گۈزەل ھايات 9-بۆلۈم 50-قىسىم _ كۈچلۈك بولۇڭ

50-قىسىم

چۈشەپ قويۇشنى خالىمىسىڭىز كۈچلۈك  بولۇڭ

ئىليارنىڭ گېپى ئاخىرلىشىپ، پۈتكۈل يىغىن زالى بىر مەھەل جىمىپ قالدى.

يىغىن زالىنىڭ ئەتراپىدا جىمجىت تۇرغان تاراتقۇلار ئامالسىز تېلېكامېرانى ئۇلارنىڭ ئۈستىگە يۆتكىدى.

ھەممە كۆز تىكىۋاتقان بۇ مۇھىم كۆرۈنۈشتە، ئىليارنىڭ بۇ سۆزى ھەرقانداق تەجرىبە- ساۋاقتىنمۇ بەكرەك كىشى قەلبىنى لەرزىگە سالدى.

ئەگەر باشقىلار تەرىپىدىن چۈشەپ قويۇشنى خالىمىسىڭىز، ئۇنداقتا ئەڭ كۈچلۈكلەردىن  بولۇڭ.

بىر ئادەمنىڭ زادى قانچىلىك كۈچلۈك ئىكەنلىكىنى ئىليارنىڭ ۋۇجۇدىدىن كۆرۈۋالغىلى بولىدۇ.

نېمە ئۇ ئاجىزلىق،  يۈك دېگەن، بۇ يەردە پەقەت ئۇ قىلماقچى بولغان، ئېرىشمەكچى بولغان ئىش بار، ئەگەر ئۇ باشقىلارنىڭ ئۆزىنى كونترول قىلىشىنى توسۇپ قالالمىسا، ئۇنداقتا ئۇ ئۆزىنى يېتەرلىك يۈكسەكلىككە يەتكۈزسە بولىدۇ، شۇ چاغدا باشقىلار ئۇنى كونترول قىلىشقا ئامالسىز قالىدۇ ھەمدە باشقۇرغۇدەك مەيدانى ۋە سالاھىيىتىمۇ بولمايدۇ.

كۆپچىلىك نەزىرىنى ئۇنىڭ يېنىدىكى ئايالغا قاراتتى، مەيلى ئەر ياكى ئايال بولسۇن، ھەممەيلەننىڭ كۆزلىرىدە ھەۋەس چاقناپ تۇراتتى.

ئەگەر ئىليارنى ئەڭ يۇقىرى پەللىدە تۇرىدىغان ئەر دېسە، ئۇنداقتا دىلارە ئېنىقكى، كىشىلىك ھاياتتىكى ئەڭ چوڭ يەڭگۈچى.

ئەمما دىلارەنىڭ شۇ تاپتا قەلبىدە ئۇنچىۋالا كۆپ ئەگرى-توقاي خىياللار يوق بولۇپ، پەقەت قەلبىدە تەسىرلىنىش ۋە چوڭقۇر مۇھەببەت بارلىقىنىلا بىلىدۇ.

ئۇ بۇ ئۆمرىدە زادى قانداق قىلىپ مۇشۇنداق بىر ئەرنى ئۇچرىتالىدى.

ئىلگىرىكى ناچار كىشىلىك ھايات كەچۈرمىشى

ئۇ ئۆزىنىڭ كۈنلەرنىڭ بىرىدە مۇشۇنداق ئەر بىلەن ئارىلىشىپ قالىدىغانلىقىنى، ھەتتا توي قىلالايدىغانلىقىنى ئويلاپمۇ باقمىغان ئىدى.

ئىلگىرى ئۆتمۈشى ناھايىتى ئېچىنىشلىق بولغاچقا،  ھازىرقى تەسىراتى تېخىمۇ چوڭقۇر بولدى.

 بوۋاي ئوخشاشلا ئىليارنىڭ بۇ گېپىدىن چۆچۈپ كەتتى.

شۇنداق، بۇلارنىڭ ھەممىسىنى ئۇ ئىلگىرى ئۇنىڭغا ئۆگەتكەن، كىچىكىدىن تارتىپ  قايتا-قايتا تەكىتلىگەن ئىشلار.

بۇرۇنمۇ ئۇنى ئۈمىدسىزلەندۈرۈپ باقمىغان، تاكى بۇ ئايال پەيدا بولغانغا قەدەر ئۆزىنىڭ ئىلگىرى ئۆگەتكەن نەرسىلىرىنى بۇ ئايال سەۋەبلىك پۈتۈنلەي ئۇنتۇپ كەتتى دەپ ئويلىغانىدى.

