རྫོང་སར་མཁན་ཆེན་པདྨ་དམ་ཆོས་ལ་བསྔགས་པའི་མེ་ཏོག་དྲང་པོར་འཐོར་བ།

བླ་མ་ལ་ཕྱག་འཚལ་ལོ།།

སྐུ་ཚེ་འདི་ལ་ཟུང་འཇུག་གི།།

གོ་འཕང་མངོན་དུ་མཛད་པ་ཡི།།

དཔལ་མགོན་བླ་མ་དམ་པ་ལ།།

སྒོ་གསུམ་དང་བས་ཕྱག་བགྱིའོ།།

ཁྱོད་ཀྱི་ཡོན་ཏན་རྒྱ་མཚོ་ལས།།

སོ་སྐྱེའི་བློ་ཡི་བུ་ག་རུ།།

ཅུང་ཟད་ཆུད་པ་རྒྱུར་བྱས་ཏེ།།

བསྔགས་པའི་མེ་ཏོག་དྲང་པོར་འཐོར།།

འགའ་ཞིག་ཕྱི་ནང་མི་མཚུངས་པའི།།

སྤྱོད་པས་སྐལ་དམན་ཕལ་ཆེར་བསླུ།།

གཟིག་ལྤགས་བཀབ་པའི་བོང་བུ་ཡི།།

རྣམ་ཐར་སྐྱོང་མཁན་ཤིན་ཏུ་མང་།།

ཁྱོད་ནི་དྭངས་གསལ་ཤེལ་བཞིན་དུ།།

རེ་དོགས་སྒྲིབ་ཐོགས་ཀུན་བྲལ་བའི།།

ཕྱི་ནང་མཚུངས་པའི་སྤྱོད་པ་ཡིས།།

སྐལ་བ་བཟང་རྣམས་ཤིན་ཏུ་མགུ།།

འདི་ན་ཕམ་ལྷག་བཅུ་བདུན་གྱི།།

མིང་ཙམ་བགྲང་ལ་ཆེས་ངལ་ཞིང་།།

འདུལ་ལ་ཤིན་ཏུ་རྨོངས་གྱུར་ཀྱང་།།

འདུལ་བ་འཛིན་པར་རློམ་པ་མང་།།

ཁྱོད་ནི་འདུལ་གཞུང་ཆེ་ཕྲ་ཀུན།།

ལག་མཐིལ་གནས་པའི་གཏེར་བཞིན་དུ།།

ཐུགས་ལ་ཤིན་ཏུ་གསལ་གྱུར་ཀྱང་།།

ད་དུང་རློམ་པའི་དྲི་མ་བྲལ།།

འགའ་ཞིག་ཚུལ་ལ་མི་གནས་ཤིང་།།

ཐོས་བསམ་སྒོམ་ལས་རིང་གྱུར་ཀྱང་།།

བླུན་པོས་བཀུར་བའི་རྒྱུ་མཚན་གྱིས།།

ང་རྒྱལ་རི་བོ་ལས་ཀྱང་མཐོ།།

ཁྱོད་ནི་ཚུལ་ལ་གནས་བཞིན་དུ།།

ཐོས་བསམ་སྒོམ་པ་ཕུལ་དུ་བྱུང་།།

མཁས་པའི་དབུས་སུ་བཀུར་གྱུར་ཀྱང་།།

ཁེངས་པའི་དྲི་མས་སྦགས་པ་མེད།།

འདི་ན་ལས་འབྲས་འཆད་བཞིན་དུ།།

འདུལ་མངོན་གཞུང་ལ་རྒྱུས་མེད་པས།།

ལས་དང་འབྲས་བུའི་ཚུལ་ལུགས་ལ།།

འོལ་ཚོད་ཅ་ཅོ་སྒྲོག་པ་མང་།།

ཁྱོད་ནི་འདུལ་མངོན་གཞུང་ལུགས་ལྟར།།

རྒྱུ་འབྲས་འཆད་ལ་ཟླ་བྲལ་བཞིན།།

ལས་བརྒྱ་པ་དང་མཛངས་བླུན་གྱི།།

གཏམ་རྒྱུད་ཕལ་ཆེར་ཐུགས་ཐོག་འཆད།།

འགའ་ཞིག་གཤིན་གསོན་འབུལ་བ་ཀུན།།

ཡོད་དགུས་ཐབས་ཀྱིས་སྡུད་བཞིན་དུ།།

