༄༅། །ཧྲཱིཿཐེལ་ལ་དཔྱད་པ།
༄༅། །འཇམ་པའི་དབྱངས་དང་དབྱངས་ཅན་མ། །སྨྲ་བའི་དབང་ཕྱུག་སྨྲ་བའི་རྒྱལ། །རྒྱལ་སྲས་སེམས་དཔའ་སེམས་མའི་ཚོགས། །རྟག་ཏུ་གུས་པས་ཕྱག་འཚལ་ལོ། །ཧྲཱིཿཐེལ་ངག་གི་ཆ་དཔྱད་ལ། །མན་རྒྱུད་བྱིས་པའི་ཉེར་སྤྱོད་ལས། །ལྕེ་ཡི་ཐོག་ཏུ་གུར་གུམ་གྱིས། །ཧྲཱིཿཡིག་བྲི་བའི་དགོས་པ་ནི། །སྐྱེ་བ་གྲངས་མེད་ངག་གི་ལས། །ཕྲ་མ་རྫུན་དང་ཚིག་རྩུབ་སོགས། །ངག་གི་མི་དགེའི་ལས་འབྲས་ལས། །ལྐུག་པ་དིག་སོགས་ངག་གི་སྐྱོན། །སྐྱོན་སེལ་ལས་སྒྲིབ་དག་པའི་ཕྱིར། །རྒྱལ་རྣམས་གསུང་གི་ས་བོན་ཧྲཱིཿ རྒྱུད་ལས་བྲི་བར་གསུངས་ན་ཡང་། །ཧྲཱིཿ ཐེལ་ལག་ལེན་བདེ་བའི་ཕྱིར། །ཐེལ་ཙེའི་དཔྱད་ཆ་བཟོ་བའི་ཚུལ། །ལག་ལེན་མཐོང་ཐོས་མེད་ན་ཡང་། །རྟེན་ཅིང་འབྲེལ་བའི་ཚུལ་དུ་བཟོ། །ཆོས་རྣམས་ཐམས་ཅད་རྟེན་ཅིང་འབྲེལ། །སྙིང་གི་རྩ་བརྒྱད་དྭངས་མའི་སྲོག །དམར་གསལ་ཐིག་ལེ་ཤེས་རབ་མ། །སྲོག་རྩོལ་རླུང་གིས་ཀླད་པར་ཁྱེར། །དབང་རྟེན་ཐིག་ལེ་ཐབས་དང་འབྲེལ། །ཐབས་ཤེས་ཟུང་འཇུག་ཧཾ་གི་ཚུལ། །ཡིག་མགོ་རྩ་མགོ་ཐུར་དུ་འཁོར། །དེ་དག་ཀུན་གྱིས་ལུས་ཀུན་ཁྱབ། །རྩ་བ་རགས་ཤིང་རྩེ་མོ་ཕྲ། །ལྗོན་པའི་ལོ་མའི་རྩ་རིས་བཞིན། །དབང་པོ་ལྔ་སོགས་ལུས་ཀུན་འབྲེལ། །ཡིག་མཇུག་རྩ་མཇུག་ཀླད་པའི་སྙིང་། །དབང་རྟེན་ས་བོན་ཐུར་དུ་འཛག །ལྕེ་སོགས་དབང་པོའི་ལས་ཀུན་འགྲུབ། །དེ་དག་རྟེན་ལ་འབྲེལ་མཚུངས་པའི། །སྙིང་གི་རྩ་བརྒྱད་པད་འདབ་བརྒྱད། །དམར་ཆའི་ཐིག་ལེ་རིན་ཆེན་ཟངས། ། ཧྲཱིཿཡིག་ཧཾ་གི་རྗེས་མཐུན་དུ། །ཡིག་མགོ་ལྕེ་མགོ་ཐུར་དུ་བསྟན། །ཡིག་མཇུག་ལྕེ་མཇུག་མཚུངས་པར་གདབ། །རྡོ་རྗེ་རྩེ་གསུམ་བཞག་པ་ནི། །སྙིང་ཐིག་ངག་གི་བྱིན་རླབས་ལས། །ལྕེ་དམར་རཾ་ཡིག་མེ་རུ་གསལ། །མེ་ལྕེ་རྡོ་རྗེ་རྩེ་གསུམ་ལས། །དབྱངས་གསལ་རྟེན་སྙིང་ཡིག་འབྲུ་གསལ། །དེ་ལས་འོད་འཕྲོས་ཕྱོགས་བཅུའི་ཞིང་། །རྒྱལ་བ་སྲས་བཅས་མཆོད་པས་མཆོད། །ཚུར་འདུས་ལྕེ་དབང་རཾ་ལ་ཐིམ། །ངག་སྒྲིབ་དག་པས་གཉིས་མེད་གྱུར། །གསུངས་པའི་ཚུལ་དང་མཐུན་པ་ཡི། །རྟེན་ཅིང་འབྲེལ་བར་བཟོས་པ་ཡིན། །ཧྲཱིཿ ཡིག་ལྕེ་སྟེང་འབྲི་བ་དང་། །ཡིག་མགོ་གང་དུ་བསྟན་པ་ཡི། །དགོས་པ་ལག་ལེན་ཅི་འདྲ་ཞེས། །དྲི་བ་ཞིག་གི་དྲིས་ལན་ཏེ། །མགོ་ལོག་འབུམ་གྱི་སྨན་མིང་པ། །ཏིང་འཛིན་གྱིས་བྲིས་དགེ་བར་གྱུར། །
