མི་ཉག་རྒྱལ་པོ་དང་། དམ་པ་ཁྱུང་འཕགས།
རྩོམ་པ་པོ། ཀ་ཤུལ་བསོད་རིན།
ཉག་ཆུ་ཁར་འགྲོ་མ་མྱོང་ཡང་ཉག་ཆུ་ཁ་ནམ་ཡང་དྲན་པ་ཞིག དེ་ནི་ཐུའུ་བཀྭན་གྱིས་བོན་པོའི་སྐོར་ལ་ལྟ་མ་མྱོང་ཡང་ཐུའུ་བཀྭན་གྱིས་བོན་པོའི་སྐོར་གླེང་བ་དང་གཞི་ནས་མི་འདྲ།
རེད་དེ། ཐུའུ་བཀྭན་གྱིས་འབྲི་གུང་འཇིག་རྟེན་མགོན་པོ་དང་། སྤྱན་སྔ་པ་བློ་གྲོས་རྒྱལ་མཚན། ཀུན་མཁྱེན་ཤེར་འོད། སྟག་ཚང་ལོ་ཙྰ་བ་སོགས་ཀྱི་ཟེར་སྒྲོས་ཤིག་བསྒྲུགས་ཏེ་བོན་གླེང་བ་ལས། བོན་ལ་བལྟས་ཏེ་བོན་གླེང་བ་ཞིག་མ་རེད། ང་ཉག་ཆུ་ཁར་འགྲོ་མ་མྱོང་ཡང་འཕྲང་སྒོ་དོག་ཀྱང་གཡང་གཟར་མང་བའི་རོང་ས་དེར་སྐྱེས་པའི་ཁྱོད་ཀྱི་སྟེང་དུ་རྟོག་པ་རབ་ཏུ་སྐྱེན།
རྒྱལ་རོང་དང་ས་གཤིས་ཆ་འདྲ་བའི་ཉག་ཆུ་ཁ་གནའ་དུས་སུ་མི་ཉག་རྒྱལ་པོའི་མངའ་ཁོངས་ཤིག་ཡིན་པའི་རྐྱེན་དེས། ངས་མགར་ཐར་ལ་དང་མགར་ཐར་དགོན་གྱི་གྱེན་ཐང་གི་ངོས་སམ། ཡང་ན་ཁྱུང་འཕགས་པ་གཡུང་དྲུང་རྒྱལ་བའི་ལོ་རྒྱུས་ཀྱི་ངོས་ནས་ཀྱང་མི་ཉག་རྒྱལ་པོ་དང་མི་ཉག་བཟའི་གཏམ་རྒྱུད་ལ་གཞིགས་པ་ཡིན། དེ་ལྟར་ན་མི་ཉག་པའི་བློ་སྤོབས་ལས་འཇམ་ཤ་ཆེ་བའི་ནང་དོན་རེ་ཟུང་རྟོགས་པ་ནི། མུ་འབྲེལ་གྱི་རེ་བ་དེ་དང་གཞི་ནས་འདྲ་བ་ལ་ཨང་།
ཁྱུང་གི་ལོ་རྒྱུས་ལ་བལྟས་ཚར་རྗེས། ཁྱུང་འཕགས་གཡུང་དྲུང་རྒྱལ་བ་གཞི་ནས་ངོ་ཤེས་སུ་ཆགས་ཤིང་། སྐབས་རེར་ཁྱུང་འཕགས་ཀྱི་མཚན་ལ་ལྷ་སྲས་གཡུང་དྲུང་རྒྱལ་བ་ཞེས་བསྔགས་བརྗོད་བྱས་ཡོད། འོན་ཀྱང་ཁྱུང་འཕགས་ཀྱི་དར་བོ་གནམ་དུ་ཕྱར་མཁན་མི་ཉག་རྒྱལ་པོ་ནི་ཚང་དུ་སྦས་པའི་གཡུ་འབྲུག་དེ་ནང་བཞིན། ནམ་ཡང་ལྐོག་གྱུར་དུ་གནས་པ་སྟེ་དམ་པ་ཁྱུང་དང་འབྲེལ་བ་བྱུང་བའི་མི་ཉག་རྒྱལ་པོ་ལ་མི་ཉག་རྒྱལ་པོ་ཞེས་བྲིས་པ་ལས་བྱེ་བྲག་གི་མཚན་གང་ཡང་མི་གསལ་བས། དེའི་སྐོར་ལ་ཞིབ་འཇུག་བྱ་བར་དཀའ་ཁག་བཟོས་ཡོད།
ནང་དོན་རེ་འགའ་བསྐྱར་དུ་འབྲི་དགོས་པའི་རྒྱུ་མཚན་ནི་ཞིབ་འཇུག་གི་འབྲས་བུ་ལ་ནང་དོན་གཞན་ཞིག་ཡོད་པའི་ཆེད་ཁོ་ན་མ་ཡིན་པར། ཟླ་ལ་ལོ་བརྩིགས་ཏེ་ཡོང་བའི་དཀའ་ཁག་གི་བརྒྱུད་རིམ་མཐའ་དག་ངའི«འཚོལ་རྟོག»གི་ལེའུ་གཞན་ཞིག་ནས་མེ་ཏོག་བཞིན་སྨིན་རྒྱུ་དེ་ཡིན།