བྱ་བྲལ་ཡིན་པའི་ཟོལ་བཟུང་ཕྱིར།།

བདོག་པ་ཐམས་ཅད་ཕག་ཏུ་བསྐུང་།།

ཁྱོད་ནི་ཁ་གསག་ལ་སོགས་པས།།

རྙེད་པ་ཚོལ་བར་མི་མཛད་ཅིང་།།

གང་བྱུང་དེ་གས་ཆོག་པ་ཡི།།

དྲང་པོའི་སྤྱོད་པ་ཤིན་ཏུ་མཛེས།།

གཞན་དག་འབྱོར་བའི་ཕུང་པོ་ཡང་།།

ཡར་མཆོད་མར་སྦྱིན་ལྟ་ཞོག་གི།།

རང་གིས་སྤྱད་ཀྱང་མི་བྲ་བར།།

ཟད་པ་སྒོམ་ལ་མེད་པ་བཟླས།།

ཁྱོད་ཀྱི་བདོག་པ་ཇི་སྙེད་པ།།

འབོ་དང་ཟག་པ་མེད་པ་ཡིས།།

སངས་རྒྱས་ཆོས་དང་དགེ་འདུན་གྱི།།

ཕྲིན་ལས་སྒྲུབ་པའི་ཆེད་དུ་བཏང་།།

འགའ་ཞིག་འབྱོར་པ་ཆེར་རྒྱས་ཀྱང་།།

རང་ཕྱོགས་འབའ་ཞིག་སྐྱོང་བའམ།།

བག་མེད་ཆུད་ཟོས་ཁོ་ན་ལས།།

མཆོད་སྦྱིན་ཡུལ་ལ་ཕན་པ་མེད།།

ཁྱོད་ཀྱི་ཇི་སྙེད་འབྱོར་པ་ཀུན།།

བསྟན་འགྲོར་སྨན་ཕྱིར་མ་ལགས་པར།།

ཁབ་དང་སྐུད་པ་ཙམ་ཞིག་ཀྱང་།།

བདག་གཅེས་འཛིན་པས་སྤྱད་པ་མེད།།

རྟོག་གེ་སྨྲ་ལ་དགའ་བ་འགའ།།

རྟོག་གེའི་གནད་གསང་མ་ཤེས་པས།།

ཚིག་ལ་འཁྲི་བའི་ཐལ་ངག་གིས།།

རྟོག་པའི་གཟེབ་ཏུ་འཛིང་ཞིང་འཐུམས།།

ཁྱོད་ནི་རྟོག་གེའི་གནད་གསང་ཀུན།།

རྩེད་མོའི་ཚུལ་གྱིས་དཀྲོལ་ནུས་པས།།

དབུ་ཚད་རིགས་པའི་མདུད་པ་བརྒྱ།།

ཤེས་རབ་འཕྲུལ་གྱིས་དུམ་བུར་བཏང་།།

འདི་ན་དབུ་མ་སྨྲ་བ་འགའ།།

དོན་ལ་ངེས་ཤེས་མ་སྐྱེས་ཀྱང་།།

སྒྱུ་དང་རྨི་ལམ་ལྟ་བུ་ཡི།།

ཚིག་ཕྱིར་འབྲང་བའི་སྟོང་སྐད་སྒྲོག།

ཁྱོད་ཀྱིས་སྣང་དང་སྟོང་པའི་དོན།།

ཀླུ་སྒྲུབ་ཡབ་སྲས་བཞེད་གཞུང་ལྟར།།

ཀུན་མཁྱེན་གསུང་གི་ཕྲིན་ལས་ལ།།

ངེས་ཤེས་སྐྱེས་ནས་གཞན་ལ་འཆད།།

འགའ་ཞིག་སྣང་ཕྱོགས་ཞེན་པ་ཡིས།།

བདེན་པར་འཛིན་པའི་དུག་གིས་ཟིན།།

གཞན་དག་སྟོང་ལ་འཐས་ཆེ་བས།།

ལས་དང་རྒྱུ་འབྲས་ཁྱད་དུ་གསོད།།

ཁྱོད་ནི་སྟོང་པའི་གནས་ལུགས་ལ།།

རན་བྱན་འབའ་ཞིག་ཆུད་གྱུར་ཀྱང་།།

ཀུན་རྫོབ་དགེ་སྡིག་བླང་དོར་ལ།།