لېكىن ھازىرقى ئەھۋالدىن قارىغاندا، يەنىلا بوۋاي ئۆزى بەك ساددىلىق قىپتۇ.

ئىليار ئاۋۋالقىدەكلا گەپ ئاڭلاپتۇ، پەقەت، ئۇنىڭ كونتروللۇقىدىن پۈتۈنلەي چىقىپ كېتىپتۇ.

ھەتتا بوۋاي پۈتۈنلەي تۇتالمايدىغان ئېگىزلىككە يېتىپتۇ.

ئۇنىڭ ئۈستىگە ئۇنى بۇنداق يۈكسەكلىككە يەتكۈزگەن ئادەم بوۋاي ئەمەس، بەلكى يېرىم يولدا پەيدا بولغان ئايال ئىدى.

 راستتىنلا  كۈلكىلىك ئىش بولدى.

بوۋاي پۈتۈن ۋۇجۇدى بىلەن ئىليارنى ئۆزى ئەڭ رازى بولىدىغان نەۋرىسىگە ئايلاندۇرماقچى بولدى، ئەمما ھازىر ئىليارنى مۇپەققىيەتكە ئېرىشتۈرگىنى بىر ئايال بولدى.

بوۋاي ھازىر  قانداق كەيپىياتتا بولۇشى كېرەكلىكىنى بىلمىدى، لېكىن ئەڭ ئېنىق ھېس قىلغىنى يەنىلا تەن بەرمەسلىك ۋە غەزەپلىنىش بولسا كېرەك.

 ئۇزاق ئۆتمەي،  سوغۇق كۈلۈپ بېشىنى لىڭشىتىپ:

- شۇنىڭ ئۈچۈن، سەن مەندىن ئاگاھ بولۇپ كەلدىڭ، سېنى بوشى مالىيە گۇرۇھى بىلەن كونترول قىلماقچى بولغانلىقىمنى ئالدىن پەرەز قىلىپ، مىڭلەن گۇرۇھىنىڭ مەۋجۇتلۇقىنى ئاشكالىدىڭ.  - دېدى.

- ئەگەر سىزنىڭ كونترول قىلىش ئارزۇيىڭىز بەك كۈچلۈك بولمىغان بولسا، ئۇنداقتا مىڭلەن گۇرۇھىنىڭ مەۋجۇت بولۇپ تۇرۇشى بوشى گۇرۇھىغا ھېچقانداق زىيان يەتكۈزمىگەن بولاتتى. بۇنىڭدىن ئىلگىرى، مىڭلەن گۇرۇھىنىڭ نامى بوشى مالىيە گۇرۇھى بىلەن بىر ماڭسا بولاتتى. چۈنكى ئۇنى مەن ئىليار قۇرۇپ چىققان. - دېدى ئىليار. 

 بوۋاينىڭ كۆزلىرى بىردىنلا تارىيىپ، سوغۇق كۆزلىرى دىلارەنىڭ ئۈستىگە چۈشۈپ:

- تېگى-تەكتىدىن ئېيتقاندا، ھەممىسى بىر ئايال ئۈچۈن. - دېدى.

ئىليار قاپىقىنى تۈرۈپ:

-  مەيلى نېمە سەۋەبتىن بولسۇن، بۈگۈنكى بۇ پۇرسەتتە، سىزنىڭ ماڭا باھا بېرىدىغان مەيدانىڭىز يوق. - دېدى . 

شۇنداق، مەيدانى يوق.

بۈگۈن  باشلىقلار يىغىنى، كۈچلۈكلەرنىڭ سۆز قىلىش سالاھىيىتى ئەڭ يۇقىرى جاي.

 بوشى گۇرۇھى بۇ مەيداندىكى ھەرقانداق ئادەمنى كۆزگە ئىلمىسا، تەنقىدلىسە بولىدۇ، ئەمما پەقەت ئىليارغا ھېچ ئىش قىلالمايدۇ.

