ་ཤེས་ལྡན་པའི་འདེགས་སྐྱོར་བྱས་ཡོད་ཅེས་གསར་འགོད་པར་བརྗོད། ང་ཚོས་བོད་ལུགས་གསོ་རིག་གི་རིག་གནས་ཁྱད་ཆོས་རྒྱུན་འཛིན་བྱེད་པ་དང་ཆབས་ཅིག སྲོལ་རྒྱུན་དང་དེང་རབས་ཟུང་འབྲེལ་གྱི་བོད་ལུགས་གསོ་རིག་གི་དེང་རབས་ཚན་ཞིབ་མ་ལག་དང་མཐོ་རིམ་སློབ་གསོའི་མ་ལག་ཧུར་ཐག་བསྐྲུན་ནས། ཤེས་རྒྱ་ཡངས་ལ་འཇོན་ཐང་ཆེ་བའི་བོད་ལུགས་གསོ་རིག་གི་ཤེས་ལྡན་པ་ཁག་གཅིག་གསོ་སྐྱོང་བྱས་ཡོད་ཅེས་གླེང་མོལ་བྱེད་རིང་མིག་དམར་གྱིས་བརྗོད་པ་དང་། ཁོང་གིས། ང་ཚོས་བོད་ལུགས་གསོ་རིག་གི་སྣེ་ཁྲིད་ཤེས་ལྡན་པ་ལེགས་གྲས་གསོ་སྐྱོང་བྱས་ཡོད་ལ། མང་ཚོགས་ལ་ཞབས་འདེགས་ཞུ་མཁན་གཞི་རིམ་གྱི་ཤེས་ལྡན་པ་ཡང་གསོ་སྐྱོང་བྱས་ཡོད། བོད་ཀྱི་སྨན་རྩིས་ཁང་ཁག་གམ་ཡང་ན་བོད་སྨན་ཚན་ཁག་གི་རྐང་འཛིན་སྟོབས་ཤུགས་མང་ཆེ་བ་ནི་ང་ཚོའི་སློབ་གྲྭ་ནས་ཐོན་པ་ཤ་སྟག་རེད་ཅེས་མགྲིན་པ་གཟེངས་སུ་བཏེགས་ནས་བརྗོད།
![]()
བོད་ཀྱི་མཐོ་རིམ་སློབ་གསོའི་བྱ་གཞག་འཕེལ་རྒྱས་ཀྱི་རྒྱང་ལམ་གསར་པར་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་བོད་ལུགས་གསོ་རིག་གི་མཐོ་རིམ་སློབ་གསོའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུར་ཇི་ལྟར་སྐྱོད་དགོས་པ་ནི་མིག་དམར་གྱིས་སྔ་ཕྱི་བར་གསུམ་དུ་བསམ་གཞིག་བྱེད་བཞིན་པའི་གནད་དོན་ཞིག་རེད།
ཆེད་ལས་རིག་ཚན་གྱི་གྲུབ་ཆ་དང་སློབ་ཚན་གྱི་མ་ལག་རྒྱུན་ཆད་མེད་པར་ལེགས་སུ་བཏང་ནས། བོད་ལུགས་གསོ་རིག་བྱང་ཆུབ་པའི་ཁར་དེང་རབས་ཚན་རྩལ་ཡང་ཁོང་དུ་ཆུད་པའི་མི་སྣ་གསོ་སྐྱོང་བྱས་ཏེ། སློབ་མའི་ལག་ལེན་དང་གསར་གཏོད་ཀྱི་འཇོན་ཐང་ཆེ་རུ་གཏོང་གི་ཡིན།
སྨན་བཅོས་སྒྲིག་གཞི་དང་སྨན་རྫས་ཁེ་ལས་སོགས་དང་མཉམ་ལས་ཀྱི་འབྲེལ་བ་བཙུགས་ནས། སློབ་མའི་ནད་ཐོག་སྨན་བཅོས་ཀྱི་ལག་ལེན་དང་ཚན་ཞིབ་འཇོན་ཐང་ཆེ་རུ་བཏང་སྟེ། བོད་ལུགས་གསོ་རིག་གི་ཚན་ཞིབ་གྲུབ་འབྲས་གཞན་སྒྱུར་དང་སྤྱོད་ཤུགས་ཆེ་རུ་གཏོང་གི་ཡིན། མཐོང་རྒྱ་ཆེ་ཞིང་ཆུ་ཚད་མཐོ་བའི་རིག་གཞུང་བསམ་བློ་དང་འཇོན་ཐང་ལྡན་པའི་དགེ་རྒན་གྱི་དཔུང་ཁག་ཁག་གཅིག་ནང་འདྲེན་དང་གསོ་སྐྱོང་བྱས་ཏེ། ཤེས་ལྡན་པའི་སློབ་གྲྭ་སྟོབས་ཆེན་འཛུགས་སྐྱོང་གི་ལས་དོན་ལ་སྐུལ་འདེད་གཏོང་གི་ཡིན་ཞེས་པ་སོགས་ཀྱི་སྐོར་གླེང་སྐབས་མིག་དམར་གྱིས་གསར་འགོད་པར་ལྷུག་པོར་བརྗོད།