དགེ་སྦྱོང་སྤྱོད་པ་ཤིན་ཏུ་སྤྱད།།

འདི་ན་དྲང་ངེས་ལྟ་སྤྱོད་སོགས།།

བསྟན་པའི་མདོ་རྒྱུད་མ་ཕྱེད་བཞིན།།

སྟོན་པར་ཁས་འཆེའི་ལྡབ་ལྡིབ་སྒྲ།།

སྨྱོན་པའི་ངག་བཞིན་ཡིད་རྟོན་བྲལ།།

ཁྱོད་ནི་རྒྱ་ཆེན་གསུང་རབ་ལ།།

ཐོས་པའི་ཕ་རོལ་ཕྱིན་པའི་འབྲས།།

གསལ་དག་རྫོགས་པའི་ཡང་དག་ངག།

སྐལ་བཟང་རྣ་བའི་བུ་རམ་གྱུར།།

དེང་དུས་དབང་བསྐུར་བྱེད་པ་འགའ།།

ཆོ་གའི་འགྲོ་སྟངས་མི་ཤེས་ཤིང་།།

ཚིག་ཀྱང་དག་པར་མི་ཐོན་བཞིན།།

སྨིན་བྱེད་ཡིན་ཞེས་སྐལ་མེད་བསླུ།།

ཁྱོད་ཀྱིས་དབང་བསྐུར་བྱེད་པ་ནི།།

བླ་མ་བརྒྱུད་པ་མ་ཉམས་ཤིང་།།

ཆོ་ག་འཁྲུགས་པར་མ་གྱུར་པས།།

བྱིན་རླབས་གཟི་བྱིན་མཚུངས་པ་མེད།།

གཞན་དག་དབང་རྫས་སྦྱིན་པ་ཡི།།

ཕྱག་ལེན་ཇི་བཞིན་མི་ཤེས་པས།།

ཆད་ལྷག་གོང་འོག་འཁྲུགས་པ་སོགས།།

བྱིས་པའི་རྩེད་མོ་བཞིན་དུ་གསོག།

ཁྱོད་ནི་ཚིགས་བཅད་གཅིག་ཙམ་གྱི།།

ཆོ་གའང་ནན་ཏན་ཆེར་མཛད་ཅིང་།།

དབང་བསྐུར་ལ་སོགས་ཆོ་ག་ཀུན།།

ཤིན་ཏུ་དག་པས་སྒྲུབ་པར་མཛད།།

འགའ་ཞིག་སྤྲོས་ལ་ཆེར་དགྱེས་པས།།

འབྱོན་བཞུགས་ཐམས་ཅད་འུར་གྱིས་ཟིང་།།

མཛད་པ་ཡུངས་འབྲུ་ཙམ་ཞིག་གིའང་།།

འུར་སྒྲས་དྲྭ་ལམ་ཀུན་ཏུ་བཀང་།།

ཁྱོད་ནི་གང་དུ་ཅི་སྒྲུབ་ཀྱང་།།

ཆུ་སྐྱར་རྫིང་བུར་སྐྱོད་པ་བཞིན།།

རྟག་ཏུ་གཅོམ་བསྐྱུང་དགའ་བ་ཡིས།།

དམ་པའི་ཆོས་དང་མཐུན་པར་སྤྱོད།།

ལ་ལ་འབད་པ་བརྒྱ་ཕྲག་གིས།།

རང་གི་ཡོན་ཏན་དྲིལ་བསྒྲགས་ཤིང་།།

གཞན་ཕྱོགས་རང་དབང་བསྒྱུར་བ་ཡི།།

ལྷ་མིན་འཇུག་པའི་སྦྱོར་བ་བཤམས།།

ཁྱོད་ནི་རང་བབ་ཤུགས་འབྱུང་གིས།།

སྐལ་བཟང་བུང་བ་ཀུན་བསྡུད་ཀྱང་།།

གཞན་དག་རང་དབང་བསྒྱུར་བ་ཡི།།

བསམ་པ་གཞར་ཡང་གནས་པ་མེད།།

འདི་ན་རང་འདོད་འབའ་ཞིག་གིས།།

ཡིད་མཁར་ཁྱབ་པར་གདལ་གྱུར་པས།།

ཟ་མ་ཙམ་གྱི་བཟང་ངན་ལ།།

བཟོད་ནུས་མེད་པར་ཁྲོ་ཞིང་གཤེ།།