 بوۋاينىڭ بەدىنى قاتتىق سىلكىنىپ كەتتى، ئەمما يېنىدىكى ئەزىمەت ئۇنى يۆلەپ تۇتۇۋېلىپ:

- ئىليار، بەك ئاشۇرۇۋەتتىڭىز، ئۇ سىزنىڭ بوۋىڭىز! تېگى-تەكتىدىن ئېيتقاندا، سىزنىڭ ھازىرقىدەك نەتىجىلەرگە ئېرىشىشىڭىز، ئۇنىڭ كىچىكىدىن باشلاپ يېتىشتۈرگەنلىكىدىن ئەمەسمۇ؟ !  - دېدى.

- بۇنى دېسىڭىز، مەن ئۇنىڭغا رەھمەت ئېيتىشىم كېرەك، لېكىن بۈگۈن باشقا گەپ بولۇنۇپ تۇرسۇن. ئۇ ئەينى چاغدا بارلىق ئاماللار بىلەن يۈزۈمنى تۆككەندە، ئاياللارغا تايىنىپ جان باقىدىغان ئەرنىمۇ ئۆزىنىڭ يېتىشتۈرگەنلىكىنى ھېس قىلمىغان بولغىيتتى. - دېدى ئىليار. 

ئەزىمەتنىڭ چىرايى  سەتلىشىپ:

- ئىليار، بۇ ئىشىڭىز ھەقىقەتەن ئېشىپ كەتتى، بوۋىڭىز خاتا ئىش قىلغان تەقدىردىمۇ، سىز بۇنداق مۇئامىلە قىلسىڭىز بولمايدۇ...  بۈگۈن قىلغان ئىشلىرىڭىزنىڭ بوۋىڭىزغا قانچىلىك سەلبىي تەسىر ئېلىپ كېلىدىغانلىقىنى ئويلاپ باقتىڭىزمۇ؟  - دېدى.

بۇ چاغدا دىلارە تۇيۇقسىز ئېغىز ئېچىپ:

 - غەمخورلۇق قىلغىنىڭىزغا رەھمەت، ئىليار بۇ بىر نەچچە كۈندە ئۇنىڭ قىلمىشى سەۋەبلىك نۇرغۇن پىتنە-پاساتلارغا قالدى. تېخى يېقىندىلا، ئۇ كۆپچىلىكنىڭ نەزىرىدە سەھنىگە چىقالمىغان ئاقپېشماق دەپ قارالدى.   - دېدى.

ئەزىمەت قوشۇمىسىنى سۈزۈپ ئۇنىڭغا قاراپ:

- سىزنىڭچە  ياشانغان ئادەمگە مۇشۇنداق مۇئامىلە قىلىش توغرىمۇ؟  - دېدى.

دىلارە بېشىنى چايقاپ تۇرۇپ:

-  ئىليارنى باشقىلار خاتا چۈشىنىپ قالمىسۇن، بۇنىڭدا مېنىڭمۇ مەسئۇلىيىتىم بارلىقىنى بىلىمەن. لېكىن ئىشنى تەرەققىي قىلدۇرۇپ مۇشۇ دەرىجىگە يەتكەنلىكىنى ھېچكىم بوۋاينىڭ كۆڭلىدىكى ئاداۋەت ۋە جاھىللىق كەلتۈرۈپ چىقارغانلىقىنى ئىنكار قىلالمايدۇ. ھەممە نەرسە ئۆز-ئارا بولىدۇ، ھۆرمەت قىلىش باشقىلار بېرىشكە تېگىشلىك نەرسە ئەمەس، بەلكى ئۆزىنىڭ سۆز-ھەرىكىتىنىڭ جۇغلانمىسىغا قايتۇرۇلغان نېمەت. سىلەر مېنى چوڭلارنى ھۆرمەتلەڭ دېدىڭلار، لېكىن سىلەرمۇ چوقۇم كىچىكلەرنى ئىززەتلەشنى ئىشقا ئاشۇرۇڭلار. گەپنىڭ ئوچۇقىنى ئېيتقاندا  ... - دىلارە بىردەم تۇرۇۋالغاندىن كېيىن، قاپىقىنى تۈرۈپ ئەزىمەتكە قاراپ :