མི་གང་འདྲ་ཞིག་གསོ་སྐྱོང་དང་། མི་ཇི་ལྟར་གསོ་སྐྱོང་། སུའི་ཆེད་དུ་གསོ་སྐྱོང་བཅས་ནི་སློབ་གསོའི་རྩ་བའི་གནད་དོན་སྐོར་གླེང་སྐབས། མིག་དམར་གྱིས་མྱོང་བ་ཟབ་མོས་བོད་ལྗོངས་བོད་ལུགས་གསོ་རིག་སློབ་གྲྭ་ཆེ་མོའི་ལེགས་གྲུབ་ཆེ་ཤོས་བྱུང་བའི་ལག་ལེན་ནི་སྤྱི་ཚོགས་རིང་ལུགས་ཀྱི་སློབ་གཉེར་ཁ་ཕྱོགས་མཐའ་འཁྱོངས་བྱས་ནས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བྱ་གཞག་གི་འཛུགས་སྐྲུན་པ་དང་ཤུལ་འཛིན་པ་ནུས་ཤུགས་ཡོད་རྒུས་གསོ་སྐྱོང་བྱེད་པ་དེ་རེད་ཅེས་བརྗོད། ཕྱིས་འབྱུང་བོད་ལུགས་གསོ་རིག་རྒྱུན་མཐུད་འཕེལ་རྒྱས་ལ་སྐུལ་འདེད་ཇི་ལྟར་གཏོང་བའི་སྐོར་ལ།
བོད་ལུགས་གསོ་རིག་ནི་ཀྲུང་གོའི་སྲོལ་རྒྱུན་གསོ་བ་རིག་པའི་གྲུབ་ཆ་གལ་ཆེན་ཞིག་ཡིན་པའི་ངོས་ནས། རིགས་པའི་གཞུང་ལུགས་དང་ལག་ལེན་གྱི་རྨང་གཞི་ཕུན་སུམ་ཚོགས་པོ་ཡོད། དུས་རབས་འཕེལ་རྒྱས་དང་ཚན་རྩལ་ཡར་རྒྱས་འགྲོ་བ་དང་བསྟུན་ནས། སྲོལ་རྒྱུན་གསོ་རིག་དང་དེང་རབས་ཚན་རྩལ་ཟུང་འབྲེལ་བྱས་ཏེ་བོད་ལུགས་གསོ་རིག་གི་ཚན་ཞིབ་གྲུབ་འབྲས་གཞན་སྒྱུར་ལ་སྐུལ་འདེད་བཏང་ནས་གསོ་རིག་ཁྱབ་ཁོངས་སུ་གནས་བབ་མཐོ་རུ་དང་ནུས་པ་ཆེ་རུ་གཏོང་བ་ནི་འཐབ་ཇུས་ཀྱི་དོན་སྙིང་ལྡན་པའི་ལས་འགན་ཞིག་རེད་ཅེས་མིག་དམར་གྱིས་བརྗོད་པ་དང་། ཁོང་གིས། ཕྱོགས་གཅིག་ནས་བོད་ལུགས་གསོ་རིག་གི་རྨང་གཞིའི་ཞིབ་འཇུག་ལ་ཤུགས་སྣོན་བརྒྱབ་ནས་དེང་རབས་ཅན་གྱི་བོད་ལུགས་གསོ་རིག་གི་ཚན་ཞིབ་མ་ལག་བསྐྲུན་པ་དང་། ཕྱོགས་གཞན་ཞིག་ནས་ད་དུང་བོད་ལུགས་གསོ་རིག་ཚད་ལྡན་ཅན་འཛུགས་སྐྱོང་ལ་ཤུགས་སྣོན་བརྒྱབ་ནས་ཚན་ཞིབ་གཞན་སྒྱུར་གྱི་ནུས་པ་ཆེ་རུ་གཏོང་བ་དང་དྲིལ་བསྒྲགས་བྱེད་ཤུགས་དང་སྤུས་རྟགས་གཏོད་ཤུགས་ཆེ་རུ་གཏོང་གི་ཡིན་ཞེས་བརྗོད། བོད་ལུགས་གསོ་རིག་གི་ལས་ལ་ཞུགས་ནས་ལོ་30ལྷག་ཙམ་སོང་ཡང་ད་དུང་མིག་དམར་གྱིས་བོད་ལུགས་གསོ་རིག་བྱ་གཞག་ལ་དགའ་ཞེན་ཚད་མེད་བྱེད་ཅིང་། ཁོང་གིས། བོད་ལུགས་གསོ་རིག་ཐད་ལས་ཀ་བྱེད་རྒྱུ་བྱུང་བ་ནི་ངའི་གཟི་བརྗིད་ཡིན། ངས་རང་ཉིད་ཀྱི་སེམས་ནུས་ཡོད་རྒུ་བོད་ལུགས་གསོ་རིག་ཁྱབ་གདལ་དང་། ཞིབ་འཇུག ཤེས་ལྡན་པ་གསོ་སྐྱོང་སོགས་ལ་བཏོན་ནས། མི་དེ་བས་མང་བའི་ནད་ཀྱི་གདུང་བ་བསལ་ནས་བདེ་ཐང་དང་རེ་བ་སྦྱིན་ཐུབ་པ་བྱེད་ཀྱི་ཡིན་ཞེས་བརྗོད།