ཁྱོད་ནི་བཟོད་པའི་གོ་བཙན་པོས།།

ཕ་རྒན་གསོད་པའི་ཤན་པ་ལའང་།།

ཟས་གོས་སྦྱིན་པའི་སྙིང་སྟོབས་ཀྱི།།

རྒྱལ་སྲས་སྤྱོད་པས་ཀུན་ནས་མཛེས།།

འགའ་ཞིག་སྙིང་རྗེ་ཆེ་བ་ཡིས།།

གཞན་ངོར་མིག་ནས་ཐིགས་ཕྲེང་ལྷུང་།།

འོན་ཀྱང་རང་འདོད་མ་འགྲུབ་ན།།

འཁོན་འཛིན་ཆེ་བས་ཕྱི་ནང་འགལ།།

ཁྱོད་ནི་བྱམས་དང་སྙིང་རྗེ་དག།

གཤིས་ལ་ཞུགས་པའི་ངང་ཚུལ་གྱིས།།

ཁྱབ་ཀྱང་གཞན་ལ་མི་ངོམ་པར།།

སྤྲོ་ཞིང་བྱམས་པའི་བཞིན་གྱིས་བལྟ།།

འདི་ན་རང་ཆེ་འདོད་པ་འགའ།།

ཐོས་བསམ་སྒོམ་པའི་བྱ་བ་ལ།།

བརྩོན་པའི་སྡོད་ཚུགས་མེད་བཞིན་དུ།།

བསྟན་འཛིན་གཞན་ལ་ཕྲག་དོག་བྱེད།།

ཁྱོད་ནི་སྐུ་ཚེ་ཧྲིལ་པོ་ལ།།

ཐོས་དང་བསམ་དང་བསྒོམ་པ་ཡིས།།

བསྟན་དོན་སྒྲུབ་པ་ཁོ་ན་ལས།།

གཞན་ལ་ཕྲག་དོག་མཛད་པ་མེད།།

འགའ་ཞིག་རྙེད་དང་བཀུར་སྟིའི་ཕྱིར།།

གཡོ་སྒྱུའི་རྫུན་གྱི་འཁོར་ལོ་ཡིས།།

བདེན་པའི་མངོན་ཤེས་མེད་ན་ཡང་།།

དད་ཅན་མགོ་བོ་གདུགས་ལྟར་བསྐོར།།

ཁྱོད་ལ་སྒོམ་པ་ལས་བྱུང་བའི།།

ཡོན་ཏན་པདྨའི་མདངས་བཀྲ་ཡང་།།

རྒྱལ་བསྟན་གཙང་མར་སྤེལ་བའི་ཕྱིར།།

མོ་ལུང་མངོན་ཤེས་དུག་བཞིན་འཛེམ།།

དེང་གི་གསུང་ངག་འཆད་པོ་འགའ།།

རྒྱུད་སྡེའི་གནད་གསང་མ་ཤེས་པས།།

སྨྲ་བ་ཤིན་ཏུ་རྡུགས་གྱུར་ཀྱང་།།

ཆེ་ཐབས་ལག་ཆར་བྱེད་པ་མང་།།

ཁྱོད་ནི་བརྩེ་ཆེན་བསྟན་པ་ལ།།

ཕན་པའི་ལྷག་བསམ་འབའ་ཞིག་གིས།།

མདོ་རྒྱུད་གཞུང་བཞིན་འཆད་པ་ལས།།

རང་ཆེའི་རྣམ་ཐར་སྐྱོང་བ་མེད།།

འགའ་ཞིག་མ་བཅོས་ཞི་གནས་ཙམ།།

རྫོགས་ཆེན་ཡིན་པར་ངོ་སྤྲོད་ཅིང་།།

གཞན་དག་སྟོང་པའི་ཡིད་དཔྱོད་ལ།།

རིག་པ་ཡིན་ཞེས་ངོ་སྤྲོད་བྱེད།།

ཁྱོད་ནི་རིག་འཛིན་བརྒྱུད་པ་ལས།།

འོང་བའི་མན་ངག་ཇི་བཞིན་དུ།།

བློ་ལྡན་དོན་དུ་གཉེར་བ་ལ།།

ངོ་སྤྲོད་ཇི་བཞིན་ཐེབས་པ་མང་།།

