ངག་གི་དབང་ཕྱུག་ལ་ཕུལ་བའི་འཕྲིན་ཡིག་སྤྲིན་གྱི་རོལ་མོ།
མཐའ་བརྒྱད་རླབས་ཕྲེང་ཟད་པའི་ཕ་མཐའ་རུ། །
གཉིས་འཛིན་རང་སར་ཞིག་པའི་དོན་གྱི་ལྷ། །
ཀུན་རྫོབ་ན་བུན་ཡལ་བའི་མཁའ་དབྱིངས་ནས། །
གཤིས་ལུགས་རྗེན་པར་མཐོང་བའི་དངོས་གྲུབ་སྩོལ། །
སྔ་ཕྱི་དབུ་མའི་ལྟ་གྲུབ་མི་མཐུན་ཞེས། །
ཕྱོགས་ཞེན་དཔུང་རྡང་སྤྲེལ་ལ་མི་གུས་ཀྱང་། །
ལུང་རིགས་རྒྱུ་ལམ་ཡངས་པའི་མགུལ་པ་ལས། །
ཟབ་དོན་དབྱངས་སུ་གྱེར་ལ་གསན་པར་འཚལ། །
ཡོད་མེད་བདེན་རྫུན་རང་རེའི་བློ་ཡིས་འཇོག། །
རང་བློ་ཚད་མར་གཟུགས་སོགས་ཡུལ་གྱིས་སྒྲུབ། །
རྐུན་མ་ཕ་བུ་གྲོས་ཁ་མཐུན་ཙམ་གྱིས། །
དགེ་ཆོས་རིགས་པའི་ཁྲིམས་ཆད་འགོག་ནུས་མིན། །
མ་བརྟགས་ཀུན་རྫོབ་སྒྱུ་མའི་འཇའ་ཚོན་གང་། །
དཔྱོད་ཤེས་སྦར་གྱིས་བཏབ་ཚེ་མཁའ་རུ་ཡལ། །
ཚད་གྲུབ་འཇའ་སྐས་འཛུགས་འདོད་བྱིས་པ་དག །
དགེ་ཆོས་ཨ་མའི་ཞལ་གསུང་ཉན་པ་དགེ །
ཐ་སྙད་རྨི་ལམ་འཁྲུལ་པའི་ཐོག་ཁང་ན། །
ཞིམ་དགུ་ཟས་ལ་རོལ་བའི་གྲོད་པོ་ཆེས། །
ཞེན་ཆགས་གཉིད་ཀྱི་བཟི་ཁ་མ་དྭངས་བར། །
ཟོས་ཕྱིར་ཚད་མས་གྲུབ་ཅེས་ལབ་རྡོལ་འབྱིན། །
ཀུན་རྫོབ་རྫུན་མའི་རང་མཚང་རྡོལ་ལས་གཞན། །
ཡིན་ལུགས་བདེན་པའི་དགྱེས་ཞལ་གུད་ན་མེད། །
ཐོག་རེག་སྒྲིབ་གཡོག་མཚན་མ་བྲལ་ཙམ་ལས། །
ལོགས་སུ་ནམ་མཁའི་དཀྱིལ་འཁོར་གང་ནས་འཚོལ་། །
ཀུན་རྫོབ་ལུང་དང་རིགས་པའི་མེ་དཔུང་གིས། །
འདིར་སྣང་ལྷག་མེད་བསྲེགས་པའི་ངོ་མཚར་ལ། །
དོན་དམ་རྟོགས་པའི་ཐ་སྙད་འདོགས་བྱེད་པ། །
ཐབས་དང་ཐབས་བྱུང་འབྲེལ་བའི་གོ་དོན་དངོས། །
དཔྱད་ན་རྫུན་རྐུབ་རྡོལ་བའི་འདིར་སྣང་ཀུན། །
ཨུ་ཚུགས་བཙན་པོས་ཚད་མར་འགྲུབ་ནུས་ན། །
སད་ཀྱང་འགྲམ་ཆུ་སློང་བའི་རྨི་ལམ་གྱི། །
ཉམས་དགའི་འཚོ་བ་དེ་ལའང་མ་གཡེལ་ཅིག །
བསྒྲུབ་བྱའི་དམ་བཅའ་སྒྲུབ་བྱེད་གཏན་ཚིགས་ཀུན། །
ཞིབ་ཏུ་བསམ་ན་འགལ་འདུའི་ཕུང་པོ་ཞེས། །
རྟོག་གེའི་སྦར་ཁྱིམ་འབྲེག་མཁས་སྔ་རབས་པར། །
རིགས་ལམ་སེན་ཤད་བྱ་འདོད་གད་མོའི་གནས། །