- ھەممىمىزنىڭ تۇنجى قېتىم ئادەم بولۇشىمىز، نېمە ئۈچۈن سىلەرنى شەرتسىز چوڭ كۆرۈپ، بېشىمغا ئېلىپ كۆتۈرۈرىمەن؟ چوڭلارنىڭ قىلغانلىرىنىڭ ھەممىسى توغرا دەپ قاراپ، كىچىكلەرنىڭ قىلغانلىرىنىڭ ھەممىسى خاتا دەپ ئاساسىسىز ئەيىبلىمەڭلار، چوڭلارنىڭ ھەممىسى ياخشى ئادەم، سىلەرگە ھۆرمەتسىزلىك قىلغانلارنىڭ ھەممىسى ئىش ئۇقمايدىغان، ھەتتا ۋىجدانسىز ئەسكى ئادەم بولۇپ قالمايدۇ. بەزىدە، ياشلار ئىش ئۇقمايدىغان بەڭباش ئەمەس، بەلكى  چوڭلار ئەسكى قېرىپ قالىدۇ... - دېدى. 

بوۋاي كۆزىنى قىسىپ خەتەرلىك ھالدا ئۇنىڭغا قاراپ:

- مەن ھەرقانچە ئەسكى بولساممۇ، ئىليارنىڭ بوۋىسى  ئىكەنلىكىمنى ئۇ بىر ئۆمۈر ئۆزگەرتەلمەيدۇ، ئەگەر سىز ئۇنىڭ بىلەن بىللە بولماقچى بولسىڭىز، مېنىڭ ئېتىراپ قىلىشىمغا ئېرىشەلمىسىڭىز، سىزدە مۇۋەپپەقىيەت تۇيغۇسى بولامدۇ؟ - دېدى. 

دىلارە قېشىنى ئېتىپ سۇس كۈلۈپ تۇرۇپ:

-  مەن بۇ ئۆمرۈمدە ئەسكى ئادەم بولۇپ باققان، يامان ئىشنىمۇ قىلىپ باققان، ئۆزۈمنىمۇ ئىزچىل ياخشى ئادەمدەك ھېس قىلمايدىغان تۇرسام، كىمنىڭ مېنى ئېتىراپ قىلىش-قىلماسلىقىغا قانداقمۇ كۆڭۈل بۆلەي؟ ئەمەلىيەتتە مېنىڭ بۇ گېپىممۇ توغرا ئەمەس، مېنىڭچە، بۇ دۇنيادا پەقەت بىرلا ئادەم مېنى ئېتىراپ قىلسىلا، يېتەرلىك. باشقىلارنىڭ ئىتىراپىنىڭ  چوڭ تەسىرىمۇ يوق. - دېدى.

بۇ ئادەم كىم، كۆپ ئويلاشنىڭ  قىلچە ھاجىتى يوق.

بوۋاي لەۋلىرىنى چىڭ يۇمۇپ،  سوغۇققىنە دىمىقىنى قېقىپ، ئاخىرى ھاسىسىغا تايىنىپ بۇرۇلۇپ يىغىن زالىدىن ئايرىلدى.

بۇ يىلقى  باشلىقلار يىغىنىنىڭ بېشىدىكى زىياپەت باسقۇچى تورغا چىقىرىلدى. كىيىنكى يىغىن زالىغا كىرگەندىن كىيىنكى ئىشلار تېخى تارقىتىلمىدى.

شۇنىڭ بىلەن ئىشنىڭ  باش ئاخىرىنى بىلمەيدىغان كىشىلەر يەنە ئىلىيارنى چىشلەپ تارىتقىنى تۇردى. 

-  نېمە ئىش بولدى؟ دىلارە باش دىرېكتورنىڭ قورسىقىدىكى بالا ئىليارنىڭ ئەمەسمۇ؟ نېمىدېگەن چوڭ  يېشىل پوسما بۇ! 

-  ئايالىدىن زىيان چىقىپتۇغۇ، بىر ئايال ئۈچۈن چوڭ بىر گۇرۇھتىن ۋاز كەچكەنىدى، ئەمدىلىكتە مۇشۇنداق ئاقىۋەتكە قالدى. 