འདི་ན་འགའ་ཞིག་གོ་ཡུལ་ལ།།

རྟོགས་པ་མཐོ་བའི་འུད་ཤོབས་ཀྱིས།།

ང་རོ་འབྲུག་གི་སྒྲ་བཞིན་ལྡིར།།

གཤེགས་དུས་ཐ་མལ་ལས་ཀྱང་ལོད།།

ཁྱོད་ནི་མཐོ་སྐད་མི་སྒྲོག་ཅིང་།།

རིག་སྟོང་རྗེན་པར་བསྐྱངས་གྱུར་པས།།

བློ་འདས་ཆོས་སྐུར་གྲུབ་པ་ཡི།།

རྟགས་ཀྱི་རིམ་པ་མ་ལུས་གསལ།།

ཁྱོད་ཀྱི་ཐུགས་རྒྱུད་ཤིན་ཏུ་དྲང་བའི་རྒྱུས།།

བླུན་རྣམས་མགུ་བའི་སྤྱོད་ཡུལ་མ་ཡིན་ཡང་།།

མཁས་མང་རྒྱུ་སྐར་དབུས་ན་ཟླ་བ་བཞིན།།

རྣམ་ཐར་བཟང་པོའི་འོད་ཀྱིས་ཀུན་ནས་མཛེས།།

འདི་ནས་བསྔགས་པའི་ཡོན་ཏན་དག།

ཁྱོད་སོགས་དམ་པ་རྣམས་ལ་སྣང་།།

འདི་ནས་སྨད་པའི་ཉེས་པ་དག།

བདག་སོགས་སྙིགས་སྤྱོད་ཅན་ལ་སྣང་།།

ཡོན་ཏན་འདི་དག་གང་ལ་མངའ།།

དེ་ལ་དེ་བཞིན་འདུད་བྱ་ཞིང་།།

ཉེས་པ་འདི་དག་གང་ལ་སྣང་།།

དེ་ལའང་སྨད་པ་འདི་དག་ཐོབ།།

རང་ཕྱོགས་བཟུང་བས་ཁྱོད་ཉིད་ལ།།

ཆལ་ཆོལ་ཚིག་གིས་བསྟོད་མིན་ཀྱང་།།

བསྔགས་འོས་ཡོན་ཏན་འདི་དག་ཉིད།།

ཁྱོད་ཀྱིས་བཟུང་བས་བསྔགས་པར་གྱུར།།

གཞན་ཕྱོགས་བཟུང་བས་འགའ་ཞིག་ལ།།

སྨད་པའི་ཡུལ་དུ་མ་བྱས་ཀྱང་།།

སྨད་པར་འོས་པའི་སྐྱོན་འདི་དག།

དེ་ཡིས་བཟུང་བས་སྨད་པར་གྱུར།།

དེས་ན་བསྔགས་པ་འདོད་པ་རྣམས།།

འདོད་རྔམ་ཆེ་བས་མི་འགྲུབ་སྟེ།།

ཡོན་ཏན་འདི་དག་འཛིན་གྱུར་ན།།

དོན་ལྡན་བསྔགས་པ་ངང་གིས་འཐོབ།།

དོན་མེད་བྲག་ཅ་ལྟ་བུ་ཡི།།

བསྟོད་བསྔགས་འབད་པས་བཙལ་བྱས་ཀྱང་།།

རང་ལ་བསྔགས་འོས་དབེན་པའི་རྒྱུས།།

བསྔགས་པ་ཐོབ་ཀྱང་སྨད་པའི་གནས།།

དེ་སྐད་སྡེ་སྣོད་འཛིན་པ་ནི།།

ཚུལ་ཁྲིམས་ནོར་བུ་ཡིས་བསྐུལ་བར།།

ཕུན་ཚོགས་རྣམ་རྒྱལ་ཞེས་བྱ་བས།།

གང་དྲན་ཐར་མ་ཐོར་དུ་བཀོད།།

ཅུང་ཟད་འབད་པའི་ལེགས་བྱས་ཀྱིས།།

སྐྱེ་དང་ཚེ་རབས་ཐམས་ཅད་དུ།།

དམ་པའི་མགོན་དང་མི་འབྲལ་ཞིང་།།

བྱང་ཆུབ་སེམས་གཉིས་འབྱོངས་པར་ཤོག །དགེའོ།  །