བུམ་སོགས་ཡོད་མེད་ལྷ་རམས་རྒན་པོས་འབྱེད། །
བདེན་པའི་རྒྱབ་རྟེན་གནག་རྫི་བླུན་པོར་འཆའ། །
རིགས་མཐུན་ལྷས་རའི་འདབ་ཀྱི་ཉམས་དགའ་བ། །
དགེ་ཆོས་འདས་པོས་གཟིགས་ན་དགོད་རེ་བྲོ། །
ཆོས་ཀུན་རྫུན་མར་སྟོན་ལས་ལྷག་པ་ཡི། །
ཚད་གྲུབ་འགོག་པའི་རྒོལ་བ་གཞན་མེད་ན། །
ཨུ་ཚུགས་ཞགས་པས་སྤྱང་ལུག་སྐེ་སྦྲེལ་ལ། །
སེངྒེའི་འཇིང་སྣོལ་འདོགས་ནའང་ཅི་དགྱེས་མཛོད། །
བདེན་གྲུབ་རྒན་མོར་སྡང་བའི་གཞུང་ཞབས་པ། །
ཚད་གྲུབ་འཕྱོན་མའི་འཛུམ་གྱིས་བསླུས་པ་ན། །
ཀླུ་སྒྲུབ་གཞུང་བཟང་གསེར་ཀྱི་བཀའ་ཡིག་གང་། །
རང་འདོད་མཆན་བུས་དཀྱོག་ལའང་བྱ་ཐབས་ཅི། །
བདེན་གྲུབ་དགྲ་བོ་འགོག་པའི་འདུ་བྱེད་ཁྲོད། །
ཚད་གྲུབ་ནང་རུལ་རྡོལ་བའི་རྟོག་གེ་བ། །
རྣམ་རྟོག་གཡུལ་ལས་རྒྱལ་བའི་སྐབས་མེད་ན། །
དགེ་ཆོས་སྐྱབས་སུ་བསྟེན་ཅིག་ཆོས་ཀྱི་གྲོགས། །
མི་ཚེ་རིགས་པར་བསྐྱེལ་ཡང་གཟུགས་སོགས་ཀུན། །
ཚད་གྲུབ་མིན་པའི་ཁས་ལེན་མ་མྱོང་ན། །
དཔྱོད་ཚེ་ཚད་མས་མ་གྲུབ་ཁས་ལེན་ཞེས། །
ཁ་ཤོམ་སྙན་མོ་བྱིས་པས་འཇའ་དེད་མཚུངས། །
དགེ་ཆོས་འདས་པོར་འཛའ་མཐུན་མི་ཟབ་ལ། །
ལྷ་རམས་རྒན་པོར་ཞེ་འཁོན་མི་ཆེ་ཡང་། །
བདེན་པའི་ལེགས་བཤད་རྐང་པ་དྲུག་པའི་གླུ། །
མཁས་མང་པད་ཚལ་དགྱེས་པའི་སྐྱེས་སུ་ཕུལ། །
ཅེས་པ་འདིའང་ཉིན་ཤས་སྔོན་ལྷ་རམས་པ་ངག་གི་དབང་ཕྱུག་གང་དེས་དགེ་འདུན་ཆོས་འཕེལ་ལ་སྤྲིངས་བའི་རྩོམ་ཐུང་ཞིག་དྲྭ་ལམ་ནས་མཐོང་མོད་བྲེལ་ཟིང་དབང་གིས་རེ་ཞིག་ཀློག་ཁོམ་མ་བྱུང་། དེ་རིང་ཁོམ་པའི་དུས་སྐབས་དང་བསྟུན་ནས་རིམ་གྱིས་བཀླགས་ཞོར་ཐོག་མར་ཁོང་གི་ཚིག་བཅད་རེ་རེའི་སྐབས་ཀྱི་དཔེ་དོན་དང་སྦྱར་ནས་ལན་ཞིག་འབྲི་བར་ཕྱོགས་ཀྱང་། མཇུག་མཐར་ཚིག་དོན་ཅུང་ཟད་ཉོབ་ཏུ་དོགས་ཏེ་མདོར་བསྡུས་ཙམ་ཚིགས་སུ་བཅད་དེ་སྤེལ་བ་འདིའང་ལུང་རིགས་སྨྲ་བའི་གྲལ་མཐའ་རུ་སོན་པ་སྤྲུལ་སྒྲུབ་བསྟན་རྣམ་རྒྱལ་དུ་འབོད་པས2024/12/2ཉིན་ལག་རྩེད་ཀྱི་དོད་དུ་བྲིས་པའོ། །