-  مىڭلەن گۇرۇھى مەسئۇلىنىڭ بۈگۈن  باشلىقلار يىغىنىغا قاتنىشىدىغانلىقىنى بۇرۇنلا بىلگەن تۇرۇقلۇق، دىلارە يەنە ئۇنى باشلاپ بېرىپتۇ، بۇ ئېنىقلا ئۇنىڭ نەق مەيداندا يۈزىنى تۆككەنلىك ئەمەسمۇ؟ قانچىلىك قەبىھ ھىيلە-مىكىرلىك بولغاندا ئاندىن  باشقىلارغا مۇشۇنداق زىيانكەشلىك قىلغىلى بولىدۇ؟ 

- تازىمۇبىر،  ئۇ ئۆزى بىر ئاقپېشماق تۇرۇپ نېمىگە ئاساسەن مىڭلەن گۇرۇھىنىڭ مەسئۇلىغا بۇنداق مۇئامىلە قىلىدۇ، ئۆزىنى كىم چاغلايدىكىنا؟ 

- مەن پۈتۈن ئىشقا نەزەر سېلىپ چىقسام، بۇنىڭ سەۋەبى پەقەت ئىليار ئەپەندىنىڭ ي رايوندىكى چوڭ مۇراسىمىدا دىلارە باش دىرېكتورغا ئازراق مېۋە سويۇپ بەرگەنلىكىدىن باشلىنىپتۇ، بۇنداق زىيانكەشلىك قىلىشنىڭ زۆرۈرىيىتى بارمۇ؟ دىلارە باش دىرېكتور ھازىر ھامىلىدار، ئۇنىڭ ئېرى بولۇش سۈپىتى بىلەن ئۇنىڭ ھالىدىن كۆڭۈل قويۇپ خەۋەر ئېلىشى ئارتۇقچە ئىش ئەمەستۇ؟ ئەجەبا سىلەر ھامىلىدار ۋاقتىڭلاردا ئېرىڭلارنىڭ سىلەرنى ئۇرۇپ-دۇمبالىشىنى ياكى سوغۇق مۇئامىلە قىلىشىنى ئۈمىد قىلامسىلەر؟ 

- شۇنداق، مېنىڭچىمۇ توردىكى بەزى كىشىلەر خورلاشقا ئۇچرىغان بولۇشى مۇمكىن، بۇ يىللاردا، ئۆز ئاياللىرىغا ياخشى مۇئامىلە قىلسا يۈزى چۈشۈپ كېتەمدىكەن؟ ئۈچ خىل قارىشىمۇ  مەجبۇرلاشتىن كېلىپ چىققانمۇ ئۇلارنىڭ! ئۆمرۈڭلاردا  داشقاللارغا ئۇچرىغان بولساڭلار خوپ بوپتۇ! 

- دىلارە باش دىرېكتورنىڭ قورسىقىدىكى بالا ئۇنىڭ ئەمەسكەن؟ ! يېشىل پوسمىنى شۇنداق ئوچۇق كىيىۋېلىپمۇ، يەنە ئۆزىنى ياخشى ھېس قىلىۋاتامدىغاندۇ؟ ! ئۇنىڭ بايىقى تۇرقىغا قارىغاندا، نەۋقىران ئەپەندىنىڭ دىلارەدىن پايدىلىنىپ كېتىشىدىن ئەنسىرەپ كېتىپتۇ، قىلغان ئىشىنى كۈلكىلىك ھېس قىلمىغاندىمۇ؟ نېمىلا بولسىمۇ نەۋقىران ئەپەندى قورساقتىكى بالىنىڭ دادىسى! 

- شۇنداق، ئۆزى يېشىل پوسما كىيىپ، يەنە تېخى باشقىلارنىڭ بالىسىغا ھامىلىدار بولغان ئاياللارغا شۇنداق قىزغىن مۇئامىلە قىلىدىكەن، ئەر كىشى بولسا ھەرگىز چىدىيالمايدۇ، ئۇ بۇ ھالىتى بىلەن دىلارە باش   دىرېكتورنىڭ Y رايوننىڭ ئەتىۋارلىق خانزىلىق سالاھىيىتىنى تېخىمۇ ئىسپاتلىماقچىمۇ؟؟ بولمىسا ئىززەت-ھۆرمىتىنى تۆكۈشتە نېمىنى كۆزلەيدىغاندۇ؟ 

- قانداقلا بولمىسۇن، بۇمۇ باشقىلارنىڭ ئۆزىنىڭ ئىشى، سىلەرنىڭ بۇ يەردە قالايمىقان سۆزلىشىڭلارنىڭ  ھاجىتى بارمۇ؟؟ سىلەر ئۆزۈڭلارنىڭ ئىشىنى بىر تەرەپ قىلىپ بولدۇڭلارمۇ؟ يەنە باشقىلارنى باشقۇرۇشقا رايىڭلار بارمۇ؟ 

- سىلەر ...   ھەقىقەتەن يۈزسىز ئىكەنسىلەر! 

