༸སྐྱབས་མགོན་ས་སྐྱ་༸གོང་མ་ཁྲི་ཆེན་མཆོག་གིས་སློབ་སྦྱོང་གལ་ཆེ་བའི་སྐོར་གྱི་བཀའ་སློབ་གལ་ཆེན།
ང་རང་ཚོ་བོད་རང་ལ་ཡོད་པའི་དགོན་པ་དེ་ཚོ་ཡར་རྒྱས་འགྲོ་དགོས་ཡ། ཕྱིའི་གཙུག་ལག་ཁང་རེད། སྐུ་གསུང་ཐུགས་རྟེན་རེད། དེ་ཚོ་གལ་ཆེན་པོ་རེད་དེ། གལ་ཆེ་ཤོས་དེ་དགེ་འདུན་གྱི་ཞལ་གྲངས་འཕེལ་དགོས་ཡ་དང་། དགེ་འདུན་འདུས་ཚོགས་རྒྱས་དགོས་ཡ། མ་གཞི་རང་དབང་ཡོད་མ་རེད་དེ། ཡིན་ན་ཡང་ཐབས་ཤེས་ཡོད་དགུ་རྩལ་སྤྲུག་གི་ཐོག་ནས་ཕྱོགས་གཅིག་ནས་དགེ་འདུན་ཞལ་གྲངས་འཕེལ་དགོས་ཡ་གལ་ཆེན་པོ་འདུག །དེ་དང་ཆབས་ཅིག་ཏུ་ཆོ་ག་ཕྱག་ལེན་ཙམ་མ་ཡིན་པར། གཙོ་བོ་མདོ་སྔགས་ཀྱི་གཞུང་ཆེན་ཁག་ལ་སློབ་སྦྱོང་བྱེད་ན། ཆོ་ག་ཕྱག་ལེན་དེ་ཚོའང་དངོས་ནས་དྲང་ནས་དོན་དང་ལྡན་པ་ཡོང་གིན་རེད། གཞན་གཞུང་ཆེན་པོ་མ་ཤེས་པར་ཆོ་ག་ཕྱག་ལས་རྐྱང་པ་ཤེས་པ་ཙམ་གྱིས། དཔེར་ན་མིའི་གཟུགས་པོ་ཡོད་ནའང་སྲོག་མེད་པའི་བཟོ་འདྲ་ཞིག་ཆགས་འགྲོ་གིན་འདུག །དེ་ཡིན་དུས་ང་རང་ཚོ་མི་ཉག་ཁུལ་ལ་རང་ལུགས་ཀྱི་དགོན་པ་མང་པོ་ཡོད་ཚོད་འདུག །ངས་ཞེ་དྲག་རྒྱུས་ཡོད་མ་རེད་དེ། ཆོ་ག་ཕྱག་ལེན་ཙམ་མ་ཡིན་པར་གཞུང་ཆེན་པོ་ལ་སློབ་སྦྱོང་བྱེད་ས་ག་བ་ཡག་པོ་ཡོད་ན། དགོན་པ་སོ་སོ་ནས་བཤད་གྲྭ་བཙུགས་ཐུབ་ན་ཡག་ཤོས་རེད། མེད་ན་ཡང་བཤད་གྲྭ་ཁག་ཆེན་ས་ག་བ་ཡོད་ན་དེ་ཚོ་ལ་བཏང་ནས། གང་དག་གཞུང་ཆེན་པོ་ལ་སློབ་སྦྱོང་བྱེད་དགོས་ཡ་དེ་དཔེ་གལ་ཆེན་པོ་རེད་ཤག །དེ་ཡིན་དུས་དེ་འདྲ་ཡོང་ཡ་ལ་ཕྱི་ནང་གི་མཐུན་རྐྱེན་མང་པོ་ཞིག་ཚང་དགོས་གིན་ཡོད་པ་ཡིན་དུས། ཁྱེད་རང་ཚོ་ཚང་མས་ད་ལྟ་ནང་བཞིན་བྱེད་ནས་སེམས་ཤུགས་བསྐྱེད་ནས་ཤུགས་རྒྱག་རོགས། གཞན་བཤད་ཡ་མི་འདུག །ལགས་སོ། །ཐུགས་རྗེ་ཆེ།
