རང་གིས་རང་ལ་གདམས་པ།
ལག་ལེན་མེད་པའི་ཁ་བཤད་སྦོམ་པོ་དེས། །
ཆོས་བཤད་བྱས་པ་ཁྲམ་པའི་ཚུལ་ཡིན་པས། །
དེས་ན་ཀུན་གྱི་འཇུག་སྒོ་ལག་ལེན་ལ། །
དང་པོ་ཉིད་ནས་བརྩོན་པ་གལ་འགངས་ཆེ། །
རང་སྤྱོད་མ་དུལ་གཞན་སྤྱོད་དུལ་བ་ལ། །
འབད་པ་དེ་ཡང་རང་སེམས་ངལ་བའི་རྒྱུ། །
དེས་ན་དང་པོ་རང་སྤྱོད་འདུལ་བ་ལ། །
འབད་པ་དེ་ཉིད་ལམ་གྱི་གོ་རིམ་ཡིན། །
རང་མགོ་མ་ཐོན་གཞན་ལ་ཇུས་གཏོགས་དེར། །
རང་སེམས་ངལ་བའི་གཞི་མ་ཡིན་པས་ན། །
ཐོག་མར་རང་མགོ་ཐོན་པ་གལ་ཆེ་ཞེས། །
གསུངས་པ་དེ་ཉིད་སྙིང་ལ་ཅིས་མི་འཆང་། །
ད་ནི་རང་རྒྱུད་འདུལ་བའི་ཆོས་སྤྱོད་ལ། །
སྒོ་གསུམ་འཇུག་པའི་ལས་ལ་འབད་དགོས་པར། །
ཤེས་པ་འདི་ཡང་བླ་མའི་དྲིན་ཡིན་པས། །
རྟག་ཏུག་བླ་མ་དྲན་ལ་གསོལ་བ་འདེབས། །
ཡང་སྙིང་ཅི་བྱས་ཆོས་སུ་འགྲོ་བ་དང་། །
ཆོས་མིན་བྱ་བས་རང་སེམས་མི་གཡེང་པར། །
ཚེ་ཡི་ལྷག་མར་ཆོས་པ་རྣལ་མ་ཡི། །
ལམ་གྱི་སྣེ་ཙམ་ཟིན་ན་ཨ་རེ་དགའ། །
ཕྱི་ཚུལ་ཙམ་གྱིས་རང་སེམས་གྱོང་པོ་འདི། །
ཆོས་ཀྱིས་བརླན་པ་འོང་བ་དཀའ་བས་ན། །
ཆོས་བརྒྱད་རྣམ་རྟོག་ནང་ནས་ཆོད་པ་ཡི། །
ཆོས་པ་རྣལ་མར་བྱུང་ན་ཨ་རེ་དགའ། །
ཡིན་ཡིན་འདྲ་བའི་མིག་སྔུན་ཆོས་ཚུལ་དེས། །
དངོས་མའི་ཆོས་ལ་རྐྱེན་གེགས་འགྱུར་སྲིད་པས། །
རང་སེམས་རང་གིས་ཞི་དག་ལེགས་པོར་ཞིག །
ཐུབ་པར་བྱུང་ན་ཨ་རེ་དགའ་བ་ལ། །
ཞེས་ངེས་འབྱུང་འཕྲལ་མ་ཞིག་གིས་རྐྱེན་བྱས་ནས་ལྷ་རྒྱལ་མགོན་རྡོ་རྒྱལ་པོས་རྫོང་སར་ཁམས་བྱེའི་བྱེ་མ་ཐང་ནས་བྲིས་པ་དགེའོ། །
