བོང་བུ་ཞིག་བེད་མེད་དུ་བསྐྱུར་བའི་ཁྲོན་པ་གཏིང་རིང་པོ་ཞིག་ཏུ་ལྷུངས། བདག་པོས་བོང་བུ་ཡར་འདོན་དང་མི་འདོན་གྱི་ཁེ་གྱོང་ལ་བསམ་བློ་རེ་ཞིག་བཏང་རྗེས། ཡར་བཏོན་ན་གྱོང་ལས་ཁེ་མི་འདུག་སྙམ་སྟེ། བོང་བུ་ཁྲོན་པ་ནས་མ་བཏོན་པར་རང་སར་བཞག
ཁྲོན་པའི་ནང་དུ་ལྷུངས་པས་མ་ཚད། ཉིན་ལྟར་མིས་ད་དུང་གད་སྙིགས་དབྱུག་བཞིན་ཡོད་པས། བོང་བུས་དངོས་གནས་རླུང་རྟ་མི་འདུག ཁྲོན་པའི་ནང་དུ་ལྷུངས་པའི་སྒང་ལ་བདག་པོས་དབྱུགས། ད་དུང་ཉིན་ལྟར་གད་སྙིགས་མང་པོ་འདི་འདྲ་དབྱུག་འོང་གི་འདུག ཤི་ཡང་གནས་བཟོད་བདེ་པོར་ཤི་རུ་འཇུག་པ་མི་འདུག་སྙམ་སྟེ་བོང་བུ་ཁོང་ཁྲོ་ཆེན་པོ་ལངས།
འོན་ཀྱང་། ཉིན་ཞིག བོང་བུའི་བསམ་བློ་གཏོང་སྟངས་ལ་འགྱུར་བ་བྱུང་བ་དང་སྦྲགས། ཁོས་འཚོ་བར་འཛིན་པའི་རྣམ་འགྱུར་ལ་འགྱུར་ལྡོག་བཏང་བ་སྟེ། ཁོས་ཉིན་ལྟར་གཞན་གྱིས་དབྱུགས་ཡོང་བའི་གད་སྙིགས་རྐང་པས་བརྫིས་ནས་གད་སྙིགས་ཀྱི་དཀྱིལ་དུ་མ་དིམ་པར་བྱས་པ་མ་ཟད། གད་སྙིགས་ཀྱི་ཁྲོད་ནས་ཟ་འཕྲོ་འཐུང་འཕྲོ་རེ་བཙལ་ནས་ལྟོགས་གྲིའི་དབང་དུ་མ་ཤོར་བ་བྱས།
དེ་ལྟར་ཉིན་མང་པོ་ཞིག་སོང་རྗེས། གཞན་གྱིས་དབྱུགས་ཡོང་བའི་གད་སྙིགས་དག་བང་རིམ་རེ་རེ་བཞིན་མཐོ་རུ་སོང་སྟེ་མཐར་གད་སྙིགས་ཀྱི་ཕུང་པོ་ཞིག་ཏུ་གྱུར་བ་དང་། བོང་བུས་གད་སྙིགས་ཀྱི་ཕུང་པོ་དེ་རྐང་བཀྱག་ཏུ་བྱས་པས། བོང་བུ་དེ་སླར་ཡང་ཁྲོན་པའི་ཕྱི་ལ་དོན་ཐུབ་པ་བྱུང་།