توردا دىلارە بىلەن ئىليار بىر مەھەل قىزىق نۇقتىغا ئايلاندى، بولۇپمۇ ئىليارنى مەسخىرە قىلىدىغان ئىنكاسلار دائىم كۆرۈلۈپ تۇردى، ئاندا-ساندا بىر نەچچە ئېغىز ئادىل گەپ قىلغانلار بىر توپ كىشىلەرنىڭ ھاقارەتلىرى ئارىسىدا قېلىپ، ئاخىرىدا ئىز-دېرەكسىز يوقاپ كەتتى، باشقىلارمۇ كۆپ گەپ قىلىشقا جۈرئەت قىلالمىدى.

 لېكىن دادىل گەپ قىلىدىغان يۈرەكلىك كىشىلەر ھامان چىقىدۇ.

ئارىدىن بىر تورداش دىلارە ۋە ئىلىيار تەرەپتە تۇرۇپ قالايمىقان گەپ قىلغانلار بىلەن خېلى دېيىشىپ باقتى. بىراق ئۇ  ئىدىيەسى بۇلغىنىپ كەتكەن بىر توپ كىشىلەر گەپ يەيدىغاندەك ئەمەس ئىدى.  

- گەرچە ئېكران ئارقىلىق ئايرىلغان بولسىمۇ، لېكىن سىلەرنىڭ باشقىلارنىڭ ئىززەت-ھۆرمىتىنى دەپسەندە قىلىشىڭلارغا، باشقىلارغا ھاقارەت قىلىشىڭلارغا ھەرگىز چىداپ تۇرغىلى بولمايدۇ!  سىلەرنىڭ بۇنداق غالجىرلىشىڭلارغا داۋاملىق سۈكۈت بىلەن يول قويۇۋەرمەيدۇ، مەنمۇ كۈچۈمنىڭ يېتىشىچە سىلەر بىلەن تۇتىشىمەن !  ماڭا ئىشىنىڭلار، ئەگەر مەن سىلەرنى بەدەل تۆلەتكۈزمەكچى بولسام، ئۇنداقتا  ھەرگىز باش تارتىپ بولالمايسىلەر! خەير-خوش،  بىر توپ ئەخلەت ئادەملەر!     - دېدى ئۇ كىشى.

 بۇ سۆزلەرنى قالدۇرغاندىن كېيىن، ئاشۇ كىشىلەر ھەرقانچە سەت گەپلەر بىلەن ئۇنى مەسخىرە قىلىپ ھاقارەتلىسىمۇ، ھېچقانداق جاۋابقا ئېرىشەلمىدى!

كېيىن بۇ ئىنكاس قالدۇرغۇچى قاتتىق ئاچچىقىدا كېسىلىپ، ھوشىدىن كېتىپ دوختۇرخانىغا كىرىپ قالغانلىق ئۇچۇرى تارقالدى.

توردا دىلارە بىلەن ئىليارغا دىققەت قىلىۋاتقان موماي بۇ خەۋەرنى كۆرگەندىن كېيىن قاتتىق ئەنسىرەپ، مۇناسىپ كىشىلەر بىلەن ئالاقىلىشىپ، دوختۇرخانىغا يېتىپ كەلدى.

بۇ ۋاقىتتا ئادەم ئوپېراتسىيە ئۆيىگە كىرىپ كەتكىلى 90 مىنۇت بولغانىدى.

ئوپىراتسىيەخانىنىڭ ئىشىكى ئېچىلغاندا، پاتىمە دەرھال بېرىپ:

- دوختۇر،   قانداقراق؟ - دەپ ئەھۋالىنى سورىدى.

دوختۇر خورسىنغان ھالدا:

-  قۇتقۇزۋېلىندى، بىراق كېيىن ئىشلار يەنىلا ئۇنىڭ ئۆزىگە باغلىق.  ھوشىغا كەلگەندىن كېيىن، ئۇنىڭغا ياخشىراق نەسىھەت قىلىپ قويسىڭىز، ياش تۇرۇپ كاللىسىدىن ئۆتكۈزەلمىگۈدەك نېمە ئىش بار... - دېدى. 

موماينىڭ چىرايىدىن غەمكىنلىك چىقىپ تۇراتتى، بۇ بالا  دىلارە ، ئىليارنى ئاقلايمەن دەپ مۇشۇنداق  ھالەتكە چۈشۈپ قالدى...