菩提道次第 mp3 [18-20]
དེ་ཡང་འཇམ་མགོན་བླ་མ་ཙོང་ཁ་པ་ཆེན་པོའི་གསུང་ལམ་རིམ་ཉམས་མགུར་ལས།
གསུང་རབ་ཀུན་གྱི་སྙིང་པོ་བསྡུ་བསྡུ་བ། །
ཚུལ་འདི་ཐུན་རེ་བཏོན་དང་ཉན་པས་ཀྱང༌། །
དམ་ཆོས་འཆད་དང་ཐོས་པའི་ཕན་ཡོན་ཚོགས། །
རླབས་ཆེན་སྡུད་པར་ངེས་པས་དེ་དོན་བསམ། །
ཞེས་ཇི་སྐད་གསུངས་པ་ལྟར་ཆོས་བྱང་ཆུབ་ལམ་གྱི་སྒྲོན་མའི་འགྲེལ་པ་ཟིན་བྲིས་དང་བཅས་པ་ཐམས་ཅད་མདོ་རྒྱུད་དགོངས་འགྲེལ་དང་བཅས་པའི་སྙིང་པོ་རྣམས་སྟན་ཐོག་གཅིག་ལ་གོ་རིམ་མ་འཆོལ་བའི་ཐོག་ནས་ཇི་ལྟར་ཉམས་སུ་ལེན་ཚུལ་གསུངས་ཡོད། དེས་ན་བྱང་ཆུབ་ལམ་གྱི་རིམ་པའི་གཞུང་འཆད་ཉན་བྱེད་སྐབས། ཆོས་ཕུང་བརྒྱད་ཁྲི་བཞི་སྟོང་གི་དོན་ཡོངས་རྫོགས་དང་འབྲེལ་བ་ཡོང་གི་ཡོད་པས་དོན་གྱིས་ཆོས་ཕུང་བརྒྱད་ཁྲི་བཞི་སྟོང་འཆད་ཉན་བྱེད་པ་དང་མཚུངས་པས་རྒྱལ་བའི་དམ་ཆོས་མ་ལུས་པ་ཡོངས་སུ་རྫོགས་པ་འཆད་པ་དང༌། ཉན་པའི་ཕན་ཡོན་རླབས་པོ་ཆེ་འབྱུང་བར་གསུངས་སོ།།
དེ་ལྟར་ད་ལམ་རང་རེས་བྱང་ཆུབ་ལམ་གྱི་རིམ་པ་འཆད་ཉན་བྱེད་ཀྱི་ཡོད་པས། དེ་ནི་ཆོས་ཕུང་བརྒྱད་ཁྲི་བཞི་སྟོང་གི་སྙིང་བཅུད་རྣམས་འཆད་ཉན་བྱས་པ་ཞིག་ཡིན། བྱེ་བྲག་ཏུ་ལམ་རིམ་ཆེན་མོ་འདི་ཁ་སང་ཞུས་པ་ལྟར།
སྲས་བཅས་རྒྱལ་བའི་རྨད་བྱུང་འཕྲིན་ལས་ལས། །
ལེགས་གྲུབ་བྱང་ཆུབ་ལམ་གྱི་རིམ་པས་ཀྱང༌། །
ཐར་འདོད་རྣམས་ཀྱི་ཡིད་ལ་དཔལ་སྟེར་ཞིང༌། །
རྒྱལ་བའི་མཛད་པ་རིང་དུ་སྐྱོང་གྱུར་ཅིག །
ཅེས་གསུངས་པ་ལྟར་སྲས་བཅས་རྒྱལ་བའི་རྨད་བྱུང་འཕྲིན་ལས་ཀྱི་མཐུ་ལ་བརྟེན་ནས་ལེགས་པར་གྲུབ་པ་ནི་ལམ་རིམ་ཆེན་མོ་འདི་ཡིན་ནོ།།
ངག་གི་དབང་ཕྱུག་འཇམ་དཔལ་གཞོན་ནུ་ཡི།།
བྱིན་རླབས་ཉི་མའི་འོད་སྣང་ཕོག་པ་ལས།།
སྲིད་པའི་གདུང་སེལ་ཟླ་བ་གྲགས་པ་དང་།།
དབྱེར་མེད་དཔལ་ལྡན་བླ་མར་གསོལ་བ་འདེབས།།
རིག་པའི་གནས་ལྔ་དག་ལ་བརྩོན་པར་མ་བྱས་ན། །
འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །
དེ་ལྟ་བས་ན་གཞན་དག་ཚར་བཅད་རྗེས་གཟུང་དང༌། །
བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱེད། །
