གཉིད་འདང་ཚད་ཅིག་ལོག་པ་ནི་བདེ་ཐང་ཡོང་བའི་རྒྱུ་གཙོ་བོ་ཞིག་ཡིན་པའི་དབང་གིས་གཉིད་ཐེབས་ཆག་པ་ནི་ཟས་མ་ཟོས་པ་ལས་ཀྱང་ཚབས་ཆེ་བའོ། དེ་བས་མཚན་མོའི་ཆུ་ཚོད11ཐོག་ང་ཚོ་ངེས་པར་གཉིད་ཉལ་ནས་ལུས་པོར་ངལ་གསོ་རུ་འཇུག་དགོས། གལ་ཏེ་ནམ་རྒྱུན་དུས་ཐོག་གཉིད་མ་ཉལ་བའམ་གཉིད་ཐེབས་ཆག་ནས་གཉིད་མ་འདང་ཚེ་ལུས་ཀྱི་བདེ་ཐང་ལ་གནོད་སྐྱོན་ཐེབས་ནས་རིམ་གྱིས་ལུས་ཀྱི་སྟོབས་ཤུགས་ཟད་དེ་མགོ་ཡུ་འཁོར་བ་དང་དབང་པོ་མི་གསལ་བ། ལུས་པོའི་རིམས་ནད་སྔོན་འགོག་གི་ནུས་པ་ཞན་པ་དང་མཆིན་ནུས་དང་མཁལ་ནུས་ཇེ་ཞན་དུ་འགྲོ་བ་སོགས་ནད་རིགས་འདྲ་མིན་མང་པོ་མང་པོ་ཕོག་ཡོང་གི་ཡོད། དེའི་ཕྱིར་དུས་ལྟར་གཉིད་ལོག་པའི་གོམས་གཤིས་འཇགས་སུ་འཇུག་དགོས།
གཅིན་པ་གཏོང་བ་ནི་ལུས་ཀྱི་སྙིགས་མའི་ཆ་རྣམས་ཕྱིར་བཏང་བ་ཡིན་ལ་ལྷག་པར་ཞོགས་པ་མལ་ནས་ལངས་རྗེས་དུས་ཐོག་གཅིན་པ་གཏོང་བ་ནི་ལུས་ཁམས་བདེ་ཐང་ལ་ཕན་པ་ཧ་ཅང་ཆེ་བའི་སྤྱོད་ལམ་ཞིག་ཡིན། ནམ་རྒྱུན་དུས་ཐོག་གཅིན་པ་མི་གཏོང་བ་དང་གཅིན་པ་གཏོང་རྒྱུ་ཡོད་ཀྱང་བསྲན་ནས་གཅིན་པ་མ་བཏང་ན་མཁལ་ནུས་ཉམས་པ་དང་ལྒང་བུར་ནད་ཕོག་སླ་བ། ད་དུང་གཅིན་ལམ་དུ་རྡེའུ་སྐྲན་འབྱུང་བ་སོགས་ནད་རིགས་ཤིན་ཏུ་མང་པོ་འབྱུང་ཉེན་ཆེ། དེར་བརྟེན་ཞོགས་པ་སྔ་པོ་ཡར་ལངས་རྗེས་དུས་ཐོག་གཅིན་པ་གཏོང་བའི་གོམས་གཤིས་འཇགས་སུ་འཇུག་དགོས།
དུས་ཐོག་བཟའ་བཏུང་མི་བྱེད་པར་བག་མེད་དུ་བཟའ་བཏུང་བྱས་པས་ཕོ་བའི་མེ་དྲོད་ལ་གནོད་སྐྱོན་ཚབས་ཆེན་ཐེབས་ཏེ་མཐར་མཆིན་ནུས་ཇེ་ཞན་དུ་སོང་ནས་ཕོ་བའི་ནད་དང་མཆིན་པའི་ནད་སྣ་ཚོགས་ཐོན་པས། བག་མེད་དུ་བཟའ་བཏུང་ལ་རོལ་བ་ནི་བདེ་ཐང་ལ་དོ་སྣང་མ་བྱས་པའི་ནོར་འཁྲུལ་གྱི་འཚོ་བའི་གོམས་གཤིས་ཤིག་ཡིན། དེས་ན་ཟ་མ་ཟ་བའི་དུས་ཚོད་གཏན་ཁེལ་བྱས་ཏེ་བག་མེད་དུ་བཟའ་བཏུང་ལ་རོལ་བའི་གོམས་གཤིས་ངན་པ་འདོར་དགོས།
